Tuesday, December 18, 2012

MORTO Den Beibel nos ta lesa cu Morto lo ta e ultimo enemigo cual Dios e Tata lo pone bou di e pianan di nos Señor y Salbador JesuCristo. (Lesa sin falta den 1 Corintionan 15:12-28, of lesa e Capitulo 15 di prome Corintionan completo, y Hebreonan 1:13.) Practicamente no ta pasa un dia cu asta den e isla chikito aki di Aruba, nos por lesa of tende di un of mas stimanan cu ta muri. Y no unicamente ancianonan, pero hendenan di tur edad. Nos sabi cu cada uno di nos mester muri un dia. Pero sinembargo morto ta keda nos enemigo. Pasobra ningun persona normal lo gusta muri. Nos tur ta stima bida, y francamente morto ta keda nos enemigo. Pero porfin, aunke con cu nos haci, sea cu nos ta hopi cuidadoso cu nos salud of no; un dia of otro nos turno ta yega. E Palabra di Dios ta bisa nos lo siguiente den Hebreo 9:27: “Y mescos cu hende ta destina pa muri un bes (so) y despues di esey pa enfrenta huicio, asina Cristo tabata sacrifica un bes (so) pa kita e picanan di hopi hende; y E lo aparece pa di dos bes, no pa carga pica, ma pa trece salbacion na esunnan cu ta sperando p’E.” E pregunta aki ta keda na cada persona den e mundo aki y esey ta enclui cada uno di nos aki den Antiyas: “Mi ta sperando pa e benida di e Cristo aki di Kende e Scritura ta papiando aki?” Sea sigur, y masha sigur, sea ta homber of mohe, rico of pober, docter of paciente, specialista of esunnan cu tin mester di cuido special. Laga cada uno di nos sea sigur, cu nos tambe ta enclui den e sentencia di morto. Sinembargo apesar di e sentencia absolut di morto na tur ser humano; nos tin tambe danki na Señor nos Dios y Tata celestial, e invitacion pa ricibi bida eterno awor mes den e curpa debil y delicado aki. Y aki tur hende di mundo ta inclui, pasobra Cristo a carga e pica di henter humanidad den Su curpa ariba e crus, pa nos libra di picanan por biba pa husticia, pasobra manera Scritura ta bisa nos; cu ta pa medio di Su heridanan nos a wordo curá. Esey ta nifica cu den e bista di nos Tata Celestial, ta mescos cu nos a muri y a resucita cu Cristo. Den e carta di e Apostel Pablo na e keredornan cu tabata biba na e cuidad di Colosas, nos ta lesa asina aki: “Siendo anto cu boso a resucita cu Cristo, pone boso curasonnan den e cosnan di ariba, unda Cristo ta sinta na e man drechi di Dios. Pone boso mentenan ariba cosnan di ariba, no ariba cosnan terenal. Pasobra boso a mrui, y awor boso bida ta scondi cu Cristo den Dios. Ora Cristo Kende ta boso bida aparece, e ora boso tambe lo aparece cu nE den gloria.” (Col. 3:1-4) Paisanonan y tur cu ta di otro nacionnan, pone atencion cu e sirbidor di Dios a scirbi na sernan humano aya na Colosas. Nan tabata personanan mescos cu nos. Nan tambe tabatin nan responsabilidadnan diario. Ademas, no ta for di e Apostel Pablo mes cu nan a tende e palabra di Dios, esta e Evangelio. Pero nan a tende for di Epafras kende tabata un fiel sirbidor di Cristo, mescos cu e Apostel Pablo. Ademas Pablo a scirbi e carta aki for di prison. (Col. 4:3,10) Aparentemente Epafras tabata den prison hunto cu Pablo. (Col. 4:12) Nos kier encurasha tur e rumannan den Cristo, pa tuma tempo pa lesa e carta aki scirbi mas cu dos mil añanan pasa, na esunnan cu a kere e Evangelio mescos cu nos, y pone bon atencion na e peligernan cu tabatin e tempo, mescos cu nos tin awe. Awe tin masha hopi siñansa falso den henter mundo. Y e isla chikito aki cu yama Aruba no ta exclui. Tur dia sea na television of literatura of otro medionan, siñansanan falso ta wordo trece padilanti. Mira con e Apostel ta spierta e rumannan aki bisando nan: “Mi ta bisa esaki pa ningun hende no gaña boso cu argumento cu ta zona bunita.” (Lesa Col 2:1-5) Nos ta repe ti: Lesa e carta scirbi na e Colosensenan completamente. Anto mira con cla Señor ta revela na nos, Su poder ariba morto y pica, den Cristo nos Señor.

Monday, November 12, 2012

E SANTONAN (continuacion) Pa motibo di e siñansanan falso cu tin den mundo, y particularmente den e Isalnan aki, nos ta continua cu e doctrina segun Scritura relaciona cu e titulo: “SANTONAN”. E palabra di Dios ta siña nos hopi cla cu ta mientras cu e personanan aki tabata na bida, nan tabata wordo yama Santonan; y no despues di nan morto. Y pa e motibo ey, ta necesario pa nos mira loke Scritura, of sea Beibel, ta siña nos. Y afortunamente Beibel ta hopi cla tocante e doctrina aki, pa nos no keda den eror mas. Tanto ta e Testament Nobo, como e Bieu tin e siñansa aki tocante e Santonan. Pero den Testament Nobo, e ta wordo haci hopi cla. Y esey ta, cu e unico Santonan berdadero ta haya den Cristo Jesus. Den otro palabra, no ta existi Santonan separa cu nos Señor y Salbador JesuCristo. E motibo pa esey ta cu Señor Jesus ta e unico persona den un curpa humano, cu nunca a comete un pica. Y sinembargo Scritura Santo ta bisa nos, cu “El a wordo tenta den tur cos mescos cu nos, pero sin pica.” Nos Señor a sufri ora cu El a wordo tenta. (Hebreonan 2:18) Den nos caso, hopi bes nos ta indiferente durante tentacionnan y te asta ta satisfecho na lugar di sufri. Y esey ta un di e situacionnan durante cual nos ta haci e Spirito Santo di Dios tristo. Pone atencion pa un momento, con nos ta wordo spierta den Scritura. “Esaki mi ta bisa boso, y ta insisti ariba esey den Señor, cu boso no mester biba mas manera e paganonan ta haci den e banidad di nan pensamento. Nan ta cubri cu scuridad den nan comprendemento, y separa for di e bida di Dios, pa motibo di ignorancia cu ta den nan, causa pa e duresa di nan curason. Y perdiendo tur sintimento di berguensa a entrega nan mes na sensualidad, y asina practica tur sorto di impuresa, cu un continuo deseo pa mas.” (Lesa Efesionan 4:17-19). E cosnan menciona aki, a wordo scirbi mas cu dos mil aña pasa, na e yiunan di Dios; na e berdadero santonan den Cristo Jesus cu tabata biba e tempo den e ciudad di Efesionan. (Mira Efesionan 1:1 y tambe vers 15) Anto for di Scritura Santo cu ta e Palabra di Dios bibo, nos por siña sin lugar na duda, cu e doctrina di Santonan a wordo falsifica dor di religiosonan cu ta realmente siñadornan falso. E unico berdadero santonan den mundo ta e pecadornan cu a tende e Evangelio y a kere, y a obedece di curason cu yudansa di Spirito Santo di Dios. Segun e Palabra di Dios: Cristo a bini na mundo pa salba pecadornan. El a bini pa busca y salba pecadornan. Segun Scritura: TUR hende a peca, y ta falta e gloria di Dios. Segun Scritura cu separa di fe den e Yiu di Dios Kende a wordo crucifica pa nos; no tin salbacion den nada y ningun otro. No ta religion ta salba nos, kerido amigonan di tur edad; pero fe personal den Jesus, e yiu di Dios. Y esey por tuma lugar den cualke momento, y na cualke luga. Pasobra e ta asunto di curason manera ta para scirbi cu: “Si bo confesa Señor Jesus cu bo boca, y kere den bo curason cu Dios a lant’E for di morto, bo lo ta salba. Pasobra e ta cu bo curason bo ta kere, y ta hustifica, y ta cu bo boca cu bo ta confesa y ta salba.” Manera Scritura ta bisa: Cada uno cu confia den djE, lo no wordo poni na berguensa nunca… pasobra cada uno cu yama ariba e nomber di Señor lo ta salba. (Lesa Romanonan 10) Ta e pecadornan aki cu a repenti di nan bida di pica, y ta kere di curason den Señor Jesus, ta e SANTONAN BERDADERO segun e Palabra di Dios.
E foto aki ta saca na parti Noord di nos bunita isla! Nos ta gusta masha di keiro banda di laman y wak "nos" gansnan asina bunita sinta riba e barancanan, y cana poco den e awa di laman! Ki precioso e ta! Ki un privilegio cu ainda Dios ta duna nos e energia!

