AŇA NOBO ---- Bicento y ami, Betty  ta desea tur di nos lesadornan di Blog un Felis Anja den nos Senjor y Salbador, JesuCristo, kende Su binimento na mundo den carni, nos a caba di celebra, pasobra den djE so tin berdadero felicidad y prosperidad!

Uno di e celebracionnan hopi conoci aki na Aruba, ta e celebracion ariba e prome dia di un aña nobo. Poco poco e custumbra ey a cambia di generacion pa generacion.

Pero antes, e celebracion di e prome dia di un aña nobo, tabata wordo spera cu gran anticipacion y preparacion. Ehempel: tabatin gruponan cu tabata prepara cu nan cantado special di e loke tabata wordo yama “Dande”. Asina pronto cu e prome dia a cuminsa mei anochi, e gruponan  ey tabata cuminsa cu nan paranda di Aña Nobo! Y nan lo pasa di cas pa cas, deseando cada miembro den e casnan, uno pa uno, na nan nomber, tur sorto di bendicion durante e aña nobo cu a caba di cuminsa.

Siendo cu ami cu ta scirbiendo e mensahe cortico aki, ta uno cu a tuma parti den e parandanan aki como Guitarista, mi por purba bisa algo sea na fabor of no. Pa sea franco, e temponan ey, e mensahe di e Evangelio di nos Señor y Salbador JesuCristo, no tabata conoci ainda aki na Aruba, manera awe si ta e caso.

Pues e tempo ey nos tabata desea un y otro tur bendicion di Dios pa henter famia. Y e bendicionnan cu nos tabatin alomenos mental tabata: liber di enfermedad y desgracia, etc., etc.  E motibo tras di e filosofia ey tabata, cu nos tur tabata religioso cu absolut confiansa den nos religion. Y kico tabata e resultado di tur e bon deseonann ey di aña nobo? E resultado tabata senper e mes un cos aña tras aña. Pronto nos ta lubida tur e bon deseonan di aña nobo pa un y otro, y cada uno di nos lo continua cu e mes un custumbra di e aña anterior.

Y amigonan di tur edad, tatanan, mamanan, y yiunan, te awe apesar di cambionan radical den tur ramo, y particularmente e cambionan den famia, of: di famia. Nos ta keda cu e mes un problema di semper, y cu ta birando peor y peor. Y pa sea franco, e problemanan cu nos ta confronta awe, nan rais a existi ya for di tempo di e caida den pica door di e prome hendenan. Corda e deluvio, y e pakico Señor a haci esey.  Pero nos lo purba bini un poco mas serca te na e tempo cu nos Señor y Salbador JesuCristo, tabata personalmente ariba mundo. Y nos lo mira un rato den e Evangelio di Juan, Capitulo tres.

Aki nos ta haya e relato di un historia berdadero, cu ta vitalmente indispensabel pa cada uno di nos duna tur nos atencion na n’e. Pasobra si nos mira bon, cada uno di nos ta inclui. E historia aki cu nos por lesa den e Capitulo tres di Juan, a tuma lugar mas of menos na e cuminsamento di Jesus Su obra publico. Tabata poco tempo despues cu El a haci e milager di transforma awa den biña. Y tabata durante e tempo cu hopi hende a kere den djE pa motibo di e milagernan cu E tabata haci. Y ta durante e tempo ey, un di e Fariseonan di hopi importancia cu tabata goberna e conseho Judiu e tempo, a bini cerca Jesus na un manera secreto duranti anochi, y a bisa Señor Jesus: “Rabi, nos sabi cu Bo ta un siñador cu a bini for di Dios. Pasobra ningun hende por haci e señalnan milagroso cu abo ta haci. Si Dios no ta cu n’E.”

Aki amigonan di tur edad, dama y cabayeronan, hoben, adultonan, nos ta bai haya e contesta cu ta envolvi cada uno di nos pa e resto di nos bida ariba e mundo aki; y pa tur eternidad. Y E CONTESTA DI SEŇOR tabata:

“Mi ta bisa bo e berdad, si un hende no nace di nobo, e no por mira e reino di Dos.”

Ora cu Nicodemo a tende e palabranan ey, el a keda asombra y a haci e pregunta aki na Señor Jesus. “Con un hende por bolbe nace mientras cu e ta biew caba. Sigur cu e no por drenta den barica di su mama pa di dos bes, pa e nace atrobe?  E contesta di Jesus cu ta sigui den e siguiente versiculonan di Juan 3:5-21, ta unda cu Señor ta splica e importancia absoluto, di Su morto y resureccion pa henter humanidad.

Aki Amigonan di tur edad, nos ta haya e contesta sigur pa un bon aña. Separa di fe personal den Cristo nos Salbador, nos nunca por tin un bon aña. Te asta si nos gana tur e rikesanan cu tin rond di nos, e ta bal net net nada. P’esey, mediante di Su Palabra y Su Spirito Santo, Señor ta yama na tur hende na tur parti di mundo, pa repentimento di picanan, y fe den nos Señor JesuCristo. Solamente asina nos por tin un Bon Aña, apesar di circunstancianan.

 

E MEDIADOR

Bon dia for di Kamay 5!

Betty y ami ta combida boso di lesa nos Blog tocante "E Mediador".

Ya nos a scirbi mas bes tocante di e MEDIADOR, den añanan pasa. Pero ta Señor Su boluntad, pa tur hende di mundo sabi sigur, cu ta un Mediador solamente tin meimei hende y Dios. Y e Mediador aki ta nos Señor y Salbador JesuCristo. E ta Esun cu a entrega Su mes como e Sacrificio pa trece nos sernan humano serca e Tata. Y segun Scritura, no tin otro nomber bou di cielo duna na hende, pa medio di cual nos mester wordo salba. Y e declaracionnan aki di Scritura, ta loke e Spirito Santo di Dios a inspira e Apostelnan di nos Señor y Salbador, pa scirbi y laga pa nos den tur nacion.

E ta increibel, pero e berdad ta, cu te asta e Nomber di nos Señor y Salbador Jesus, ta wordo mal uza pa trece confusion. Ehempel: den medionan di communicacion, nos por lesa tocante e “Divino Yiu di Dios”. Ta berdad cu Señor Jesus a nace for di un birgen Maria como un Baby. Pero ta algo masha simple pa nos comprende, cu E no a keda un Baby. E asunto ey di “Niño Jesus”, ta Historia; y a pasa pa semper. Pues, esey no ta existi mas. Sin lugar na duda, e historia di e nacemento di e Niño Jesus, ta pa semper e bunita historia di e binimento di e Yiu di Dios, Kende a existi for di eternidad hunto cu e Tata. Pues, e Baby ey cu a nace for di un birgen, realmente a existi prome cu El a nace den un curpa mescos cu esun di nos. Pero: sin pica.

Esey ta nifica cu nos Señor no a nace cu e naturalesa di pica mescos cu tur otro sernan humano desde e caida den pica door di Adam y Eva. Pero nos por lesa masha cla mes den Scritura, cu El a wordo tenta den tur cos, mescos cu nos, pero sin pica. Esaki no ta nifica cu Señor Jesus no a sinti e poder maligno di tentacion. Pero e ta nifica cu E no a cai of comete ningun pica. E ta algo masha dificil pa nos comprende cu Señor Jesus durante Su bida ariba e mundo aki, a wordo tenta pa haci maldad. Ma e berdat ta, cu El a surfri ora cu El a wordo tenta, y semper a vence ariba tur tentacion. Y siendo cu E no a cai den pica, e ta nifica cu El a soporta tur e peso maligno di tentacion y vence ariba esey.

Den nos caso, nos tur a peca y ta falta di e gloria di Dios. Y e bida victorioso di nos Señor y Salbador Jesus, a haci posibel  pa nos ricibi pordon di tur pica, y haya bida eternu. Danki na e victoria di nos Señor y Salbador Jesus. Segun Scritura, Señor Jesus a carga nos picanan den Su curpa ariba e crus. Pa nos libra di picanan por biba pa husticia. Pasobra ta pa medio di Su heridanan nos a wordo cura. E heridanan no tabata unicamente e sotanan y e golpinan, y e clabonan cu El a soporta. Ma principalmente nos picanan cu El a carga den Su curpa ariba e crus. Esey tabata e momento cu El a sclama na Dios e Tata bisando: “Mi Dios, Mi Dios, pakico Bo a bandonaMi”? Mateo 27:46 Ta berdad cu esakinan a tuma lugar mas cu dos mil añanan pasa. Pero nos ta wordo spierta den Scritura cu nos no mester lubida esun cos aki, y esey ta cu pa Señor un dia ta mescos cu un mil aña, y un mil aña ta mescos cu un dia.

