Monday, September 17, 2007

E FE CU NO TA SALBA# 2

Den e promé mensahe tokante e tema aki nos a mustra for di Skritura , kon fásil e ta pa konfia den un fe ku ta zona bunita, ma ku realmente ta morto. No ta basta pa un persona bisa: “Ami ta kere ku tin un Dios so.” Ounke e deklarshon ei ta berdat, pasobra tin varios Skritura pa konfirmá esei. (Lesa Huan 17:3; Romanonan 3:30; 1 Korintionan 8:4-6; Efesionan 4:4,5; 1 Timoteo 1:17; 1 Timoteo 2:5 i Hudas 1:25).

Lesando e Skrituranan ei i hopi otronan mas, nos por mira klaramente ku ta un Dios so tin rebelá den Skritura dor di e profetanan i nos Señor Hesus Su mes, i tambe dor di e Apòstelnan skohí. E úniku Dios berdadero aki segun Skritura ta e úniku Todopoderoso, e úniku cu ta Santu. Klaro ku mi por spera reakshonnan relashoná ku e deklarashonnan ei, pero no ta ami ta bisa esei for di mi mes, sino Skritura ta bisa nos esei.

Pa kuminsá, ta Hesus mes a yama e Tata komo e úniku Dios berdadero( Huan 17:1-5). (Lesa tambe 1 Timoteo 6:13-16.) Ademas Skritura ta bisa nos cu e úniku Dios berdadero aki ta amor i ku E ta bon i ku E ta fiel i hustu. Tambe Beibel ta bisa ku Dios ta lus, i no tin skuridat den djE. Ademas, Dios tin pasenshi i no ta lihé na kastigá nos. Algun Skritura pa buska ta esakinan: (1 Korintionan 1:9; Rebelashon 16:7; 1 Huan 4:7-21; 1 Huan 1:5 i Lukas 18:19.) I tin hopi otro Skrituranan mas ku ta rebelá na nos e ekselensianan di e úniku Dios berdaderu.

Ma tambe tin Skrituranan ku ta rebelá na nos e severidat di Dios pa ku esunnan ku ta risistí kontra Su bondat i Su boluntat. Den e di dos karta ku e Apòstel Pedro a skirbi na tur esunnan ku ta kere e Evangelio, e ta bisa nos den Kapítulo 3, versnan 8-10 lo siguiente: “Ma no laga di ripará esun echu aki stimánan; ku pa Señor un dia ta meskos ku mil aña, i mil aña meskos ku un dia. Señor no ta tarda ku Su promesa manera algun ta komprendé tardansa, ma E tin pasenshi ku boso, i no kier pa ningun hende bai perdí, ma pa tur bin na repentimentu. Ma e dia di Señor lo bin manera un ladron, den kual e shelunan lo desparesé ku un boroto inmenso i e elementonan lo wòrdu destruí ku un kalor intenso, i e tera i su obranan lo wòrdu kimá kompletamente.”

Tur e kosnan aki ta skirbí pa spierta na promé lugá kada uno di nos ku ta kere e Evangelio di grasia di Dios, pa nos no drumi meskos ku esunnan ku no ta kere; ma pa nos ta na wowo kla, pa nos por spierta nos próhimonan di e huisio di Dios ku lo bini sigur, y ku tur hende mester repentí i kere den Esun ku a muri i a resusitá pa nos. Pasobra ta E so por libra nos di e rabia di Dios ku ta bini riba henter mundu.

Hopi hende ta manera na soño, i no sabi nada tokante repentimentu i fe den nos Señor Hesu-Kristu. Beibel ta mustra nos ku ta henter mundu òf sea henter humanidat ta bou kontrol di e Maligno. (Lesa 1 Huan 5:19) I e kosnan ei ta skirbí pa nos ku ta kere e Evangelio sabi ku nos mester bisa otronan kon nan por ta librá di e gara i kontrol di e Maligno.

Kuantu di nos ko-siudadanonan aki na Antiyas i Aruba, meskos na Hulanda, i tur otro parti di mundu ta bibando dia den, dia afo, morto den piká i separá for di e bida di Dios, ku ta solamente den Kristo pa medio di fe. Multitutnan ta konfia den nan religion òf den nòmber di un, òf otro denominashon, ENBES di konfia solamente den Hesus, e Yiu di Dios ku a entregá Su mes pa nos pikánan, pa nos por risibí pordon i bida eterna, y asina sea librá for di e poder di Satanas ku ta skuridat, I wòrdu tresí na e lus ku ta solamente den Kristu.