Thursday, October 25, 2012

Bon dia amigonan di nos Blog! E foto ta di nos palo chikito di "pomegranate" - e ta produci bon. Ami Betty ta gusta su fruta - chupa e djuis di pipitanan! Den siman nos a lesa basta tocante santonan, ma kico Scritura (Beibel) ta bisa di e asunto e "santonan"? E SANTONAN Kende ta e persona cu por wordo yama un “Santo”? Kende por declara un persona como un “Santo”? Kico un ser humano mester hasi, of con e mester biba pa e por wordo declara como un “Santo”? Kico e titulo “SANTO” ta nifica? Amigonan di tur edad; e unico cu por y ta hasi esey tambe, ta e Dios Todopoderoso. Na manera di bisa, e doctrina aki relaciona cu e titulo “Santonan”, ta asina cla den Beibel; cu no ta keda lugar pa erornan cu ta wordo cometi te ariba e dia di awe tanto ta aki na Aruba, como e otro islanan, y realmente rond mundo. E potret cu mundo religioso ta duna di un persona “santo” ta; un persona cu mannan den forma di oracion, cu wowonan dirigi na cielo y cu un splendor rond di su curpa. No tin lugar pa un trahador cu ta gana su pan cu sodor di su frenta, of un mama cu ta traha duro pa yuda su esposo y nan yiunan, etc., etc. Amigonan stima pa nos Tata Celestial Su mes; den Beibel tin hopi ehempelnan scirbi pa nos relaciona cu e Santonan berdadero. Den e Buki di Echunan 9:32, nos ta lesa lo siguiente: “Awor a sosode cu ora Pedro tabata biaha dor di tur e partinan ey, el a bai tambe cerca e Santonan cu tabata biba na Lida.” Mescos nos por lesa den Efesionan 1:15 lo siguiente: “Pa e motibo aki tambe, despues di a tende di e fe den Señor Jesus cu tin meimei di boso, y boso amor pa tur e Santonan, mi no ta stop di duna gradicimento pa boso, cordando boso den mi oracionnan; pa e Dios di nos Señor JesuCristo, e Tata di gloria por duna boso un spiritu di sabiduria y di rebelacion den e conosmento di djE”. Aki e Apostel ta scirbiendo na hendenan mescos cu nos. Y mescos cu awe nos tin esunnan cu ta kere e Evangelio bendiciona di nos Señor di henter nan curason; nos tin tambe esunnan cu te awe ta rechasa of ta hasi menos caso di e Evangelio. E tempo di e Apostel Pablo, tabatin e Judiunan cu a resisti contra e Evangelio di gracia di Dios. Awe rond mundo encluyendo aki n a Aruba y e otro islanan, nos tin e religiosonan cu ta wordo yama Cristiannan, cu ta risisti contra e Evangelio. Y un di e formanan cu e Evangelio di Dios ta wordo rechasa abiertamente y publicamente ta, pa medio di adoracion di Santonan. Den e ultimo dianan aki, tabatin otro personanan cu a wordo declara como santo, dor di Lidernan religioso. Y esey ta enclui, cu di awor padilanti , e religiosonan por hasi oracion na e personanan aki cu a wordo declara como Santo, dor di hende, pero no dor di Señor. Nos ta comprende cu un mensahe manera esaki, por hasi hopi hende sinti nan mes ofendi. Pa e motibo ey nos kier encurasha tur hende cu lesa e mensahe aki, pa bo lesa den bo Beibel y mira pa bo mes, cu e loke nos ta bisa aki ta e loke ta segun Scritura, y no segun religion. Ademas si bo ta un persona cu kier ta sigur sigur, y no kier wordo gaña, anto drenta den bo camber of unda ke sea cu bo por papia cu Dios libremente tocante bo situacion. Bisa na Señor cu bo kier sabi e berdad y pa E yuda bo comprende, etc. E promesa di Scritura ta esaki: “Ken cu invoca e Nomber di Señor, lo ta salba”. Tambe e ta bisa: E palabra ta serca di bo, e ta den bo boca, y den bo curason,…… Si bo confesa cu bo boca, cu “Jesus ta Señor”, y kere den bo curason cu Dios a lant’E for di morto, bo ta ta salba. Pasobra e ta cu bo curason cu bo ta kere y ta hustifca, y e ta cu bo boca cu bo ta confesa y ta salba. Manera Scritura ta bisa: Cada uno cu confia den djE, nunca lo wordo poni na berguensa…Pasobra cada uno cu yama ariba e nomber di Señor lo ta salba. Si Señor permiti, nos lo sigui e mensahe aki den e siguiente BLOG.

Friday, October 12, 2012

E HUICIO DI DIOS continua

Alafin alafan nos amigonan Benny y Miriam, su empleada a basha nos camina di nos casita pa e auto! Net na ora tambe, pasobra tres siman pasa ami a opera heup (di dos bes den un anja) y ki un bendicion e "walkway" ta! Danki Benny y Miriam pa e bunita trabao di amor!! Den e prome mensahe tocante e Dia di Huicio nos a menciona cu un dia Dios lo huzga henter humanidad. Y e Huicio ey lo ta basa ariba berdad sin excepcion di persona. Esey ta nifica cu henter humanidad ta enclui desde Adam te na e ultimo persona cu lo nace. Pero Scritura ta revela mucho mas cu esey, y ta bisa nos lo siguiente den Echunan 17:29-31. “P’esey siendo cu nos ta decendencia di Dios, nos no por pensa cu e Ser Divino ta manera oro of plata of piedra – un imagen forma dor di arte y imaginacion di hende. Den tempo pasa Dios a ignora tal ignorancia, pero awor E ta comanda tur hende na tur parti, pa nan repenti. Pasobra El a stablece un dia cu E lo huzga e mundo cu husticia pa medio di e homber cu El a apunta. El a duna prueba di esaki na tur hende dor di a lant’E for di e mortonan.” Amigonan di tur edad, anciano y hobennan, homber y mohenan, ta pa nos, Dios e Creador di e Cielonan y e tera , ta sperando. E ta spera pa cada uno di nos repenti di nos bida di pica, y obedece e Evangelio, cual su nificacion ta, e bon nobo di pordon y di bida eterno den Cristo, nos Señor. Cualke persona cu ta spera pordon di pica y bida eterno di cualke otro manera, ta rechasa e gran amor di Dios y e sacrificio di Dios Su unico Yiu cual ta Jesus nos Señor. P’esey cu nos ta lesa e spiertamento solemne aki den Scritura cu ta bisa: “Con no lo por scapa, si nos neglisha un salbacion tanto grandi asina?” E palabra “neglisha” ta hopi importnte como un spiertamento na cada uno di nos. E ta nifica cu ora un persona tende of lesa tocante repentimento y pordon di picanan pa medio di fe den nos Señor y Salbador JesuCristo; e no ta nenga of rechasa e mensahe ey. Ma e simplemente ta sigui biba, mescos cu nunca el a lesa of tende esey. Tin bes nos por bisa: e mensahe ey di fe den e yiu di Dios ta berdad, pero….. algun dia lo mi mira tocante esey. Pues, nos por yega na e lugar, cu nos no ta bisa no; pero nos ta pospone pa un otro dia. Y amigonan stima, pa kende Cristo a sufri y a muri y a resucita; ta e sorto di actitud ey ta wordo yama den scritura “NEGLISHA”. E ta un di e formanan di mas bergonzoso di rechasa e AMOR y MISERICORDIA di nos Tata Celestial, y di nos Señor y Salbador JesuCristo. Poco poco e santidad di matrimonio ta despareciendo, y aki na Aruba no ta menos. Antes, ora cu un hoben yega na e edad di matrimonio, e lo aserca e señorita di cual el a enamora, y declara su amor cu e proposito pa nan dos uni den matrimonio. Si e señorita ta di acuerdo, e prome cos cu e hoben lo haci, ta pa pone e dia pa aserca e mayornan di e señorita pa ricibi nan aprobacion. Pa haci e asunto ey cortico, den e asunto ey di uni den matrimonio, ta algo serio y sagrado den bista di Dios, y tambe den bista di hende. Ey no tin asunto di bisa, “Mi ta bai pensa, mi ta bai mira, despues kisas ora cu mi bira mas bieuw, etc., etc.” No, mi amigonan, te asta den e bida temporario aki, nos ta masha cuidadoso tocante di nos decisionnan cu nos ta haci. Cuanta mas cuidadoso nos mester ta tocante decisionnan cu tin consecuencia eterno. Scritura ta spierta nos bes tras bes, cu lo tin Un Dia Di Huicio pa henter humanidad, y despues di e huicio ey, lo no tin tempo mas. Lo no tin tempo pa repenti mas, y pa confia di curason den Esun cu a carga nos picanan den Su curpa ariba e crus, pa nos libra di picanan por biba pa husticia, pasobra ma medio di Su (Señor Jesus) heridanan, nos a wordo cura. Pasobra e Tata a haci Esun cu no conoce pica, bira pica pa nos. Pa nos por bira e husticia di Dios den djE. Tur e cosnan aki ta scirbi pa nos bon eterno. “Danki Señor pa Bo amor tan grandi pa nos, cu ta den Cristo nos Señor. Amen.”

Wednesday, October 10, 2012

Bon dia nos amigonan stima; aki Sr. Bicento ta comparti algun pensamentonan for di e Scrituranan tocante E Dia di Huicio. Les'e, pens'e, y comparti cu nos ariba "share comment". Nos lo aprecia esey; e lo encurasha nos. E DIA DI HUCIO Den Scritura Santo, nos por lesa hopi cla tocante e “DIA DI HUICIO”. Esey ta e dia cu Dios lo huzga henter humanidad cu a biba desde e prome hende cu a bin na mundo, te na e ultimo. Esaki anto, ta inclui cada persona cu ta na bida awe, y cada persona cu lo nace ainda prome cu e dia final. Y laga nos ta sigur, y masha sigur, cu e dia ey lo yega net manera ta para scirbi. Y laga nos purba comprende cu e spiertamento aki ta scirbi pa nos bon. Pasobra no ta e boluntad di nos Tata Celestial pa un persona bai perdi. Ma Su boluntad ta pa tur hende repenti y tin fe den Cristo. Sinembargo e dia ey yama: “E DIA DI SEŇOR” lo bini manera un ladron. Anto e cielonan cu nos ta mira awor, lo desparece cu un boroto, y e elementonan lo wordo destrui pa candela, y e tera y tur loke tin den dje lo wordo kima completamente. (Lesa 2 Pedro 3: 1-18) Mientras cu Señor Jesus tabata ainda den un curpa humano ariba e mundo aki, Su discipelnan a puntr’E tocante ki señalnan lo tin prome cu Su benida, y e fin di e era aki. Y den Mateo Capitulo 24, nos por lesa Señor Su contesta cu a wordo scirbi y preserva pa nos por lesa awe. Awor amigonan stima pa Señor Su mes; siendo cu ta asina e sistema di e mundo aki lo caba, kico nos por, of kico nos mester haci pa nos por scapa di condenacion? Danki na Señor nos Dios cu Scritura ta cla y persistente tocante e contesta pa e pregunta ey. Laga nos lesa un ehempel, un Scrtiura masha simple y conoci, cu ta den Juan 3: 1-21. Anto e versiculo 16,17, ta bisa nos lo siguiente: “Pasobra Dios a stima mundo asinta tanto cu El a duna Su unico Yiu pa tur cu kere den djE, no bai perdi, ma tin bida eterno. Pasobra Dios no a manda Su Yiu den mundo pa condena e mundo, ma pa salba e mundo door di djE. Kende cu kere den djE lo no ta condena, ma kende cu no kere, ta keda condena caba,. Pasobra e no a kere den e nomber di e unico Yiu di Dios. Pues amigonan di tur edad, y di tur nacion sea sigur awe, cu si bo ta uno di esunan cu te na e momento aki NO a repenti di bo picanan y acepta personalmente Señor Jesus como bo unico Salbador; ta nifica cu bo ta bou di e condenacion di cual Scritura ta spierta cada uno di nos. Ora cu Señor Jesus a wordo crucifica, El a carga e pica di henter humanidad den Su curpa. Y siendo cu e pago di pica ta morto, nos Señor tambe a muri, pasobra El a carga nos picanan den Su curpa ariba e crus. Anto ora cu nan a mira cu e tabata morto, nan a bah’E for di e crus, y a hib’E y pon’E den un graf. Pero na di tres dia, Dios e Tata a lant’E for di e mortonan, pasobra E mes nunca a peca. Y pa e motibo ey tin pordon di picanan pa cada persona cu repenti y kere den nos Señor Jesus. Anto Scritura ta yen di bendicionnan pa cada persona cu admiti su picanan y acepta personalmente Señor Jesus como bo Salbador. E ora ey, segun Scrtiura, e ta mescos cu bo a wordo crucifica cu Cristo, y dera cu nE, y resucita cu nE. Amigonan stima pa Señor, ora cu Jesus a muri ariba e crus, ta pa motibo di nos picanan El a muri, y keda tres dia den e graf. Ma ora cu e Tata a dun’E bida atrobe, El a haci esey no solamente pa Su unico Yiu, ma pa henter humanidad. P’esey cu awe ta posibel pa nos hasi un invitacion na tur hende na tur parti pa repentimento di picanan y fe den nos Señor JesuCristo. Anto Dios Su promesa ta cu pa e persona cu repenti y kere den Señor Jesus, lo no tin condenacion mas. Pero e persona aki ta pasa for di morto na bida. (nos lo continua den un otro blog cu e tema: E DIA DI HUICIO.