Anto e ta sigui spierta nos cu Señor no ta tardando cu Su promesa, pero si cu ta pasenshi E tin cu nos, pasobra E no kier pa ningun bai perdi, ma cu cada uno por repenti. Lesa 2 Pedro 3:1-18, pa e mensahe completo.  Pa e motibo ey, amigonan stima pa nos Señor Su mes, ta para scribi: Con nos lo por scapa. Si nos neglisha un salbacion tanto grandi asina? Ta nos Señor Su mes den un curpa humano mescos cu nos, cu excepcion di e naturalesa pecaminoso cual nos tur sernan humano ta nace cu ne, for di nos mayornan, cu ta combida nos bisando: “Bini serca Mi, boso cu ta cansa y carga; y lo Mi duna boso descanso. Tuma Mi yugo ariba boso, y siña for di Mi, pasobra Mi ta suave y humilde di curason, y boso lo haya descanso pa boso alma. Pasobra Mi yugo ta suave y mi carga ta lihe.” Mateo 11:25-30

E palabranan aki a wordo bisa door di nos Señor Su mes mientras cu E tabata den un curpa humano mescos cu nos, pero sin e naturalesa di pica. Y ya pa mas cu dos mil añanan, e palabranan aki di Señor a duna berdadero descanso na miyones di sernan humano, cu a kere di curason den e Yiu di Dios, Kende a carga nos picanan den Su curpa ariba e crus.  Señor Jesus a muri pa motibo di pica, pero no di djE mes. Pasobra E ta e uniko cu nunca a peca, y ningun mintira a wordo haya den Su boca.

Amigonan di tur edad, awe y awor ta e dia di salbacion. No spera pa un oto dia, no spera pa mañan. Pasobra ta net esey por hasi nos curason duro y insensitivo. P’esey dobla bo rudianan awe den berdadero repentimento y acepta Señor Jesus como bo unico Salbador personal. Y pa eternidad bo lo ta un persona bendiciona den Cristo nos Señor. Corda cu tardansa ta igual cu desobediencia.

 

Djoin nos pa un plato di Cabaron! E ta un salada favorite di nos! Ma awe mi ta preparando un plato di Bakiyou, I manjan ta Papaya stoba, dor cu nos tin hopi papaya pa stoba. E palo a kibra y un palo carga a laga nan basha y lora tur caimnda!! Mucho carga pa e pober palo wanta. Tres ramanan di dje tambe carga. Wel, boso tur ta bonbini!

 

Danki na tur shen y piko "amigonan y amiganan" cu a subi blog den e ultimo siman; ki un encurashamento pa nos! Aunke Sr. Bicento a scirbi tocante e asunto di loke Beibel ta bisa tocante "santonan", den e ultimo dianan tin tantissimo referencia na sierto personannan declara "santo" - el a dicidi di scirbi algo mas tocante loke Beibel ta bias claramente tocante e topico aki. Observa kendenan Beibel ta yama SANTO.

E SANTONAN

Henter mundo, y esey ta inclui Antiyas y Aruba, mester ta na haltura, cu berdadero santonan ta existi solamente  y unicamente den Cristo, nos Señor y Salbador. Lo no tabatin nesesidad pa nos a bolbe  trece e doctrina biblico aki padilanti, si no tabatin tanto Papiamento den e ultimo dianan tocante declaracionnan religioso tocante uno of dos persona declara como Santonan, door di autoridadnan religioso. Pa sea sincero y onesto, y cu tur respet pa e Palabra di Dios bibo cu nos ta haya den Beibel. E forma ey, pa considera un persona como un Santo, contario di loke e sirbidornan di Dios ta siña nos den Beibel, no por ta corecto di ningun manera.

E siñansa robes ey, simplemente no ta existi den Scritura Santo, cu ta e Palabra di Dios bibo, inspira pa medio di e Spirito Santo di e Dios bibo. Awor e pregunta aki por bini: Con por ta posibel, pa un ser humano manera nos, por ser yama un Santo? Francamente bisa;  esey lo tabata imposibel.  Pero e bon nobo cu nos ta proclamando ta, cu nos Tata Celestial a hasi esey posibel, y ta ofreciendo e bendicion increibel ey, na tur hende di mundo. Ta p’esey cu nos tin e loke yama e Evangelio. Pasobra esey ta e bon noticia, cu un Persona a muri pa e picanan di tur hende di mundo. Y e Persona aki, ta e unico Yiu di Dios Su mes, Kende a carga nos picanan den Su curpa ariba un crus. Pa nos libra di picanan por biba pa husticia, pasobra pa medio di Su heridanan, nos a wordo cura.

Y amigonan di tur edad; awor e persona cu kere di curason den e Yiu di Dios, ta haya pordon di tur pica. Y no esey solamente, pero cada persona cu repenti, y kere e bon noticia di salbacion cu ta solamente den Cristo, ta bira un eredero di Dios, y co-eredero cu Cristo. Lesa esaki den e Buki di Romanonan 8: 16, 17, unda nos ta lesa cu: “E Spirito Santo Su mes ta testifica cu nos spirito, cu nos ta yiunan di Dios. Y si nos ta yiunan, anto nos ta erederonan tambe. Y esey ta; erederonan di Dios, y co-erederonan cu Cristo, esta si berdad nos ta participa den Su sufrimentonan, pa nos por participa den Su gloria tambe.”

Bolbiendo na e mensahe tocante E SANTONAN, e berdad segun Scritura ta: cu e unico berdadero SANTONAN ta esunnan cu ta den Cristo. Y e unico manera pa un persona por ta den Cristo, ta pa medio di repentimento y fe den nos Señor y Salbador  JesuCristo. Pasobra e berdad ta keda, cu El a carga e pica di henter humanidad den SU curpa ariba e crus. Pa nos libra di picanan por biba pa husticia. Pasobra ta pa medio di Su heridanan nos a a wordo cura. Manera a wordo publica den henter mundo algun dianan pasa: cu dos persona a wordo declara como Santo mediante un lider religioso. Esey ta nifica, cu di awor padilanti, oracion por wordo hasi na e dos santonan ey tambe, mescos cu na hopi otro Santonan. Esey ta e loke por ser yama, poniendo e Palabra di Dios un banda, pa sigui reglanan di hende. Pasobra den Scritura, y particularmente den tur e cartanan cu e Apostelnan a scirbi na e personanan cu a kere e Evangelio di e gracia di Dios. E keredornan ey, sea homber of mohe, ta worodo yama: “SANTONAN”.

Y semper e ta nifica: “E SANTONAN DEN CRISTO.” Segun Scritura anto NO TIN OTRO SANTONAN, sino esunnan cu ta den Cristo. Y e berdad ta, cu no ta te despues di nan morto cu e berdadero keredornan aki ta wordo yama santonan; pero realmente y claramente esey ta berdad mientras cu nan ta na bida ainda. Y esey sin excepcion pa motibo di color of di nacionalidad, of sea homber of mohe. Pasobra den Cristo nos ta UNO.Y no pensa cu esey ta algo barata. Pasobra e berdad ta, cu nos a wordo cumpra cara. P’esey laga nos glorifica Dios den e curpa aki cu ta pertenece na n’E.

Ata aki algun Scritura tocante e berdadero Santonan, mientra cu nan tabata den e lucha di bida diario ainda, y no despues di nan morto.. Echunan 9:13, 32, 41; 26:10. Romanonan 12:13; 15:25,26,31;16:2-15. Nos ta spera cu e mensahe corto aki, por sirbi como un recordatorio serio na tur e rumannan den Cristo cu ricibi’E di un of otro manera. Y te un otro mensahe.

 

OCTOBER 30 - Dia di Instalacion di nos Gobierno Nobo - Gabinete Eman II pa lo siguiente 4 anjanan. Scritura ta pidi keredor pa "pidi Dios pa nan" - esey ta nos responsabilidad.

Con ta bai cu nos lesadornan stima di nos "BLOG", bibando leu aya na Hulanda, na Canada, (tin hende abla Papiamento eynan tambe), of na e islanan di Caribe cu ta papia Papiamento! Awe nos tabatin un dushi awacero - masha bonbini!

