E FE KU TA SALBA ....#2

(Praktikando un siertu tipo di fe... lesa mas di esaki den e mensahe mas abou)

Bon dia, bon dia na tur nos amigunan i amiganan plamá rònt Aruba, Antiyas, Hulanda y otro partinan rònt mundu! Kon ta bai ku boso? Lo nos ta kontentu di tende for di boso awe, si boso a bishitá nos sitio. Laga nos sabi bo pensamentunan, bo preguntanan. Nos ta enkurasha bo pa “print” e mensahe pa bo mes y asina bo por tin e den bo propio man pa bolbe les’e atrobe i studia e material segun ku bo tin tempu.

Nos ta rekòrda boso ku nos ta trata di skirbi den tur dos ortrografia: di Aruba i di Antiyas. Aunke similar, sinembargo nan ta diferente. Ta nos deseo di bai segun e deseo di kada gobiernu. Ta bon ku boso tur por lesa kada uno sin problema!

Sr. Bicento ta sigui awor ku e tema ku el a kuminsá den nos último “blòg”:

E FE KU TA SALBA #2

Amigunan, Skritura Santu ta bisa nos, ku e hustu lo biba di fe. (Hebreonan 2:4 i Romanonan 1:16,17, i Hebreonan 10:38).

Te asta den nos bida diario nos ta praktiká un forma di fe. Ehempel: Nos ta kai sinta den un stul ku tur konfiansa, pasobra nos ta kere ku e lo sostené nos peso. Probablemente, abo, ku ta lesando e artikulo aki, ta sintá den un stul. I bo no tin ningun duda òf miedu ku e stul den kual bo ta sinta lo habri fo’i otro laga bo basha abou. Kisas aki ratu bo ta bai tira algo na stoma. I di nobo, bo ta kome bo papa òf bo pan ku beleg tur trankil. Pakiko? Pasobra bo tin konfiansa ku no tin ningun peliger. Dia tras dia nos ta praktiká e forma di fe ei den nos aktividatnan. Nos sabi ku sin alimento nos kurpa lo bira débil i muri den poko tempu.

Tin un porshon masha konosí den Beibel ku ta bisa lo siguiente: “Hende lo no biba di pan so, ma di tur palabra ku ta sali fo’i boka di Dios. (Mateo 4:4 i Deuterónomo 8:3).

Aki, i den hopi otro skrituranan, nos por mira ku tin dos forma di bida pa hende. Uno ta e bida fisikal i temporario; e otro ta, bida spiritual ku ta keda pa semper.

Un persona ku a muri fisikalmente no por biba atrobe ku alimentashon. Un kurpa morto no por risibí alimentashon mas. Ma e bida spiritual ta e loke mi ke papia di djé awor. I mi ta admití ku esaki no ta un tópiko ku ta fásil pa splika. Di akuerdo ku Skritura, desde e kaida di Adam, piká a pasa na tur hende. Esei ta nifiká ku tur hende ku a nase desde e tempu i te awe, ta nase ku e naturalesa di piká. I p’esei ku Skritura ta enfatisá e fakto ku no tin ni un hende ku ta hustu. (Romanonan 3:9-20) ta bisa lo siguiente: “Kiko nos lo konluí anto? Nos ta mihó? Di ningun manera! Ya nos a kulpa tantu Hudiu komo pagano ku nan tur ta bou di piká. Manera ta para skirbí: No tin un hustu, ni sikiera un; No tin un ku ta komprendé, ni un ku ta buska Dios. Tur a desvia, tur hunto a bira inútil; no tin un ku ta hasi bon, ni sikiera un. Nan garganta ta un graf habri; nan lenga ta praktiká mentira. E veneno di kolebra ta riba nan lipnan. Nan boka ta yen di maldishon i amargura. Nan pianan ta lihé pa drama sanger; ruina i miséria ta marka nan kamina, i e kamina di pas nan no konosé. No tin temor di Dios dilanti nan wowonan. Anto e Apòstel Pablo ta sigui splika bisando: Awor nos sabi ku tur loke e Lei ta bisa; e ta bisa na esunan ku ta bou di e Lei, asina ku tur boka por ta será, i mundu kompletu teni responsabel pa ku Dios. P’esei ningun hende lo ser deklará hustu den Su bista dor di wardamentu di Lei; alkontrario, dor di e Ley nos ta bira konsiente di piká.”

Loke nos por siña for di e Skritura aki ta; ku no tin ni un persona den e mundu aki ku ta hustu den bista di Dios. I esei ta inklui tantu ta Hudiu komo no Hudiu. Manera nos sabi, ta e Hudiunan a risibí e Lei ku Su mandamentunan for di Dios dor di Moises. Sinembargo, e Ley no tabata duná pa e proposito di duna bida, pero mas bien pa hasi hende konsiente di piká. (Romanonan 3:19,20). Bou di e Ley di Moises, e Hudiunan siendo hasí konsiente di nan piká, tabata ofresé sakrifisio di animalnan den varios okashonnan. Pero un bes pa aña un sakrifisio hopi importante tabata wòrdu hasí mediante e Sumo Saserdote e tempu. (Lesa Hebreonan kapítulo nuebe i dies pa un splikashon kompletu.)


Na kuminsamentu di e mensahe kòrtu aki, nos a menshoná ku un persona ku a muri kaba, no por risibí alimento mas. Ma mientras ku un persona ta na bida, e tin mester di alimento, òf e lo muri sigur. Ma Skritura ta siña nos di un otro forma di morto ku ta pasa na tur hende desde e kaida den piká di e promé hende Adam. Pa un splikashon kla i sigur tokante e tema ei ku ta inklui kada uno di nos; por fabor lesa: Romanonan kapítulo sinku sin falta. Den e karta skirbi na esunnan ku a kere Evangelio den e siudat di Efesio, e Apòstel Pablo a bisa nan lo siguiente: “Loke ta boso, boso tabata morto den boso transgreshonnan i pikánan, den kualnan boso tabata bibando tempo ku boso tabata sigui e kustumbernan di e mundu aki i di e gobernantenan di e reino di laira, e spiritu ku ta obrando awor den esunnan ku ta desobedesí.” Y e Apòstel ta sigui bisando: “Nos tur tambe a biba asina un tempu kumpliendo ku e deseonan di nos naturalesa pekaminoso.” (Efesionan 2:1-3).

Aki anto, Skritura ta papia di un otro forma di morto, ku ta e morto spiritual. Siendo asina tabata impusibel pa nos por tabatin komunion ku Dios. Lesa e restu di e kaptíulo dos di Efesionan, unda nos por mira e grasia i e miserikòrdia di Dios pa henter humanidat den e morto di Su Yiu nos Señor HesuKristu ariba un krus pa nos. Lesa e Skritura ei pa bo mes, i e Spiritu Santu lo yuda bo pa komprendé i pa bo repentí i kere di kurason den Hesus.

Amigu/anan, tuma e libertat di skirbi nos pa informa mas aleu, si ainda bo tin pregunta riba loke a wòrdu skirbí tokante “E Fe Ku Ta Salba”. Nos adrés pa skirbi nos ta: bbhenriquez@shaw.ca Of bo por laga un komentario na e lugá indiká riba e “blog”. Te otro biaha.


Skirbí i prepará pa Bicento i Betty Henriquez