Sunday, September 9, 2012

UN CRISTIAN (continuacion) Den e prome mensahe nos a menciona cu e titulo of e nomber CRISTIAN ta conoci den henter mundo. Y sigur cu aki na Aruba y e otro islanan mescos. Pero como un spiertamento solemne y masha serio nos ta sigui spierta; cu masha hopi hende cu ta yama su mes un Cristian ta un Cristian di nomber solamente. Esun cu ta scirbiendo esaki a pasa dor di e experencia ey te na e edad di binti y tres aña. Ta na e edad ey mi a tende e Evangelio di gracia di Dios pa prome bes. Y despues di a risisti pa un poco tempo mi a obedece Dios, dor di dobla mi rudianan y acepta Señor Jesus como mi unico Salbador personal. Ya awor cu nos ta scirbiendo esaki, hopi añanan a pasa. Pero manera Scritura ta bisa: “JesuCristo ta keda mescos, manera E tabata ayera y awe y pa semper. Segun Scritura; “bou cielo no tin otro nomber duna na hende pa medio di cual nos meser wordo salba.” Pues, no tin salbacion den ningun otro! Y ora cu e Spirito Santo a inspira e Apostel pa bisa cu no tin salbacion den ningun otro, ta nifica cu ta asina e ta, y asina ta keda te na e final di e era aki. Y nos no mester lubida cu segun Scritura y segun nos mes por mira y tende; cu cada uno di nos su bida ta manera neblina cu ta parece pa un poco tempo y despues ta desparece. (Lesa Santiago 4:13-17) Y e spiertamento ey ta pa nos tur sin excepcion. Scritura ta spierta nos cu lo bini tempo trabahoso of dificil y malo. Pasobra hende lo bira stimado di nan mes, stimado di placa, gabado, orguyoso, abusado, desobedecido na nan mayornan, ingrato, impio, ireconciliabel (no ta pordona) sin dominio propio, grosero, odiado di loke ta bon, traidor, sorberbe, etc., etc. Anto ainda, apesar di e caracteristiconan ey, tog e ta religioso. (Lesa 2 Tim. 3:1-5). Un di e motibonan pakico mi por comprende hopi bon e forma di bida aki ta: cu mi a biba e sorto di bida ey for di mucha te na edad di mas cu binti aña. Y na principio cu mi a tende e Evangelio di gracia di Dios, mi tabata persisti cu ya mi ta un Cristian. Pero pronto mi a wordo convenci cu mi tabata un Cristian pa nomber so, pero no den e bista di Dios. Den e buki di Echunan, tin un porcion cu ta manera un potret di hopi di nos cu ta biba den e islanan aki. E Apostel Pablo durante su biahenan Misionero a haya su mes na Atenas, unda e tabata sperando ariba su compañenan den e obra di proclama e Evangelio di gracia di Dios. Anto ora cu El a mira con e cuidad tabata yen di idolonan, e tabata masha perturba. Anto el a cuminsa descuti cu algun Judiunan y algun Griego cu tabata teme Señor. E Apostel su mensahe tabata tocante Jesus y e resureccion. Y ora cu e hendenan aki a tende di resureccion, algun di nan a cuminsa hasi bofon. Ta increibel, pero te awe nos tin e mes un spirito ey di mintira ta reinando den nos islanan meimei hendenan religioso. Nos ta baiendo mas y mas leuw di Dios, den un forma di spirito religioso. Nos ta yama nos mes Cristian, na e mes un tempo cu nos ta enemigonan di Cristo. Nos ta Cristiannan sin Cristo, of sea, Cristiannan di nomber so, pero enemigo di e crus di Cristo. Cu tur respet pa e nomber di Senor Jesus, nos ta hala atencion na e eror di adoracion di Niño Jesus. Señor Jesus NO A KEDA un mucha. Realmente El a cuminsa cu Su ministerio di proclamacion di e Palabra ora cu El a cumpli trinta aña. Y El a muri pa nos picanan ariba un crus, na edad di trinta y tres aña mas of menos. Awe Señor Jesus ta sinta na man drechi di e Tata den un curpa glorifica, y no como un mucha. UN CRISTIAN (continuacion) Den e prome mensahe nos a menciona cu e titulo of e nomber CRISTIAN ta conoci den henter mundo. Y sigur cu aki na Aruba y e otro islanan mescos. Pero como un spiertamento solemne y masha serio nos ta sigui spierta; cu masha hopi hende cu ta yama su mes un Cristian ta un Cristian di nomber solamente. Esun cu ta scirbiendo esaki a pasa dor di e experencia ey te na e edad di binti y tres aña. Ta na e edad ey mi a tende e Evangelio di gracia di Dios pa prome bes. Y despues di a risisti pa un poco tempo mi a obedece Dios, dor di dobla mi rudianan y acepta Señor Jesus como mi unico Salbador personal. Ya awor cu nos ta scirbiendo esaki, hopi añanan a pasa. Pero manera Scritura ta bisa: “JesuCristo ta keda mescos, manera E tabata ayera y awe y pa semper. Segun Scritura; “bou cielo no tin otro nomber duna na hende pa medio di cual nos meser wordo salba.” Pues, no tin salbacion den ningun otro! Y ora cu e Spirito Santo a inspira e Apostel pa bisa cu no tin salbacion den ningun otro, ta nifica cu ta asina e ta, y asina ta keda te na e final di e era aki. Y nos no mester lubida cu segun Scritura y segun nos mes por mira y tende; cu cada uno di nos su bida ta manera neblina cu ta parece pa un poco tempo y despues ta desparece. (Lesa Santiago 4:13-17) Y e spiertamento ey ta pa nos tur sin excepcion. Scritura ta spierta nos cu lo bini tempo trabahoso of dificil y malo. Pasobra hende lo bira stimado di nan mes, stimado di placa, gabado, orguyoso, abusado, desobedecido na nan mayornan, ingrato, impio, ireconciliabel (no ta pordona) sin dominio propio, grosero, odiado di loke ta bon, traidor, sorberbe, etc., etc. Anto ainda, apesar di e caracteristiconan ey, tog e ta religioso. (Lesa 2 Tim. 3:1-5). Un di e motibonan pakico mi por comprende hopi bon e forma di bida aki ta: cu mi a biba e sorto di bida ey for di mucha te na edad di mas cu binti aña. Y na principio cu mi a tende e Evangelio di gracia di Dios, mi tabata persisti cu ya mi ta un Cristian. Pero pronto mi a wordo convenci cu mi tabata un Cristian pa nomber so, pero no den e bista di Dios. Den e buki di Echunan, tin un porcion cu ta manera un potret di hopi di nos cu ta biba den e islanan aki. E Apostel Pablo durante su biahenan Misionero a haya su mes na Atenas, unda e tabata sperando ariba su compañenan den e obra di proclama e Evangelio di gracia di Dios. Anto ora cu El a mira con e cuidad tabata yen di idolonan, e tabata masha perturba. Anto el a cuminsa descuti cu algun Judiunan y algun Griego cu tabata teme Señor. E Apostel su mensahe tabata tocante Jesus y e resureccion. Y ora cu e hendenan aki a tende di resureccion, algun di nan a cuminsa hasi bofon. Ta increibel, pero te awe nos tin e mes un spirito ey di mintira ta reinando den nos islanan meimei hendenan religioso. Nos ta baiendo mas y mas leuw di Dios, den un forma di spirito religioso. Nos ta yama nos mes Cristian, na e mes un tempo cu nos ta enemigonan di Cristo. Nos ta Cristiannan sin Cristo, of sea, Cristiannan di nomber so, pero enemigo di e crus di Cristo. Cu tur respet pa e nomber di Senor Jesus, nos ta hala atencion na e eror di adoracion di Niño Jesus. Señor Jesus NO A KEDA un mucha. Realmente El a cuminsa cu Su ministerio di proclamacion di e Palabra ora cu El a cumpli trinta aña. Y El a muri pa nos picanan ariba un crus, na edad di trinta y tres aña mas of menos. Awe Señor Jesus ta sinta na man drechi di e Tata den un curpa glorifica, y no como un mucha.