Kico nos ta druk cu ne den e dianan aki? Wel, Sr. Bicento ta scirbi blognan, ami ta tene cas limpi, cushina,  "bakiyao, bonchi cu rabu, pisca, etc., etc.

Ma tambe mi ta gusta hasi obra di man cu cocolishinan! Mi a traha un mapa di Aruba tur cubri cu cocolishinan chikito, y el a resulta un obra di man, cu diferente hendenan ta haya masha bunita, te cu mi ta trahando ariba number tres!! E ta den un cuadra cu glas cubri, cu su bandera y escudo den skina poni!

 

Ma awor nos lo sigui cu e tema den e Ultimo Dianan! Otro blog lo ta tocante algo loke Beibel ta papia di "E Santonan." .... keda pendiente!

 

 

Scritura ta rebela na nos hopi cla, cu durante e ultimo dianan di humanidad ariba e planeta aki cu yama “MUNDO”, lo tin masha hopi afliccion cu lo ta causá door di e mes un habitantenan cu ta biba ariba mundo. E Apostel Pablo, a spierta nos, for di mas cu dos mil añanan pasa, lo siguiente: “Pero marka esaki: Den e ultimo dianan lo tin temponan teribel. Pasobra hende lo bira stimado di nan mes, stimado di placa, bromado, abusado, desobedecido, impio, sin stimacion, ireconciliabel, lenga sushi, sin dominio personal, grosero, odiado di loke ta bon, traidor, imprudente, sorberbe, stimado di placer, na lugar di stima Dios. Tin un forma religioso, pero ta nenga su poder”. Lesa 2 Timoteo 3:1-5

Awe cu nos ta scirbiendo e mensahe aki, nos edad ta hopi avansa, y nos a experimenta algun di e cambionan cu a bini durante e varios generacionnan. Y nos por testigua cu e cambionan menciona den e Scrituranan a y ta tumando lugar exactamente manera e Spirito Santo a revela mediante e sirbidor di Dios, e Apostel Pablo. No ta un asunto local solamente, pero e ta mundialmente. E ta cla pa mira con rapido biahamento rond mundo a bira compara cu solamente e tempo di nos generacion. Miles y miles di avionan y cruceronan, y otro medionan di transportacion ta biahando rond mundo diariamente. Y pakico tanto biahmento?

Pa cuminsa, biahamento ariba su mes no ta un maldad. E ta algo masha bunita y satisfactorio, pa conoce otro lugarnan di mundo, y sera conoci cu habitantenan di otro nacionalidad, y admira nan custumbranan, etc., etc. Kiko ta e problema anto?

E problema ta revela den Scritura for di e mes un principio di humanidad ariba e mundo aki. Y e nomber di e problema ta: “pica”. Asina pronto cu pica a drenta den mundo, morto tambe a drenta cu tur sorto di maldad. E asunto ey di pica a trece un cambio asina teribel, cu nos ta lesa den Scritura cu: “Ora cu Señor a mira cu maldad di hende tabata grandi ariba tera, y cu tur intencion di e pensamento di su curason tabata continuamente maldad solamente, a duel Señor cu El a traha hende ariba tera, y e tabata tristo den Su curason.” Lesa Genesis 6:1-8.

Ta imposibel pa nos comprende y splica un situacion asina. Pero otro Scritura ta yuda nos comprende cu Señor a crea hende pa goberna cu husticia y multiplica y yena e mundo. Y pa esey por tuma lugar, e hende cu Dios a crea, mester obedece Dios Su mandamento. Y manera tur berdadero keredor ariba e dia di awe, y den e periodo di tempo den cual nos ta bibando awe, mester sabi ta: cu Señor nos Dios a duna Adam un solo mandamento. Y esey tabata, pa Adam no come for di e Palo di conocemento di bon y malo, cual Señor a crea mei di e hardin. Pasobra ora cu bo come di dje bo lo muri sigur. Manera nos tur mester ta na haltura ta; cu Adam a desobedece Señor, aunke cu ta Eva ta esun cu a cai prome. Y Eva a cai door di e scucha na e mentira di e colebra.

Y e colebra ey ta representa e mes un Satanas cu ta obrando awe den henter mundo. Y e splicacionnan tocante di e tema ey, cu ta na vigor awe den henter mundo, encluyendo Aruba; nos ta haya den Rebelacion 20:1…, unda nos ta lesa asina aki: “Y mi a mira un Angel bahando for di shelo, cu e yabi di e abismo den su man. Y el a gara e dragon, e colebra di antiquedad, cu ta e diabel y satanas”, etc., etc.  Pues; esey ta e splicacion tocante e caida di Adam y Eva den e hardin di Eden. Ta e mes un Satanas ey ta obrando awe den henter mundo, mediante spiritonan malo. Den prome Timoteo 4:1 nos ta haya e spiertamento aki pa e dianan aki den cual nos ta bibando awe.E Spirito ta bisa claramente cu den e ultimo temponan algun lo bandona e fe, y sigui spiritonan mentiroso y cosnan siña pa demoñonan. E sorto di siñansanan aki ta bini door di mentirosonan hipocrita, kende nan consenshi a wordo kima manera cu un heru cayente, etc. etc.

Pues, rumannan stima den Cristo, y tur e personanan den Antiyas cu tin hamber y sed di husticia. E tempo a yega pa nos repenti y kere e Evangelio puro di nos Señor y Salbador JesuCristo. Pasobra ta pa salba nos, El a bini na mundo, y a carga nos picanan den Su curpa ariba e crus. Pa nos libra di picanan, por biba pa husticia e resto di nos dianan. Sea libra awe di tur e milagernan di mentira cu ta wordo usa pa e Enemigo number uno di Cristo, y di Su Iglesia. Lesa Efesionan 2:2-10, y te un otro mensahe.

 

Ola, lesadornan di nos blog! Pa hopi dia nos no a scirbi nada,manera sigur boso sigura a ripara. Nos ta pidi dispensa, ma ni Bicento of ami, Betty, tabata sinti bon den e luna cu a pasa. Sr. Bicento ta lucha awor cu algo nobo: Presion halto!! Nunca den su bida el a wordo molestia cu algo asina - te awor. Ami a cuminsa cu remedy di anja 1965 te awe. Cada bes mi tin cu cambia eseynan, dor cu e sistema di e curpa ta custumbra cu e medicina. Ma danki Dios cu awe si nos por a prepara algo cu ta spierta nos den e ultimo temponan cu nos ta bibando eyden.

E ULTIMO DIA

Mescos cu tabatin un principio of un cuminsamento, tambe lo tin un final of un cabamento, di e tera cu nos ta yama mundo,  mescos cu tabatin e prome dia (Genesis 1:1-5). Nos lo tin tambe e ultimo dia di e sistema actual, den cual nos ta bibando awor.

Nos ta encurasha tur hende pa lesa den e Testamento Nobo, y busca Mateo Capitulo 24, y lesa e capitulo ey completo. Pasobra den e porcion di Scritura aki, nos ta lesa e historia completo tocante e final di e sistema actual, den cual nos ta bibando. Y esey a wordo revela na nos door di nos Señor JesuCristo, e Yiu di Dios Su mes. Ey nos ta lesa tocante e peliger di profetanan falso. Esakinan ta personanan cu ta pretende cu nan ta sirbidornan di Dios, pero cu realmente ta siñadornan falso.

Ademas Señor Jesus a spierta nos adelanta cu maldad lo multiplica asina tanto, cu e lo afecta e bida asta di e berdadero yiunan di Dios, kendenan ta e personanan cu a tende e Evangelio, y a kere, y a repenti, y a deposita nan fe den e Yiu di Dios, kende a carga nos picanan den Su curpa ariba e crus. Pa nos libra di picanan, por biba pa husticia. Pasobra ta pa medio di Su heridanan, nos a wordo cura. Ademas nos Señor a spierta nos adelanta cu lo tin afliccionan manera nunca antes ariba henter mundo. Simplemente laga nos compara e isla chikito aki di Aruba. Practicamente Aruba ta wordo proclama como un isla Cristian. E no ta asunto cu nos cu ta scirbi e mensahe aki ta pensa di nos como miho cu tur otro hende, y ta exalta nos mes como huesnan. Pasobra Scritura ta proclama cu realmente no tin ni sikiera un bon hende ariba e mundo aki, ni sikiera uno.  Romanonan 3:10-18 ta bisa nos lo siguiente: “Manera ta para scirbi: No tin ni un husto, ni sikiera un; no tin un cu ta comprende,ni un cu ta busca Dios. Tur a desvia, nan tur hunto a bira sin balor; no tin ni un cu ta hasi bon, ni sikiera un. Nan gargantanan ta grafnan habri; nan lenga ta practica mentira. Veneno di colebra ta ariba nan lipnan. Nan boca ta yen di maldicion y di amargura. Nan pianan ta lihe pa drama sanger; ruina y miseria ta marca nan pasonan, y e camina di pas nan no conoce. No tin temor di Dios dilanti di nan wowonan.”