KONKLUSHON
 Algun hende por puntra: Kiko ta nifiká un fe ku no ta salba?
 Kon ami por sabi sigur ku e fe ku mi tin ta e fe berdaderu?

Hopi otro preguntanan asina tin, i e úniku ku tin e kontesta ta e Señor Dios Su mes.
PERO, ta kon Dios ta papia ku nos awe?
Amigunan, e kontesta pa tur e sorto di preguntanan ei, por ser hayá den bo Beibel. Skritura ta revelá ku den tempunan pasá Dios a papia ku nos tatanan dor di e profetanan na hopi okashon I na varios manera, ma den e último dianan aki, El a papia ku nos pa medio di Su Yiu. Lesa esaki abo mes den e buki di Hebreonan kapítulo uno; lesa pa kuminsa e versnan uno te tres. E kontesta pa nos preguntanan tokante nos fe, òf kualke otro pregunta, nos lo haya skirbí pa nos den Beibel, den e Skrituranan di Hesus, e Yiu di Dios. I e loke nos ta siña den tur nos mensahenan, ta basá riba e loke e Yiu di Dios a siña mientras ku E tabata den un kurpa humano den e mundu aki; i tambe loke El a sigui siña pa medio di Spiritu Santu via e Apòstelnan ku El a skohe. Den e Evangelio di San Huan 15:26,27, Hesus a bisa na e Apòstelnan lo siguiente: “Ora ku e Konsoladó bin, Kende Ami lo manda pa boso for di e Tata, e Spiritu di berdat, Kende ta sali for di e Tata, E lo testifiká di Mi; pero boso tambe mester testifiká, pasobra boso tabata ku Mi for di prinsipio.” Lesa tambe Huan 16:12-15, unda e ta bisa: “Mi tin hopi mas di bisa boso, mas ku boso por karga awó. Ma ora ku E, e Spiritu di berdat, ta bini, E lo guia boso den tur berdat. E lo no papia di Su mes; E lo papia solamente loke E tende, y E lo bisa boso loke ta bin ainda. E lo glorifiká Mi dor di tuma for di loke ta di Mi y hasi e konosí na boso. Tur loke ta pertenesé na e Tata ta di Mi. Ta p’esei Mi a bisa ku e Spiritu lo tuma fo’I loke ta di Mi I hasi e konosí na boso.” Pa e mensahe aki no bira muchu largu, lo mi konkluí den e mensahe ku lo sigui. Mientras tantu lesa Mateo 7:13-28.

Amigunan! Te otro biaha.

Tuesday, September 11, 2007

SEPTEMBER 11, 2001

Dia diesun di September di aña 2001, ta e dia cu mas cu tres mil persona a perde nan bida na un manera tragico, ora cu dos avion a dal intencionalmente den e dos edificionan yama “TWIN TOWERS” den tempo di algun minut di separacion. Hopi lagrimanan ta ser drama te awe, na recuerdo di stimanan cu a perde nan bida inesperadamente den e disaster cruel ey. Sigur cu nos por comprende pa e mayornan cu a perde nan yiunan, y e esposonan y esposanan cu a perde nan stimanan. Y di ningun manera nos kier desprecia nan sintimento.

Ma un cos si nos tur mester ta conciente di dje, y ta esaki: cada uno di nos tin su final den e mundo aki; y no ta tur lo muri di e mes manera. Mira cuanto otro tragedia a tuma luga desde September di aña 2001. Mira cuantu a muri di ripiente sea riba tera of riba laman: temblor, tempestad, accidente di un of otro manera, etc., etc.

Pero awe lo mi trece na nos atencion algo tragico cu a tuma lugar aya na Palestina durante e tempo di nos Señor Jesus, y cu algun persona a hala Jesus su atencion tocante esey. Nos por lesa esey den Lucas 13:1-5, y e ta bisa lo siguiente: “Awor tabatin algun hende presente na e tempo ey cu a bisa Jesus tocante e Galileonan kende nan sanger Pilato a mescla cu nan sacrificionan. Jesus a contesta; boso ta kere cu e Galileonan ey tabata pecadornan peor cu tur e otro Galileonan pasobra cu nan a sufri di e manera ey? Ami ta bisa boso, no; ma si boso no repenti; boso tur lo perece tambe. Of e diesochonan cu a muri ora cu e toren den Siloam a cai riba nan; boso ta kere cu nan tabata mas culpabel cu tur e otronan bibando den Jerusalem? Ami ta bisa boso, no; ma si boso no repenti, boso tur tambe lo perece.”

