Thursday, December 25, 2008

E NACEMENTO DI JESUS - continua


BON PASCO NA UN Y TUR!! - Dios ta bendicionando Aruba cu un awacero henter mainta awe, dia 25 di December, 2008. Awor, un poco prome cu merdia e solo a sali un rato. Ariba por wak un bunita regenboog cu nos ta mira na Aruba. Awor ta sigui nos mensahe cortico ariba e Nacemento di Jesus - cual henter mundo ta celebrando awe, aunke hopi no sa mes e berdadero nificacion di Pasco.

Den e prome mensahe, nos a papia di e nacemento di Jesus como un beby, for di Maria kende tabata compremeti cu un carpinte cu yama Jose. Manera nos sabi, cu ora un señora ta duna lus na un beby, ta nifica cu un persona nobo a bini na mundo. Esey ta nifica cu e persona of e beby aki a cuminsa existi for di barica di su mama. Pero e nacemento di Señor Jesus tabata completamente otro, aunke ta berdad cu e curpa humano di Jesus no a existi antes. Ma e berdad ta, cu nos Señor Jesus no solamente a nace como un beby, ma tambe El a bini den mundo. El a existi prome cu El a nace for di Maria. Aki mi ta purba splica e encarnacion di nos Señor, pasobra mi no por. Ma e berdad ta cu Esun cu a nace despues di tabata nuebe luna den barica di Su mama, a existi for di temponan di eternidad.

Den e buki di Mikeas den Testament Bieu nos ta lesa lo siguiente den capitulo sinco vers dos: "Ma abo Bethlehem Efrata, mucho chikito pa ta entre e famianan di Juda, for di bo lo sali Uno pa Mi pa ta gobernante na Israel. Su origin ta for di hopi tempo pasa, dor di e dianan di eternidad." E profecia aki ta repiti den Mateo 2:6 unda e ta bisa: "Y abo Bethlehen, tera di Juda, di ningun manera ta esun di mas chikito entre e lidernan di Juda; pasobra for di bo lo sali un Gobernante, Kende lo pastoria Mi Puebel Israel."

Pues Amigonan stima di tur edad, nos por bisa cu tur confiansa cu Esun Kende nos ta celebra Su nacemento den e dianan aki; no solamente a nace como un Beby den un curpa humano; ma El a bini den mundo pa haci e boluntad di e Tata cu a mand’E, y a dun’E pa nos. Aki nos por puntra: "Y kico e boluntad di e Tata ta?" Amigonan stima pa Dios; e contesta ta cla y sigur di Scritura. Pues, nos kier tuma e momento aki pa encurasha tur hende den e islanan aki, pa bo busca un Beibel cumpra y disiplina bo mes pa tuma tempo pa lesa fielmente for di dje. Y semper pidi Señor pa E lumina bo pa bo por comprende y pa obedece. Bo ta liber pa scirbi nos pa algun conseho, ma e boluntad mester bini for di abo mes cu yudansa di e Spirito di Dios.

Pa fabor Amigonan, e obra aki di Dios ta di sumo importancia pa cada uno di nos. Nos mester yega na e comprendemento, cu Señor nos Dios ta stima nos, y ta cla pa haci loke ta imposibel pa un ser humano. Y esey ta encera den e loke nos ta yama Pasco di Nacemento. Dios ta stima nos asina tanto, cu El a duna Su unico Yiu, pa tur cu kere den djE, no bai perdi, ma haya bida eterno. Sea sigur, sea masha sigur, cu no tin salbacion den NINGUN OTRO, pasobra no tin otro nomber duna na hende pa medio di cual nos por ta salba. Lesa Echunan 4:12

Awe cu bo ta lesando esaki, salbacion y pordon di picanan y bida eterno ta siendo ofreci na tur hende di mundo incluyendo Aruba, Curaçao y Bonaire. No ta asunto di celebra pa loco sin pia ni cabes manera: laga nos come y bebe, pasobra mañan nos ta muri. Oh, no, aki nos tin di hasi cu un situacion di bida y morto. E mes Jesus aki cu ta ofrece pordon di picanan y bida eterno na tur esunnan cu ricibi E, lo bolbe un dia pa huzga como Hues. Repenti y kere Evangelio, pasobra mañan por ta lat! Amigonan di tur edad, nos oracion ta cu cada uno cu lesa e mensahe corto aki lo hasi e decision di mas importante di henter bo bida. Y esey ta pa obedece e Evangelio di gracia di Dios. Bo por scirbi nos na e adres cu ta hunto cu e mensahe aki.
bbhenriquez@setarnet.aw

Friday, December 19, 2008

E NACEMENTO DI JESUS

Si mi lo a busca un titulo adecuado pa e mensahe corto aki, e por tabata: "BON NOTICIA", pasobra esey ta loke e Angel di Señor a participa na e wardadornan di carne, e anochi cu nos Señor a a nace den un curpa humano manera esun di nos, pero sin e naturalesa di pica. Siendo cu e wardadornan a spanta masha ora e gloria di Señor tabata resplandece tur rondo di nan; e angel a calma nan bisando, "No tene miedo, mi ta trece BON NOTICIA pa boso di gran goso cu lo ta pa tur hende. Awe den e ciudad di David un Salbador a nace pa boso; e ta Cristo e Señor. Y esaki lo ta e señal pa boso: boso lo haya un beby lora den paña , y drumi den un pesebre." Anto nos ta sigui lesa cu: "Di ripiente un multitud grandi di e ehercito celestial a aparece hunto cu e Angel, alabando Dios y bisando: Gloria na Dios den haltura, y ariba tera pas na hende riba kendenan Su fabor ta descansa."(traduci for di NIV)

Amigonan di tur edad, manera nos sab,i aki den Antiyas nos tin e custumbra ariba e dia 25 di December, cual ta e fecha cu nos ta recorda e nacemento di e beby Jesus; di saluda un y otro bisando, "Bon Pasco". Ademas henter Antiyas ta considera e dia aki como un dia di celebra den varios forma. Pero segun Scritura e motibo principal pa nos celebra ta, cu e nacemento di Señor Jesus como un beby tabata pa salba humanidad.

E pregunta ta: Salba humanidad for di kiko of for di kende? E contesta cla y sigur nos ta haya den Scritura mes. I mi por ta asta sigur, cu bo tin esey ey mes hunto cu bo den bo cas. Habri bo Beibel anto, y busca den e Evangelio di Mateo, capitulo un y versnan 18-25. Den vers 21, nos ta lesa lo siguiente: E (esta Maria) lo duna lus na un yiu homber, y abo (Jose, e esposo di Maria) lo dun’E e nomber Jesus, pasobra E lo salba Su puebel for di nan picanan.

Amigonan, ata e causa berdadero di e celebracion pa cual nos Señor Jesus a bini na mundo. El a bini pa salba nos for di nos picanan. Ma atrobe y cu rason nos por puntra: "Pero con El a haci esey? Con ami por haya e salbacion ey?" Pa nos bisa e berdad amigonan di tur edad. Nos Tata Celestial Su mes ta mucho, pero mucho mas interesa cu cualke di nos, pa nos por ricibi e gracia inexplicabel aki di pordon y bida eterno. Den 1 Pedro 2:22-25, nos ta lesa lo siguiente: "E (JesuCristo) no a comete pica, y ningun mintira a wordo haya den Su boca. Ora cu nan a insult’E, E no a insulta bek; ora cu El a sufri, E no a menasa, ma El a confia Su mes na Esun Kende ta huzga cu husticia. E mes a carga nos picanan den Su curpa ariba e crus, pa nos por muri pa picanan y biba pa husticia; pa medio di Su heridanan boso a wordo cura. Pasobra boso tabata mescos cu carne cu a dwal, ma awor boso a bolbe na e wardador y cuidador di boso almanan." Tambe nos ta lesa lo siguiente: "Pasobra Cristo a muri pa picanan un bes y pa semper, e Husto pa e inhustonan, pa trece boso (nos) serca Dios." 1 Pedro 3:18
Amigonan di tur edad; di acuerdo cu Scritura, e pordon pa nos picanan a wordo hasi posibel a costo di un preis masha halto mes. Y esey tabata cu Jesus e Yiu di Dios a carga den Su curpa ariba e crus, e picanan di henter humanidad, y esey ta inclui abo cu ta lesando esaki: Kico nos mester hasi awor? E contesta ta cla y sigur den Beibel, y ta esaki: Repenti y kere e Evangelio, y lo bo ricibi pordon y bida eterno. Sea sigur di esaki: Sin repentimento no tin pordon.

Bon Pasco y Feliz Aña Nobo
Amigo y amiganan di tur edad. Nos ta desea di curason, cu cada uno di boso por tin un dia felis, celebreandi e recuerdo di e Nacemento di Señor.

Nos Aniversario di 10 aña di Matrimonio











Dia 16 di December nos a corda cu esaki tabata e fecha di nos casamento dies aña pasa! Ki lihe e añanan a core - ta dificil pa pensa cu ta asina tanto tempo caba. Ma nos ta gradici Dios Pa Su misericordia y fieldad pa cu nos cada dia. Nos a biba den varios lugar y a biaha entre Aruba y Canada varios biaha cu bishita na Bonaire un dos of tres biaha! Nos no a celebra na grandi, ma nos a invita un pareha, amigonan di nos cu a yuda nos masha hopi den e ultimo siete lunanan cu nos ta aki na Aruba. Ki ora cu tabatin un trabou mucho duro pa nos, nan tabata ey pa duna un man. Pues, nos a celebra cu un cena hunto den un resturant na Oranjestad. Aki ta un dos fotonan cu nos a saca dilanti nos cas y na e resturant.
1. Max y Sita dilanti nos casita.
2. & 3. Sinta na mesa na e Restuarant "Promenade"
4. Na e resturant
5. Den nos hofi dilanti cas.
" Mi alma ta haya sosiego den Dios solamente; E so ta mi Roca y mi Salbacion; E ta mi forte, mi lo no wordo movi." Salmo 62:1 y 2

Tuesday, December 2, 2008

BON DIA, bon dia, ariba e Dia Aki!! - December 2/08




Despues di hopi awa ceru nos ta bolbe post algun foto di nos dushi Aruba - asina bunita y berde! E foto ariba ta di nos mata dilanti porta di nos cas, y e otro dos foto ta saca ora nos a keiro pa explora cu coasta di laman parti noord y pariba.