Amigonan stima pa nos Señor, pone bon atencion cu e cosnan aki no a wordo scirbi tocante di solamente algun persona, kendenan nos por ta masha lihe pa condena; pero pone bon atencion cu tur hende di mundo ta wordo inclui. Pues, tanto ta Judiunan, y e resto di humanidad ta inclui aki. No ta nos ta siña esaki for di nos mes huicio; pero ta e Spirito Santo di e Dios Haltisimo, a inspira e Apostel Pablo pa scirbi esaki – y claro e ta inclui su mes, esta, e Apostel.

Hopi añanan prome cu e Apostel Pablo a scirbi tocante di e corupcion di e naturalesa humano, e profeta Jeremias a scirbi lo siguiente: “E curason ta mas engañoso cu tur otro cos, ta totalmente corupto, ken por comprende?” Anto e contesta di Señor ta lo siguiente: “Ami, e Señor, ta scudriña e curason. Mi ta scudriña e mente, pa duna cada uno segun su conducta, segun e fruta di su echunan.” (Jeremias 17:9,10).

Segun Scritura, Señor nos Dios ta papia na tur hende di mundo, na cada uno di nos individualmente sin excepcion. Y e mensahe di Dios na cada persona den e mundo aki ta: Cu salbacion cu ta inclui pordon di tur picanan, y bida eternu, ta wordo obteni solamente pa medio di fe den Jesus e Yiu di Dios. Pasobra aunke El a biba pa un tempo ariba e mundo aki, den un curpa humano. Y aunke El a wordo tenta den tur cos mescos cu nos. E no a peca, y ni un mentira no a wordo haya den Su boca. Scritura ta revela masha clas mes, cu Señor Jesus a carga nos picanan den Su curpa ariba e crus; pa nos libra di picanan, por biba un bida husto. Pasobra ta pa medio di Su heridanan nos a wordo cura. Y e berdad puro y precioso ta, cu bou cielo no tin un otro nomber pa medio di cual nos mester wordo salba. Sea sigur di esaki, y sea masha sigur, cu separa di fe den e Yiu di Dios, no tin pordon di picanan y bida eterno. Esey, ta e testimonio den henter Scritura, y den henter mundo. Y aun den e cielonan mes.

Y uno di e bendicionnan masha grandi, revela na nos den Beibel ta : cu e palabra ta den bo boca y den bo curason. Esey ta e mensahe cu nos ta proclamando: Cu si bo confesa Señor Jesus cu BO boca, y kere den BO curason cu Dios a lamt’E for di e mortonan; lo bo ta salba. Pasobra ta cu su curason un persona ta kere y ta wordo hustifica, y cu boca e ta confesa of bisa esey pa haya salbacion. Pasobra Scritura ta bisa: Ken cu kere den djE, lo no keda brongosa. Pasobra no tin distinction meimei Judiu y no Judiu, pasobra e Señor ta Señor di tur, y ta bendiciona ricamente tur cu yama n’E. Pasobra cada uno cu yama na e nomber di e Señpr, lo ta salba.

E yamamento aki, Amigonan stima di tur edad, mester ta un yamada causa pa un repentimento real di curason. Pasobra sin repentimento real di curason no tin pordon. Lesa e Capitulo 12 di Romanonan sin falta. Y te un otro mensahe pa e gracia di Dios.

“E SPIRITO SANTO”

E mensahe aki ta tocante e Spirito Santo di Dios, cu ta duna na cada persona cu a tende e Evangelio di gracia di Dios, y a wordo convence di pica y di husticia y di huicio. Y a obedece di curason manera nos ta lesa den Romanonan 10. Tuma tempo pa lesa e capitulo completo.

Cuminsando cu vers ocho nos ta lesa lo siguiente: “Ma kico e ta bisa? E palabra ta serca di bo; e ta den bo boca y den bo curason, esta, e palabra di fe cu nos ta proclamando, cu si bo confesa cu bo boca, “Jesus ta Señor”, y kere den bo curason cu Dios a lant’E for di mortonan, bo lo ta salba. Pasobra ta cu bo curason bo ta kere y ta hustifica, y e ta cu bo boca cu bo ta confesa, y ta salba. Manera Scritura ta bisa, cada uno cu ta confia den djE, nunca lo wordo poni na berguensa. Pasobra no tin diferencia meimei Judiu y Griego, e mes Señor ta Señor di tur, y ta bendiciona ricamente tur cu ta invok’E; pasobra tur cu invoca, (of yama) na e nomber di e Señor lo ta salba.”

Amigonan stima pa Señor Su mes; e loke nos kier presenta den e mensahe aki, ta e absolut importancia di e Spirito Santo di Dios, pa convence   humanidad di pica y di husticia y di huicio. E presencia di e Spirito Santo di Dios den e proclamacion di e Evangelio ta asina importante y indispensabel, cu Señor Jesus a prohibi e Apostelnan di sali for di Jerusalem cu e mesnahe di salbacion, prome cu e Spirito Santo bini pa nan. Lesa sin falta Echonan 1:1-5. Y lesa tambe Echunan Capitulo 2 completo. Nos mester haci tur esfuerso di nos banda pa comprende e absolut importancia di e Spirito Santo den cada uno di nos cu ta kere e Evangelio di gracia di Dios, su bida. Pasobra separa di Su guiansa, nada nos por haci. Sinembargo e mensahe aki, no ta un intento di nos banda pa splika e doctrina di e Spirito Santo. Pero pa cada uno di nos cu ta kere di curason, por wordo haci conciente di e importancia di Su presencia den cada uno di nos su bida diario. Sea sigur, y masha sigur, cu sin e poder di e Spirito di Dios den nos bida nos lo tin solamente fracaso y mas fracaso.

Y mes importante cu esey ta e berdad revela den e Palabra di Dios, cu e Spirito Santo, lo no a bini, si Señor Jesus no a wordo gorifica prome – despues di un bida yen di pruebanan y tentacionnan cu nos Señor y Salbador a pasa aden. Scritura ta spierta nos solamnemente, cu nos Señor y Salbador, a wordo tenta den tur cos mescos cu nos, pero sin pica. E prome mencion di e Spirito Santo ta haya den Genesis 1:2 y e ultimo ta den Rebelacion 22:17, Y eynan e Spirito Santo y e Iglesia ta bisa; “Bini”. Anto e ta sigui cu e ultimo invitacion den Beibel cu ta bisa: Ken cu tin sedo, lagu’e bini; y ken cu kier, laga e tuma e awa di bida pornada.

Y sea sigur amigonan di tur edad, cu e invitacion aki, ta un cu ta na vigor awe y awor. Y sea sigur cu e invitacion aki ta esun di mas precioso cu cualke ser humano por ricibi. Tuma como ehempel, e palabranan di Señor Jesus ora cu El a sclama bisando: “Bini cerca Mi, tur cu ta cansa y carga, y lo Mi duna  boso descanso. Tuma Mi jugo ariba boso, y siña di Mi. Pasobra Mi  ta manso y umilde di curason; y boso lo haya sosiego pa boso alma. Pasobra Mi yugo ta suave y Mi carga ta lihe.” Mateo 11:29-30. Y di acuerdo cu Scritura, Señor Jesus a hasi e invitacion aki guia pa e Spirito Santo, siendo cu durante Su encarnacion, E tabata guia pa Spirito Santo. . Esey realmente e titulo “Mesias” ta nifica. Lesa sin falta Lucas 4:1-21.

