Saturday, November 24, 2007

E Brasa di Señor



Alafin, alafan WINTER a yega aki banda!

Bon dia, amigo amiganan, awe, aki na Canada, e shelo ta nubiá i sneew a cai basta hopi ayera, cu tur rond di nos ta kubrí ku un blankura masha bunita. E ta hasi nos kòrda e versíkulo den Isaias 1:18 “”Bin awor, i laga nos rasoná huntu.” Señor ta bisa, “ Maske boso pikánan ta manera skarlata, nan lo bira blanku manera sneu, maske nan ta kòrá manera skarlata, nan lo bira manera lana.”

Nos ta combida bo awor pa un estudio un poco mas profundu tocante e: E BRASA DI SEÑOR

Den e buki di Isaias Kapítulo 53:1-6, nos ta lesa e siguiente profesia tokante nos Señor HesuKristu, i tambe relacioná ku kada uno di nos komo sernan humano:

“Ken a kere nos mensahe, i na ken e brasa di Señor a wòrdu rebelá? El a krese Su dilanti manera un spreit delikado, i manera un raís for di tera seku. E no tabatin bunitesa òf mahestat pa atraë nos na djE, nada den Su aparensia pa nos lo a dese’E. E tabata despresiá i rechasá pa hende, un hòmber di tristesa, ku a konosé sufrimentu. Manera un for di kende hende ta skonde nan kara, E tabata despresiá, i nos no tabatin aprecio pE. Siguramente El a tuma nos enfermedadnan i a carga nos tristesa, sinembargo nos a consider’E golpiá pa Dios y gedal p’E, y aflihí. Pero E tabata traspasá pa nos transgreshonnan. E tabata golpiá pa nos inikidatnan; e kastigu ku a trese pas pa nos tabata ariba djE, i pa medio di Su herídanan nos ta kurá. Nos tur a dwal manera karné kada uno di nos a bira na su propio kamina; i e Señor a pone ariba djE e inikidat di nos tur.”

Amigo y Amiganan, e porshon di Skritura aki, ta un profesia hopi kla tocante nos Señor HesuKristu durante Su enkarnashon. Pero nos deseo ta ku kada uno ku ta lesa e mensahe aki, por sigui lesa e Kapítulo 53 di Isaías kompletu; pasobra kada uno di nos ta inkluí den e profesia aki.

Pa kuminsá nos Señor Hesus ta wòrdo menshoná komo e Brasa di e Señor. E Señor menshoná aki ta Dios, e Tata Su mes. P”esei ku tur loke a sosodé ku e Yiu di Dios den e profesia aki, tabata di akuerdo ku e boluntat di nos Tata Celestial. Pero esei no ta nifiká ku Hesus no tabata di akuerdo, i ku e Tata a obligu’E pa El a wòrdu humiyá i tratá skandalosamente na man di hende.

Di ningun manera, pasobra otro Scritura ta bisa nos bon kla, ku Señor Hesus a tuma e berguensa i e kastigu kual kada uno di nos a meresé, boluntariamente motivá pa amor.
Hebreonan 10:5-7 ta bisa lo siguiente:

“P’esei ora Kristu a bini den e mundu, El a bisa: sacrifisio i ofrendanan Bo no tabata kier (òf deseá) ma un kurpa Bo a prepará pa Mi;ku ofrendanan kimá i ofrendanan pa piká Bo no tabata agradá. E ora Mi a bisa, Ata Mi aki, e ta scirbí di Mi den e buki, Mi a bini pa hasi Bo boluntat, O Dios.”

Pues, Hesus ta ser yamá den Isaías 53:1 “E Brasa di SEÑOR”. Dor di Skritura e brasa di Dios ta representá fortalesa, poder i outoridat di e Dios todopoderoso. Señor Hesus a risibí outoridat for di e Tata pa hasi e trabou ku El a bin den mundu pa hasi. Pa ta sigur di esei nos ta pidi kada uno ku ta lesa e mensahe aki, pa bo lesa Kapítulo 5 y 6 di e Evangelio segun Huan, i tambe e Kapítulo 17 di e mes un buki ei.