Amigo y amiganan di tur edad; e loke a tuma lugar na Merca seis aña pasa, por a wordo mira rond mundo via television e mes un dia cu el a sosode. Pero recientemente, mas y mas escenanan di e personanan cu a ser atrapa den e edificionan ey a ser publica via television. E situacion di esunan atrapa tabata asina insoportabel, cu hopi di nan a comete cuicidio dor di a tira nan curpa for di haltura na un morto sigur riba suela. Manera a wordo bisa caba, hopi otro tragedianan asina a tuma lugar desde September 11, 2001, y tambe prome cu esey. Y semper nos ta sigui comenta tocante nan, y tambe duna nos opinion.

Pero e palabranan di Señor Jesus cu El a bisa e hendenan e tempo, por ser dirigi na nos tambe awe. Nos por sigui duna nos opinionnan, y huzga of lamenta; pero e palabranan solemne di Señor Jesus mester sirbi como un spiertamento hopi serio pa cada uno di nos. “Si boso no repenti, boso tur lo perece tambe.” E doctrina di arepentimento ta pa tur hende di mundo, pa grandi y chikito, pa e sabí y e bobo. Ningun persona, ni sikiera uno cu ta na tino tin dispensa. Cada uno di nos mester repenti di nos picanan, y kere den nos Señor JesuCristo pa ricibi pordon di picanan y bida eterno. Na e Judiunan cu tabata di acuerdo cu e crucificacion di Jesus, e Apostel Pedro a bisa den e boeki di Echunan 3:15: “Boso a mata e autor di bida, pero Dios a lant’E for di morto, y nos ta testigonan di esaki…. awor rumannan, mi sabi cu boso a hasi e den ignorancia mescos cu boso lidernan. Ma esaki ta con Dios a cumpli cu e loke El a bisa padilanti dor di tur e profetanan cu Su Cristo lo sufri. Repenti anto y bolbe na Dios, pa boso picanan por sea kita,” etc. etc. Pone atencion cu e Judiunan aki tabata di acuerdo pa Jesus a wordo mata, ma nan a haci esey den ignorancia, y awor pordon y bida eterna ta ofreci na nan.

Awe ta mescos cu nos. Hopi di nos ta bibando den ignorancia siguiendo e camina di e multitud cu ta rechasa Cristo. Cualke hende cu ta nenga di confia den Cristo pa ricibi pordon, ta mescos cu si e persona aki ta di acuerdo cu e Judiunan cu a haya bon pa laga mata Jesus y asina rechasa tur loke El a siña y haci. Pero nan a hasi esey den ignorancia, y Señor tabata cla pa pordona y bendiciona nan ora cu nan repenti di pica y bolbe na Dios dor di pone nan fe den Jesus cu Dios a lanta for di morto segun Scritura. E mes mensahe aki cu tabata duna na e Judiunan e tempo, ta duna na cada uno di nos aki na Antiyas.

Den e buki di Echunan 17:29-31, e Apostel Pablo cu ta e Apostel mandá di Dios na e nacionnan cu no ta Judiu, ta bisa nos lo siguiente: “P’esey siendo cu nos ta decendientenan di Dios, nos no mester pensa cu e Ser divino ta mescos cu oro of plata of piedra, un imagen traha dor di arte y imaginacion di hende. Den tempo pasa Dios a pasa por alto tal ignorancia, ma awor E ta manda na tur hende na tur parti pa nan repenti. Pasobra El a fiha un dia cu E lo huzga e mundo cu husticia pa medio di un Homber cu El a apunta. El a duna prueba di esaki na tur hende dor di lant’E for di morto. E dia aki di huzgamento lo bin sigur."