Thursday, September 6, 2012

UN CRISITIAN E nomber of titulo “CRISTIAN”, ta conoci den henter mundo, y probablemente cada persona cu lesa e mensahe aki, ta considera su mes como cu un Cristian. Ta interesante pa sabi, cu den Beibel e titulo ey ta wordo menciona solamente tres bes. Y nos por haya nan den: Echunan 11:26, y Echunan 26:28, y 1 Pedro 4:16. Pero prome cu e titulo ey a tuma lugar, esunnan cu a obedece e Evangelio tabata ser yama “E keredornan”. Mas despues, ora cu e Apostelnan a scirbi na e diferente Iglesianan, e keredornan ta wordo yama: santonan, y stimanan y yiunan di Dios. Pa bisa e berdad, basa ariba e Palabra di Dios bibo, te awe e ta sigui mescos. Cu esey nos ta bisa, cu tur y cada persona cu ta kere e Evangelio di curason segun Scritura, ta un yiu di Dios, y eredoro segun Dios Su promesa. (Lesa Romanonan 10:1-21) Amigonan di tur edad, cu tur reverencia y libertad cu nos tin den Cristo, nos ta roga na cada uno cu lo lesa e mensahe cortico aki, pa bo sabi sigur cu Dios ta stima nos, y no ta Su boluntad pa un solo persona bai perdi. Ma loke ta Su boluntad revela masha cla den Scritura ta: Pa nos tur repenti di nos picanan, y acepta Señor Jesus como nos unico Salbador personal. (Lesa 2 Pedro 3:9; Echunan 17:30,31) Awor bolbiendo na e titulo of nomber CRISTIAN, den e lus di doctrina Sano cu ta segun Scritura; e titulo ey ariba su mes no ta un garantia di salbacion. E berdad ta cu masha hopi personanan cu ta carga e nomber Cristian nunca a repenti di pica y acepta Señor Jesus como su unico Salbador. Di acuerdo cu Scritura; sin repentimento no tin pordon. Segun e Palabra di Dios den Scritura; fe ta bini pa medio di tendemento, y tendemento di e Palabra di Cristo. Hunto cu esey, Scritura ta hopi cla tocante e obra di e Spirito Santo di Dios. Ora cu un persona ta tende e mensahe di Dios cu ta e Evangelio, e Spirito Santo ta convence e persona aki di pica y di huicio y tambe di husticia. Y e proposito finalmente ta pa nos admiti nos pica, y ricibi e pordon for di Dios mediante nos Señor y Salbador JesuCristo. Amigonan stima, ta pa nos y den nos lugar Cristo a muri. Pasobra e Tata a pone den Su Yiu e picanan di nos tur ora E tabata ariba e crus. Pues ora cu nos Señor a muri, El a muri pa henter humanidad, pasobra E mes no a comete ningun pica, y ningun mentira a wordo haya den Su boca. Pues ta pa nos El a sufri, ta pa nos El a muri. Y despues di tres dia Dios, e Tata a lamt’E for di morto, y a dun’E e nomber cu ta ariba tur nomber. Cu pa e nomber di Jesus, tur rudia lo dobla, y tur lenga lo confesa cu JesuCristo ta Señor pa Gloria di Dios, e Tata. P’esey, amigonan stima, examina bo mes awe, si bo ta den Cristo, y no sigui dual den scuridad di incredulidad. Sea sigur, y masha sigur cu NO TIN SALBACION den ningun otro, pasobra bou di cielo no tin otro nomber duna na hende, pa medio di cual nos mester wordo salba. Awe mas cu nunca antes maldad ta multiplica na tur parti di mundo, y Aruba no ta keda afo, y ningun di e otro islanan. Sea sigur cu Dios ta stima nos, y esey a keda marca den historia mediante e morto di e Yiu di Dios na un manera bergonsoso ariba un crus. Pero ey ta unda El a carga e picanan di henter humanidad den Su curpa. Y henter humanidad ta inclui, abo cu ta lesa e mensahe aki, y tambe tur otro persona cu a biba y cu ta biba awe, y esunnan cu lo nace ainda. Corda e loke e Spirito di Dios a inspira un di e sirbidornan di Dios pa scirbi cu ta esaki: “KEN CU INVOCA E NOMBER DI SEŇOR LO TA SALBA!” (Romanonan 10:13)

Sunday, August 19, 2012

E CAMINA Nos ta bibando den e dianan cu e Profeta Daniel a scirbi di dje bisando, “Hopi lo bai di un lugar pa otro pa aumenta sabiduria.” Lesa capitulo dies di Daniel pa mas splicacion tocante e tempo den cual a toca nos pa biba. Mas despues e Apostel Pablo ta yama e tempo aki como temponan peligroso. Lesa of pidi otro pa lesa pa bo den 2 Timoteo 3:1-5. Aki ta unda e sirbidor di Dios, e Apostel Pablo a spierta nos hopi adelanta tocante e dianan aki den cualnan nos ta bibando awe. E ta yama e dianan aki como temponan teribel: “Hende lo ta stimado di nan mes, stimado di placa, bromado, orguyoso, abusador, desobedecido na nan mayornan, ingrato, impuro, sin stimacion, ireconciliabel, mal lenga, sin dominio propio, grosero, ta odia loke ta bon, traidor, imprudente, soberbe, stimado di placer na lugar di stima Dios. Tin un forma di ta religioso, pero ta nenga su poder.” Amigonan y rumannan stima pa Señor nos Dios Su mes; nos no ta scirbiendo e cosnan aki pa otronan solamente; pasobra segun Scritura cu ta e Palabra di Dios bibo y santo, ta henter humanidad ta encera den e loke Spirito Santo di Dios ta bisa nos. Ehempel: Beibel ta bisa nos, tur di nos sin excepcion. cu no tin ni un hende husto, no tin ni un cu ta busca Dios. Segun Scritura, ta nos tur a bira inutil. Lesa Rom. 3:1-31. Ademas tin hopi otro Scrituranan cu ta spierta nos tocante e mes un berdad ey cu ta encera nos tur. E Apostel Pablo scirbiendo na un di e sirbidornan di Señor, ta spierta e sirbidor aki cu yama Tito, y a bis’e lo siguiente: “Recorda e puebel pa nan ta someti na e gobernantenan y autoridadnan, pa nan ta obedecido, pa nan ta cla pa haci tur loke ta bon, pa nan no papia malo di ningun hende, pa nan ta passible y tin consideracion y pa mustra berdadero humilidad na tur hende. Pasobra un tempo nos tambe tabata bobo, desobedecido, gaña y sclabisa na tur sorto di pashonnan y placernan. Nos a biba den malicia y envidia, odio y odiando un y otro. Pero ora cu e bondad y amor di Dios nos Salbador a aparece, El a salba nos, no pa motibo di e cosnan husto cu nos a haci, ma pa motibo di Su misericordia. El a salba nos dor di e labamento di nacemento di nobo y renobamento dor di e Spirito Santo, Kende El a drama ariba nos generosamente pa medio di JesuCristo nos Salbador, di manera cu siendo hustifica pa Su gracia, nos por bira erederonan, teniendo e speransa di bida eterno (Lesa Tito 3:1-7) Den un otro lugar, e Apostel Pablo ta bisa nos lo siguiente: Aki ta un palabra fiel cu ta merece aceptacion completo: “Cristo Jesus a bini den mundo pa salba pecadornan, di cualnan ami ta esun di mas peor. Pero ta pa e motibo ey mi a haya misericordia, asina cu den mi, e pecador di mas malo, Cristo Jesus por demostra Su pasenshi sin limite como un ehempel pa esunnan cu lo kere den djE, y ricibi bida eterno.” Anto e Apostel ta conclui cu e palabranan aki di gradicimento na Dios bisando: “Awor na e Rey Eterno, immortal, invisible, e unico Dios, sea honor y Gloria pa semper y semper. Amen.” (Lesa 1 Tim. 1:15-17) Amigonan di tur edad, nos no por nenga cu e mundo ta yen di sabiduria awe. Y sabiduria ariba su mes, no ta malo, ma ta hende a cai desde e cuminsamento di humanidad. Mira con asta den e isla cjikito aki cuanto maldad ta tumando lugar. Y apesar di esey, nos ta wordo considera como Cristiannan. Pero segun e palabra infalibel di Dios, tin solamente UN CAMINA, y UN SALBADOR. Señor Jesus Su mes mientras cu E tabata ariba e mundo aki den un curpa humano a bisa lo siguiente pa henter humanidad tende: “Ami ta e Camina, e Berdad y e Bida. Ningun ta bini cerca e Tata sino pa medio di Mi.”

Wednesday, August 15, 2012

Bon dia lesadornan di nos Blog. Aki nos ta mustra un tiki porcion di nos hofi prome cu nos mester a haci cambionan - door cu nos trapinan y balcon ta den processo di wordo traha! Algo cu nos ta sperando di basta dia, Pues, nos a ranca nos ramanan di pampuna, squash, concomber, bonchinan y melon - tabata lastima, ma nan a rama full cubri henter e lugar unda nos veranda chikito lo bin. Otro biaha mi ta spera di por mustra boso nos entrada dilanti!

Thursday, August 9, 2012


UN CREACION NOBO

Segun Scritura, FE ta bini via tendemento, y tendemento di e Palabra di Cristo. (Rom. 10:17)

Amigonan di tur edad: damanan y cabayeronan, e declaracion aki for di Beibel, y bo por busca den cualke Beibel cu bo ta desea; ta keda e berdad te na final di e mundo aki. Manera nos sabi, ta hopi religion tin den mundo. Pero, pa e autoridad di e Palabra di Dios, nos ta declara cu no tin salbacion den ningun religion, ni aki na Aruba, y na ningun otro parti di mundo. Pakico nos por bisa esey? Pasobra e Spirito Santo di Dios a inspira e Apostel Pedro pa bisa nos lo siguiente: “Y no tin salbacion den  ningun otro, pasobra no tin un otro number duna na hende bou di cielo, pa medio di cual nos mester wordo salba.” (Echunan 4:12)

Awor por bin e pregunta: Kico ta di iglesianan; e ta malo pa bai na un iglesia? E ta malo y robes pa ta miembro di un Iglesia? Nos contesta ta esaki: Claro cu e ta bon pa nos ta miembro di un Iglesia. Pero nos mester tene cuenta cu un berdadero Iglesia ta unda e Palabra di Dios ta wordo proclama y siña. Un di e problemanan grandi cu nos tin cu e nomber Iglesia ta, cu nos ta considera e edificio unda nos ta reuni, como Iglesia. Pero e berdad ta, cu ta e keredornan, esta cada persona cu a repenti y ta kere den nos Señor y Salbador JesuCristo pa pordon di picanan, ta bira un miembro di e Iglesia di Cristo. Y hunto cu tur otro berdadero keredornan di henter mundo, nos ta miembranan di E IGLESIA DI CRISTO, Y DI DIOS. E Iglesia ta yama den Scritura: E Iglesia di Dios bibo,pilar y fundeshi di berdad.

Nos tur sabi e importancia di un fundeshi prome cu lanta un edificio. Den Lucas 6:46-49, Señor Jesus Su mes ta duna nos un spiertamento hopi cla tocante e importancia di un bon fundeshi, bisando “Pakico boso ta yama Mi Señor, Señor, y no ta haci loke Mi ta bisa? Ami lo mustra boso con e lo ta cu un persona cu bini cerca Mi, y tende Mi palabranan y pone nan den practico. E ta mescos cu un homber trahando un cas, kende a coba hundo y a pone un fundeshi ariba baranca. Ora cu un deluvio a bini (of un tempestad) esey a dal duro contra e cas ey, pero no por a sacudi e, pasobra e tabata bon traha. Pero esun cu a tende Mi palabranan, y no pone nan na practica ta igual cu un homber cu a edfica un cas ariba e tera sin un fundeshi. E momento cu e torente a dal contra e cas ey, el a basha abou, y su destruccion tabata completo.

Kisas nos por puntra: Ta di cual palabranan nos Señor ta papiando ey? E contesta corecto nos ta haya pa cuminsa, den e prome cuater relatonan den e Testamento Nobo, esta, Mateo, Marco, Lucas y Juan. Anto despues cu e Spirito Santo a bini nos tin e resto di splicacion den tur e cartanan te na e buki di Rebelacion. Pa e motibo ey  ta di masha importancia pa nos habri nos oreanan y nos curason pa duna atencion na e palabranan cu nos Señor mes a papia pa cada uno di nos sin distincion di persona.