Den Lukas 4:17-19, nos por mira unda Hesus ta lesa fo’i e Buki di Isaías lo siguiente:

E Spiritu di Señor ta riba Mi, pasobra El a ungi Mi pa prediká bon notisia na e pobernan; El a manda Mi pa proklamá libertat na e prishoneronan, i restorashon di bista na e siegunan. Pa duna libertat na e oprimínan, pa proklamá e aña faborabel di Señor.”
Anto serando e Buki, El a sinta, y a bisa na tur ku tabata skuch’E: “Awe e Skritura aki ta kumplí den boso oído.” Aki e Spiritu Santu ta wòrdu yamá, E Spiritu di Señor, i ku ta Señor a ungi Hesus ku e Spiritu pa prediká e bon notisia, etc. Den e Buki di Echunan Kapítulo 10, e Apòstel Pedro guiá pa e Spiritu Santu den un vishon a wòrdu mandá pa hiba e Evangelio na cas di un ofishal Romano ku yama Kornelius. Kuminsando ku vers trinta i ocho nos ta haña lo siguiente:

Boso sabi di Hesus di Nazaret, kon Dios a ungui’E ku Spiritu Santu i poder i kon El a bai rònt hasiendo bon, i kurando tur ku tabata bou poder di e diabel, pasobra Dios tabata ku nE. Nos ta testigunan di tur loke El a hasi den e tera di e Hudiunan i den Herusalem. Nan a mat’E, kologando E na un palu, pero Dios a lant’E for di morto ariba di tres dia, i a hasi pa E wòrdu mirá. E no a wòrdu mirá pa tur hende, ma pa e testigunan kende Dios a skohe adelantá esta nos ku a kome i bebe huntu ku nE despues ku El a lanta for di e mortonan. El a manda nos pa prediká na e puebel i pa duna testimonio ku E ta Esun ku Dios a apuntá komo Hues di e bibunan i e mortonan. Tur e profetanan ta duna testimonio di djE ku tur ku kere den djE ta risibí pordon di pikánan pa medio di Su nòmber.”

Konsiderando tur e Skrituranan ku nos a menshoná i hopi otronan mas, nos por komprendé pakico Hesus ta wòrdu yamá E Brasa di Señor den Isaías 53:1-6. Ta pa medio di djE Dios, e Tata, a proveë pordon di pikánan i bida eterna pa kada uno di nos ku repentí i risibi E komo nos Salbador personal.
Skirbí i prepará pa Bicento i Betty Henriquez

Tuma un rato pa laga nos sabi bo pensamentunan ariba loke nos a komparti ku boso awe tokante E Brasa di Señor. Bo ta uno ku a repenti y a risibi E komo bo Salbador? Komparti esei ku nos. Nos adres ta: #534, 120 La Ronge Rd, Saskatoon, SK., Canada, S7K 7Z9. Nos email ta: bbhenriquerz@shaw.ca

Thursday, November 8, 2007

Kico ke men "Nacemento di Nobo?"


Laga nos descuti rond mesa loke Beibel ta bisa tocante e topico di: Nacemento di nobo.

Den Beibel tin un versiculo masha stima y aprecia pa tur hende cu ta kere e Evangelio di henter nan curason. Y e ta bisa lo siguiente:

“Pasobra Dios a stima mundo asina tanto cu El a duna Su Unico Yiu pa tur cu kere den djE, no bai perdi ma tin bida eterno.” Juan 3:16

Mescos cu tur otro Scritura, esun aki tambe mester wordo studia den su contexto. Y esey ta nifica cu nos mester lesa y studia of pensa riba e otro cosnan cu a wordo bisa hunto cu e declaracion ey. Ademas nos mester ta conciente di loke e resto di Scritura ta siña tocante e mes un topico aki. Pa cuminsa nos mester lesa for di versiculo uno te na versiculo 21. Haciendo esey nos por mira cu henter e porcion aki tin di haci cu Jesus Su mensahe of siñansa na un Fariseo cu yama Nicodemo.