P’esey obedece Dios y repenti y pone bo fe den Su Yiu,Kende a muri pa nos picanan y resucita pa nos justificacion.”
Scirbi y prepara pa Bicento & Betty Henriquez
Corda scirbi nos na bbhenrique@shaw.ca

Tuesday, September 4, 2007

Desfrutando di e cosecha di "Strawberries!"



" .... ummmmm...lekker"

E FE CU NO TA SALBA -#1



Bon dia na tur amigonan y amiganan ariba nos dushi islanan di Aruba, Bonaire y Curaçao! Nos ta den e prome dianan di e luna di September. Algun di bosonan a manda nos fotonan di e Hosnan cu a bishita Aruba. Danki Dios cu nan no a subi tera y causa daño! Tambe danki pa e fotonan di e temblor na Peru, unda rumannan ey no a scapa sin tragedia. Danki pa e fotonan ey. Aki, e tempo di Otoño ta riba nos, y nos ta ripara con e foyonan ta birando color geel, cora y bruin, y nan ta cuminsa cai. E cosecha ta na vigor: tur ta druk den e hofinan y cunucunan. Pronto winter lo ta aki pa un otro periodo di seis shete luna!
E tempunan ta cambia, ma Cristo semper ta keda mescos!

Bicento ta sigui awor cu e menahe fo’i e Palabra di Dios:

E FE CU NO TA SALBA -#1

Den e dos ultimo mensahenan, nos a presenta e berdad fundamental segun Scritura; cu salbacion y bida eterna ta pa medio di fe. Y segun Scritura, e fe aki ta bini pa medio di tendemento di e Palabra di Dios. E “palabra” aki ta referi na e Evangelio, of sea e bon nobo, tocante nos Señor y Salbador Jesus. Nunca tabatin y no tin te awe, y lo no tin den e dianan nos dilanti un noticia mes, of mas importante y bunita: cu e bon nobo tocante pordon y bida eterna pa medio di fe personal den e Yiu di Dios, kende a wordo mata pa nos picanan y resucita pa nos hustificacion.

E hustificacion aki di cada pecador cu repenti y kere den Jesus ta bini di e Unico Dios berdadero cu a crea e universo y tur loke ta den dje, tanto ta e cosnan cu nos ta mira of por mira, como esunnan cu nos no ta mira. Y e declaracion di hustificacion di cada pecador cu repenti y obedece e Evangelio ta basa riba e husticia di Cristo, esta Su bida sin pica apesar di a wordo tenta den tur cos mescos cu nos. (Lesa Hebreonan 2:14-18 y tambe Hebreonan 2:14-18 y tambe Hebreonan 2:21-15.) Por fabor lesa e palabranan ey cu calma y cu oracion na Dios den bo curason. Ta pa nos nan a wordo scirbi y preserva y abo cu ta lesa esaki ta inclui. P’esey, nos ta repeti; cu salbacion ta pa medio di fe den Jesus solamente y den ningun otro y den nada otro.

Pero Scritura ta spierta nos tambe tocante un fe cu NO ta salba. Santiago ta un di e sirbidornan di Dios cu a papia cla tocante e peliger di tin un fe cu no ta salba. (Lesa Santiago 2:14-26. Anto lesa tambe Romanonan 4:16-25, y tambe Efesionan 2:1-10.) Di nobo nos ta encurasha bo pa tuma tempo pa lesa tur e Scrituranan ey cu calma y cu reverencia y oracion den bo curason.

Anto, awor laga nos considera loke Santiago ta bisa nos tocante fe. Cuminsando cu Capitulo 2:18 nos ta lesa lo siguiente: “Ma algun hende lo bisa, “abo tin fe; ami tin obranan. Mustra mi bo fe sin obranan, y ami lo mustra bo mi fe pa medio di loke mi ta haci. Abo ta kere cu tin un Dios. Bon! Asta de demoñonan ta kere esey y ta tembla. Abo hende bobo, bo kier evidencia cu fe sin obranan ta pornada? (of morto). Abraham no a wordo considera husto pa loke el a haci ora cu el a ofrece su yiu Isaac ariba e altar? Bo ta mira cu su fe y su accionnan tabata obrando hunto, y su fe a wordo hasi completo pa medio di loke el a hasi. Y e Scritura a wordo cumpli cu ta bisa: “Abraham a kere Dios, y esey a wordo acredita n’e como husticia” y el a wordo yama Amigo di Dios. Boso ta mira cu un persona ta hustifica pa medio di loke e hasi, y no pa fe so.” E versiculo 26 ta conclui bisando: “Mescos cu un curpa sin spirito ta morto, mescos fe sin obranan ta morto.”