Laga nos mira un porcion chikito tocante e importancia absoluto di e palabranan di Señor. Consolando Su discipelnan prome cu Su morto ariba un crus, El a bisa nan lo siguiente: “No laga boso curason bira intrankilo. Confia den Dios, of: boso ta confia den Dios; confia den Mi tambe. Den e cas di Mi Tata tin hopi luga; si no tabata asina, Mi lo a bisa boso. Mi ta bai y prepara un luga pa boso, lo Mi bolbe y tuma boso pa ta cu Mi, pa boso tambe por ta unda cu Ami ta. Boso sabi e camina pa e luga na unda Mi ta bai. Thomas a bisa Jesus, Señor nos no sabi ta unda Bo ta bai, anto con nos por sabi  of conoce e camina? Jesus a contesta, Ami ta e camina, y e berdad y e bida. Ningun, of Ni un ta bini serca e Tata, sino pa medio di Mi.”

Amigonan stima pa Señor Su mes. Esaki ta e berdad rebela na nos dor di nos Señor Su mes; y splica dor di Scritura. E unico manera cu nos por nace di nobo, ta pa medio di fe personal den Jesus, e Yiu di Dios, Kende a entega Su mes boluntariamente pa muri den nos luga, cargando nos picanan den Su curpa ariba e crus. Pa nos por bira un creacion nobo, den djE.

Friday, July 27, 2012




Bon dia, bon dia!  E dianan aki nos ta come Papaya "bai gol!" Nan ta grandi y dushi.  Ki un bendicion pa tin nos propio hofi chikito cu ta produci. Ayera mi nos a come "Butternut Squash" di nos hofi. Awe mainta un melon di basta tamanjo.  Danki Dios pa Su bondad, y te awe nos tin e forsa pa cococha den nos pida lugar chikito yama: "Hardin di B&B"!
NO OTRO NOMBER

Beibel cu ta duna na nos pa inspiracion di Dios, ta bisa nos lo siguiente: “Y no tin salbacion den ningun otro, pasobra no tin otro nomber bou di cielo duna na hende pa medio di cual nos mester ta salba.” (Echunan 4:12)

E declaracion aki cu ta di sumo importancia pa henter humanidad, a wordo revela na e Apostel Pedro dor di e Spirito Santo na e mes un principo di proclamacion di e Evangelio bendiciona pa Dios. P’esey nos por ta sigur y masha sigur, cu e declaracion ey ta keda mescos awe. Y di berdad nos mester comprende cu si e declaracion ey no ta na vigor awe, ta nifica cu loke e Apostel Pedro a declara tocante salbacion solamente den e Nomber di Señor Jesus, no ta berdad.

Ora cu e Apostel a haci e declaracion preciso aki, e tabata controla pa e Spirito Santo, y no dor di sernan humano. (Lesa Echunan 4:5-12) Y no lesa mucho pura, sino cuidadosamente mescos cu tur otro Scritura. E mes Spirito Santo cu a inspira e Apostel Pedro pa declara e infalibel berdad aki, ta poderoso pa yuda nos comprende y pa obedece e mensahe ey di curason. Y esey ta nifica cu si ya bo ta un cu a obedece e Evangelio, bo lo sigui gradici Señor sin stop. Ma si encaso bo ta un persona sea hoben of adulto, cu te awe ta tira dj’aki p’aya, pa tur sorto di siñansanan religioso cu tur sorto di nombernan, etc., etc. Anto awe ta e dia pa bo reconoce bo necesidad personalmente na Señor nos Dios. E berdad ta, cu Señor conoce cada uno di nos exactamente manera cu nos ta; y pa e motibo ey, nos no tin mester di bunita palabranan of hopi palabranan pa nos por ricibi pordon di picanan y bida eterno. Y asina ey bira un miembro di e berdadero Iglesia di Cristo. Ora cu nos ta menciona e Iglesia di Cristo, nos no ta papia di un edificio, ni tampoco un religion. Ma e loke nos ta papia di dje ta, cu cada persona cu tende e Evangelio manera e ta presenta den Beibel, y kere di curason cu yudansa di Spirito Santo di Dios. E persona aki ta bira un miembro den e curpa di Cristo, cual ta wordo yama den Scritura: “ E Iglesia di Dios bibo, pilar y fundeshi di e berdad.” (1 Timoteo 3:15)

Si Señor permiti, nos lo sigui un poco mas tocante E Iglesia y e Iglesianan den un otro mensahe. Pero awe nos lo papia un poco tocante e CABES di e Iglesia aki, kende ta nos Señor y Salbador JesuCristo. Y no ta existi otro cabes, sino JesuCristo, e Yiu di Dios. Segun e Scritura cual nos a cuminsa cu ne den e mensahe aki; no tin salbacion den ningun otro, pasobra no tin un otro nomber  bou di cielo duna na hende pa medio di cual nos mester wordo salba. Siendo cu e mensahe y e advertencia ey a bini na e Apostel Pedro dor di e Spirito Santo di Dios Su mes, no ta keda lugar pa otro Salbador. Pasobra esey ta igual cu pone e Palabra di Dios un banda, y scohe nos mes Salbador, cual no solamente ta imposibel, pero tambe ta rebeldia contra Dios. P’esey manera Scritura ta spierta nos bisando, “Con lo nos por scapa si nos neglisha un salbacion tanto grandi asina? E salbacion aki a wordo anuncia dor di e Señor Su mes na prome lugar, y a wordo confirma na nos dor di esunnan cu a tende, esta a tende Señor papia di e salbacion grandi aki. Y Dios tambe a testifica di dje pa medio di señalnan y maraviyanan y varios milagernan, y donnan di e Spirito Santo comparti of destruibi di acuerdo cu Su boluntad. (Lesa Hebreonan 2:1-4)

O kerido lesador di e mensahe aki, sea sigur cu Señor ta fiel y ta cumpli cu Su Palabra tocante Salbacion pa medio di fe den Su Yiu stima, Kende a muri y resucita pa nos.  P’esey: OBEDEC’E awe.  Scirbi pa B&B Henriquez)

Sunday, July 22, 2012


SALUDO na tur lesador di nos Blog: nos  ke introduci Hyacinth (conoci como Chinda) na bosonan. Chinda ta yiu di Bicento y su prome esposa Ursula ( cu  ya a bai nos dilanti serca su Senjor. Chinda y su otro dos rumannan,  Myrna y Linda,  ta bin train tur diasabra . Senjor ta usando nan door di e ministerio di e CANTICANAN stima di Evangelio y Alabansa scirbi den e anjanan di 1940 pariba. Nan a wordo lubida y casi bandona den hopi di nos congregacionnan den e temponan den e utlimo anjanan . Yammer! Pasobra e mensahenan den nan ta toca e curason ki ora nan ta canta.  Hendenan ta expresa esey cada bes.
Keda dependiente pa otro fotonan - mas esaki a wordo saca diasabra cu a pasa ora nan a train pa canta na sirbishinan di Comunion di Igelsianan aki na Aruba cu ta tuma lugar e siman aki na Aruba.
NOS TA SIGUI AWOR CU E TEMA DI BIAHA PASA:
SPERANSA PA ESNAN SIN SPERANSA  (continuacion)

Den nos ultimo mensahe, nos a menciona e speransa cu ta segun Scritura compara cu e speransa relaciona cu cancer, tocante cual lo bai tin un seminario den e luna di Augustus benidera aki na Aruba. Ya nos a menciona caba den nos prome mensahe tocante e topico aki; cu nos no ta desprecia of ta contra e asunto di curamento pa cancer, pasobra cualke di nos por experimenta e enfermedad teribel ey. Masha hopi hende rond mundo ta muri di esey, encluyendo berdadero keredornan di e Evangelio bendiciona di Señor.

Ma e loke nos ta purba hala atencion di tur hende ta, cu Scritura ta papia hopi cla pa tur hende por comprende, cu Dios nos Tata a haci esaki posibel, esta: “Awe tin speransa pa esunnan cu no tin speransa.”

Sinembargo tin un gran diferencia meimei e speransa cu ta bini di Dios, cu e speransa basa riba e sabiduria di hende . No ta importa con salud y fuerte un ser humano por ta. Nos por tin e mihor docternan di mundo, etc. etc; pero, porfin nos tur lo muri toch. Pasobra Scritura ta bisa nos asina aki: “Ta stableci pa hende muri un bes, y despues ta sigui huicio.” (of huzgamento) P’esey ken cu bo por ta cu ta lesando esaki, encluyendo esun cu ta scirbiendo e mensahe aki. Laga nos sea sigur, cu cada un di nos lo muri, cu excepcion di esunnan cu nan fe ta den Jesus, y ta na bida ora cu e Señor lo bolbe of bini pa tuma Su Iglesia cu ta consisti di tur e personanan cu a repenti di pica y a deposita nan fe den Señor Jesus. Segun Scritura, esakinan lo no muri, ma nan lo wordo transforma den un momento y contra cu Señor den laira. (Lesa 1 Tes. 4:13-18)

Na un otro lugar nos ta lesa lo siguiente: Pablo, un sirbidor di Dios, y Apostel di JesuCristo, conforme e fe di e scoginan di Dios, y conocemento di e berdad cu ta segun santidad, den e speransa di bida eterno, cu Dios Kende no por gaña, a priminti hopi siglonan pasa, ma na Su debido tempo a manifesta Su Palabra, den e proclamacion cu a wordo confia na mi segun mandamento di Dios nos Salbador. (Tito 1:1-3).

Pues, amigonan stima, e doctrina di speransa ta hopi cla menciona den Scritura. E speransa aki for di Scritura, no ta mescos cu e speransa cu ta existi den mundo den varios forma. E speransa segun mundo ta similar cu casualidad of suerte. Un hende por bisa na otro; mi ta spera cu awa lo yobe den e dianan aki. Of, mi ta spera  tur cos bon pa bo, etc., etc. .. sin fin.

Pero e speransa cu ta segun Scritura ta absolutamente sigur, pasobra e ta basa ariba Palabra di nos Tata Celestial. Un cos cu cada un di nos mester tene bon cuenta cuenta cu ne ta esaki. “Mescos cu e promesanan di bida eterno pa cada persona cu repenti y kere den nos Señor y Salbador ta berdad. Mescos e spiertamentonan tocante e huicio di Dios contra esunnan cu no ta kere, of cu no kier kere, ta berdad. Segun Scritura: Esun cu kere den e Yiu (di Dios) tin bida eterno, ma esun cu no kere, lo no mira e bida ma e rabia di Dios ta keda riba dje.: Lesa Juan 3:13-21, y tambe Juan 5:24-30).

