Sunday, May 20, 2012

Pordon Di Picanan - segun Scritura




E doctrina tocante  pordon di pica, ta un di e doctrinanan fundamental di Scritura Santo. Palabranan manera: labamento, baño, kita, etc.,  ta wordo usa pa yuda comprende e necesidad absoluto pa pordon di nos picanan.

Laga nos purba compara e asunto di labamento y bañamento, cu pordon di picanan. For di tierno edad nos a siña for di nos mayornan con indispensabel bañamento y labamento ta. Purba imahina pa un rato, con e lo ta si nos keda sin baña nos curpa pa dianan largo, of si nos keda bisti e mes un  paña dia tras dia, etc.

Wel, amigonan stima pa nos Señor Su mes. Mescos e ta cu nos picanan den e bista di Señor nos Dios, si no no wordo pordona. Y ora nos ta papia di pordon segun Scritura, nos ta papia di kitamento of labamento completo di nos culpa di pica. Segun Scritura, ta Dios solamente por kita pica. Y El a hasi esey posibel mediante Su Unico Yiu, cu ta nos Señor y Salbador JesuCristo. Manera nos por lesa den Beibel cu no tin ni un hende husto ni sikiera uno; no tin ni un hende cu ta comprende, no tin ni un hende cu ta busca Dios. Tur a desvia; hunto nan a bira inutil; no tin un hende cu ta hasi bon, no tin ni sikiera un,.” Lesa of pidi un hende les’e pa bo den e Testamento Nobo for di e Buki di Romanonan capitulo tres y versnan 9-20.

Amigonan di tur edad, nos por gradici Señor nos Dios pa e porcion aki di Scritura Santo, pasobra esaki a wordo scirbi pa nos bon, y pa trece nos na repentimento y na fe den nos Señor y Salbador JesuCristo, Kende a carga nos picanan den Su curpa ariba e crus; pa nos libra di picanan, por biba pa husticia, pasobra ta pa medio di Su heridanan nos a wordo cura.

Amigonan di tur edad, homber y mohenan, e Palabra di Dios ta bisa nos hopi cla cu ta pa medio di fe nos ta wordo hustifica, of sea declara husto dor di Señor Su mes. P’esey nos ta lesa den e Scritura lo siguiente: “Siendo cu nos a wordo hustifica pa medio di fe, nos tin pas cu Dios pa medio di nos Señor JesuCristo, pa medio di Kende nos a haya entrada pa medio di fe den e gracia aki den cual nos ta para awor.” Dor di Scritura nos ta wordo spierta y encurasha, cu ta pa medio di fe, e pecador ta wordo hustifica of sea declara husto. Testamento Nobo ta hasi esey cla pa nos cu ta dor di fe den e Yiu di Dios solamente tin pordon di picanan, y e promesa di bida eterno. Y e promesa aki ta bini na nos for di ESUN KENDE no por gaña. ESUN di cual ta para scirbi, cu ta imposibel pa E gaña.

E doctrina di fe y e doctrina di obediencia ta bai hunto. Mescos e ta cu e doctrina di obra. Nos ta lesa un camina cu fe sin obra ta morto. Romanonan 1:5 ta bisa nos lo siguiente: “Dor di djE nos a ricibi gracia y apostolado pa trece obediencia di fe meimei di tur e paganonan pa causa di Su Nomber, den kendenan boso tambe ta e yamanan di JesuCristo. Pues, obediencia ta bini di fe y fe ta bini via tendemento di e Palabra di Dios.( Lesa sin falta Rom. 16:25-27) Aki ta unda nos ta lesa tocante e mandamento di e Dios eterno pa tur nacionnan por kere y obedece Dios. Y e obediencia aki na prome lugar ta pa kere of tin fe den Señor Jesus. Den Echunan 6:7, nos ta lesa lo siguiente: “Asina e Palabra di Dios a plama. E numero di discipelnan den Jerusalem a multiplica, y un number grandi di sacerdotenan a bira obedicido na e fe.

P’esey amigonan di tur edad aki na Aruba, Bonaire y Curaçao y na cualke parti di mundo: e boluntad di nos Tata Celestial ta pa nos obedece na fe den nos Señor y Salbador JesuCristo. Sea sigur, sea masha sigur, cu no tin salbacion den ningun otro. Pasobra ta para scirbi cu bou di cielo no tin otro nomber cu ta duna na hende pa medio di cual nos mester, of por wordo salba. Y sabi esaki: cu tardansa ta igual cu desobediencia y incredulidad.