E TEMPO ACEPTABEl - continua
Den e prome mensahe cu nos a duna tocante e tema aki di "E TEMPO ACEPTABEL", nos a purba enfatisa e berdad ensera den cada uno di e porcionnan di Scritura inclui den e mensahe ey; cu e tempo aceptabel ta pa awe y awor. Y mescos e ta cu: E dia di salbacion, cu ta pa awe y awor. Den tur y cada uno di e Scrituranan cu nos a menciona brevemente ta inclui e urgencia y e seriedad di e Evangelio di Dios y di nos Señor JesuCristo.
Awe mi ke encurasha cada persona cu ta lesa e mensahe aki, pa bo lesa e prome capitulo den e buki di Romanonan. Sea cu bo ta un persona cu a kere e Evangelio pa varios añanan caba, of uno cu a kere recientemente. Of sea cu bo ta un persona cu ta wel religioso, pero bo nunca a haci e decision personal mediante fe den Señor Jesus. E prome cos pa nos tene cuenta cu ne mientras cu nos ta lesando e prome capitulo di Romanonan ta: pa pone atencion ta na kendenan e Apostel Pablo a scirbi e carta aki. Anto nos lo mira bon cla, cu e Apostel no a scirbi e carta aki na e gobernantenan religioso sea Judiu of no Judiu. Ma versnan uno te siete ta mustra claramente cu e Apostel a scirbi na tur esunnan cu a kere e Evangelio na Roma sea Judiu of no Judiu. Pues el a scirbi e carta aki na esunnan cu ya ta kere e Evangelio. E motibo pakico mi ta bisa esaki y ta enfatis’e ta: "cu ta na nos cu ta kere di curason den nos Señor y Salbador JesuCristo, a wordo duna e responsabilidad y privilegio pa sigui duna testimonio di e Evangelio di gracia di Dios. Cu esaki mi no ta bisa cu nos tur mester predica of siña e Evangelio, of cu nos tur mester sirbi como misionerona den otro partinan di mundo. Ma e loke si nos por mira bon cla ta: cu tanto den e carta scirbi na e Romanonan como tur e otro cartanan den e Testament Nobo, ta inclui tur y cada persona cu ta kere e Evangelio.
Nos mester lanta fo’i soño y realisa cu ta un curpa so tin di cual Cristo ta e cabes. Ta un Spirito tin cu ta biba den cada pecador cu a repenti y kere e Evangelio. Nos tin un Señor y un fe y un bautismo, y esey ta nifica cu cada uno di nos cu a tende y a obedece e Evangelio a wordo batisa den un curpa cu ta wordo yama: "E Iglesia di Dios bibo, pilar y fundeshi di berdad. Lesa 1 Timoteo 3:15 y Efesionan 5:23-35. Segun Scritura e nomber Iglesia no ta nifica edificionan cu nos ta yama Iglesia. E berdadero Iglesia ta consisti di sernan humano cu ta obedece e Evangelio di e Yiu di Dios. Den e Testament Nobo nos por mira bon cla con gruponan di keredornan cu ta reuni hunto ta wordo yama Iglesia; pero no e edificio.
Ta e pecadornan cu a tende e Evangelio y a kere cu nan curason y confesa nan fe den Cristo cu nan mes boca ta esakinan ta e Iglesia. Lesa Romanonan 10:10-13. E mes Scritura ey ta bisa nos masha cla mes cu "fe ta bini for di tendemento di e mensahe, y e mensahe ta wordo tendi door di e palabra di Cristo." Romanonan 10:17 (NIV = New International Version).
Na e Iglesianan di Cristo cu ta plama den varios distrito di Aruba y e resto di Antiyas Hulandes.
Na nos tambe ta toca e spiertamento cu ta tempo pa nos lanta for di soño. Ademas e spiertamento cu ta bisa lo siguiente, "Con nos lo scapa si nos ignora un salbacion tanto grandi asina?" Pone atencion cu e no ta bisa: Con nan lo scapa, etc., ma: con NOS lo scapa?….. y esaki ta e spiertamento pa awe, pa cada uno di nos cu ta den Cristo.
Te otro biaha, di Bicento y Betty
Corda nos email adres ta: bbhenriquez@setarnet.aw

Thursday, November 13, 2008

Nos Pasa Temponan!




Aki ta un foto cu mi a traha poco dia pasa for di cocolishinan cu laman bruto ta tira riba santo blanco na oriya di laman. Realmente mi a traha alomenos un dies di e tiponan aki, anto tur sorto di otronan tambe. E ta algo cu ta bon terapi pa mi pa mi relaha!!

Un otro pasa tempo cu nos tin ta - planta, cuida y gosa nos hofi. Aki ta sigui un foto saca recien. E foto ta un di dos mata di papaya cu nos a hinca den tera awor y nan ta creciendo bunita asina! Nan ta floriando y nos ta confia cu nos lo mira e dia cu nos lo por come un dushi papaya di nos mes palo! Temponan cu mi tabata chikito mi a yuda mi mayornan masha hopi den hofi, y mi a gusta masha. Ma ora mi a drenta e ministeriso aki na Camp Washington, no tabatin tempo, aunke tempo tempo mi tabata purba planta algo! Ma awor cu nos a bolbe biba aki na Camp Washington, mi tabatin e deseo di purba atrobe. Bicento ta yuda masha hopi mes, pasobra e tambe ta gusta mata, flor, parha y barbulet! Hunto nos ta gosa nos hardin!

E TEMPO ACEPTABEL

E foto ta di nos hofi dilanti nos casita chikito! E ta tene nos ocupa y nos ta gosa tur e flornan y matanan cu ta atraë barbuletnan, parhanan y beinan, pa no menciona vruminganan!

Ma awor laga nos sigui cu nos tema pa awe: e dia aceptabel!!

Den e buki di 2 Corintionan 6:1 y 2, nos ta lesa lo siguiente: "Y trahando hunto cu nE, nos ta roga boso pa no ricibi e gracia di Dios enbano, pasobra E ta bisa: "Den tempo aceptabel Mi a scucha bo, y riba e dia di salbacion Mi a yuda bo. Mira, awor ta e tempo aceptabel, mira, awor ta e dia di salbacion."
Nada mas cu ayera tabata un dia cu a trece basta movemento pa e doñonan di auto aki na Aruba, pa motibo cu a wordo anuncia cu e preis di gasolin a baha considerablemente. Pa colmo algun a comprende cu tabata pa un dia so, y asta un solo Stacion di Gasolin. Francamente, mi no por acusa e doñonan di auto pa nan accion, pasobra e preis di gasolin ta halto, y un rebaho lo alivia hopi.


Pero aki nos por siña algo hopi importante si. E Scritura cu nos a mira na cuminsamento di e mensahe aki, ta recorda e puebel di Dios cu nos cu ta kere e Evangelio, ta co-trahadornan cu Dios Su mes; y pa nos no hasi menos caso cu un responsabilidad tanto grandi asina. E Scritura aki ta siña nos cu nos ta bibando den e tempo aceptabel y e dia di Salbacion. Y cu e tempo aceptabel ta AWOR, y e dia di salbacion ta AWOR.


Pero hopi hende ta tende y ta bisa: Awe no, ma un otro dia, despues, mas despues. Pero amigonan, e despues ey probablemente lo no yega. Mira cuanto hende conoci ta muri cada dia den e tres islanan aki so, sin conta e resto di Caribe, of di e otro nacionnan. Y no ta tur ta hendenan di edad halto. Ademas, considera loke nos ta bira lomba p’e, ora cu nos ta haci menos caso di e gracia di Dios cu ta den Cristo. Segun e Scritura den 2 Cor. 6:1,2, ta pa Dios Su mes nos ta bira lomba ora cu nos ta nenga di repenti y kere den nos Señor JesuCristo. P’esey cu otro Scritura ta spierta nos lo siguiente: "Awe si boso tende Su bos, no haci boso curason duro." Hebreonan 4:7. Tambe den Hebreonan 2:1-4 nos ta lesa lo siguiente: "Pa e motibo aki nos mester paga mucho mas atencion na loke nos a tende, pa nos no drief pasa bai, (of drief for di nan). Pasobra si e mensahe papiá dor di e angelnan tabata firme, y tur violacion y desobediencia a ricibi su pago husto, con nos lo scapa si nos ignora un salbacion tanto grandi asina? E salbacion aki cual tabata anuncia prome pa e Señor, tabata confirma na nos dor di esunnan cu a tend’E (tende e Señor) Dios tambe tabata duna testimonio na esey pa medio di señalnan, maraviyanan y varios milagernan y donnan di e Spirito Santo parti di acuerdo cu Su boluntad."
Amigonan di tur edad, tur e spiertamentonan solemne cu nos ta lesa den Scritura, ta pa nos tene cuenta cu nos curason por bira duro y insensitivo pa e palabra di Dios. Den e buki di Romanonan 13:11-14, nos ta haya e siguiente spiertamento: "Y hasi esaki, conciendo e tempo actual (of e tempo presente) e ora a yega pa boso lanta for di soño; pasobra awor nos salbacion ta mas serca cu ora nos a kere. Nochi ta serca di pasa y e dia ta serca. P’esey laga nos pone e obranan di scuridad un banda y bisti e amrmadura di lus. Laga nos comporta nos mes desentemente manera den dia, no den parandamento y buracheria, no den inmoralidad sexual y sensualidad, no den pleito y envidia. Ma bisti boso mes cu Señor JesuCristo, y no pensa con pa satisface e deseonan di e naturalesa pecaminoso." E spiertamento pa cada uno di nos ta, pa nos obedece Dios Su Palabra tocante Señor Jesus.


Te otro oportunidad. Nos ta encurasha bo pa laga nos sabi dor di scirbi un noto na: bbhenriquez@setarnet.aw si e Blog aki tabata di spiertamento of bendicion pa bo, Siguramente esey lo encurasha nos pa sigui cu e ministerio aki.

Wednesday, October 15, 2008

E REINO DI DIOS (continua)



E foto: un mirada di nos hofi y su progreso!

Den nos prome mensahe corto tocante e Reino di Dios, mi a menciona cu Beibel ta papia hopi di esey; y mescos tocante e reinonan di e mundo aki.
Esey ta asina fo’i Genesis ta na e buki di Rebelacion. Mi ta admiti cu no ta facil pa papia of pa scirbi y splica tocante e Reino di Dios, y e reinonan di mundo. Hopi di esunnan cu ta kere e Evangelio di gracia di Dios, ta confundi tocante ambos reinado. Hopi precioso almanan cu ta kere di curason den nos Señor JesuCristo ta pensa cu tin un diferencia entre e Reino di Dios y e Evangelio. Ma e berdat ta cu e Evangelio y e Reino di Dios ta inseparabel, pero mester wordo distingui. Pa cuminsa, nos Señor Su mes a siña y proclama tocante e Reino di Dios. For di cuminsamento di Su ministerio te na su final Señor Jesus a siña tocante e Reino di Dios. Tuma como ehempel, Señor Jesus Su palabranan na Nicodemus kende tabata un miembro di e Conseho Judio, den Juan 3:3, unda Jesus ta bisa Nicodemus lo siguiente: "Ami ta bisa bo e berdad, si un hende no bolbe nace, e no por mira e Reino di Dios." Anto contestando Nicodemus su pregunta y su observacion, Jesus a continua bisando, "Si un hende no nace di awa y di e Spirito, e no por drenta e Reino di Dios."
Den nos prome mensahe corto, nos a trece e doctrina aki caba padilanti, pero nos ta haya mas di esey den otro scrituranan pa yuda nos comprende pa medio di fe. Den prome Pedro 1: 3-5, nos ta lesa e siguiente, "Alaba sea e Dios y e Tata di nos Señor JesuCristo, Kende segun Su gran misericordia a hasi nos nace di nobo den un speransa bibo pa medio di e resureccion di JesuCristo for di e mortonan, etc., etc. Aki nos por mira hopi cla, cu nacemento di nobo ta relaciona cu e morto y e resureccion di nos Señor; y cu ta obra di Dios e Tata mediante Su Spirito. Mas leu den prome Pedro 1: 23-25, nos ta lesa asina aki: " Pasobra boso a nace di nobo, no di simia coruptibel, ma incoruptibel, ma medio di e palabra bibo y permanente di Dios. Pasobra tur hende ta manera yerba, y tur nan gloria ta manera e flornan di yerba. E yerba ta seca y e flornan ta cai, ma e Palabra di Señor ta permanece pa semper. I esaki ta e palabra cu a wordo predica na boso."
Aki Amigonan, nos por mira bon cla, cu nacemento di nobo ta tuma lugar ora cu nos como pecadornan ta tende E PALABRA di Dios, den e Evangelio. Scritura ta bisa nos cu: "fe ta bini pa medio di tendemento di e mensahe, y e mensahe ta tendi pa medio di e Palabra di Cristo." Romanonan 10:17
Un estudio simpel di e porcion di Scritura aki ta mustra cu e mensahe y e Palabra ta nifica e Evangelio. Y e palabra Evangelio ta nifica: Bon Nobo, of Bon Noticia. Nos por conclui anto cu ta solamente e pecadornan cu ta repenti di nan picanan ora cu nan ta tende e Evangelio, y ta obedece Dios dor di pone nan fe den Señor Jesus, Kende a muri y a wordo lanta for di morto pa nos; lo drenta e Reino di Dios. Beibel ta cristalinamente cla tocante e berdad aki! Tur e declaracionnan di Scritura tocante e berdad aki di e Reino di Dios, ta sigur y irrevocabel, pasobra e ta e Palabra di Dios bibo cu ta permanece pa semper.
Ata aki poco Scritura pa yuda esunnan cu kier sabi mas tocante e Reino di Dios: Echunan 1:3 y 19:8 y 20:25 y 28:23-31. Tur e Scrituranan aki ta fo’I e buki di Echunan. Lesa nan cu oracion sincero di bo curason, y Señor mes lo yuda bo.
Te aki nan pa awe. Ora bo ta cla di lesa y studia e mensahe cortico aki, tuma un rato y communica bo pensamentunan cu nos na: bbhenriquez@setarnet.aw
Bicento y Betty Henriquez for di Washington 23A, ARUBA

Monday, October 6, 2008

E REINO DI DIOS



Den Beibel nos ta lesa hopi tocante e Reino di Dios. Ma na e mes un tempo, Beibel ta papia hopi cla tocante e reino di e mundo aki. Tocante e reino di e mundu aki, nos no tin mester di hasi decision pa ta pertenece na n’e; pasobra for di e momento cu nos a nace for di barica di nos mama, nos ta pertenece na e reinado na cual nos mayornan ta pertenece.