Friday, July 13, 2012

SPERANSA PA ESNAN SIN SPERANSA



“SPERANSA PA ESNAN SIN SPERANSA”

Pa esunnan cu lo keda na bida pa e dia ey, pronto aparentemente lo bai tin un Seminario masha special of sea extra ordinario. Y e proposito ta, pa esnan cu a perde speransa sabi cu tin speransa. Y e speransa menciona ta: “cu tin cura pa cancer”. Nos proposito den e mensahe corto aki, no ta pa desacredita e bon proposito di e Seminario ey. Ma nos ta haci uso di e oportunidad aki, pa recorda tur hende, cu ta existi ya for di miles di aña , curamento pa e cancer cu yama pica.

E problema grandi di e cancer cu yama pica ta, cu tur hende ta nace cu n’e for di barica di nos mama. For di e prome criatura cu a nace despues cu e prome pareha a wordo gaña pa e autor di e cancer aki, esta Satanas. Tur otro hende cu a nace despues ta nace cu e cancer aki cu yama:” PICA”.

Scritura ta absolutamente cla y persistente cu tur hende ta nace cu e cancer aki, cual su final ta morto. Pero danki na Señor nos Dios y Tata Todopoderoso pa Su amor inexplicabel, Kende for di e mes un momento cu e prome hendenan a cai den pica, a duna e promesa di un Salbador, Kende lo pachura e cabes di Satanas cu a introduce e cancer di pica den mundo cual a afecta tur hende te ariba e dia di awe cu nos ta scirbiendo e mensahe aki. Y e Salbador aki ta Su Yiu stima, Su unico Yiu cu ta nos Señor y Salbador JesuCristo. E ta e unico cu a nace sin e cancer cu yama pica. Pasobra El a nace pa e poder di Dios mediante e Spirito Santo door di un señorita of sea un birgen cu yama Maria. Pa e motibo ey, e criatura ey na cual Maria a duna lus, ta wordo yama “E Yiu di Dios”. Pero kico ta e motibo pa cual Dios, e Tata a haci esey?

Amigonan di tur edad, danki na Señor nos Dios cu e motibo pakico Señor a haci tal sacrificio ta para scirbi hopi cla den Beibel, pa nos por lesa for di dje directamente. Y e motibo berdadero pakico Señor nos Dios y Tata a haci e sacrificio tanto grandi asina ta: cu El a stima humanidad asina tanto, cu El a duna Su unico Yiu, pa tur cu kere den djE no bai perdi, ma tin bida eterno. Pasobra Dios no a manda Su Yiu den mundo pa condena e mundo, pero pa salba e mundo. Anto e ta spierta cada uno di nos bisando: Esun cu kere den e Yiu, no ta condena, pero kende cu no kere ta condena caba, pasobra e no a kere den e nomber di Dios Su Unico Yiu.

Anto Scritura ta sigui spierta nos bisando: Esaki ta e sentencia of verdicto, cu Lus a bini den mundo, pero hende ta stima scuridad na lugar di lus pasobra nan obranan of echunan ta malo.  Cada un cu ta haci loke ta malu ta odia e lus, y lo no bini na e lus, pasobra e tin miedo cu su  echunan lo wordo exponi. Ma esun cu ta biba pa medio di e berdad ta bini den e lus, pa asina por wordo mira claramente, cu loke el a haci a wordo haci mediante Dios.

Pa conclui e mensake cortico aki, nos por bisa cu ningun di nos ta tuma e enfermedad di cancer na un manera leviano. Pero mira con nos ta comporta cu e cancer di pica. Mira con nos ta propaga e cancer di inmoralidad publicamente sin ni un tiki di berguensa. Of e cancer di rebeldia contra nos mayornan, y contra autoridadnan. Of nos actitud pa cu e Evangelio bendiciona di Dios. Amigonan stima pa kende Cristo a duna Su bida, y cu Dios a lant’E for di morto. Ta pa nos por haya pordon di pica y bida eterno, El a haci esey! Pa nos cu tabata biba sin speransa, por tin awor e speransa di bida eterno cual e Dios cu no por gaña a priminti na nos. Y ta imposibel pa E gaña. Repenti awe, y pone bo fe den e Yiu di Dios; pasobra “E TA NOS UNICO SPERANSA”.     




Saturday, June 30, 2012


“E ULTIMO DIANAN”

Mescos cu tabatin e prome dianan di e historia humano, mescos lo tin tambe e ultimo dianan di humanidad. Con e asuntonan tabata prome cu Dios a crea e prome hendenan ariba e mundo aki, no tin mucho revelacion den Scritura. Pero con lo ta prome cu e fin di humanidad ariba e mundo aki si ta scirbi hopi cla pa esun cu kier tende. Asina pronto cu e prome sernan humano a cai den pica door di desobediencia na e mandato cla di Señor, pica a drenta den mundo mediante Adam y Eva. Y asina pica a sigui te ariba e momento aki cu mi ta scirbiendo e mensahe aki. Pero for di e mes un dia cu e prome sernan humano a desobedece Dios y a scucha na mentira di e diabel cu ta Satanas e colebra Antigua; Dios nos Tata a duna e promesa di un Salbador cu lo pachura cabes di e colebra Antigua ey, cu ta diabel y Satanas.

Lesa captiulo tres di Genesis. Y den e buki di Revelacion 20:1-3; nos ta lesa unda Satan ta wordo yama: E Dragon, e Colebra Antigua cu ta e Diabel y Satanas. Tanto ta e nomber colebra y dragon , diabel y satanas  tin di haci cu e character destrutivo y mentiroso di nos enemgo, e diabel.  Y final di Satanas lo ta den e tanki di candela scirbi den e buki di Revelacion 20:10.

Pero, amigonan di tur edad pa kende e Yiu di Dios a surfri y a muri ariba un crus, unda El a carga nos picanan den Su curpa. Den e mes un buki di Revelacion capitulo 20:11-14, nos ta lesa cu na e dia di huicio, tur hende cu nan nomber no ta scirbi den e buki di bida, lo wordo tira den e tanki di candela. Y esey ta mes un lugar unda Satanas lo wordo tira na final di e historia humano ariba e mundo aki. Nos ta roga den nomber di Señor Jesus pa cada uno cu ta lesa e mensahe corto aki, pa bo mes lesa Rebelacion capitulonan 20 y 21. Y encurasha otronan pa nan tambe por lesa y wordo lanta fo’i soño. Pasobra no solamente nos ta bibando den e ultimo dianan, ma nos bida mes ta masha cortico, y tur dia nos por lesa of tende di hendenan cu ta muri. Y nos ni sikiera ta puntra nos mes si e personanan aki cu nos por te asta mira nan potret, tabata personanan cu a tende y obedece e Evangelio bendiciona di Dios.

No ta basta pa carga e nomber Cristian, anto biba manera nunca a existi un Cristo. Mayoria di nos ni sikiera sabi of busca pa sabi, ta kico e nomber “Cristo.” kier meen. Y e pakico di e nomber of titulo ey. P’esey cu e palabra di Dios ta spierta nos bisando: “Con nos lo por scapa, si nos neglisha un salbacion tanto grandi asina? E contesta solemne lo ta: NO TIN SCAPATORIO. Awor bolbiendo na e tema of titulo di e mensahe aki cu ta:”E Ultimo dianan”.  Den un sentido e ultimo dianan a cuminsa cu e benida di Señor Jesus den mundo. Pero for di e tempo te awe, tabatin un desaroyo increibel den e historia humano. Y ya for di tempo di e Apostelnan nos ta wordo spierta, cu segun e dianan ta bai pasando, lo tin cambionan cu lo afecta henter humanidad. Y nos ta wordo spierta cu e cambionan na lugar di trece felicidad, lo trece sufrimento manera nunca antes.

Tuma pa ehempel un porcion cortico di Scritura cu ta menciona parti di e cambionan cu nos ya ta experimentando den nos generacion. Na e tempo ey hopi lo bira lomba of cai for di e fe, y nan lo traiciona y odia un y otro, y hopi profetanan falso lo aparece y gaña hopi hende. Y pa motibo di e crecemento di maldad, e amor di e mayoria lo bira frio, pero esun cu para firme te na fin lo ta salba. Y e Evangelio aki di e Reino, lo ta predica den henter mundo como un testimonio na tur nacionnan, anto e ora e fin lo yega. (Mateo 24:10-14). Sea sigur amigonan, pa cada uno di nos haci su mes e pregunta: Mi ta den e fe di cual Scritura ta papia asina cla y persistente? Of mi ta simplemente sigui e multitude den e camina robes? Corda e palabranan aki di nos Señor cu a bisa “Ami ta e camina, berdad y bida; ningun ta bini cerca e Tata sino pa medio di Mi.” Amen y amen!



     E EVANGELIO Y MUCHANAN

Den e buki di Mateo 19:13,14, nos ta lesa e siguiente: “E ora ey algun mucha a wordo treci serca djE, pa E pone Su mannan riba nan, y haci oracion, ma e discipelnan a reprende esunan cu a trece nan. Jesus a bisa: Laga e mucha chikitonan bini cerca Mi, y no strobe nan, pasobra e reino di cielo ta pertenece na esunan cu ta manera esakinan.”

Marco scirbiendo tocante e mes un ocacion aki ta agrega: “Mi ta bisa boso e berdad; Kende cu no ricibi e reino di Dios manera un mucha chikito, lo no drenta den dje nunca.” Den otro palabranan, cu te ariba e dia di awe, e palabranan y e declaracionnan aki di Señor Jesus, ta na vigor.

Pone antencion cu no ta e muchanan a bini cerca Señor Jesus, y a pidi E pa E pone man riba nan, y bendiciona nan. Ma ta e mayornan di e muchanan a trece nan. Y nos Señor a haci uso di e ocacion ey, pa siña nos e berdad te ariba e dia di awe.

Recientemente nos tabatin un bon ehempel di e berdad cu nos por siña di dje, aki na Aruba. Y nos ta referi na e loke ta wordo yama: “E prome Santa Comunion di muchanan.” Nos por a mira varios potretnan di muchanan para cu nan mannan poni den un forma religioso di debocion y bisti cu bistinan corespondente. Nos no ta usa e evento aki pa critica of pa ofende ningun hende, ma solamente cu e speransa di por tin e mensahe di salbacion pa medio di fe den nos Señor y Salbador Jesus haci simpel y comprendibel pa tur hende di bon boluntad.

Ami cu ta scirbiendo esaki a pasa dor di e mes un adventura religioso na edad di mas of menos 12 aña. Y personalmente mi por recorda cuanto bes despues mi a sigui tuma e loke ta ser yama “Santa Cena”. Mi por corda claramente con un dia despues di a tuma e Santa Cena, anto ora cu mi a sali pafo di e edificio net prome cu mi a yega na e imahen cu a wordo tumba poco dia pasa durante un tempestad di strena y hoos. Anto mi a pidi Señor pa E tuma mi awor cu mi tin Señor Jesus den mi curason. Pasobra ta esey nos a siña e tempo, y probablemente te awe. Ma awor, bolbiendo na e Scritura cu ta spierta nos, y cu ta siña nos, cu si nos no acepta e Reino di Dios manera un mucha, nos lo no drenta den dje nunca. Den ki sentido nos por acepta e Reino di Dios, mescos cu un mucha chikito?