Awe cu nos ta scirbiendo e mensahe aki na e Islanan di idioma Papiamento particularmente, e invitacion di e Mesias ta keda mescos. “Bini serca Mi, boso tur cu ta cansa y carga, y lo Mi duna boso descanso.” E descanso cu nos Señor ta papia di dje aki, ta na prome lugar, e pordon di tur picanan y e speransa di bida eterno cual Dios, Kende no por gaña a priminti hopi siglonan pasa, etc. (Tito 1:1-3, Tito 3:5-8)

Amigonan di tur edad; tur e cosnan aki a wordo scirbi pa nos bon, y E ta stima tur otro ser humano ariba e mundo aki, y no ta Su boluntad pa un hende bai perdi. Ma E ta spera pa tur hende por arepenti, y yega na conocemento di berdad. Y e berdad aki ta solamente den Cristo Jesus, Kende a duna Su mes como un sacrificio, pa E trece nos serca e Tata. P’esey cu nunca nos mester lubida, cu Dios a hasi Esun cu no conoce pica, bira pica pa nos, pa nos libra di pica por biba pa husiticia, pasobra ta pa medio di Su heridanan nos a wordo cura. E mes un Spirito Santo cu ta convence nos di pica, y di husticia y di huicio; lo sigui guia nos den nos bida diario, for di e momento cu nos repenti y acepta Jesus como nos Salbador y Señor.

"n' ta manera!!" di celebra e 90 anja! - ta bon cu nan a pasa y bida a bira normal atrobe. Danki na un y tur! Y especialmente na nos ruman Esther Williams! Mi no sa si e ta wak nos blog.

Ma awor Sr. Bicento lo sigui cu e pensamentonan tocante kico Scitura ta menciona di:

 

AMIGONAN DI JESUS (continua)

Den nos prome mensahe tocante Amigonan di Jesus, nos a considera entre otro, cu nos no por ta amigo di mundo y amigo di Dios na e mes un tempo segun Scritura. Sigur cu ta keda lugar pa algun pregunta tocante e tema ey. P’esey nos lo purba bai un poco mas profundo awe, tocante e berdadero relacion cu tin meimei tur berdadero keredor, y nos Tata Celestial y nos Señor y Salbador JesuCristo. Y di un cos nos ta sigur, y esey ta cu ta imposibel pa Dios gaña, y p’esey tur Su promesanan den Cristo ta: AMEN (Rebelacion 3:14.)

Pa cuminsa nos ta lesa e siguiente den e Evangelio di Juan e Apostel: “E tabata den mundo y aunke e mundo a wordo traha door di djE, e mundo no a reconoc’E. El a bini na e loke tabata di djE, pero Su mes hendenan no a ricibi’E.  Sinembargo na tur cu a ricibi’E, na esunnan cu a kere den Su nomber, El a duna e derecho pa bira yiunan di Dios. No yiunan cu ta nace di manera natural, ni pa decisionnan humano, of pa decision di un esposa; pero naci di Dios. Anto e ta sigui bisando: E palabra a bira carni, y a biba pa un tempo meime di nos. Nos a mira Su gloria, e gloria di Esun y unico Yiu di Dios, yen di gracia y berdad. (Lesa Juan 1:1-18).

Nos a comenta den nos prome mensahe, tocante e encreibel previlegio di por wordo yama: “Amigonan di Jesus”. Ma aki nos por mira claramente, cu nos por bira no solamente amigonan di Jesus, pero muchu mas cu esey ainda: Pone bon atencion loke Señor ta bisa nos den Juan 1:10 -12. “E tabata den mundo, y e mundo a wordo traha dor di djE, y e mundo no a reconoc’E. El a bin serca loke tabata di djE, ma esunnan cu tabata di djE no a ricibi’ E. Ma tur cu a ricibi’E, na esunnan cu a kere den Su nomber, El a duna e derecho pa bira yiunan di Dios. No yiunan cu ta nace di boluntad di hende, pero cu ta nace di Dios.”

Aki anto, amigonan di tur edad, e Spirito di Dios a inspira e Apostel Juan pa scirbi mas cu dos mil añanan pasa, e bendicion di mas grandi posibel cu ta ofreci na tur ser humano. Y e bendicion cu nos ta papia di dje aki, ta e increibel previlegio di por bira, no solamente amigo, pero yiunan di Dios. E bendicion di por yama e mes un Dios y Tata di nos Señor y Salbador JesuCristo; Mi Tata.

Y esey ta inclui cu awor e Tata ta yama cada pecador cu a repenti, y kere di curason den nos Señor JesuCristo, como Su Yiunan. Manera nos por lesa den Scritura cu: “Awor nos ta yiunan di Dios, y ainda no ta revela con nos lo ta. Ma nos sabi cu ora E (Señor Jesus) wordo manifesta, nos lo ta mescos cu nE, pasobra nos lo mir’E manera E ta.” (Lesa 1 Juan 3:1-3)

Nos ta conciente cu e doctrina aki ta hopi pisa, apesar cu e ta revela hopi cla den Scritura. Y ta claro cu e doctrina aki ta parti di loke Scritura ta yama: cuminda pisa. Lesa sin falta 1 Corintionan 3:1,2, y Hebreonan 5:11-14, y tambe Efesionan 4:11-16. Tur e spiertamentonan cu nos ta haya den e porcionnan ey, a wordo scirbi pa tene nos lanta y na wowo cla pa e bon di nos prohimonan.

Den Hebreonan 2:11,12, nos ta lesa esaki: “Pasobra tanto ta Esun cu ta santifica como esnan cu ta wordo sanctifica, tur ta bini for di un Tata, pa cual motibo E no tin berguensa di yama nan rumannan; bisando: “Lo Mi proclama Bo Nomber na Mi rumannan; meimei di e congregacion lo Mi canta Bo alabansa.” Nos ta admiti cu tanto e porcion aki, y hopi  otronan ta dificil pa enterpreta. Pero otro Scrituranan ta yuda nos comprende.

Ata aki un simple ehempel: Un dicho conoci aki na Antiyas ta bisa: “Nos tur ta yiunan di Dios.” Wel, esey ta zona bunita, pero e ta berdad?  Segun Scritura Señor a crea e ser humano, y e prome ser humano a peca, desobedeciendo un mandamento masha cla cu a wordo duna n’e. Y desde e tempo pica a drenta den mundo di tal manera cu tur hende a peca y ta falta e gloria di Dios. Esaki ta repeti bes tras bes den Scritura, cu no tin ni sikiera un persona den mundo cu no ta comete pica. Nos ta nace cu e naturalesa ey. Pero e bon noticia ta esaki: Nos Tata celestial a stima humanidad asina tanto, cu El a duna Su unico Yiu pa carga nos picanan den Su curpa riba e crus, pa nos libra di picanan por biba pa husticia. Ta pa medio di Su heridanan nos a wordo cura. Awor nos por bira yiunan di Dios, y Señor Jesus no tin berguensa pa yama esunnan cu ta kere den djE como: rumannan. Y segun Scritura, siendo cu e persona cu repenti y kere di curason den Señor Jesus, ta bira un yiu di Dios, e ta bira na e mes un tempo un eredero di Dios, y co-eredero cu Cristo. Galationan 4:6,7  ta bisa lo siguiente: “Pasobra cu boso ta yiunan, Dios a manda e Spirito di Su Yiu den nos curasonnnan, e Spirito cu ta yama of sclama,
“Abba Tata”! Asina boso no ta catibo mas, pero un yiu y siendo cu boso ta un yiu, Dios a hasi boso un eredero tambe”

. E mes un berdad nos por lesa den Romanonan 8:17, Tito 3:7.

Te otro mensahe, y danki pa oracion. B&B

Kerido bishitante na nos blog! Desde nos ultimo blog, nos a celebra un dia hopi special den e Henriquez famia, y tambe nos rumannan den e fe. E ocacion? Bicento cu yudansa y misericordia di Dios a alcansa 90 anja di bida! Wel, wel, masha fiesta tabatin! Apreciando tur e gestonan ey di amor, nos graditud na Senjor, nos Dios, sinembargo, ta bai prome na nE. Ki un storia Ruman Bicento, "Pachi" por conta di Su fielded. Aki ta djies algun fotonan di e tres funshonnan cu tabatin!!


Na "Salt & Pepper"

 

E prome dos foto ta cu nos amigonan Max y Sita Semeleer cu a hiba nos "Salt & Pepper" pa desayuna; di tres ta bolonan regalo, esun di fruta  regalo di Domingo y su esposa (foto mas abou cu famia na "Peanuts"), y e otronan fotonan di famia por ser mira riba Facebook unda e yiunan a pone varios foto. Anto un foto di Norma (y su yiu Glenda). Norma ta ruman di Bicento, yiu di criansa, cu semper ta bishita nos fiel. E otro ta cas di nos rumannan y amigonan Luis y Ingrid Tromp, unda nos a come un plato di Salada di Shrimp, Pisca hasa cu aros y berduranan y un otro Bolo di Crema! Nos a come di mas e dia ey!