Nos no tin mester pa hasi ningun decision, pasobra nos ta nace como un ciudadano di e nacion na cual nos mayornan ta pertenece. Ma, e no ta asina cu e Reino di Dios; e Reino Celestial. Te asta si nos mayornan ta miembronan di e reino di Dios; nan yiunan no ta nace automaticamente un miembro di e Reino di Dios. Si nos mayornan ta miembro di un of otro religion; nan por pone nos nomber den e lista di nan religion. Pero loke nos mayornan nunca por hasi ta; pa hasi nos un miembro di e Reino Celestial di nos Dios y Tata.

E mundo ta parti den diferente reinadonan bou di diferente nombernan. Pero e Reino di Dios ta un solo reino cu ta consisti di hendenan for di tur nacion y tribo y di tur idioma. Awor, si nos no por ta miembro di e Reino di Dios, aunke nos mayornan si ta; con anto nos por drenta of bira un miembro di e Reino ey?

Amigonan di tur edad; e contesta ta duna na nos cla y sigur, dor di Señor Su mes. Si bo tin un Beibel, busca den Juan 3:1-21. Aki nos ta lesa cu si un hende no nace di nobo, e no por mira e Reino di Dios, y e no por drenta e Reino di Dios. Pero pa un hende drenta e Reino di Dios, e mester nace di nobo mediante e Spirito di Dios. Anto ta bin e pregunta: Con esey por ta? Con un hende por bolbe nace siendo cu ya el a nace caba for di barica di su mama kerida? Nos meste bisa danki na Señor Jesus, pasobra E mes ta duna e contesta den e versnan cu ta sigui den Juan 3:10-21. Den e versnan 14,15, Señor ta papia di e colebra di metal cu Moises a halsa riba un staca pa e orden di Señor Dios, tempo cu e puebel cu Moises a saca for di Egipto tabata rebelde y papia contra Dios y contra Moises. Anto Señor a manda colebranan venenoso meimei di e puebel cu a morde y mata hopi hende. E ora ey numa e puebel a reconoce nan error y a admiti nan pica. E ora Señor a bisa Moises "traha un colebra di metal y pon’e riba un staka y hals’e, pa esun cu worde mordi, por mira na e colebra di metal y biba."
E storia ey, amigo y amiganan di tur edad, nos Señor a bisa na Nicodemus como un ilustracion di loke lo socode cu nos Señor Jesus Su mes. E ta Esun cu a wordo hisa ariba un crus pa salba nos for di nos picanan. El a muri pa motibo di picanan, pero no di djE, pasobra E nunca a peca, y ningun mentira a wordo haya den Su boca. Lesa sin falta, 1 Pedro 2:21-25.

Ora cu nos ta lesa cu E mes a carga nos picanan den Su curpa riba e crus, etc., anto enbes di nos picanan, lesa: mi picanan. Esey ta e berdad, ta p’esey e ta scirbi den Scritura, pasobra ta pa nos El a sufri, ta pa nos El a muri, y pa nos El a wordo lanta for di morto. E yiunan di Israël cu a kere Moises y a atmiti nan culpa, y a hisa cara wak na e colebra di brons, a hasi ey pa fe. Mescos e ta awe amigonan, kere e Palabra di Dios cu ta bisa cu nos tur a peca y ta falta e gloria di Dios. Lesa Romanonan 3:21-26. Tin un spiertamento sumamente solemne cu ta compaña e oferta di pordon y bida eterno aki cu ta bisa: "Con nos lo por scapa si nos neglisha un salbashon asina grandi?" Lesa Hebreonan 2:1-3.


Esaki ta tur pa awe, nos lo sigui e topico aki otro ocasion, si Dios permiti.

Monday, September 29, 2008

Our New Home in Aruba







This is the small cabin we are living in temporarily. It is a cabin on the camp grounds where I, Betty, was director for some fifteen years. It is called: Camp Washington. Washington is the area where the campsite is founded. It is airconditioned, for which we are very thankful. It would not be possible, we think, to survive in the constant temperatures in the 90's these months that we have been here! We love to garden so we have planted flowers and shrubs and they are beginning to blossom and bring life to the yard, as you can see in some of the additional images.

Thursday, September 25, 2008

E Curason - conclusion

Nos a mira for di Scritura Santo, cu e curason di e sernan humano ta falso mas cu tur otro cos y desesperamente malo. Y nos a menciona cu e curason den Beibel no ta papia di e curason cu ta pomp e sanger door di nos curpa, pero e curason segun Scritura ta inlcui na prome lugar e mente y e spirito humano cu ta diferente cu animalnan.

Nos ta lesa den Beibel cu Dios a crea hende segun Su imahen y semehansa cu e capacidad pa distingui mei mei bon y malo. Sinembargo e prome hende Adam, a wordo gaña y a cai den pica, y asina morto a drenta y a pasa na tur hende, pasobra tur a comete pica. E Palabra di Dios ta enfatisa cu no tin ni un persona cu nunca a peca of hasi pica. Beibel ta bisa tur a peca y ta falta e gloria di Dios. No ta keda ningun persona cu ta liber di e condenacion ey. Beibel ta enfatisa esey bisando, "No tin ni un hende husto, ni sikiera UN; no tin ni un hende cu ta comprende, no tin ni un hende cu ta busca Dios. Tur a desvia; conhuntamente nan a bira inutil; no tin ni un hende cu ta hasi bon, no tin ni sikiera un. Nan garganta ta un graf habri, nan lenga ta practica mentira, veneno di colebra ta ariba nan lipnan. Nan boca ta yen di maldicion y armagura. Nan pianan ta lihe pa drama sanger, ruina y miseria ta marca nan pasonan, y e camina di pas nan no conoce. No tin temor di Dios, dilanti nan wowonan." Lesa Romanonan 3:9-20
E loke nos a caba di lesa aki ta inclui cada uno di nos sin excepcion prome cu nos a tende e Evangelio y cu nos a kere e mensahe y a repenti y kere di henter nos curason den Señor Jesus, Kende a carga nos picanan den Su curpa ariba e crus; pa asina libra di nos picanan nos por biba awor den husticia y segun e boluntad di nos Tata Celestial, na Kende ta pertenece gloria y alabansa pa semper.
Pero si bo ta un persona cu te na e momento aki di bo bida, bo no a wordo convenci di pica y di husticia y di huicio; ta nifica cu te na e momento aki, bo ta bou di e sentencia di condenacion. Pa ta pertenece na un of otro religion no ta e contesta. Cu miedo francamento mi mester menciona loke Scritura ta siña nos, y asta for di boca di Señor Jesus Su mes; cu hopi hende religioso cu a confia den nan religion, lo ta condena pa eternidad. Den Mateo capitulo siete y ver 21 padilanti, Jesus ta bisa lo siguiente: "No ta tur hende cu ta bisa na Mi; Señor, Señor; lo drenta e Reino di cielo, ma solamente esun cu hasi e boluntad di Mi Tata Kende ta den cielo. Hopi lo bisa Mi ariba e dia ey, Señor, Señor, nos no a profetisa den Bo nomber, y saca demoñonan den Bo nomber, y haci milagernan? E ora ey lo Mi bisa nan claramente; nunca mi a conoce boso. Bai for di Mi, boso hasidornan di maldad."

Amigonan di tur edad, Señor ta yama awe na tur hende na tur parti, pa nos repenti y kere den Su Yiu nos Señor Jesus. Pasobra ta pa medio di Jesus, Dios lo huzga henter mundu cu husticia, y no pa medio di religion of ki grupo of ki esaki of esaya.
Lesa por fabor den Echunan 10:34-43, y tambe Echunan 17:29-31. Lesa y pidi Señor di henter bo curason. E ta sperando pa bo.
Nos email adres ta: bbhenriquez@setarnet.awe

Monday, September 22, 2008

E CURASON - continuacion


Pakico tin tanto maldad asina den mundu? Pakico tanto guera, matamentu, krueldad y tur forma di inhusticia? Segun Scritura, tur e maldadnan ey ta sali for di e curason di hende. For di e principio cu Dios a crea hende den Su imagen y Su Semehansa, El a dun’e un mandamento cu e spiertamento aki; cu e dia cu e desobedece, e lo muri sigur. (nos garage natural!!>>>>>>>

E prome hende a desobedece Dios, y a scucha na e Diabel, y for di e momento ey morto a drenta, y hende a perde comunion cu Dios. Sinembargo Dios a duna e promesa aki, (mientras cu E tabata reprende e colebra cu tabata representa e Diabel of Satanas). "Lo Mi pone enemistad entre abo y e mohe, y entre bo simia y su simia. E lo herida bo cabes, y abo lo herida Su hilchi." Aki anto nos ta haya un di e prome promesanan di nos Salbador Jesus.
Awe despues di miles di añanan, nos ta bibando den e periodo di tempo, cu e Salbador a bini y a pachura e cabes di e colebra biew cu ta e diabel y satanas. Lesa sin falta, e capitulo 12 den e buki di Rebelacion tocante e colebra di cual nos ta lesa den Genesis. Sinembargo, for di e momento ey, cu e prome hende a desobedece Dios, pica a drenta den mundu y hunto cu pica; morto. Y asina morto a pasa na tur hende, pasobra tur a peca. Romanonan 5:12. Nos por descuti y reclama y pleita tocante e doctrina aki; pero e berdad ta cu no ta existi ningun hende den e mundu aki cu nunca a peca. Segun Scritura, tur hende a peca y ta falta e gloria di Dios. Romanonan 3:23. Pero nos por puntra: Den ki sentido of di ki manera y con nos por comprende cu Jesus a pachura e cabes di e diabel?
Amigonan, e contesta ta cla y sigur y ta irevocabel y ta scirbi pa nos den e Beibel. E ta sirbi cu e proposito pa duna nos bida eterna si nos obedece e Evangelio. Evangelio ta nifica: "Bon Noticia", y e bon noticia ta cu Cristo a muri pa nos ariba un crus. Beibel ta bisa nos clarisimo cu El a tuma of carga nos picanan den Su curpa ariba e crus; pa nos libra di picanan por biba pa husticia; y pa medio di Su heridanan nos a worde cura. Lesa 1 Pedro 2:24.

Pues cu e ta Dios Su boluntad di amor y di misericordia na cada persona cu ta lesa e mensahe corto aki, pa bo sabi cu Dios ta stima bo, y E no kier pa bo bai perdi, pero pa cada uno di nos por repenti y admiti cu nos ta un pecador, y pone nos fe den Esun cu a muri den nos lugar ariba un crus. Ma e Tata a lanta Jesus for di morto despues di tres dia den graf. Di e manera ei, e Yiu di Dios a pachura e cabes di e colebra segun Scritura. Di ningun manera esey por nifica cu Satanas no tin poder pa mata y pa destrui awe. Beibel ta bisa hopi cla, cu henter mundu, of sea humanidad cu no ta kere di curason den Señor Jesus; ta drumi den e malbado, of sea bou di su control. 1 Juan 5:19

Beibel ta bisa: "E palabra ta serca bo, den bo boca y den bo curason, y cu si bo confesa Señor Jesus cu bo boca y kere den bo curason cu Dios a lant’E for di e mortonan, lo bo ta salba. Pasobra cu curason hende ta kere pa haya husticia, y cu boca e ta confesa pa haya salbacion. Romanonan 10:8-13.