Amigonan stima pa Señor nos Dios y Tata Celestial Su mes. Tanto ta aki na Aruba y Bonaire y Curaçao, y realmente nos por bisa: “den henter mundo.” E relacion entro mayornan y nan yiunan ta diferente cu apenas algun añanan pasa. Actualmente yiunan ta lanta contra nan mayornan, y mayornan contra nan yiunan. Y den masha hopi caso, e enemigonan di hende ta e mes hendenan di su cas. Pero e boluntad di nos Tata Celestial ta keda basa ariba e berdad di e Palabra di Dios Su mes. Y esey ta pa mayornan stima nan yiunan, y pa yiunan obedece  y respeta nan mayornan. Siendo cu esey ta keda berdad relaciona cu nos mayornan enparticular, cuanto mas atencion nos mester duna na nos Tata Celestial, Kende a stima nos asina tanto, cu E no a spaar ni Su propio yiu, ma El a dun’E pa nos tur? Ta p’esey ta para scirbi lo siguiente:  Con nos lo por scapa, si nos neglisha un salbacion tanto grandi asina? O sea sigur, y masha sigur pa bo curason no bira insensitivo. Obedece e Evangelio awe, y sea salba. Nos mayornan por comete error, pero nos Tata Celestial nunca lo por haci esey.

Thursday, June 14, 2012

Aki nos ta gosando un plato di Yucca - berdura di nos hofi chikito! E tabata hopi dushi. Mi nunca antes a come yucca, ma awor mi tin un smak p'e! E foto ariba ta e palo di Papaya cu mi a mustra riba POSTnan anterior - mira con grandi nan ta birando! Si un di eseynan mester dal ariba hende si cabes - no papia mes!!
CERCA KENDE NOS LO BAI? (continuacion)
Den nos ultimo dos mensahenan, nos a trece padilanti e cumplimento di e profecianan di Daniel, kende pa e gracia di Dios a profetisa hopi adelanta e sistema di bida den cual nos ta experimentando awe. Y particularmente e sabiduria cu tin awe tur parti di mundo; y e biahamento sin fin buscando mas y mas sabiduria y placer.
Nos no ta bisa cu e cosnan ey ta malo ariba nan mes, ma ta ora cu nos ta duna mas balor na e cosnan ey cu nos ta duna na Señor nos Dios, nos ta robes. Beibel ta bisa nos lo siguiente: “Pero marca esaki: lo bai tin temponan teribel den e ultimo dianan. Hende lo ta stimadornan di nan mes, stimado di placa. Bromado, orguyoso, desobedicido na nan mayornan, ingrato, impio, sin stimacion, ireconciliabel, sin control of domino propio, grosero, odiado di loke ta bon, traicionero, imprudente, soberbe, stimado di placer na lugar di stima Dios; cu tin un forma di religioso berdad, pero ta nenga su poder; evita e sorto di e hendenan aki.” (Lesa 2 Timoteo 3:1-9)
Apreciable co-cuidadanonan y amigonan di cualke nacionalidad cu ta habita e isla aki. E loke e Apostle Pablo a scirbi mas cu dos mil añanan pasa, ta siendo cumpli claramente ariba e dia awe tur parti di mundo, encluyendo den e islanan aki. Nos simplemente no por nenga cu sabiduria y maldad ta bai man den man meimei di nos.  Famianan berdaderamente uni, unda tin respet y dignidad pa nos mayornan, y pa nos gobernantenan, y pa nos hefenan di trabao, etc., etc., practicamente ta masha poco. Pero nos mester tene na cuenta, cu ta imposibel pa e Palabra di Dios perde su balor. Y e Scritura ta hopi cla tocante e berdad, di cu un dia pronto Dios, nos Tata Celestial, lo huzga henter mundo cu husticia pa medio di un Homber cu El a destina pa esey. Y Señor, nos Dios a duna nos prueba di esaki door di a lanta e Homber aki for di morto.
Y amigonan di tur edad; mescos cu a socode e tempo cu e Apostel Pablo a haci e declaracionnan ey na un grupo di hendenan hopi inteligente segun e sistema di e mundo aki. Mescos e situacion ta te awe rond mundo. Pasobra nos ta lesa cu asina pronto cu e Apostel a menciona asunto di repentimento di un bida pecaminoso, y di resureccion for di mortonan, algun a cuminsa haci bofon. Sinembargo algun cu a tende e mensahe cu e Apostel a proclama, a kere e mensahe y a sigui hunto cu e Apostel. Nos por bisa cu ta algun persona so a wordo convenci di e necesidad pa repenti di pica y fe den nos Señor Jesus den e ocacion ey. Y practicamente te ariba e dia di awe ta sigui mescos rond mundo, encluyendo e islanan aki.  (lesa Echunan 17:22-33)
Anto examina bo mes y mira si bo ta uni cu e bofonadornan of cu e poconan cu ta kere di curason awe. Y te asta den e situacion ey tocante personanan cu ta kere, sea sigur cu bo ta kere di henter bo curason di acuerdo cu loke Scritura ta siña nos. Pakico nos ta bisa esey? E motibo ta cu e mes un Apostelnan ta spierta nos na e peliger di kere pornada. Of kere algo cu ta robes.  Ki tristo e ta pa un persona ta miembro den un of otro iglesia, y ta asta batisa den awa, y ta canta himnonan di alabansa, y tin un Beibel na su alcanse y ta wordo yama Cristian, etc., pero toch su creӫncia ta pornada, pasobra e loke e ta kere ta falso.
Amigonan stima pa Señor Dios Su mes, y pa kendenan Cristo a muri y a resucita; Bijbel ta bisa nos lo siguiente: “Den e tempo aceptabel Mi a scucha bo, y ariba e dia di salbacion Mi a yuda bo; mira, awor ta e tempo aceptabel, mira awor ta e dia di salbacion.”
Y pakico e Apostel a scirbi tal declaracion? El a scirbi esaki pa nos awe, mescos cu e hendenan di Corintio e tempo; pa nan no ricibi e gracia di Dios enbano. (Lesa 2 Cor. 5:11-21 y 6:1,2, y tambe Hebreonan 3:12-19)
Cerca Kende anto nos mester bai pa nos ricibi pordon di picanan y bida eterno? E contesta ta cla y sigur pa nos den Beibel, y e ta bisa nos asina aki: “Y no tin salbacion den ningun otro, pasobra no tin otro nomber duna na hende bao di cielo pa medio di cual nos mester wordo salba.” (Echunan 4:10-12)


Esaki ta nos Palo di Papaya cu nos a planta chikito asina for di un pochi ora nos a yega aki na
Kamay! E ta un poco mas cu seis luna y mira si fruta awe! E ta carga carga, y nan ta cuminsa hecha!

SERCA KENDE NOS LO BAI?
Den nos prome mensahe relaciona cu e tema aki, nos a menciona e profecia di e profeta Daniel, unda el a profetisa hopi cla e loke lo tuma lugar den e ultimo dianan prome cu e fin. Nos kier a combida cada uno cu lesa e mensahe cortico aki, pa bo tuma tempo pa lesa e buki di Daniel den bo Beibel. Na e final di e buki, ta wordo revela algo interesante unda e ta bisa lo siguiente: “Lo tin un tempo di angustia manera nunca tabatin for di e cuminsamento di nacionnan te e tempo ey. Pero na e tempo ey bo puebel – cada uno kende su nomber ta wordo haya scirbi den e buki, lo wordo rescata. Multitudnan cu ta drumi den e stof di e tera lo lanta: algun pa bida eterno, otronan pa berguensa y confucion eterno. Esunnan cu ta sabí lo briya manera e splendor di e cielonan; y esunnan cu ta guia hopi na husticia, manera e streanan pa semper y semper. Ma abo Daniel, sera y seya e palabranan di e buki te na  tempo di e fin. Hopi  lo bai di un un lugar pa otro pa aumenta sabiduria.” ( of conocemento)

Anto pone antencion y sigui lesa te na e ultimo versiculo. E versiculo 8 ta bisa lo siguiente: “Ami a tende, pero mi no a comprende. Asina mi a puntra: Mi Señor , kico lo ta e fin di tur e cosnan aki? El a contesta: Sigui bo camina Daniel, pasobra e palabranan aki ta sera y seya te na tempo di e fin. Hopi lo wordo purifica, y hasi sin mancha y refina, pero e malbado lo sigui ta malbado. Ningun di e malbadonan lo comprende, pero esunnan cu ta sabi lo comprende.”

Apreciable amigonan stima pa Señor nos Dios y Tata Su mes. Tin varios cosnan menciona den e porcionnan di Scrituranan ey, cu lo ta imposibel pa nos comprende sin yudansa di otro Scrituranan, y guiansa di e Spirito Santo di Dios. Si nos interpreta e Scrituranan ey y otro Scrituranan den nos propio sabiduria, nos lo fracasa sigur. Como ehempel considera unda e ta bisa cu ta e sabinan lo comprende, y cu ningun di e malbadonan lo comprende. E ta zona net manera cu ta solamente un persona bon educa lo por comprende Scritura, mientras cu ningun di e malbadonan lo comprende. Ta pa e motibo ey nos mester compara Scritura cu Scritura, pa nos comprende ta kendenan ta e malbadonan segun Scritura. Den e buki di Romanonan captiulo  uno, cuminsando cu e versiculo 18, nos lo lesa lo siguiente: “E rabia di Dios ta siendo revela for di cielo contra tur impiedad (un bida sin reverencia pa Dios) y maldad di hende cu ta oprimi e berdad pa medio di nan maldad; siendo cu e loke por wordo conoci tocante Dios ta manifesta na nan, pasobra Dios a hasi esey conoci na nan. Pasobra desde e creacion di mundo Su atributonan invisible, Su poder eterno, y naturalesa divino, a wordo mira claremente, siendo comprendi pa medio di loke a wordo traha, asina cu hende ta sin dispensa. Pasobra aunke nan tabata conoce Dios, nan no a glorifica como Dios, ni dun’E gradicimento …..profesando di ta sabi, nan a bira bibo, y a cambia e berdad di Dios na mintira y a adora y sirbi e cosnan crea na lugar di e Creador Kende ta alaba pa semper. Amen.”

Awor un pregunta por ta:  Kende ta e sabinan cu lo comprende y kende ta e malbadonan cu ta menciona den Scritura.

