Thursday, January 25, 2007

Libreria Victoria

Si bo ta biba na Aruba, bo por

bishita Libreria Victoria, Elleboogstraat 25, Oranjestad pa Beibel , otro material y tractado na

Papiamento

DIA MI BIRA BIEW

Durante e añanan di mi bida cu ta keda atras, mi a scucha varios opinion di diferente hendenan ora cu yega na e luga cu nos mester haci nos decision awor mes pa repenti y kere e Evangelio di Señor Jesus, pa nos por ricibi pordon di picanan, y bida eterno.

Uno lo bisa: E ta bon, mi ta kere cu esey ta un bon conseho, pero awor no, kisas dia mi bira biew lo mi haci mi decision.

Otro lo bisa: Mi ta hoben ainda, y mi kier gosa mi bida awor. Of; mi ta bai pensa, etc., etc.

Ma kico Scritura mes ta bisa nos tocante un decision tanto importante asina? Den 2 Corintionan 6:1,2 ta para scirbi lo siguiente: “Como trahdornan hunto cu Dios, nos ta urgi boso, pa no ricibi e gracia di Dios enbano. Pasobra E ta bisa: Den e tempo aceptabel, Mi a scucha bo, y den e dia di salbacion Mi a yuda bo. Ata, awor ta e tempo aceptabel, ata, awor ta e dia di salbacion.”

Amigo y amiganan cu ta lesa esaki: E tempo di Dios Su gracia y abundancia di pordon y di reconciliacion cu Dios ta awe y no mañan. Masha hopi hendenan rond di mundo cu a laga pa mañan of pa despues, a muri den nan pica sin acepta e pordon y bida eterno cu ta ofreci na nos awe y awor. Si bo ta un cu a tende Su bos awe, no haci bo curason duro. No bira lomba pa Esun kende ta yamabo na bo nomber. Mediante Su Palabra, Dios ta roga na nos pa nos sea reconcilia cu nE door di kere den Jesus. Lesa: 2 Corintionan 5:11-21.

Nos ta invita bo scirbi nos na e adres ariba y comunica cu nos bo pensamentonan tocante e tema aki: Dia mi bira biew! Bo tin pregunta? Laga nos sa sin falta!

AMI TA KERE DEN DIOS

Masha hopi hende den e mundo aki ta biba cu e speransa di bai cielo un dia, pasobra cu e ta kere cu tin un Dios so!

Ma kico Beibel mes ta siña nos?

Laga nos mira loke Santiago, un di e sirbidornan di Cristo ta bisa nos:

Abo ta kere cu tin un Dios so; bon! Asta e demoñonan ta kere esey y ta tembla.” (Santiago 2:19)

P’esey, pa kere cu tin un Dios, no ta salba nos; ma e loke ta salba nos ta pa kere e loke e unico Dios aki ta bisa nos den Beibel pa boca di e Apostelnan y di Señor Jesus mes. E Apostel Juan ta scirbi lo siguiente: “Nos ta acepta e testimonio di hende, ma e testimonio di Dios ta mas grandi pasobra e ta e testiominio di Dios, cual El a duna tocante Su Yiu. Ken cu kere den e Yiu di Dios tin e testimonio aki den Su curason. Ken cu no kere Dios a haci E un gañador, pasobra e no a kere e testimonio cu Dios a duna tocante Su yiu. Y esaki ta e testimonio: Dios a duna nos bida eterno, y e bida aki ta den Su yiu. Esun cu tin e Yiu tin bida; esun cu no tin e Yiu di Dios no tin e bida.”

Beibel ta siña nos masha cla anto, cu pa kere cu tin un Dios, lo no salba nos di e huicio cu ta bini; pero loke ta salba nos ta pa kere di curason den e Yiu di Dios cu a muri ariba un crus cargando nos picanan den Su curpa . Y Dios a lant’E for di morto na di tres dia pa nos hustificacion. Pues: pa kere cu tin un Dios, no ta salba; pero, pa kere loke e Dios aki ta bisa nos tocante di Su Yiu si ta salba. Kere den Jesus y sea salba! Bo ta kere den djE?

*

Sinti liber pa scirbi nos na e adres mas ariba. Si bo tin pregunta of comenatrio ariba loke ta scirbi den e mensahe cortico aki, laga nos sabi di esey.

NOS HISTORIA

Mi nomber ta Bicento Henriquez. Mi a nace dia 19 di July di aña 1923 na Aruba. Na edad di 23 aña mi a casa cu Ursula Tromp, for di cual matrimonio a nace 8 yiunan. E mes aña cu nos a casa, mi a tende e Evangelio di gracia di Dios pa prome bes den mi bida. Mi a wordo convenci despues di a risisti y a contradici pa algun simannan; pero pa e gracia di Dios mi a stop di risisti y a obedece e Evangelio door di a acepta Señor Jesus como mi unico Salbador di acuerdo cu Scritura. Despues di 50 aña di matrimonio, mi esposa a fayese den Señor. Durante nos bida di matrimonio mi a wordo yama pa sirbi como pastor na e Iglesia di MonPlazier, Oranjestad, Aruba. Y mi a sirbi den e congregacion ey pa algo mas cu binti aña. Durante e temponan ey Radio Victoria a cuminsa funciona na Aruba, y mi tabatin varios programanan cu por a wordo scucha na e otro islanan tambe. Programanan tabata: Palabranan di Bida, E Bijbel Habri, Bo Preguntanan Contesta, E Iglesia di Aire, y Hobentud pa Cristo.