E Spirito Santo ta spierta nos binti cuater ora pa dia den Scritura bisando: Con lo nos por scapa si nos neglisha un salbacion tanto grandi asina? E pregunta aki inspira pa e Spirito Santo di Dios, Su contesta ta: silencio, pasobra separa di fe den Señor Jesus, no tin speransa y no tin scapatorio!


Tuesday, May 15, 2012

E UNICO CAMINA

For di tempo cu nos a haya comprendementu, nos ta familiarisa ku caminanan. Nos ta siña conose e camina cu ta bai cunucu, esun cu ta bai cas di madushi, esun cu ta bai pa tienda, esun cu ta bai skol, etc., etc. E ta maraviyoso pa lesa den Beibel con Spirito Santo di Dios a guia esunnan ku ta scirbi e Scrituranan Santo, pa scirbi hopi cla tocante e CAMINA DI BIDA ETERNO. Nos no ta papiando aki di un camina di bida largu den e mundo aki, di rikesanan terenal, manera plata y oro i luho, of di poder y gloria segun e sistema di e bida temporario y insigur aki; ma aki nos tin di haci cu Bida Eterno den un curpa inmortal y glorioso. Pero, un hende por haci e pregunta aki: Y ta con nos por ta sigur di algo asina, y ta con esey a wordu hací posibel? Amigonan stima, pa Señor Su mes, e contesta pa e pregunta ey, y otro preguntanan similar, bo por haya cla den bo Beibel. Un tempo, manera tur Arubaiano, Boneirano y Kurasoleño cu a biba den e siglo cu a pasa, por duna testimonio; tabata exstrictemente prohibí pa lesa Beibel. Pero cu binimento di e Evangelio di e grasia di Dios, e tabu ey a wordo vensi,di manera cu awor tur hende den e islanan aki por tin nan Beibel. Y loke ta mas, nos tin esey den nos idioma Papiamento. Y den e Beibel aki nos por lesa e testimonio di e Apostel Pablo, na un hoben cu a kere e Evangelio ey: “Loke ta abo, continua den loke bo a siña, y a wordo convensi di dje, pasobra bo conose esunnan for di kende bo a siña esey, y con for infansia bo a conose e Scrituranan Santo, cual ta capas pa haci bo sabi pa salbashon dor di fe den JesuCristo. Tur Scritura ta inspira pa Dios i ta util pa siñansa, reprendemento, correcion y disiplina den husticia, pa asina e hende di Dios por ta completamente ekipa pa tur bon obra (trabou).” (2 Tim. 3:14-16) Den e porcion aki di Scritura, nos ta lesa di salbashon pa medio di fe den Cristu Jesus. Y den otro Scritura nos ta lesa lo siguiente: “Y no tin salbacion den ningun otro; pasobra no tin bou cielo ningun otro nomber cu a wordo duna na hende, pa medio di cual nos mester wordo salba.” (Echunan 4:12) Segun Scritura e Uniko Camina pa bai serca Dios, ta nos Señor Jesus. Ta pa e proposito ey El a nace for di e birgen Maria den un curpa manera esun di nos. El a bin pa busca y salba pecadornan. Y con El a haci esey? Beibel ta masha cla tocante e pregunta ei. El a haci esey dor di a duna Su bida pa nos. El a carga nos picanan den Su kurpa ariba e krus, pa nos libra di picanan por biba pa husticia. Lesa sin falta 1 Pedro 2:24,25. Den Juan 14:6 tin e declarashon di Señor JesuCristu, cual e Spirito di Dios a usa pa salbacion di hopi pecadornan. E ta bisa nos lo siguiente: Jesus a contesta, “Ami ta e camina, berdad y bida. Ningun ta bini serca e Tata, sino pa medio di Mi.” Sea prudente y pone atencion na e Scritura aki, i kico e ta bisa nos. Aki Jesus no ta bisa nos cu E ta UN CAMINA, sino E CAMINA. Pues, nos mester comprende cu no ta exsisti un otro camina pa yega serca e Tata. Tuma bo Beibel y lesa e siguiente Scrituranan aki: (Juan 3:13-21; Juan 5:24-30; Col. 3:1-4; 2 Tim. 1:8-10 I Tito 1:1-3 I 1 Juan 5:9-12). “Tin un camina desconsi pa mundo, Tin un camina cu mi por drenta p’e; E ta den Cristo, e salbacionn di mi alma; E so por yuda y duna salbacion.”