Amigonan, ta CLA pa mira den e Scritura aki den Santiago capitulo dos con facil nos por interpreta cu haciendo bon obranan un persona por merece di ta hustifica. Den otro palabra, cu nos por gana bida eterno hasiendo bon obranan. Ta p’esey cu nos ta conseha pa lesa e otro Scrituranan cu nos a indica na cuminsamento di e articulo aki. Ademas tin hopi otro Scrituranan pa proba cu e ta imposibel pa un ser humano ser declara husto basta ariba su obranan of bon obranan cu el a haci. Santiago no ta menciona bon obranan aki, sino; obranan. Y esey ta igual cu accionnan of echunan. Considera ey mes den Santiago e loke Abraham a hasi. Loke el a haci tabata cu el a obedece Dios, e ta tabatin confiansa den e Dios todopoderoso Kende a pidi’e pa hasi algo cu tabata contrario di tur rasonamento humano. (Lesa Hebreonan 11:17-19)

Pues, nos por bisa cu Abraham a obedece Dios completamente pa fe, sin rasonamento. Laga nos considera awor, e FE CU NO TA SALBA, cu Santiago ta menciona den e versiculonan 14-25 di capitulo dos. Aki ta menciona un persona cu ta kere den un Dios so. Masha bon, pero demoñonan tambe ta kere esey y nan ta tembla. Alomenos ta menciona cu e demoñonan ta tembla pa e Unico Dios aki, pero e ser humano por bai asina leu di ta biba den tur sorto di pica, y toch ta bisa cu e ta kere den Dios.

Ta bon conoci den Scritura cu Dios a scohe e nacion Judiu, y a haci Su mes conoci na nan, y dor di nan, pa nan por ta Su testigunan den e nacionnan. Pero na luga di esey nan a sigui e mes custumber di e otro nacionnan di manera cu tanto Judiu como no Judiu ta inclui den e lista di maldadnan cu ta menciona den Romanonan capitulo tres. Lesa esey pa bo mes.

E profeta Isaias tabata un Judiu, y laga nos mira kico e ta bisa: “Nos tur a bira manera un hende cu ta impuro, y tur nos echunan hustu ta manera trapo di imundicia; nos tur marchita manera un foyo, y mescos cu e biento nos picanan ta lastra nos bai cu ne.” (Isaias 64: 6,7) .

Isaias no ta papiando di e nacionnan pagano solamente, ma ta inclui na prome lugar e puebel cu Dios a libra for di sclabitud na Egipto. Laga nos considera pa un rato, nos mes cu ta pertenece na e tres islanan aki di abla Papiamento. E gran mayoria di nos ta bisa cu nos ta keredornan den un solo Dios berdadero. Mescos, e mayoria di nos ta bisa cu nos ta Cristiannan.

E pregunta ta: E fe ey lo saba nos? Un’ ta berdad cu fe sin obra ta morto? Un’ ta berdad cu demoñonan tambe ta kere cu tin un Dios so? E demoñonan lo ta salba pasobra nan sabi esey? E contesta ta simpel y cla den Scritura. Pa kere cu tin un Dios so, no ta nifica salbacion pa ningun hende. Ma e loke si ta salba nos ta pa kere y obedece e loke e unico Dios ta bisa tocante Su Yiu, nos Señor y Salbador JesuCristo. Y esaki ta Su testimonio: “El a duna nos bida eterno, y e bida aki ta den Su Yiu. Esun cu tin e Yiu tin bida, esun cu no tin e yiu di Dios no tin bida.” (Lesa 1 Juan 5:1-12)

Amigonan, e fe cu ta salba un pecador ta nos fe personal den e Yiu di Dios cu a muri y a resucita pa nos.
Bo tin pregunta, no hesita pa scirbi nos na: bbhenriquez@shaw.ca of si bo kier scirbi nos via carta nos adres ta: Bicento & Betty Henriquez, #534, 120 La Ronge Road, Saskatoon, Saskatchewan, Canada, S7K 7Z9. Tambe por comenta na e “blogspot” mes. Click ariba “Comment”. Corda, lesa e Scritura