Esey ta pasado! Laga nos pone nos mente awor pa sigui loke Sr. Bicento ta duna nos for di Scritura tocante:

 

AMIGONAN DI JESUS

Den Scritura nos ta lesa cu Abraham a wordo yama amigo di Dios. No door di hende, ma door di Dios Su mes. Lesa Isaias 41:8, Santiago 2:23, 2 Cronicos 20:7. Tuma tempo tambe pa lesa Romanonan Capitulonan 4 y 5 sin falta.

Den e ultimo dianan aki nos por tende of lesa tocante amigonan di Jesus den nos medionan di comunicacion. Ohala cu henter Antiyas por ta di curason amigonan di Jesus. Sinembargo nos tin cu considera esaki di dos banda. Y e prome y mas principal ta e banda di Señor Jesus Su mes. Kico E ta bisa tocante di un amistad asina?

Pa nos haya sa kico Señor ta bisa nos, nos mester lesa den Juan Capitulo 15. Lesa e Capitulo ey completo. Anto den versnan 9 padilanti, e ta bisa lo siguiente: “Mescos cu e Tata a stima mi, asina Mi a stima boso. Awor, keda den Mi amor. Si boso obedece Mi mandamentonan, boso lo permanence den Mi amor, mescos cu Ami a obedece Mi Tata Su mandamentonan y a permanence den Su amor.” Anto E ta sigui bisando: “Mi a bisa boso esaki, pa Mi goso por ta den boso, y cu boso goso por ta completo. Mi mandamento ta esaki: stima un y otro mescos cu Mi a stima boso, Ningun hende tin amor mas grandi cu esaki; cu uno ta duna Su bida pa Su amigonan. Boso ta Mi amigonan, si boso haci e loke Mi ta manda.”

Aki anto amigonan y rumanan den Cristo, nos ta haya loke e palabra di Dios ta siña nos tocante e berdadero amigonan di Señor Jesus. E ta hopi diferente cu ora nos ta considera nos como un Cristian y amigonan di Señor Jesus; pero na e mes un tempo nos ta odia un y otro, y ta comete tur sorto di maldad contra un y otro. E tempo a yega pa nos repenti di e calidad di bida ey, cu ta un bida sin Dios, y sin speransa den mundo. E ta tempo pa nos repenti di nos bida di pica, y acepta e pordon cu Señor nos Dios ta ofrece na tur hende di mundo mediante fe den Señor Jesus, Kende a carga cada un di nos su picanan den Su curpa ariba e crus. Pa nos libra di picanan, por biba pa husticia, pasobra ta pa medio di Su heridanan, nos a wordo cura.

Scritura ta spierta nos masha hopi mes tocante e error di yama of considera nos como un Cristian, pero nos echunan ta contradici esey. Pasobra e nomber Cristian ta papia pa su mes. E ta nifica, un persona cu ta sigui Cristo, un siguidor di Cristo. Y e titulo ey, ta wordo haya solamente tres bes den Scritura - Echunan 26:28, 1 Pedro 4:16, y Echounan 11:26. Otro titulonan cu ta duna na e miembronan di e Iglesia di Dios, ta santonan, rumannan keredornan. E rumannan aki ta wordo recorda den Scritura, cu nan curpanan ta tempel di Dios, y cu Spirito di Dios ta biba den nan. Anto e ta sigui cu e spiertamento aki: Si un persona destrui e tempel di Dios, Dios lo destrui e persona ey. Lesa 1 Corintionan 3:16,17. Of lesa e Capitulo 3 di prome Corintionan completo. Y den 1 Corintionan 6:19 nos ta lesa lo siguiente: Boso no sabi cu boso curpanan ta un tempel di e Spirito Santo, Kende ta den boso, Kende boso a ricibi for di Dios? Boso no ta pertenece na boso mes, boso a wordo cumpra pa un preis. Pesey honra Dios cu boso curpa. Nos ta roga cada uno cu lo lesa e mensahe aki pa bo lesa tur e Scrituranan ey. Pasobra mescos cu e Iglesia na Corintio, nos tin e mes un problemanan aki na e Iglesianan di Aruba, Curaçao y Bonaire, etc. Y e forma di lucha ey ta personal. E parehanan cu ta tata y mama di yiunan, semper tabatin nan lucha; pero awe rapidamente esey a bira peor. P’esey mes cu nos ta wordo spierta for di Señor Su mes, pa nos para firme mediante e Palabra di Dios, y e Spirito Santo cu ta biba den nos. Pero aunke nos por pensa cu antes tabata mihor, e berdad ta cu semper tabatin e lucha spiritual pa tur e keredornan. Cu esey nos ta referi na tur cu a kere di curason den presencia di Señor.

Considera como ehempel e spiertamento aki, cu a wordo duna esunnan cu a kere e mes un Evangelio cu nos ta kere awe. Y e spiertamento aki a wordo duna mas cu dos mil añanan pasa. Tempo cu tabatin nada moderno manera nos tin awe. Y esey a wordo duna door di e sirbidor di Señor cu yama Santiago of James na Ingles. Den Capitulo 4, versiculo  4, e ta bisa lo siguiente: Boso hendenan adulterado, boso no sabi cu Amistad cu e mundo ta enemistad pa cu Dios? P’esey kende cu kier ta amigo di mundo, ta bira enemigo di Dios. Otro scritura ta spierta nos di e manera aki: No stima e mundo, ni e cosnan cu ta den mundo. Ken cu ta stima e mundo, e stimacion pa e Tata no ta den dje. E spiertamentonan aki, no ta nifica cu nos no por stima y admira e naturalesa cu ta resultado di e obra di Dios, E laman, cual ta un fuente di alimentacion pa henter humanidad. E parhanan cu nan variacion di color y bunitesa. E variedad di matanan y flornan. E riunan y fuentenan, etc., etc.  Pero e sistema di bida cu ta basa ariba montona tesoronan pa nos mes, pero ta pober pa cu Señor JesuCristo, Kende a bandona Su gloria pa E por trece nos serca nos Dios y Tata.

Te otro mensahe. Pa fabor, corda nos den oracion.  Bicento y Betty Henriquez

Bon dia, bon dia! Bonbini na nos Blog awe! Nos ta sigui cu e tema awe "E Buki di Bida".  Hopi ta e mensahenan cu nos clientenan a ricibi. Y manera ya mi a menciona, cu mas cu 13,000 personanan a bishita nos blog. Dios ta grandi, y el a yuda Bicento door di dos anjamam cu a pasa recuperando di un tumor den su stoma cu a wordo elimina cu tratamento,  y cu diagnosis di Malt Lymphoma cu doctornan tin tur confiansa cu e ta cura; y anos ta duna Dios y nan danki pa e recuperacion ey cu awe e por celebra cu famianan aki, Hulanda, y Canada, y amigo/anan na gran cantidad ront mundo e EDAD BUNITA DI NOBENTA!!  MASHA DANKI NA DIOS Y NA UN Y TUR.  Bicento y Betty  (mira e fotonan di e prome fase cu tabata awe mainta, cu un desayuna masha precioso cu Max y Sita Semeleer. Awe tardi, lo mi trata di post algun di nos fiesta di awe tardi, y manjan di esun di famianan di Bicento .... keda pendiente!! manera nos tabata bias antos den nos Matutino di Camp Washington cu tabata yama "Cadushi"!!

 

... y awor sigui lesa nos continuacion riba nos topico:

E BUKI DI BIDA (continua)

Nos ultimo mensahe tabata tocante e Buki di Bida rebela den Beibel. Y e importancia di e buki aki ta; cu tur hende cu a yega di biba ariba e mundo aki, y cu ta bibando awe, y cu lo bini ainda;  ta involvi.