Danki pa lesa e mensahe aki. Si bo a worde bendiciona of spierta, laga nos sabi esey dor di scirbi nos na: bbhenriquez@setarnet.aw

Tuesday, September 9, 2008

E CURASON

Kico Beibel ta siña nos tocante curason di e sernan humano? Masha hopi mes; pero no den e sentido fisical, sino spiritual. Manera nos sabi, e asunto di curason humano ta bon conocí tur parti di mundo. Y si e curason stop di funciona ta nifica morto di e persona. Tin te asta especialistanan di curason cu por splica detayadamente con e curason ta funciona. Ma e scrituranan cu ta duna na nos via inspiracion di Dios Su mes pa medio di Spirito Santo, ta papia cu nos den e sentido spiritual tocante e curason. Ehempel: Jeremias 17:9,10 ta bisa esaki: "E curason ta engañoso mas cu tur otro cos, y totalmente corupto; ken por comprende? Ami e Señor ta scrudiña e curason, y ta examina e mente, pa recompensa cada hende di acuerdo cu su conducta, di acuerdo cu loke su echonan ta merece."
Ta cla pa mira aki, cu e Señor no ta papia tocante e curason di carni y sanger, sino di e totalidad di e potencial di e naturalesa humano, incluyendo particularmente e mente. P’esey cu e Profeta no a bisa cu ta e curason di e Judiunan, of di e paganonan etc; ma simplemente e ta bisa: "e curason" y tambe e "mente". Tanta e curason y cerebro ta miembronan masha importante den cada ser humano sin importa rasa ni colo ni nada otro.

Pero ya mi a menciona cu aki nos tin di hasi cu e ser humano completo. Den Scritura nos ta lesa di e curason , e mente, e spirito humano, e alma y e consenshi. Tur eseynan ta mescos den cada uno di nos. P’esey, e declaracion di e profeta tocante e curason corupto y engañoso ta enclui nos tur sin excepcion. Ademas tin hopi otro Scrituranan cu ta papia tocante e mes un facto ey. Den Mateo capitulo 15, e Señor ta reprende algun persona religioso masha fuerte mes. Anto e Apostel Pedro a pidi Jesus pa e splica e comparacion na nan. Jesus su contesta tabata lo siguiente: "Ainda boso ta sin comprendemento?" "Boso no ta comprende cu tur loke ta drenta e boca ta bai den e stoma, y despues ta sali for di e curpa? Ma e loke ta sali for di e boca ta sali for di e curason, y esey ta haci un hende impuro. Pasobra for di e curason ta sali mal pensamento, matamento, adulterio, inmoralidad sexual, ladronicia, testimonio falso, calumnia. Eseynan ta loke ta haci un hende impuro, pero come sin laba man no ta hasi hende impuro."

Amigonan di tur edad; e maldadnan ey menciona pa Señor Jesus, ta sali for di e mente di nos como sernan humano. Nos ta nace cu e naturalesa pecaminoso ey, cada uno di nos. Ta p’esey Cristo a bini na mundo den un curpa humano mescos cu nos, pero sin e naturalesa di pica ey. El a nace pa e obra di e Spirito Santo for di un birgen cu yama Maria. Y E ta e unico den un curpa humano cu a risisti contra tur e maldadnan menciona y tur otro no menciona sin hasi pica. P’esey E tabata e Unico cu por a duna Su bida den lugar di henter humanidad dor di a tuma den Su curpa ariba e crus, e pica di nos tur. Y e Tata a lant’E na di tres dia victorioso, y e victoria ey tabata pa nos. Awor nos por haya pordon di tur pica si nos repenti y acept’E como nos Salbador personal.
Pa Bicento Henriquez

Wednesday, August 27, 2008

Nos lugar di biba - Washington 23A




Bida of Morto (conclucion)

Amigonan y stimanan; nos tabatin dos mensahe corto tocante bida of morto, y awe nos ta conclui e tema aki. Esey no ta nifica cu nos a bisa tur loke tin di bisa relaciona cu bida of morto, pasobra tur mensahe biblico di un of otro manera ta den e contexto di bida eterno of perdicion eterno. Jesus a bisa e siguiente palabranan aki, mientras cu E tabata den un curpa humano aya na Palestina. "Ami ta bisa boso e berdad, kende cu tende Mi palabranan y kere Esun cu a manda Mi tin bida eterno y lo no ta condena; el a pasa for di morto na bida." Juan 5:24

Tempo cu Jesus a bisa e palabranan ey, E tabata den un curpa humano mescos cu esun di nos, cu excepcion di e naturalesa pecaminoso. Pero, mescos cu e prome hende Adam por a wordo tenta pa desobedece Dios Su mandamento, mescos Señor Jesus tambe por a wordo tenta ora E tabata den un curpa humano mescos cu nos. Y mescos cu nos por sinti dolor y calor y friu y hamber, etc., mescos Señor Jesus tambe por a sinti mescos cu nos. Y mescos cu nos por wordo tenta pa hasi loke ta malo, nos Señor tambe a wordo tenta.

Den Hebreonan nos ta lesa lo siguiente: "P’esey siendo cu nos tin un gran Sumo Sacerdote Kende a bai dor di e cielonan, Jesus e Yiu di Dios, laga nos tene firme na e fe cu nos ta profesa. Pasobra nos no tin un Sumo Sacerdote kende ta incapas pa simpatisa cu nos debilidadnan, ma nos tin Un kende a wordo tenta den tur manera, mescos cu nos ta ser tenta, ma sin pica, (of sinhasi pica)." Hebreonan 4:14-16.

Den e mes un buki ey nos ta lesa: "Siendo cu e yiunan ta di carni y sanger, E tambe a comparti den nan humanidad, di manera cu dor di Su morto E por destrui esun kende tabatin poder di morto, esta, e diabel, y duna libertad na esunnan cu henter nan bida tabata teni den sclabitud dor di nan miedo di morto… Pa e motibo aki E mester a wordo haci mescos cu Su rumannan den tur manera, pa asina E por bira un Sumo Sacerdote misericordioso y fiel den sirbimento na Dios, y cu E por haci reconciliacion pa e picanan di e puebel. Pasobra E mes a sufri ora cu E tabata wordo tenta, E por bini na yudansa di esunnan cu ta wordo tenta." Hebreonan 2:14-18
Den e Scrituranan ey tin masha hopi berdadnan spiritual involvi cu no ta facil pa pone riba papel. Nos ta combida sinceramente na cada uno cu ta lesando e mensahenan aki, pa bo mes personalmente lesa den bo Beibel e scrituranan aki. Y nos ta enfatisa cu cada uno di nos mester haci esey cu oracion y confesion di nos ignorancia, pa Señor ilumina nos mente y obra den nos spirito y den nos ser completo, pa nos por comprende y kere y ricibi e bendicionnan indescribibel cu e Scritura ta contene.

Pues, te aki pa awe. Te otro ocacion. Corda cu nos adres di email ta: bbhenriquez@setarnet.aw Nos lo tin deseo di tende cu bo ta lesando nos blog, y nos ta contento tambe pa cualke sugerensia, pregunta of palabra di encurashamento.
Bicento y Betty Henriquez, Washington

Monday, August 25, 2008

BIDA of Morto #1


Kerida lesador di nos blog, bon tardi! Mi atencion a wordo hala cu e prome mensahe di "Bida of morto a worde poni den nos blog Ingles. P'esey mi no por a hay'e!! Wel, wel, dispensa mi e error aki. Pues, e mensahe aki ta e prome riba e topico aki, anto esun cu ta prome cu esaki realmente ta sigui esaki. Di tur manera tur dos ta aki awor. Betty

Beibel ta contene e historia di e creacion di mundo, y di tur loke tin den dje. Tambe nos tin e relato tocante e creacion di e prome sernan humano. Prome Dios a crea e homber, y despues Diosa a crea e mohe for di curpa di e homber. Segun Genesis 1:27, "Dios a crea hende segun Su mes imagen; segun e imagen di Dios. El a crea hende; homber y mohe El a crea nan." Anto nos ta lesa den Genesis 2:16, 17; cu e Señor a ordena e homber bisando, cu e ta liber pa come di tur e palonan den e hofi, cu excepcion di e palo di conocemento di bon y malo, pasobra si e come di dje, bo lo muri sigur. Y si nos ta sigui lesa, nos lo mira cu con apesar di e spiertamento di e Señor Dios, tog e homber a come di e fruta; aunke ta e mohe a persuadi’e. Y for di e momento ey morto a drenta, y asina morto a pasa na nos tur, pasobra nos tur a peca y ta falta e gloria di Dios.
Pa un splicacion hopi cla tocante e tema aki di pica universal, lesa pa fabor e capitulo sinco di e buki di Romanonan. Si bo ta un persona cu tin e deseo intimo den bo ser, pa por ta den bon relacion cu nos Tata Celestial; anto cu bo mes boca y di curason pidi e Señor pa E yuda bo comprende y obedece. Comprende esaki bon amigonan; cu ta nos tur ta nace for di e barica di nos mama, cu e naturalesa di pica. Ta pa e motibo ey, cu for di e tempo cu e prome hende a cai den pica, ya Dios a priminti un Redentor. Y e Redentor aki ta e Jesus cu a nace for di un birgen den un curpa mescos cu esun cu nos tin, pero sin e naturalesa di pica. Un otro scritura sumamente importante tocante e tema aki di bida y morto, ta haya den 1 Corintionan 15:45-49. Aki Señor ta bisa nos door di e Apostle Pablo, cu ta para scirbi cu e prome Adam a bira un ser of un persona bibo, y cu e ultimo Adam a bira un spirito cu ta duna bida. E ultimo Adam aki ta nos Señor y Salbador JesuCristo. Pa E por a duna nos bida, e mester a tuma un curpa mescos cu esun di nos, pero sin e naturalesa di pica cual tur otro ser humano tin. Anto El a carga e pica di henter humanidad den Su curpa ariba e crus. Pues, El a muri den nos lugar. Y e Tata a lant’E for di morto y a ricibi E den gloria.
Pesey, O Aruba, Bonaire y Curaçao; salbashon ta haya solamente pa medio di fe den e Jesus aki manera Scritura ta bisa: "Y no tin salbacion den ningun otro, pasobra bou di cielo no tin ningun otro nomber cu ta duna na hende, pa medio di cual nos por ser salba." Echunan 4:12. Esun cu tin e Yiu tin e bida, esun cu no tin e Yiu di Dios, lo no mira e bida, ma Dios Su rabia lo keda ariba dje.
Nos lo continua si Señor permiti; y no vacila y scirbi nos cu bo pregunta y observacionnan na: bbhenriquez@setar

Friday, August 22, 2008

BIDA OF MORTO – continua
Segun Scritura amigonan, den cada momento cu bida humano ta continua ariba e mundo aki, tin esunnan cu tin e bida eterno menciona hopi bes den Scritura; ma tambe na e mes un tempo tin esunan cu no tin e bida ey. Tambe Scritura ta menciona cu si un persona no tin e bida eterno aki, e ta morto den su picanan. Ta hopi importante pa nos comprende cu Scritura no ta bisa cu ta e personanan cu ta comete crimennan manera matamento di hende, of ladronicia of abuso na tata of mama, of crueldad di un esposo pa cu su esposa of vice versa, etc., etc. Ma Scritura ta menciona masha cla, cu si un persona no ta kere e Evangelio, e persona aki ta morto den su picanan.