E Nicodemo aki ta wordo menciona mas despues, con e, hunto cu un otro homber, kende tabata un miembro den e consilio , a percura pa e curpa morto di Jesus, por a haya un entiero digno. (Lesa Juan 19:38-42; y Mateo 27:57-61 y Marco 15:42-47 y Lucas 23:50-56). Ta na e Fariseo aki cu yama Nicodemo, Jesus a cuminsa siña e doctrina di nacemento di nobo ora cu El a bis”e: “Mi ta bisa bo e berdad, ningun hende por mira e Reino di Dios, si e no bolbe nace.” Manera nos por lesa, Nicodemo no por a comprende e declaracion straño aki di Jesus, y p’esey El a contesta cu e pregunta aki: Con un hende cu ta bieu caba por bolbe nace? Sigur cu e no por drenta den barica di su mama pa di dos bes, pa e bolbe nace! Jesus Su contesta tabata esaki: “Ami ta bisa bo e berdad, ningun hende por drenta e Reino di Dios si e nace di awa y di e Spirito….. no keda sorprendi cu Mi a bisa bo, boso mester bolbe nace. E biento ta supla unda cu e kier. Bo ta tende su zonido, ma bo no por bisa ta di unda e ta bini, of unda e ta bai. Asina e ta cu cada uno cu nace di e Spirito.” Nos ta lesa cu Nicodemo a keda mes sorprendi.

Anto el a puntra Señor Jesus: Con esaki por ta? Jesus Su contesta e biaha aki tabatin cierto reprendemento tanto na Nicodemo como pa nos awe. “Bo ta e Maestro di Israel, y bo no ta comprende e cosnan aki?” E Nicodemo aki, por representa tur e siñadornan religioso cu ta biba awe, cu apesar di nan titulo como maestro, no sabi nada tocante e doctrina aki di nacemento di nobo. E declaracion aki di Señor Jesus Su mes ta di sumo importancia pa cada persona cu ta biba aki den Antiyas y den e resto di nos mundo; pasobra ni un di nos por drenta e Reino di Dios, si nos no a nace di nobo.

Awor ta keda e pregunta aki: Kico nacemento di nobo ta? Kico e ta nifica?

Prome, laga nos mira loke e no ta. Nacemento di nobo no ta boutismo di awa sea di un baby of un adulto. E no ta pa ta miembro den un religion, of den un asina yama Iglesia. E no ta nifica pa carga e nomber “Cristian”. Un hende por tin tur eseynan, pero sinembargo no a nace di nobo, y lo bai perdi si e no kere manera e versiculo tan stima ta bisa.

Amigonan stima, nacemento di nobo ta obra di e poder di Dios. Ta Dios e Tata todopoderoso so por haci esey. Nacemento di nobo ta igual cu un creacion nobo, y Dios so por haci esey. Nacemento di nobo ta igual cu bida eterno, y ta Dios solamente por duna un hende mortal bida inmortal. Laga nos bolbe na e versiculo cu nos a cuminsa cu ne, esta Juan 3:16. Lesa e versiculo cu un curason habri pa Dios obra den bo. Aki e ta bisa nos, cu Dios a stima mundo asina tanto cu EL a DUNA Su Unico Yiu, PA TUR CU KERE den djE, no BAI PERDI, ma tin BIDA ETERNO. Den esun versiculo aki ta inclui Dios Su amor pa cada uno di nos, apesar di nos picanan. Den e palabra: “DUNA”, ta inclui: e incarnacion di nos Señor , y Su bida di sufrimento ora cu El a wordo tenta dor di Satan y hende; y Su morto ariba un crus. Ma tambe ta inclui Su resureccion for di morto y Su glorificacion. P’esey cu e frase cu ta bisa: “Pa tur cu kere den djE” no ta nifica pa kere ku E ta existi y cu El a wordo mata y cu El a resucita so. Ma pa kere den Señor Jesus ta inclui cu El a muri pa mi, y den mi lugar pa motibo di mi picanan. Ta nos picnan El a carga den Su curpa riba e crus …. Y pa medio di Su heridanan nos a wordo cura.

Ta awe y awor cada uno di nos mester repenti di nos picanan, y pone nos fe den Esun cu a muri y a resucita pa nos.

Amigonan stima pa Dios y pa nos Señor Jesus; no sigui tarda mas, dobla bo rudianan awe pa nos Señor Jesus, den berdadero repentimento, y asina ricibi pordon y bida eterno.

Si e mensahe aki a toca bo curason, of ainda bo tin pregunta ariba e topico aki, lo bo tuma tempo pa tuma contacto cu nos? Siguramente esey lo ta un encurashamento pa nos, y alabes nos por sigui yuda bo segun cu bo ta refleha y tuma decision ariba si of no bo a nace di nobo. Nos adres di email ta: bbhenriquez@shaw.ca

Y na Libreria Victoria na Elleboogstraat 25 na Oranjestad, bo por cumpra Beibel, si ainda bo no tin un pa bo mes. Aserca nan libremente pa esey, y otro tractadonan y buki.