Nos por compara esaki, cu e morto y resureccion di nos Señor y Salbador JesuCristo. Henter mundo ta involvi den esey. Pasobra nos ta lesa masha cla mes den Beibel, cu Dios a stima mundo asinta tanto, cu el a duna Su unico Yiu, pa tur cu kere den djE, no bai perdi, ma tin bida eternu. Pasobra Dios no a manda Su Yiu den mundo, pa condena e mundo, sino pa salba e mundo. E mundo ta inclui cada ser humano cu lo habita e planeta aki. Esey, amigonan di tur edad, ta e berdad revela den Scritura. Cada persona den nos propio famia, y den tur otro famia, ta involvi den e obra di Cristo, den Su incarnacion, y Su morto, y Su resureccion, y Su glorificacion, y tambe den Su di dos benida. E diferencia ta entre esunnan cu ta kere, y a obedece e Evangelio, cu esunnan cu no ta kere. Y e keremento menciona aki, ta di curason, y no simplemente forsa ariba bo di un of otro manera. E ta algo personal cu ta bini via di tendemento di e Palabra di Dios, esta e Evangelio.

Nos mayornan, aunke cuanto nan ta stima nos, no por kere pa nos. Ta cada uno di nos cu tende e Evangelio, y cu ta wordo convenci pa e Spirito Santo di Dios Su mes, mester hasi e decision ey di kere cu henter nos curason den Cristo como nos unico Salbador personal. Separa di fe den nos Señor y Salbador JesuCristo, no ta existi posibilidad pa nos nomber ta scirbi den e buki di bida. Y pa e motibo ey nos ta lesa lo siguiente den Rebelacion 21:27. Nada cu ta impuro lo drenta den dje, ni tampoco esunnan cu ta hasi e loke ta bergonsozo, of engañanoso; pero solamente esunnan kende nan nomber ta scirbi den e buki di bida di e Lamchi. Aki anto amigonan di tur edat, homber y mohenan, hobennan y ancianonan, nos ta haya e contesta tocante e buki di bida.

E Lamchi ta un representacion di e Yiu di Dios, esta nos Señor y Salbador JesuCristo. Nos por lesa di e prome bes cu esey ta wordo menciona den Testament Nobo den Juan 1:29, unda nos ta lesa lo siguiente: E siguiente dia Juan a mira Jesus biniendo serca dje, y el a bisa: “Mira aki e Lamchi di Dios cu ta kita e pica di mundo.”

Manera nos tur sabi, bou di e ley di Moises, Lamchinan tabata wordo ofreci como sacrificio pa e pordon di picanan. Pero Scritura ta siña nos cu sanger di animalnan nunca por kita pica di hende. Pues nan tabata solamente un recordatorio of figura, te ora cu e berdadero sacrificio a wordo ofrece cual ta e Yiu di Dios Su mes. Y asina ta para scirbi cu: E mes a carga nos picanan den Su curpa ariba e crus, pa nos libra di picanan por biba pa husticia, y pa medio di Su heridanan nos a wordo cura. Anto e ta sigui bisa cu: pasobra boso tabata mescos cu carnenan cu ta dwal, ma awor boso a bolbe serca e Wardador y Cuidador di boso almanan. ( 1 Pedro 2:21-25).

Awor e pregunta: Con anto mi por tin mi nomber scirbi den e buki di bida?  E contesta cla y sigur nos ta haya den Beibel solamente. Y ey nos ta lesa hopi cla, cu Señor Jesus Su mes a carga nos picanan ariba e crus, pa nos libra di picanan por biba pa husticia. Pues, segun Scritura, no ta existi otro manera pa nos pecadornan por drenta e reino di Dios, of tin nos nomber scirbi den e buki di bida. Esey ta e motibo pakico e ta wordo yama: E BUKI DI BIDA DI E LAMCHI.

Bicento y Betto Boekhoudt ta combersa na un reunion special cu gobierno tabatin pa tur esnan cu ainda ta bibo, pa wordo reconoci como e prome firmantenan di un documento na luna di Maart 1948, cu e prome peticion pa Aruba separa for di nos isla Hermana Curacao. Esey ta un tiki di historia, ma loke mi kier menciona ta:  loke e dos rumannan den Cristo tin comun: Tur dos ta den 90 anja! Tur dos a tende Evangelio den e mes un periodo di tempo na anjanan 1947 pariba; tur dos a sirbi den dienst hunto; tur dos a traha na e compania Lago; nan tur dos a asisti na Igelsia Aliansa Evangelica di Oranjestad, un como pastor y e otro como ansiano! Anto, tur dos a biba varios anja na Centro Juvenil Washington cu nan famianan yudando den e trabao ey. Di tempo den dienst nan tabata amigo y te awe den biahes ta bishita otro pa bebe un lek di Coffee. Dos ters!

Ma awor laga nos mira kico e tema pa awe ta:

E BUKI DI BIDA

Si tin algo den e mundo aki, cu nos tur ta familiarisa cu ne, ta bukinan. For di mucha caba nos ta custumbra cu tur sorto di bukinan. Dia cu nos a cuminsa bai school, ta bukinan y mas bukinan. Y sin bukinan ta imposibel pa un persona avansa den e sabiduria necesario pa competi den e mundo aki. Ya awe sabiduria a aumenta asina tanto, cu nos por haci uso di otro inventonan moderno pa progresa den cualke estudio den tur ramo. Y nos a yega asina leu, cu ya nos no tin mester di tanto bukinan mas. Pasobra si nos sabi cual botonnan nos mester primi ariba un computer, nos ta haya e contesta rapido, sin cu nos mester kibra cabes cu bukinan.

Pero awe nos ta bai presenta un buki unico den su cualidad y contenido. Y nunca ningun hende lo a haya sabi di e buki aki, si Señor no a revela esaki den Beibel. E prome lugar den Beibel cu nos ta lesa di e buki aki, ta den e buki di Daniel Capitulo 12:1. Aki e ta wordo yama : “E Buki”.

Anto den Lucas 10:20, ta unda Señor Jesus ta encurasha Su discipelnan pa nan sea contento cu nan nomber ta scirbi den cielo. Mas despues e Apostel Pablo ta menciona algun damanan y otro rumannan cu ta luchando hunto cu e Apostel Pablo den proclamacion di e Evangelio, kende nan nomber ta den e buki di bida. Mira Filipensenan 4:1-3

E ta bon pa nos, rumannan stima den Cristo; pa nos tene bon cuenta cu, tin nos nomber scirbi den e buki di miembro di un of otro iglesia, no ta mescos cu tin nos nomber den e buki di bida cu ta den cielo. Den e buki di iglesia, pa importante cu e por ta, toh por tin eror. Pero den e buki di bida cu ta den cielo, nunca por tin eror. P’esey cu e ta na su lugar pa nos sea masha atento na e spiertamento di Scritura cu ta bisa nos: “Examina boso mes, si boso ta den e fe”, etc. E ta bon pa nos lesa e buki di Galationan cu ta yen di spiertamentonan pa nos. Den Rebelacion 3:1-6, tin un spiertamento masha solemne dirigi na e Iglesia di Sardis. Y aki tin un spiertamento sumamente solemne na un iglesia unda tin miembronan cu ta profesa cu nan ta den bon relacion cu Dios, pero e berdad ta otro. Y Señor ta spierta nan, pa nan repenti of ricibi e casigo husto. Lesa Rebelacion 3:1-6.

Den Rebelacion 13:1-12, nos ta wordo spierta tocante sistemanan di siñansanan falso dirigi directamente contra Señor nos Dios. Y e resultado ta cu tur habitante di mundo lo cai y adora e loke ta yama: E Bestia, cual a ricibi su poder directamente for di Satan. Pero segun e Scritura ta bisa nos aki ta; cu e berdadero keredornan kende nan nomber ta scirbi den e buki di bida, cu ta pertenece na e Lamchi cu a wordo mata; lo no adora e bestia aki.” Lesa esey stimanan, den Rebelacion 13:1-11.

Pa fabor lesa e capitulo aki, y ora cu nos ta les’e, permiti e Spirito Santo di Dios papia cu nos, y laga nos obedece e Spirito di Dios, dor di repenti y admiti nos picanan di carnalidad, y mundanalidad na Señor nos Dios. Señor lo yuda cada uno di nos pa haci esey den Su presencia, for di e profundidad di nos curason. Y sin cu nos tin mester di comete dobel eror, dor di exalta nos mes ariba nos otro rumannan. Pero mas bien sin ningun forma of intento di hipocrecia, cu nos curason yen di gratitud y alabansa na nos Tata Celestial, pa medio y den e nomber di Jesus nos Señor y Salbador. Amen.