Ata aki algun ehempel for di Scritura. Romanonan 6:23 ta bisa lo siguiente: "Pasobra pago di pica ta morto, ma e regalo di Dios ta bida eterno den of dor di Cristo Jesus nos Señor." Pone bon atencion cu e Scritura aki no ta bisa cu e pago di picanan ta morto, sino cu: E pago di pica ta morto. E pica cu ta ser menciona ey, ta e naturalesa pecaminoso cu nos tur a nace cu ne. Y esey ta e motibo pakico nos ta comete tur sorto di picanan. Ta berdad cu un persona por ricibi un bon educacion sea na cas of na cualke otro luga sea cu ta religioso of no religioso. Pero, e naturalesa di pica nunca por ser kita dor di ningun forma di educacion.

Pakico? E contesta ta, cu e pago di pica ta morto. Nos mester muri pa motibo di e naturalesa di pica ey. Siendo asina, ta nifica cu ningun ser humano por scapa e condenacion di morto, pasobra nos tur a nace cu e naturalesa di pica ey cu ta menciona masha cla den Scritura.
Pero amigonan, aki e bon nobo ta bin aden. Den e prome mensahe mi a menciona cu e unico persona cu a nace sin e naturalesa di pica ey, ta nos Señor, e Salbador JesuCristo. Pakico anto El a muri, aunke cu E tabata sin pica? Amigonan, henter Scritura ta duna testimonio, cu ta pa salba pecadornan El a bin den mundo. Y cu ta pa nos picanan El a wordo mata riba e cruz. El a carga nos picanan den Su curpa riba e cruz, pa nos libra di picanan por biba pa husticia y pa medio di Su heridanan nos a wordo cura.

Pesey cu awor nos mester repenti di nos picanan, y kere den nos curason cu Dios a lamt’E for di morto pa nos por ricibi pordon. Pasobra ta cu curason un persona ta kere y ta hustifica, y e ta cu su boca e ta confesa y ta salba. Manera Scritura ta bisa, ken cu confia den djE, lo nunca wordo poni na berguensa. Lesa por pabor Romanonan 10: 1-13 .

Saturday, August 2, 2008

E SPIRITO SANTO

Esaki lo ta e di tres y ultimo mensahe corto tocante di e Spirito Santo di Dios. Ma esey no ta nifica cu mi a siña tur loke ta ensera den esun Doctrina aki. Mi por asta bisa cu e Doctrina aki , ta pertenece na e loke e Apostel Pablo a menciona varios bes como e Misterio di Dios; y tambe e Misterionan di Dios. Sinembargo e mes Apostel ta declara cu e loke tabata un misterio scondi bou di e Testamento Bieu, a wordo revela y hasi cla den e Testamento Nobo. Na prome lugar e Apostel ta menciona e misterio di e boluntad di Dios den Cristo, cu nunca antes tabata revela manera awor si e ta mediante e Spirito di Dios.

Den e buki di Efesionan nos ta lesa cu: "den Cristo nos tin redencion mediante Su sanger esta pordon di picanan, di acuerdo cu e rikesa di Dios Su gracia, cual El a basha abundantemente ariba nos cu tur sabiduria y comprendimento. Y El a haci e misterio di Su boluntad conoci na nos, di acuerdo cu Su bon placer y proposito den Cristo…. pa trece loke ta den cielo y ariba tera hunto bou di un cabes, esta Cristo." Y e ta continua bisando: "Lesando esaki anto, boso por bin comprende con leu mi conocemento ta den e Misterio di Cristo, cual no a wordo haci conoci na hende den otro generacionnan, manera awor a wordo revela door di e Spirito, na Dios Su Apostelnan santo y e profetanan. E misterio ta cu pa medio di e Evangelio, e paganonan ta eredero hunto cu Israel; miembronan hunto den e promesa den Cristo."
Amigonan, e misterio di cual nos ta scirbiendo aki cu Pablao ta yama e rikesanan insondabel, of sin fin, incalculabel, di Cristo, tabata teni secreto den Dios e Creador di tur cos. Y Su proposito tabata cu awor dor di e Iglesia, e sabiduria multiforme of supremo di Dios, por worde hasi conoci na e gobernantenan y autoridadnan den e lugarnan celestial, di acuerdo cu Su propositonan eterno, cual El a cumpli den Cristo Jesus nos Señor. Ta den e Jesus aki, y pa medio di fe den djE, nos por yega serca Dios, cu libertad y confiansa. Tuma bo Beibel, y lesa capitulonan uno dos y tres di Efesionan, y tambe Colesensenan 1:24-29, y Col. 2:1-5. Tuma tempo pa bo lesa tur e scrituranan ey, pidiendo Señor na e mes un tempo den nomber di Jesus, pa e Spirito di Dios duna bo comprendemento den e Misterio di Dios revela den Cristo. E proposito ta, pa nos repenti for di nos bida di pica, y ricibi pa fe pordon di tur pica, y di e manera ey pasa fo’i morto na bida y for di e poder di Satanas, na Dios.

Amigonan di tur edad; segun Scritura, motibo pakico Dios a manda Su Unico Yiu den mundo, y permiti pa El a sufri asina tanto na man di pecadornan; ta pasobra cu E ta stima nos, y no ta Su boluntad pa uno di nos bai perdi, ma pa nos tur bini na e lugar unda nos ta repenti, cu yudansa di e Spirito Santo. Lesa pa fabor e siguiente Scrituranan aki cu oracion den bo curason. 2 Pedro 3:9; Lucas 5:31,32; Lucas 24:45-49 y Echunan 17:30,31.
Prepara pa Bicento y Betty Henriquez

Tuesday, July 22, 2008

SPIRITO SANTO - continua

E SPIRITO SANTO – continua

Manera nos sabi, e doctrina tocante e Spirito Santo di Dios ta ser haya den tur religion cu ta relaciona cu Cristianismo. Y sin lugar na duda, e Spirito Santo di Dios ta na manera di bisa cu tur reverencia: Ocupando un lugar mes importante cu Dios e Tata, y cu e Yiu di Dios nos Señor y Salbador Jesus, den Scritura. E Spirito di Dios ta wordo menciona for di cuminsamento di Scritura Santo den Genesis 1:3, unda nos ta lesa cu "E Spirito di Dios tabata moviendo ariba e awanan." Y e mes Spirito aki nos por lesa di djE den e utlimo buki di Scritura Santo. Den Rebelacion 22:17, nos ta lesa lo siguiente: "E Spirito y e bruid ta bisa, Bini! Y laga esun cu tende bisa, Bini! Y esun cu tin sed, laga e bini; y ken ku desea, laga e tuma e awa di bida pornada."
Den otro Scritura nos por lesa lo siguiente for di nos Señor Jesus: "Ariba e ultimo, y e dia dia mas grandi di e fiesta, Jesus a lanta para y bisa cu bos duro" "Si un hende tin sed, laga e bin serca Mi y bebe. Kende cu kere den Mi, manera e Scritura ta bisa, riunan di awa bibo lo brota for du su paden."
Esaki El a bisa di e Spirito, cual esunnan cu ta kere den djE, lo ricibi despues. Te na e tempo ey, e Spirito no a wordo duna ainda, siendo cu Jesus no a wordo glorifica ainda. Lesa Juan 7:37-39. Si ta posibel lesa e traducion na Ingles, Spaño y Hulandes pa mas claridad. Ta intersante y hopi importante pa nos por comprende e ministerio di e Spirito Santo actualmente tanto ta den henter Antiyas como aki na Aruba. Palabranan comun ta wordo usa den Scritura relaciona cu e obra di e Spirito di Dios. Ehempel: E por wordo hasi tristo, y por ser risisti y desobedeci. E Spirito no ta papia cu nos awe cu bos audibel; y lo no trece otro doctrina cu no por ser haya den Scritura Santo. E Scritura cu nos a mira den Juan 7:37-39, ta bisa nos cu e tempo ey, e Spirito no tabata duna ainda, pa motibo cu e tempo ey Señor Jesus no tabata glorifica ainda. Pero awe esey no ta e caso, pasobra awe nos por bisa cu tur confiansa, cu nos Señor Jesus ta glorifica door di Dios e Tata. Pues, awe si e Spirito aki ta wordo duna na cada persona cu tende e Evangelio y kere di tur su curason den e Yiu di Dios cu a muri ariba un crus pa nos picanan, y a wordo lanta for di morto na di tres dia door di e Tata. Ademas Dios e Tata a hals’E na e lugar di mas halto y a dun’E e nomber cu ta ariba tur nomber, cu pa e nomber di Jesus, tur rudia mester dobla, den cielo y ariba tera, y tur lenga lo confesa cu JesuCristo ta Señor, pa e gloria di Dios e Tata. Ta e Jesus aki nos ta presenta na cada uno cu ta lesa e mensahe aki. Y cada persona cu repenti y kere di curason den djE, ta ricibi pordon di picanan y bida eterno den Su nomber. Y for di e momento ey e persona aki ta ricibi e Spirito Santo den su bida como seyo y garantia di bida eternpo y un curpa glorifica na e dia di resureccion di tur esunnan cu ta kere.


Amigonan, mi ta reconoce y ta admiti y confesa, cu den Beibel tin hopi declaracionnan menciona pa e Profetanan y e Apostelnan y asta pa nos Señor Jesus Su mes, cualnan ami personalmente no por splica, pasobra cu mi no ta comprende nan completamente, pero pa gracia di Dios y cu yudansa di e Spirito di Dios mes, mi ta kere nan. Y e doctrina di e Spirito Santo di Dios ta uno di nan. Laga nos mira un rato, e obra di e Spirito, den e bida di nos Señor Jesus Su mes, relaciona cu Su encarnacion. Den Mateo, capitulo uno y versnan 18-25, nos por lesa tocante e manera cu Jesus a wordo consebi den e curpa di Maria, Kende tabata compremeti cu Jose. Aki nos por lesa masha cla mes, cu ta e Spirito Santo a obra e milager aki. Lesa di e mes un milager aki den e Evangelio di San Lucas 1:26-38. Despues di Jesus Su nacemento nos por lesa den Lucas 2:40-52 cu El a crece y bira fuerte; y cu E tabata yena cu sabiduria, y cu e gracia di Dios tabata ariba djE. Y cu El a crece den sabiduria y statura y den gracia cu Dios y cu hende.

Despues di esey nos ta lesa di Jesus te e dia di Su boutismo den Jordan door di Juan e Boutista. Aki atrobe nos ta lesa cu e Spirito Santo a baha riba Jesus den e forma di un paloma. Lucas 3:21,22. Despues di Su boutismo, e Spirito Santo a guia Señor Jesus den e desierto, unda El a wordo tenta pa cuarenta dia door di e diabel.

Despues di Su tentacion den desierto, El a bolbe den e poder di e Spirito pa Galilea, y Su fama a cuminsa plama den tur e districtonan rond. Anto El a bai Nasaret unda El a lanta para pa e lesa e Scritura di e profeta Isaias cu ta bisa: " Spirito di e Señor ta ariba Mi, pasobra El a hunta Mi pa predica e bon nobo na e pobernan. El a manda Mi pa proclama libertad na e prisoneronan y restoracion di bida na e ciegonan, pa liberta e opriminan, pa proclama e aña agradabel di Señor."
Amigonan; si e Spirito Santo tabata asina importante den e bida y ministerio di Señor Jesus Su mes; cuanto mas nos tin mester di Su guiansa y yudansa y consuelo!!

Corda cu nos tin deseo di tende algo for di bo cu ta lesando nos Blog! Tuma un rato asina y manda nos un palabra di encurashamento of por ta bo tin un pregunta cu bo tin gana pa haya contesta, etc. Realmente, via email nos a tende di un cu a scirbi cu el a wordo encurasha y spierta door di e blog cu el a lesa! Wel, siguramente, esey ta un encurashamento pa nos tende esey!

Bicento a haci 85 aña di edad dia 19 di Juli! E famia y e rumannan na Iglesia Evangelica di Oranjestad a pone hunto un bunita sirbishi di gradisimento y alabansa na nos Señor JesuCristo dia 20. Podise otro biaha lo mi nos lo comparti algo foto di e ocacion aki!! PUES, scirbi nos awe sin falta.... bb.henriquez@setarnet.aw

Monday, July 7, 2008

E SPIRITO SANTO

Bicento y Betty cu nan dos prendanan "Tanishka y Lixiëre" - yiunan di Bicento su nieta!!