E contesta simpel segun Scritura ta esaki. E sabinan segun Scritura ta e personanan, sea homber of mohe, cu a tende e Evangelio di gracia di Dios, y cu yudansa di e Spirito Santo di Dios, ta kere di curason y ta repenti di tur pica, y ta deposita su fe den Señor Jesus, Kende a muri claba riba un crus pa nos picanan, y cu Dios, e Tata, a duna bida atrobe na e tres dia. Esakinan ta e sabinan menciona den e buki di Daniel y dor di Scritura. E malbadonan ta esunan cu no ta kere, of cu no kier kere. Un persona asina sin cu e ta tene cuenta, ta hasi Dios un gañador, y ta desprecia e amor y pacenshi di Señor nos Dios, y ta ignora e sacrificio di e Yiu di Dios cu ta nos Señor y Salbador JesuCristo. Nos sabi cu ta den ignorancia hende ta sigui den e situacion ey. Pero Señor nos Dios ta semper cla pa pordona nos si nos repenti di nos bida di pica, y obedece e Evangelio bendiciona di Señor. (Nos lo continua)

Thursday, June 7, 2012

SERCA KENDE NOS LO BAI?


SERCA KENDE NOS LO BAI?

E foto ta mustra un man di okra di nos hardin chikitu cu Bicento y ami a planta y ta cuminsando gosa su frutanan!  Hopi Sop'i yambo! Dushi! Awor nos ta sperando e tomatinan! Nan ta floriando.  Ki un privilegio cu den e edad di 85/89 (den un luna di tempo) nos por tin e pasa tempo aki. Dios ta bon!!
Awor.... serka Kende nos lo bai, e topico pa awe mainta. 
Nos ta bibando awe den e era di cual e sirbidor di Dios cu yama Daniel, a scirbi. Entre otro cosnan el a scirbi cu lo tin hopi  biahamento di un lugar pa otro cu e proposito di aumenta sabiduria of conocemento.
Aunke cu semper tabatin biahamento di un lugar pa otro, e ta cla pa mira cu nunca antes tabatin manera awor. Hopi hende ta biaha pa placer y diberticion. Otronan ta biaha pa studio mas avansa. Otronan no por biaha pa motibo financiero, etc., etc.
Y berdad, biahamentonan no ta barata. Y te asta den debe hende por keda pa motibo di gastonan cu tin den biahamento. Y nos no ta scirbi esaki pa condena biahamento tampoco. Ma loke si nos kier hala atencion di tur hende, sea rico of pober, sea bon educa of sea sin gran educacion den sabiduria humano. Y ta esask: Den Beibel nos ta wordo spierta tocante e bobedad di sabiduria di e mundo aki, ora cu esey ta bai contra e sabiduria di Dios. Y pa e motibo ey, nos ta encurasha tur hende cu lesa e mensahe aki, pa bo sigui lesa bo Beibel tur dia, y no bira floho. E motibo pakico nos ta encurasha tur hende pa lesa Beibel ta: Pasobra e palabra di Dios ta bibo y poderoso  y ta mas scerpi cu cualke spada di dos fila. Y e palabra di Dios ta penetra te na e divicion di alma y spirito, y ta husga e pensamentonan y attitudnan di e curason. No tin nada den henter e creacion cu ta scondi for di e bista di Dios. Tur cos ta descubri y dilanti wowonan di Esun na Kende nos mester duna cuenta. (Lesa Hebreo 4:12,13)

E loke nos kier hala atencion di tur hende ta e loke nos ta siña for di e palabra di Dios cu yudansa di Spirito di Dios. Y un cos cu nos a siña for di Scritura ta cu e sabiduria di e mundo aki, ta bobedad cerca Dios. Ademas ta para scirbi cu si un hende kier ta sabi den e mundo aki, e hasi su mes bobo, pa e por ta sabi. Scritura ta enfastisa e berdadnan aki, pa cada un di nos por somete nos mes na Dios, y na e palabra di Su gracia. Scirbiendo na e personanan cu a kere e Evangelio aya na Corintio, Apostel Pablo a scirbi lo siguiente: “Boso no sabi cu boso mes ta tempel di Dios y cu e Spirito di Dios ta biba den boso? Si cualke hende destrui e tempel di Dios, Dios lo destrui (e persona ey), pasobra e tempel di Dios ta sagrado, y boso ta e tempel ey. No gaña boso mes. Si cualke di boso pensa cu e ta sabi segun e siglo aki, e hasi su mes bobo (of admiti su ignoriancia) pa e por bira sabi. Pasobra e sabiduria di e mundo aki ta bobedad den e bista di Dios. Manera ta para scirbi: E ta gara e sabinan den nan astusia; y atrobe, E Señor sabi cu e pensamentonan di e sabinan ta inutil.”
P’esey amigonan di tur edad cu ta obedicido na e Evangelio bendiciona di Dios. Laga nos stop cu tur gabamento di hende. Pasobra ta na nos Tata Celestial nos mester ta continuamente gradicido cu nos ta den Cristo. Kende a bira pa nos e poder y sabiduria di Dios. P’esey laga cada uno di nos cu ta uno di esnan cu a repenti y kere e Evangelio, considera con nos a wordo yama. Segun Scritura, den esunnan cu a kere den e tempo  di e Apostelnan, no tabatin hopi hende sabi segun carni, y no hopi hende di influencia, y ni tampoco di famia di noblesa. Pero Dios a scohe e cosnan bobo di e mundo aki pa brongosa e sabinan; Dios a scohe e cosnan debil di mundo pa brongosa e fuertenan. El a scohe e cosnan baho di mundo, y e cosnan desprecia, y e cosnan cu no ta nada, pa hasi e cosnan cu ta algo bira nada; pa ningun hende por gaba dilanti Dios. Pasobra ta dor di djE boso ta den Cristo Jesus, Kende a bira pa nos e sabiduria for di Dios – cu ta, nos husticia, santidad y redencion. P’esey manera ta scirbi: Laga esun cu ta gaba, gaba den Señor. (Lesa 1 Cor. 1:26-31) Pues, stimanan, unda of serca KENDE nos lo bai pa alcansa sabiduria y satisfacion y trankilidad? E contesta ta: kere den Señor Jesus, y lo bo ta salba, abo y e hendenan di bo cas.

Sunday, May 20, 2012

Pordon Di Picanan - segun Scritura




E doctrina tocante  pordon di pica, ta un di e doctrinanan fundamental di Scritura Santo. Palabranan manera: labamento, baño, kita, etc.,  ta wordo usa pa yuda comprende e necesidad absoluto pa pordon di nos picanan.

Laga nos purba compara e asunto di labamento y bañamento, cu pordon di picanan. For di tierno edad nos a siña for di nos mayornan con indispensabel bañamento y labamento ta. Purba imahina pa un rato, con e lo ta si nos keda sin baña nos curpa pa dianan largo, of si nos keda bisti e mes un  paña dia tras dia, etc.

Wel, amigonan stima pa nos Señor Su mes. Mescos e ta cu nos picanan den e bista di Señor nos Dios, si no no wordo pordona. Y ora nos ta papia di pordon segun Scritura, nos ta papia di kitamento of labamento completo di nos culpa di pica. Segun Scritura, ta Dios solamente por kita pica. Y El a hasi esey posibel mediante Su Unico Yiu, cu ta nos Señor y Salbador JesuCristo. Manera nos por lesa den Beibel cu no tin ni un hende husto ni sikiera uno; no tin ni un hende cu ta comprende, no tin ni un hende cu ta busca Dios. Tur a desvia; hunto nan a bira inutil; no tin un hende cu ta hasi bon, no tin ni sikiera un,.” Lesa of pidi un hende les’e pa bo den e Testamento Nobo for di e Buki di Romanonan capitulo tres y versnan 9-20.

Amigonan di tur edad, nos por gradici Señor nos Dios pa e porcion aki di Scritura Santo, pasobra esaki a wordo scirbi pa nos bon, y pa trece nos na repentimento y na fe den nos Señor y Salbador JesuCristo, Kende a carga nos picanan den Su curpa ariba e crus; pa nos libra di picanan, por biba pa husticia, pasobra ta pa medio di Su heridanan nos a wordo cura.

Amigonan di tur edad, homber y mohenan, e Palabra di Dios ta bisa nos hopi cla cu ta pa medio di fe nos ta wordo hustifica, of sea declara husto dor di Señor Su mes. P’esey nos ta lesa den e Scritura lo siguiente: “Siendo cu nos a wordo hustifica pa medio di fe, nos tin pas cu Dios pa medio di nos Señor JesuCristo, pa medio di Kende nos a haya entrada pa medio di fe den e gracia aki den cual nos ta para awor.” Dor di Scritura nos ta wordo spierta y encurasha, cu ta pa medio di fe, e pecador ta wordo hustifica of sea declara husto. Testamento Nobo ta hasi esey cla pa nos cu ta dor di fe den e Yiu di Dios solamente tin pordon di picanan, y e promesa di bida eterno. Y e promesa aki ta bini na nos for di ESUN KENDE no por gaña. ESUN di cual ta para scirbi, cu ta imposibel pa E gaña.

E doctrina di fe y e doctrina di obediencia ta bai hunto. Mescos e ta cu e doctrina di obra. Nos ta lesa un camina cu fe sin obra ta morto. Romanonan 1:5 ta bisa nos lo siguiente: “Dor di djE nos a ricibi gracia y apostolado pa trece obediencia di fe meimei di tur e paganonan pa causa di Su Nomber, den kendenan boso tambe ta e yamanan di JesuCristo. Pues, obediencia ta bini di fe y fe ta bini via tendemento di e Palabra di Dios.( Lesa sin falta Rom. 16:25-27) Aki ta unda nos ta lesa tocante e mandamento di e Dios eterno pa tur nacionnan por kere y obedece Dios. Y e obediencia aki na prome lugar ta pa kere of tin fe den Señor Jesus. Den Echunan 6:7, nos ta lesa lo siguiente: “Asina e Palabra di Dios a plama. E numero di discipelnan den Jerusalem a multiplica, y un number grandi di sacerdotenan a bira obedicido na e fe.

P’esey amigonan di tur edad aki na Aruba, Bonaire y Curaçao y na cualke parti di mundo: e boluntad di nos Tata Celestial ta pa nos obedece na fe den nos Señor y Salbador JesuCristo. Sea sigur, sea masha sigur, cu no tin salbacion den ningun otro. Pasobra ta para scirbi cu bou di cielo no tin otro nomber cu ta duna na hende pa medio di cual nos mester, of por wordo salba. Y sabi esaki: cu tardansa ta igual cu desobediencia y incredulidad.

E Spirito Santo ta spierta nos binti cuater ora pa dia den Scritura bisando: Con lo nos por scapa si nos neglisha un salbacion tanto grandi asina? E pregunta aki inspira pa e Spirito Santo di Dios, Su contesta ta: silencio, pasobra separa di fe den Señor Jesus, no tin speransa y no tin scapatorio!