Na aña 1998 mi a bolbe casa, y e biahe aki tabata cu un misionera conoci den henter Antiyas, y su nomber ta Betty Ratzlaff. E aña aki nos a drenta nos di nuebe aña di matrimonio. Pa e gracia di Dios nos ta bibando actualmente na Canada.

Y nos a dicidi di haci uso di e asina yama “Blogspot”, y siendo cu nos nombernan tur dos ta cuminsa cu e letter “B”; nos a dicidi di yama e programa “Blogspots di B+B Henriquez.

Mi nomber ta Elizabeth Ratzlaff -Henriquez, conoci mas tanto como “Betty”. Mi a nace dia 25 di April, 1927 na Waldheim, Saskatchewan, Canada. Mi a lanta ariba un cunucu hunto cu siete ruman homber! Di mucha nos a cuminsa traha duro pa yuda nos mayornan cu tur e trabao conoci ariba un cunucu: Nos a planta hofi; sembra trigo y otro granonan. Nos tata y mama tabata cria cabai, baca, porco, carne, y galiña. Nos tabata stima animal. Di chikito mi a

siña hala lechi di baca y tur sorto di trabao.

Na e edad di 12 aña mi a cuminsa comprende e Evangelio di nos Señor JesuCristo; esta, cu mi tabata un pecador, y pa haya bida eterno, mi mester acept’E pa medio di fe. Nos mayornan mes a guia nos y a siña nos den e Palabra di Dios. Un anochi, despues cu mi a scucha un mensahe special ariba e berdad aki: “No tin salbacion den ningun otro; pasobra no tin bao di cielo ningun otro nomber ku a wordo duna na hende, pa medio di cual nos mester wordo salba.”: Echunan 4:12. “Kere den Jesus y lo bo ta salba, abo y e hendenan di bo cas.” Echunan 16:31

Nunca a duel mi cu mi a haci e decision ey. Despues cu mi a caba cu educacion primario y secundario, mi a bai pa studia na un Colegio Biblico cu ta yama Prairie Bible Institute, pa cuatro aña mas. Eynan mi a tende di un Mission cu a yama “The Evangelical Alliance Mission” cu tabata principiando un trabao riba e isla di Aruba, y mi a wordo acepta pa bin taha na Aruba.

Nunca a duel mi e decision aki tampoco! Pues, mi a yega Aruba na dia 29 di November aña 1949. Mi a sigui traha na Aruba cu Iglesia Evangelica di Oranjestad pa lo siguiente 30 aña, y durante e tempo ey mi a traha como directora di e Centro Juvenil Washington di 1965-1980. Esey tabata un ministerio cu mi a stima masha, y hopi bes tin nostalgia pa tur e muchanan y hobennan cu mi a siña eynan! Mi a yuda na Radio Victoria y tabatin e programa E Mundo Femenino pa cinco aña, y a yuda den varios otro programa tambe. Mi tabata yuda hopi den traduccion di material y canticanan.

Despues mi a bai pa e isla di Boneiro pa 17 aña mas. Pa prome mi a yuda den e obra di Child Evangelism den traduccion di material pa Felicia Emerencianan. Pero despues mi a uni cu Radio Transmundial pa 15 aña mas sirbiendo como maestra di e idioma Papiamento na su empleadonan pa siña e dushi idioma aki! Esey a habri e porta y e invitacion pa compila e diccionario Bi-lingual di Papiamento/Ingles y Ingles/Papiamento cu ta den su di tres drukmento.

Despues di un carera largo y felis (47 aña) di bida misionera soltera, na 1997 mi a bandona e isla di Boneiro pa Canada pa retira, na e lugar unda mi a nace: e stat chikito cu yama Waldheim, den e provencia Saskatchewan., parti di e pais Canada.

Anto na 1998, fin di aña a bin un sorpresa y cambio drastico pa mi bida!

Mi a casa dia 16 di December, 1998 cu Bicento Henriquez na Aruba, e isla stima, unda mi a traha pa 30 aña! E ultimo ocho aña cu a pasa, tabata masha dushi y precioso.

Nos deseo mutuo ta: pa caba nos careda bon manera e Apostel Pablo a expres’e: “Mi a lucha e bon lucha, mi a termina e careda, y mi a warda e fe. Den futuro ta wardá pa mi e corona di husticia, cual e Señor e Huez husto, lo duna mi riba e dia ey – y no na mi so, ma tambe na tur esnan cu a stima Su binida.” 2 Timoteo 4:7-8.

BONBINI

BONBINI na nos Blogspot.

E proposito principal di e “blogspot” ta pa proclama e BON NOTICIA di nos Señor Jesus Cristo na tur hende di abla Papiamento cu ta biba na Aruba, Boneiru y Corsow, y esnan cu ta biba na St. Martin, na Hulanda, of unda cu boso ta plama riba nos mundo aki. Tin un amiga di nos cu ta di abla Papiamento cu ta biba te na Africa! Pues, e sitio aki ta pa abo cu ta papia Papiamento. Nos por tin algun otro informacionnan cu nos lo kier participa cu tur cu bishita e sitio aki.

E Evangelio di JesuCristo ta pa TUR hende y no pa algun privilegia so.

Boso por communica cu nos na e adres aki: bbhenriquez@shaw.ca

Pa prome nos kier introduci nos mes pa boso por sabi kende ta scirbi den e “blogspot” aki, y algo di nos historia.

NOS NOMBER TA:

Bicento y Betty (Elizabeth) Henriquez

NOS LUGAR DI BIBA TA:

#534, 120 La Ronge Road,

Saskatoon, SK., Canada,

S7K 7Z9

E ta un habitacion pa hendenan di edad. Tin mas of menos 324 hende cu ta biba den e edificio aki.