Nos ta sigui awor cu nos tema: E Spirito Santo
Den e buki di Efesionan 4:30 ta para scirbi lo siguiente: "Y no haci e Spirito Santo di Dios tristo, pa medio di Kende boso a wordo seya pa e dia di redencion."
E Apostel Pablo, inspira y guia pa e Spirito Santo mes, a scirbi e spiertamento aki, na tur e berdadero keredornan na Efesio. Y e spiertamento aki ta pa cada uno di nos tambe cu ta profesa fe den nos Señor Jesus. Nos por comprende hunto cu otro scrituranan, cu e Spirito Santo aki Su mes ta e seyo. Den Efesionan 1:13, e Apostel ta bisa nos lo siguiente: "Den djE boso tambe a confia, despues di a tende e mensahe di berdad; e Evangelio di boso salbacion; den Kende tambe despues di a kere, boso a wordo seya cu e Spirito Santo di promesa, Kende ta e garantia di nos erencia te na e redencion di e posecion di Dios, pa e alabansa di Su gloria." Ta hopi siñansa mes tin den e poco palabranan aki.
Pa cuminsa; e Apostel ta menciona na prome lugar e Judiunan cu a kere e Evangelio den vernan 11 y 12. Anto e ta sigui cu esnan cu no ta Judiu den vers 13. Nos por mira cla anto cu awe no tin diferencia entre Judiu y no Judiu. Den Efesionan 2:11-18, e Apostel ta splica masha cla mes cu e muraya cu tabata separa nos y e Judiunan, a wordo basha abou door di Señor Jesus, mediante Su morto riba e crus. Segun Scritura cada persona cu a pone su fe den Cristo despues di a tende e palabra di berdad, esta e Evangelio; ta ricibi e Spirito Santo for di e momento ey. Y e Spirito aki ta e garantia pa e dia di redencion. Di manera cu si un hende no tin e Spirito aki, e no tin speransa di e redencion cu ta menciona aki. E doctrina aki di Redencion, tin dos aplicacion importante pa cada pecador, cu a tende e Evangelio, y a comprende y a obedece door di a repenti y kere den Señor Jesus.
E prome aplicacion ta pa awor mes den e bida aki. E palabra: "REDENCION", ta nifica cu nos a wordo cumpra. Of sea cu un preis a wordo paga pa nos libertad. Tin varios scritura tocante e tema sumamente importante aki, esta e tema di Redencion. E Apostel Pedro ta scirbi lo siguiente: "Sabiendo cu boso no a wordo redemi cu cosnan cu ta ta perese, manera plata of oro, for di boso manera bano di biba cu boso a ereda di boso antepasadonan, ma cu e sanger precioso di Cristo, un Lamchi sin defecto y sin mancha."
Segun e scritura aki, ni oro ni plata por cumpra un hende su libertad for di poder di e maligno. Ma den 1 Cor. 6:19,20, nos ta lesa lo siguiente: "Boso no sabi cu boso curpa ta un tempel di e Spirito Santo, Kende ta den boso, kende boso a ricibi for di Dios? Boso no ta pertenece na boso mes; boso a worde cumpra pa un preis. P’esey glorifica Dios cu boso curpa."
Pues, segun Scritura, e pecador cu kere e Evangelio ta pertenece na Dios awor caba den e bida aki, y cu for di e momento cu un persona a kere e ta pertenece na Dios, y cu e Spirito Santo di Dios ta biba den cada uno cu ta kere pa duna nos victoria ariba pica awor den nos bida diario si nos obedece.
Ma e di dos aplicacion ta cu e mes un Spirito aki ta e garantia pa e redencion final. Y di esaki nos por lesa den Romanonan 8:18-27. Aki nos por lesa cu aunke cu awor nos tin e prome frutanan di e Spirito, toch nos ta keha of suspira paden di nos curpa mientras cu nos ta sperando ansiosamente pa nos adopcion como yiunan, esta e redencion di nos curpa. Y e ta sigui bisa cu ta den e speransa aki nos a wordo salba… y siendo cu nos ta sperando pa e loke nos no tin ainda nos ta spera pa esey cu pasenshi. Ademas e Spirito di Dios ta yuda nos den nos debilidad, y ta intersede pa nos cu suspiro cu palabranan no por expresa, etc., etc. Lesa e porcion aki den bo Beibel pa bo mes. E ta hopi importante pa cada uno di esunnan cu ta kere e Evangelio, pasobra diariamente nos ta experimenta e berdadnan aki.
Y sea sigur di esaki amigonan cu ta lesando e notanan aki; cu e persona cu no tin e Spirito Santo, no ta pertenece na Dios. Y cu ningun hende por ricibi e Spirito aki sino pa medio di fe den nos Señor y Salbador JesuCristo. Cu tur reverencia mi ta bisa esaki basa ariba e Palabra di Dios. Lesa pa fabor, e capitulo ocho completo di Romanonan. Ey e Spirito Santo ta ser yama: E Spirito di Dios, e Spirito di Jesus; y ademas e ta bisa tambe cu e persona cu no tin e Spirito di Cristo, e persona aki no ta pertenece na Cristo. Lesa e capitulo aki cu oracion, y scirbi nos pa laga nos sabi cual ta bo opinion; of bo creëncia of bo fe.

Esaki ta nos direccion na cual bo por scirbi : Bicento & Betty Henriquez, Washington 23A, Aruba. Of via email bo por scirbi na: bbhenriquez@setarnet.aw

Wednesday, June 18, 2008

DIA DI HUICIO - continua

Esaki ta un foto saca na Bonaire dia 10 di Juni. Autor (Betty Ratzlaff-Henriquez) di e diccionario Papiamento/Ingles y Ingles/Papiamento su di dos edishon, ta entregando e prome copia di e diccionario na e Gezaghebber H. Domaccasse. Pa mira mas foto y informacion por hay'e na: www.PapiamentuDictionary.com

Nos ta sigui awor cu nos continuacion ariba e topico: E DIA DI HUICIO.
Den e ultimo mensahe nos a scirbi un poco tocante e dia di huicio cu ta pa bin. E huicio di cual nos ta scirbiendo aki, ta nifica huzgamento; e sentencia final cu Dios ta duna mediante nos Señor y Salbador JesuCristo. Scritura ta hopi cla tocante e huicio final aki, tanto ta den e Testament Bieu y e Testament Nobo. E profeta Daniel ta scirbi di dje bisando: "Lo tin un tempo di angustia manera nunca tabatin for di tempo cu tabata existi un nacion te na e tempu ey. Ma na e tempu ey bo puebel, cada uno cu su nomber ta haya scirbi den e buki, lo wordo rescata. Multitudnan cu ta drumi den e stof di tera lo lanta:algun pa bida eterno, y otronan pa berguensa y confusion eterno. Esunnan cu ta sabi lo briya manera e splendor di e cielonan, y esunnan cu ta guia hopi na husticia, manera e streanan pa semper y semper." Lesa 12:1-3
Aki e profeta Daniel ta bisa nos tocante esunnan cu nan nomber ta scirbi den e buki, y cu nan lo ta rescata. Di ki buki e profeta ta papiando aki? Por ta den buki di religion? Of di un of otro asina yama Iglesia? Danki na Señor nos Dios cu e contesta ta den Beibel. Y pa sea franco, y sumamente cauteloso mi por bisa cu tur reverencia pa e Nomber di Señor, cu aki nos tin di hasi cu algo sumamente solemne pa henter mundo, encluyendo cada Antiyano y Arubano. E berdad ta cla y directo y ta scirbi como e advertencia di mas solemne posibel; ma na e mes un tempo como un invitacion y spiertamento pa nos repenti y kere e Evangelio. E Evangelio cu mi ta papia di dje ta, e bon noticia di pordon y bida eterno pa cada persona cu ta repenti di su picanan, y kere di curason den Esun cu a muri y a resucita pa nos. E no por ta mas cla cu e loke ta ser bisa ey den Revelacion 20:15 "Y si uno su nomber no wordo haya scirbi den e buki di bida, el a wordo tira den e tanki di candela." Den e Nomber di Señor Jesus, Kende a entrega Su mes pa nos, mi ta puntra na cada uno cu ta lesa e mensahe aki. Bo tin e speransa cu bo nomber ta scirbi den e buki di bida? Algun por hasi e pregunta: Y ta kico mi mester hasi pa mi nomber por ta scirbi den e buki ey? E contesta ta masha cla den Beibel, ma mi no ta bisa cu e ta facil, pasoba e no ta.
Uno di prome obstaculonan ta: nos naturalesa pecaminoso. Nos tur, pues cada uno di nos ta nace for di barica di nos mama, cu e naturalesa di pica. Y segun cu nos ta crece nos lo experimenta esey mas y mas. Te asta si nos mayornan ta berdadero keredornan den nos Señor JesuCristo, y cu nan nomber ta scirbi den e buki di bida; ainda nos nan yiunan lo nace cu e naturalesa di pica. Mi sabi cu e declaracionnan aki ta hopi pisa, pero tuma bo Beibel y lesa pa bo por comprende. Tambe bo por scirbi nos na e direccion cu nos ta scirbi na final di cada mensahe.

Un otro obstaculo, ker’e of no ta; religion. Religion ta un sistema religioso den cual e persona por pone su confiansa, y ta spera cu despues di su morto su religion lo sirbi manera un passport pa drenta Reino di Cielo. E siñansa ey no ta existi den Beibel, pero sinembargo multitudanan den henter mundo ta confia cu un dia nan religion ta nan salbacion. Pa e autoridad di e Palabra di Dios mi por bisa cu tur respet pa tur e almanan precioso aki den Antiya Hulandes y Aruba; cu e enemigo principal di humanidad cu yama e diabel y satanas, no tin problema cu religion; pero si cu e Evangelio di gracia di Dios cu ta ser proclama den henter mundo na tur nacion prome cu e fin yega. E Evangelio no ta un religion, sino e bon noticia di pordon y bida eterno mediante repentimento pa nos picanan y fe den nos Señor Jesus, Kende a muri y resucita pa nos, pa cada uno di nos. Pero ta nos mes personalmente mester repenti di pica y ricibi E como nos unico Salbador personal. Ningun otro ser humano por haci esey pa nos.

Un otro obstaculo masha peligroso ta, negligencia of tardansa y posponementu. Nos a mira caba tocante dos obstaculo cu ta stroba nos di kere e Evangelio di gracia di Dios, cual ta e unico medio dor di cual nos nomber por ser haya den e buki di bida di e Lamchi. (Rebelacion 13:8). Pero lesa, por fabor, e capitulo 13 completo.
Nos a menciona e naturalesa di pica, pasobra masha masha hopi hende, homber y mohe, adulto y hoben, ta cai pa e pensamento cu ora un persona kere e Evangelio, e no por gosa bida mas, etc., etc. E manera di pensa ey ta un gran mintira, y e ta bini dor di e Maligno via nos naturalesa di pica. Hebreonan 11:24-26 ta bisa nos lo siguiente: "Pa medio di fe Moises, ora cu el a crece bira grandi, a nenga di wordo yama yiu di Farao su yiu mohe, scohiendo mas mihor pa sufri maltrato hunto cu e puebel di Dios, cu di goso di e placernan pasahero di pica, considerando e reproche di Cristo como rikesanan mas grandi cu e tesoronan di Egipto, pasobra e tabata mira padilanti na su recompensa." Tambe nos a mencion Religion como obstaculo pa kere e Evangelio. Por ultimo un otro obstaculo cu Satanas y e sistema di mundo y e carni di pica ta usa ta: Awor no, mas despues.

Amigonan, e decision ey ta resulta den perdicion eterno di multitudnan, pasobra mas tanto e despues ey, nunca ta yega. Segun Scritura, Awe y awor ta e tempo aceptabel, awe ta e dia di Salbacion. Lesa 2 Cor. 6:1,2 y 14-18
Scirbi y prepara pa Bicento y Betty Henriques, Washington 23A, Aruba
Scirbi nos libremente na e direccion aki:
Bicento & Betty Henriques,
Washington 23A, Aruba.
Tambe por yama nos na: (297) 587-7472

Wednesday, June 4, 2008

E DIA DI HUICIO

Nos tabatin dos mensahe tocante e tempo di cosecha, y awe nos mensahe ta bai tocante e Dia di Huicio cu por wordo yama tambe, e dia ultimo huicio, of e huicio final. Con cu nos yam’e, e dia ey lo yega sigur net manera cu e ta scirbi den Scritura Santo na varios luga. Segun Scritura, e personanan cu a muri den nan pica, lo wordo tira den e tanki di candela cu ta wordo yama tambe: "E di dos morto." Lesa pa fabor den e buki di Rebelacion 20: 11-15 y 21:1-8. Lesa e porcionnan ey cu tur reverencia, y nos ta conseha bo pa pidi na Señor pa E yuda bo comprende y pa bo obedece e yamada di Dios cu ta na tur hende den e Scrituranan ey. Sea sigur pa lesa nan. Sea sigur cu si te awe nunca bo a repenti di bo picanan, y kere di curason den Esun cu a carga nos picanan den Su curpa ariba e crus; cu bo ta inclui den e yamada di e Señor di Cosecha den e porcion di Scritura aki unda E ta bisa: "Ta cumpli. Ami ta e Alfa, y e Omega, e principio y e fin. Y esun cu tin sed, lo Mi dun’e di bebe for di e fuente di awa di bida, pornada, " etc., etc.

Amigonan, kendenan Dios ta stima cu un amor inexplicabel, ta awe y ta awor ta e tempo aceptabel, ta awe ta e dia di salbacion. Si bo a tende Su bos awe, no hasi bo curason duro. Uno di e bendicionnan increibel cu ta scirbi den Beibel ta esaki. Nos no mester spera pa e huicio ey di Dios, bibando dia tras dia un bida sin speransa, of ta confia ariba un speransa falso cu ta bini dor di siñadornan falso cu ta plama den henter mundo. Nos por scapa e huicio final ey cu lo ta e huicio di condenacion, awe y awor mes.

Bo lo puntra: Con esey por ta posibel? Con ami por scapa e huicio ey di condenacion? E contesta ta cla y sigur den bo Beibel, pasobra nos ta confia cu bo tin uno y cu bo ta les’e.
Hopi hende na Antiyas tin un Beibel, pero masha poco, of nunca ta habri e pa nan les’e of scucha kico Dios ta bisa nos den Scritura. Beibel ta bisa nos masha cla mes, cu fe ta bini dor di tendemento y tendemento pa medio di e Palabra di Cristo. (Romanonan 10:17) Aki e palabra di Cristo ta nifica e mensahe tocante Cristo (compara e versiculo 16) Y e mensahe tocante Cristo ta e Evangelio, of e bon noticia tocante Cristo. Y e bon noticia ey ta loke nos ta presenta na prome lugar den tur nos mensahenan. Nos ta combida cada uno cu tin e hamber y set di husticia den e intimo di bo spirito, pa bo habri bo curason na Señor Su mes; y manera cu El a bisa den un ocacion: "Tur loke e Tata duna Mi lo bin serca Mi, y esun cu bini serca Mi lo Mi no tira afo di ningun manera."

Awor lo mi bolbe na e declaracion cu mi a hasi tocante con nos por scapa di e huicio di condenacion awe mes, Scucha e palabranan aki di Señor cu El a laga pa nos tur. "Di berdad, di berdad, Mi ta bisa boso, esun cu tende Mi palabra y kere Esun cu a manda Mi tin bida eterno, y no ta bin na huicio, ma a pasa for di morto na bida. Di berdad, di berdad Mi ta bisa boso, e ora lo yega, y ta awor, cu e mortonan lo tende e bos di e Yiu di Dios y esunnan cu tende lo biba." (Juan 5:24,25)

Ma un hende lo puntra: Con mortonan por tende e bos di e Yiu di Dios awe? E contesta ta den Scritura cu nos ta yama Beibel. Den e buki di Efesionann capitulo dos cuminsando cu vers uno nos por lesa loke e Apostel Pablo a scirbi na e hendenan di Efesio cu a kere e mes Evangelio cu nos ta proclama awe bisando: "Y boso tabata morto den boso delitonan y picanan, den cualnan boso tabata camna antes segun e curso di e mundo aki, segun e prins di e poder di laira, di e spirito cu ta obra awor den e yiunan di desobediencia. Nos tur tambe tabata biba antes meimei di nan den e pashonnan di carni y di mente y tabata yiunan di rabia, mescos cu e otronan. Ma Dios, Kende ta rico den misericordia a duna nos bida hunto cu Cristo, asta tempo cu nos tabata morto den transgrescionnan, ta pa graci boso a wordo salba. Y Dios a resucita nos hunto cu Cristo", etc., etc.

Tuma bo Beibel y lesa e capitulo dos di Efesionnan completo. Pero no bai pura, lesa cu calma y permiti pa e Spirito Santo di Dios obra den bo curason, anto obedece y pone bo fe den e yiu di Dios, Kende a stima nos, y a entrega Su mes pa nos picanan.

Amigonan stima pa Dios, scucha kico e Palabra ta bisa nos den Romanonan 8:1 "P’esey cu awor no tin condenacion mas pa esunnan cu ta den Cristo Jesus. Pasobra e ley di e Spirito di bida den Cristo Jesus a hasi mi liber di e ley di pica y di morto. Pasobra loke e ley no por a haci, pa motibo cu e tabata debil dor di e carni, Dios a hasi, mandando Su mes Yiu den e semehansa di hende pecaminoso, como un ofrenda pa pica. Y asina El a condena pica den hende pecaminoso, pa e demánda husto di e ley por wordo cumpli completamente den nos, cu no ta biba segun e naturalesa pecaminoso ma segun e Spirito."

Pa mas di esaki, lesa e capitulo ocho completo di Romanonan, pidiendo Señor na e mes un tempo pa Su guiansa y yudansa. Nos lo continua cu e tema aki den un otro mensahe.
Bicento y Betty Henriquez, Washington 23A, Aruba


PS Si bo a lesa e mensahe aki, tuma un momento pa scirbi nos un email y laga nos sabi esey! Ki un bendicion esey lo ta pa nos, y alabes un afirmacion. bbhenriquez@setarnet.aw

Tuesday, June 3, 2008

TEMPO DI COSECHA -#2



TEMPO DI COSECHA – (continua)
Banda di aña 45 di e siglo pasa, Señor a manda algun sirbidornan di djE den e Islanan di Antias y Aruba cu e BON NOTICIA di salbacion pa pecadornan. Manera ta para scirbi: "Pasobra no tin diferencia entre Judiu y Griego, pasobra e mes Señor ta Señor di tur, y ta bendiciona ricamente tur cu yama n’E, pasobra ken cu yama na e nomber di Señor lo ta salba."
"Con, anto, nan lo por yama na Esun den Kende nan no tabata kere? Y con nan por kere den Esun di Kende nan no a tende? Y con nan por tende si un hende no predica na nan? Y con nan por predica si nan no ta manda? Manera ta scirbi, Ki bunita ta e pianan di esnan cu ta trece bon noticia."
Manera esunnan cu a biba den e añanan ey por duna testimonio ta; cu e mensaheronan ey e tempo, no a wordo ricibi cu man habri. E motibo principal tabata, y te ainda ta; cu e tres islanan aki tabata masha religioso. Ma e loke a pasa tabata cu e sirbidornan aki di Señor no a wordo manda serca nos cu un otro religion, sino cu e Evangelio cu ta nifica un noticia di gran alegria. Nan a bini cu e bon noticia di pordon y salbacion na pecadornan. Nan mensahe tabata cu si bo confesa cu bo boca, "Jesus ta Señor", y kere den bo curason cu Dios a lant’E for di morto, bo lo ta salba. Pasobra ta cu bo curason bo ta kere y ta hustifica, y e ta cu bo boca cu bo ta confesa y ta salba.
Manera Scritura ta bisa, Ken cu confia den djE, nunca lo wordo poni na berguensa. Pasobra no tin diferencia meimei Judiu y Gentilnan (esunan cu no ta Judiu) e mes Señor ta Señor di tur, y ta bendiciona ricamente tur cu ta yama n’E, pasobra ken cu yama na e nomber di e Señor lo ta salba. (Lesa Romanonan capitulo 10.)
Amigonan stima pa Dios den e tres islanan aki, cu a ricibi e bendicion di mas grandi cu por ser haya den e Evangelio; esakinan ta e dianan of e tempo di cosecha. E cosecha ta resultado di e fruta di e Evangelio di Dios. Corda esaki bon. Tin tempo pa prepara e tereno, tin tempo pa planta e simia y tin e tempo pa cosecha. E fruta awe ta, ora cu e pecador ta tende e Palabra y ta kere di curason, anto e ta repenti di su bida di pica, y ta kere di curason den Esun , esta e Señor Jesus, Kende a carga nos picanan den Su curpa riba e crus unda El a muri den nos lugar. Anto nan a tuma Su curpa sin bida, y a der’E den un graf cu tabata di un amigo. Ma despues di tres dia Dios e Tata a dun’E bida atrobe, y a permiti pa El a wordo mira pa algun testigonan cual Señor Su mes a scoge. Despues di cuarenta dia El a wordo ricibi y halsa na e man drechi di e Dios todopoderoso. Y for di ey E lo bolbe atrobe pa E huzga esunnan cu ya a muri, y esunnan cu ta na bida ainda ora cu E ta bolbe.
Amigonan tur, sea sigur cu tur e cosnan ey ta berdad, y cada un ta tuma lugar na su tempo. Awe nos ta bibando den e dia cu pordon y bida eterno ta ofreci na nos den e nomber di Jesus e Yiu di Dios. Esun cu kere lo ta salba, esun cu no ta kere lo ta condena, pasobra cu e no a kere den nomber di e Yiu di Dios. Realmente segun Scritura, e persona cu no ta kere den e yiu di Dios, ta condena caba. Ta nifica cu un persona cu a tende e Evangelio di e gracia di Dios y e ta no kere; e persona aki ta condena caba, pasobra cu e no ta kere den e nomber di e Yiu di Dios. Scucha loke Dios ta bisa nos den Su Palabra: "Pasobra Dios a stima mundo asina tanto, cu El a duna Su unico yiu, pa ken cu kere den djE no bai perdi, ma tin bida eterno. Pasobra Dios no a manda Su yiu den mundo pa condena mundo, ma pa salba e mundo dor di djE. Esun ku kere den djE no ta condena; ma esun cu no ta kere ta condena caba, pasobra e no a kere den e nomber di e Unico Yiu di Dios"!
Amigo stima pa Dios, si na e momento aki cu bo ta lesando e simpel mensahe aki, y si bo ta uno di esunnan cu no a kere di curason den Jesus e Yiu di Dios, Kende a entrega Su mes pa nos picanan, ta nifica cu bo ta bibando bou di condenacion. Lesa esey pa bo mes den San Juan capitulo 3 y e versiculonan 16-21. Nos ta roga cada uno cu ta lesa e palabranan aki, y cu sabi den bo curason cu nunca bo a repenti di bo picanan y kere di henter bo curason den e Yiu di Dios, Kende a muri pa nos picanan riba un crus; pa awor mes bo repenti y yama e nomber di Jesus.
Amigonan tur, no tin bendicion mas grandi den e mundo aki cu di sabi cu nos picanan ta pordona y cu nos a pasa fo’i morto na bida. Den Juan 5:24 nos ta lesa lo siguiente di Jesus Su mes papiando: Di berdad, di berdad, Mi ta bisa boso; esun cu tende Mi palabra y kere Esun cu a manda Mi, tin bida eterno y no ta bin na huicio, ma a pasa for di morto na bida. Di berdad di berdad, Mi ta bisa boso, e ora a yega y ta awor, cu e mortonan lo tende e bos di e Yiu di Dios, y esunnan cu tende lo biba.
Cu Señor yuda bo pa obedece na e yamada di Dios.
Scirbi y prepara pa Bicento y Betty Henriquez
*Corda cu un comentario, of pregunta, sugerencia lo duna nos alegria. Bo por haci esey via un comentario ariba e blog mes, of sea via un email na bbhenriquez@setarnet.aw Lo ta nesesario pa cambia nos adres den bo propio "Address Book", sino bo carta no ta yega si bo ta usa "return mail" of "forward". Si bo a lubida nos blog adres e ta: bbhenriquez.blogspot.com y nos Email adres ta: bbhenriquez@setarnet.aw
Un recuerdo chikito ta pa laga sa cu nos ta bibando awor na ARUBA, na Washington 23A

Wednesday, May 21, 2008

TEMPO PA COSECHA



Bon dia Amigonan cu ta lesa nos Blog! Manera nos a participa cu bosonan den nos ultimo blog na luna di April cu nos lo muda bek pa Aruba, awe ta echo! Nos a yega aki dia 2 si Mei den e oranan di 9:30 anochi. Tabatin famia y amigonan na aeropuerto pa duna nos un Bonbini bek na Aruba!
Foto: Gosando nos ultimo cosecha di "Strawberries" na Canada
Nos email nobo ta: bbhenriquez@setarnet.aw
Nos adres ta: Washinton #23A

TEMPO PA COSECHA
Tur Antiyanonan di algun generacion pasa por recorda con

antes nos tabata antisipa e tempo di awacero pa nos planta nos maishi rabo y bonchi y otro simianan. Ma prome cu esey nos ta prepara e tereno unda nos tin pensa pa planta e simianan. Nos ta hasi e tereno limpi di matanan di sumpiña y di piedranan y di tur loke por ta un strobacion pa e cosecha cu nos ta spera di ricibi.
Awe nos mensahe ta bai tocante plantamento di simia y di cosecha. Señor Jesus a biba ariba e mundo aki durante un tempo cu El a observa y experimenta plantamento y cosechamento. Y El a uza esey den Su siñansa tocante e Reino di Dios. Lesa den e buki di Mateo, capitulo 13, e prome nuebe versiculonan. Den e porcion aki di Scritura, Señor Jesus ta siñando tocante e mes un berdad cu nos ta experimenta aki na Aruba, Curaçao y Bonaire. Y den Mateo 13:18-23, Señor Su mes ta duna nos e splicacion di un cunucero plantando su simianan. Na prome lugar Señor ta siñando nos e importancia pa proclama e Palabra di Dios cu ta e Evangelio. Si un cunucero no planta e simia, e no por spera un cosecha. Y si nos no proclama e Evangelio, nos tampoco por spera pa pecadornan repenti y kere. Un otro cos cu nos por siña aki ta e importancia pa proclama of predica of siña e Evangelio mes simpel cu nos ta hay’e den Scritura. Y e proposito di esey ta, pa e pecador of sea, pa e persona cu ta scucha nos testimonio por COMPRENDE. Nos no mester depende ariba e sabiduria di nos palabranan, aunke cuanto educacion nos por a ricibi, y ni cuanto talento nos tin (Mi no ta bisa cu e cosnan ey ta malo). Ma nos mester confia cu e Spirito Santo di Dios lo obra den curason di e personanan cu a tende e "Palabra di Dios", cu ta wordo yama tambe e Palabra, of e Evangelio."
Nos por asta siña algo for di un cunucero. E no mester ta un persona bon educa cu diploma halto pa e simia cu el a planta of sembra por nace. Ta Señor nos Dios a crea e ley di simia y nacemento y crecemento y finalmente fruta. Cada simia ta produci su fruta propio.
Den un cierto occasion Señor Jesus a haci e declaracion aki tocante di Su mes bisando: "E ora a yega pa e Yiu di hende wordo glorifica. Di berdad, di berdad, Mi ta bisa boso, si un pipita di trigo no cai den tera y muri, e ta keda su so; ma si e muri, e ta duna hopi fruta." (Lesa Juan 12:20-36) E Apostel Pablo ta bisa nos e siguiente den 1 Corintionan 3:5-7: "Kico Apolos ta anto? Y kico Pablo ta? Sirbidornan pa medio di kendenan boso a kere, manera Señor a duna oportunidad na cada un. Ami a planta, Apolos a muha, ma ta Dios a duna crecemento. Asina anto, ni esun cu ta planta ni esun cu ta muha no ta nifica nada, sino Dios, Kende ta duna e crecemento." Vers 9 ta continua bisando, "Pasobra nos ta trahadornan hunto cu Dios, boso ta Dios Su cunucu, Dios Su edificio." E declaracionnan aki, Amigonan, ta increiblemente grandi den nan contenido, mescos cu masha hopi otronan dor di henter Scitura. Dios trahando hunto cu hende, y hende trahando hunto cu Dios!

Principalmente ora cu nos realisa cu ta asina e obra di Dios ta sigui te awe. Ma tambe nos ta wordo spierta tocante trahadornan falso, kendenan ta sirbidornan di e diabel, pero ta pasa como sirbidornan di Dios. E mes Apostel Pablo ta bisa lo siguiente den 2 Cor. 11:13-15: "Pasobra hombernan asina ta apostelnan falso, trahadornan engañoso, kendenan ta disfrasa nan mes como apostelnan di Cristo. Y no tin nada straño, pasobra Satanas mes ta desfrasa su mes como un Angel di lus. P'esey no ta nada straño si su sirbidornan tambe ta disfrasa nan mes como sirbidornan di husticia, kende nan fin lo ta segun nan obranan. (E titulo ‘sirbidornan’ den vers 15, ta traduci for di e titulo ‘diacononan’)
Amigonan stima pa Dios y pa nos Señor Jesus, e ta increibel cuanto promesanan precioso y eterno e Scrituranan ta contene. Y tur, absolutmente tur ta e fruta di e Evangelio di nos Señor y Salbador Jesus. No ta existi promesa di bendicion eterno na nos, cu ta separa di e glorioso Evangelio. Manera cu nos ta spera, esta cu tur e rumannan den Cristo mester sabi, cu e palabra, "Evangelio" ta nifica "Bon Nobo" of "Bon Noticia." Y e bon noticia ta cu Cristo a muri pa nos picanan, y a wordo lanta for di morto dor di e Tata, y a wordo ricibi den Gloria y ta sinta na e man drechi di e Mahestad den halturanan. Como nos Mediador, esta pa cada uno cu a repenti di nan pica, y a ricibi Señor Jesus como Salbador y Señor personalmente.
Awe y awor ta e tempo di cosecha, of e dia di salbacion. Si bo a tende Su bos awe, no hasi bo curason duro dor di hasi menos caso, of di pensa, wel mas despues, algun dia kisas, pero awor no. Ta awe y awor ta e dia di salbacion.
Un cunucero no ta keda rosa mondi y drecha tereno pa semper. Ni tampoco e ta keda planta simia tur dia bai. Pa nos aki den Antias mescos cu den henter mundo; awe y awor ta e dia di salbacion, e dia di pordon y di bendicion eterno.
Te otro mensahe, amigonan, y nos ta spera bo reaccion.
Bicento y Betty Henriquez,
Washington 23A,
Aruba
Nos number di telefon ta: (297) 587-7472
"Boso ta Bonbini pa bishita nos na Washington 23A !"

Tuesday, April 15, 2008

MUDAMENTO


Ora cu un persona of un famia ta sali for di e lugar unda e tabata bibando, pa e bai biba na un otro lugar, nos ta bisa cu e persona, of e hende ey a muda pa un otro lugar.. Den nos caso nos mudamento no ta local sino for di un nacion pa un otro nacion.

Den e dianan aki nos ta masha ocupa mes preparando pa nos mudamento for di Canada pa e Isla di Aruba. Nos oracion na Señor ta pa Su proteccion di acuerdo cu Su gracia y misericordia den Cristo nos Señor. Y cu pronto nos lo por stablece na Aruba, y reanuda cu nos mensahenan corto via nos Blogspot.

Hunto cu kibramento di cabes como preparacion pa nos mudamento, nos ta wordo recorda tocante e mundamento mucho mas serio y importante cu ta toca cada persona den e mundo aki encluyendo Aruba, Curaçao y Bonaire. Ami, hunto cu mi esposa Betty, a biba pa algun añanan hopi felis den e gran nashon aki di Canada, na unda nos a ricibi e miho cooperacion cu un hende por desea. Y esey ta berdad tanto for di e autoridadnan como for di e otro ciudadanonan. O cu Señor lo sigui proteha e Nacion aki, y particularmente e gobernantenan, pasobra ta tur parti di mundo e sistemanan di gobernacion ta bou di atake continuo dia y nochi. Y net manera Scritura ta bisa: “E malbadonan lo bai di peor pa peor, gañando y siendo gaña door di otro.” (Lesa 2 Timoteo 3:12-17)

Durante nos preparacionnan pa nos regresa na Aruba, nos mester dicidi ta kico cu kico nos por pone den nos maletanan pa hiba cu nos. Y francamente bisa, esaki ta un experencia interesante. Ta parce asina duro pa laga cosnan cu bo ta gusta atras. Beibel ta papia masha cla mes tocante e asunto aki di posicion di cosnan material. Beibel ta siña nos cu e bendicion mas grandi cu un pecador cu kere e Evangelio por tin den e bida aki, den loke ta toca cosnan material ta esaki: “Di ta contento cu e loke bo tin. Pasobra e dia cu nos a nace, nos no a bini cu cosnan, y dia cu nos muri nos no por hiba nada. P’esey si nos tin alimento y paña pa cubri nos curpa, nos lo ta contento cu esey. Pasobra hende cu kier bira rico ta cai den tentacion y den trampa y den hopi deseonan bobo y perhudicial cu ta sink hende den ruina y destruccion. Pasobra amor pa placa ta un rais di tur sorto di maldad. Algun hende golos pa placa a desvia for di e fe y a traspasa nan mes cu hopi sufrimento.” (1 Timoteo 6:3-16.)

Señor Jesus Su mes a siña nos lo siguiente: No montona tesoronan pa boso mes ariba mundo, unda mot y frusto ta destribi, y unda ladronnan ta kibra y horta. Pero montona pa boso mes tesoronan den cielo, na unda mot y frusto no ta distribi, y unda ladronnan no ta kibra y drenta y horta. Pasobra unda bo tesoro ta, ey bo curason lo ta tambe.

Amigo y amiganan stima pa Dios, e Tata, y pa nos Señor y Salbador JesuCristo, e cosnan aki a wordo scirbi pa nos cu ta profesa di ta un Cristian practica. No pa nos gana bida eterno, ma poniendo na pratica e frutanan di Spirito Santo cu ta duna na cada uno cu ta kere e Evangelio di Dios y di Señor Jesus. Un persona cu no a repenti di su picanan despues di a tende e Evangelio di gracia di Dios, y kere di curason den Esun cu a muri pa nos picanan, y cu a wordo lanta for di morto despues di tres dia, no por comprende e cosnan cu ta di e Spirito di Dios.

Pa un persona cu no ta kere e Evangelio di curason e doctrinanan spiritual ta parce locura. Lesa e siguiente Scrituranan aki: Romanonan 10:1-13; 1 Cor. 15:1,2; Galationan 1:8.9 y tambe 1 Corintionan 1:18-31 y 1 Corintionan 2:1-16. Ta parce hopi, ma no ta asina. Lesa e Scrituranan aki cu un oracion cortico pidiendo Dios Su proteccion pa bo no wordo gaña. Anto obedece Dios sin vacila ora cu e Spirito Santo convense bo di e berdad di e Evangelio.

Nos ta confia den e Señor Su gracia y misericordia, pa nos sigui cu e ministerio aki ora cu nos establece na Aruba den e luna di Mei benidera.

Mientras tanto nos oracion ta pa cada uno di boso por obedece e yamada di Dios den Cristo nos Señor.

Te pronto, Bicento y Betty Henriquez