Cuminsando den e Capitulo 17 di Rebelacion, nos ta haya revela na nos, un sistema religioso cu lo y cu ta gobernando ariba mundo, te ariba e dia cu nos ta yama awe. Y e sistema aki lo keda ariba mundo te na e final ora cu nos Señor Dios Todopoderoso lo huzg’e. Y  Rebelacion Capitulo 18, cuminsando cu versiculonan 4-24, nos por lesa tocante e final tristo di e sistema religioso aki.

Anto Rebelacion 19 ta cuminsa cu e celebracion di e multitudnan den cielo cuminsando cu un Aleluya aki. Y e causa ta, e asina yama den Scrtiura, e matrimonio di e Lamchi y e Iglesia. Y e bruit cu ta e Iglesia, tabata bisiti cu lino fini, briyando y limpi; y e lino fini ta e echunan husto di e Santonan. Y rumannan stima di nos Tata Celestial, y pa nos Señor  y Salbador JesuCristo; ta awe y awor ta e tempo pa nos obedece di curason, y cu e goso cual e Spirito di Dios ta proveë nos cu n’e diariamente ta awe y awor nos por montona tesoronan den cielo, unda ladronnan no por alcansa. Y den Rebelacion 20:11-15, nos ta lesa di e huicio final na unda tur esunnan cu a muri, grandi y chikito ta para dilanti di e trono blanco, pa wordo huzga segun loke ta scirbi den e bukinan segun nan obranan. Y si un hende su nomber no a wordo haya scirbi den e buki di bida, el a wordo tira den e lago di candela.

Amigonan stima pa Dios Su mes; nos mester ta contento cu e cosnan aki a wordo scirbi pa nos como un spiertamento solemne. Pasobra awe ta e tempo pa nos repenti di un bida di pica, y pone nos fe den Esun cu a carga nos picanan den Su curpa ariba e crus. Pa nos libra di picanan por biba pa husticia. Pasobra pa medio di Su heridanan, nos a wordo cura.

Nos lo sigui cu e mensahe aki den e siguiente blog.

DIA DI HUICIO

(Bon dia awe mainta dia 2 di Juli, 2013! Ayera mi a wordo spierta cu e letranan di nos “Blog” ta poco chikito y dificil pa lesa!  Ami a haci e un tamaño mas grandi.  Please laga mi sa si esaki ta mas mihor – mas fasil pa lesa.  Boso por manda nos boso reaccion na:  cjwmitesoro@gmail.com.  Nos tin mas cu 12,000 bishitantenan na nos blog, y esey ta encurasha nos. Tambe nos a wordo bisa cu no ta posibel pa comenta ariba nos blog. Ami no ta un gran sabio den computer, p’esey mi no sa e motib ey tampoco.  E “blogsite” ta ariba un “carrier di Canada”, pasobra ta na Canada nos a cuminsa e ministerio aki. Di tur manera comunica cu nos si e letranan aki ta fasil pa lesa.)

E FOTO: Ki nostalgia di temponan pasa ora mi tabata pisca nan na cantidad; mi tabata un piscador! E foto aki a wordo saca pariba e toren di lus. Nos tabata para wak con un piscador a bin fo'i hundo cu dos di nan na man!  Nos a combersa cu e maneer, y naturalmente a saca un foto como un memoria!

AWE nos kier mira Kico Scritura ta bias nos tocante e tema di "DIA DI HUICIO" - un topico serio, un tema cu nos no tin gana di pensa riba, corda papia. MA Scritura ta papia di dje. Pues, tuma bo Beibel, y sigui lesa y wak den bo propio Beibel loke ta scirbi pa nos.

Bes tras bes, nos ta wordo spierta den Scritura, cu lo tin un dia di huicio pa tur ser humano cu a biba ariba e mundo aki. Hebreonan 9:27 ta bisa nos lo siguiente: Hende ta destina pa muri un bes; y despues di esey enfrenta huicio (of huzgamentu). Ora Scritura ta menciona cu hende ta enfrenta huicio, e ta referi na tur hende cu lo biba ariba e mundo aki te na e final. Pues, esey claramente ta inclui cada uno di nos. Y huicio ta nifica simplemente pa ser huzga. Kico esey ke meen?

Amigonan di tur edad, e nificacion di huzgamento aki, ta scirbi pa nos den Scritura. Y pa nos sea franco, e parti mas importante pa cada un di nos, ta tumando lugar tur dia na tur parti di mundo, incluyendo nos Islanan di abla Papiamento. Den ki sentido e huzgamento ey por ta tumando lugar awe den henter mundo? E contesta ta masha cla mes den Scritura Santo cu nos ta yama Beibel. Laga nos lesa algun Scritura cu ta masha cla mes tocante e tema ey di huicio y huzgamento.

Den e Evangelio di Juan 5:24, nos ta lesa lo siguiente declaracion dor di Señor Jesus Su mes bisando, “Ami ta bisa boso e berdad, Kende cu tende Mi Palabra, y kere Esun cu a manda Mi, tin bida eterno, y lo no wordo condena: el a pasa over for di morto na bida. Mi ta bisa boso e berdad, un tempo ta bini y a bini awor, cu e mortonan lo tende bos di e Yiu di Dios; y esunnan cu tend’E lo biba.”  Den ki sentido nos por tende e bos di Señor awe? E contesta cla y sigur ta den e Evangelio. Pa e motibo ey Señor Jesus a manda e Apostelnan pa nan bai proclama e Evangelio den henter mundo na tur criatura. Pasobra den e Evangelio un husticia for di Dios ta rebela.Un husticia cu ta pa medio di fe pa fe, manera ta para scirbi: E hustu lo biba pa fe. Lesa Romanonan 1:16,17.

Aki un hende por haci e pregunta: Y con mi por ricibi e fe ey di cual Scritura ta papia? E contesta ta cla y sigur den Beibel cu ta bisa nos lo siguiente: Ki bunita ta e pianan di esunnan cu ta trece e bon noticia! Consecuentemente, fe ta bini via tendemento di e mensahe, y e mensahe ta wordo  tende (of scucha) mediante e palabra di Cristo. Anto e profeta Isaias a bisa hopi añanan prome: “Mi a wordo haya door di esunnan cu no a busca Mi; Mi a rebela Mi mes na esunnan cu no a puntra pa Mi.” Lesa Romanonan 10:1-21.

Amigo y amiganan di tur edad; e ta posibel cu algun cu ta lesando e mensahe cortico aki, nunca ni a pensa mes den puntra pa nos Señor y Salbador. Nos por ta simplemente satisfecho cu nos tin un asina yama religion como nos unico speransa pa despues di nos morto. Cu tur respet pa tur persona cu lesa e mensahe corto aki. Den henter Scritura no ta existi e nomber di un sistema religioso cu por salba un solo persona. E motibo ta cla y sigur revela na nos den e Palabra di Dios. Y e loke ta revela ta esaki: “No tin salbacion den ningun otro; pasobra bou di cielo no tin otro nomber duna na hende, pa medio di cual nos mester wordo salba.” Echunan 4:12

Awor siendo cu Señor a revela na nos asina cla y sigur, cu no ta existi salbacion den ningun otro nomber, kico nos ta gana si nos persisti den spera cu un dia nos ta den cielo tog, aunke cu nos rechasa Esun cu Señor nos Dios a duna como un sacrificio pa nos picanan! Pasobra ta para scirbi masha cla mes, cu Cristo Su mes a carga nos picanan den Su curpa ariba e crus. Pa nos libra di picanan, por biba pa husticia. Pasobra ta pa medio di Su heridanan nos a wordo cura. Anto con nos lo por scapa si nos neglisha un salbacion tanto grandi asina? Realmente Scritura ta menciona cu nos tabata mescos cu carnenan cu ta dwal, ma awor nos a bolbe cerca e Wardador y Cuidador di nos almanan. Pues, amigonan di tur edad, damanan y cabayeronan, Segun Scritura, e no ta cu cosnan pasahera manera plata y ora cu nos a wordo libra for di un sistema bano di biba cual nos a ereda di nos tatanan; ma pa medio di e sanger precioso di Cristo, manera di un lamchi sin falta y sin defecto. Esaki a wordo scohi prome cu e fundacion di mundo, pero tabata revela den e ultimo dianan aki pa nos bon. Ta pa medio di djE nos ta kere den Dios, Kende a lant’E for di morto, y a glorifik’E, di manera cu nos fe y speransa ta den Dios. Pasobra tur hende ta manera yerba, tur su gloria ta manera e flor di sabana; e yerba ta seca y su flor ta cai, pero e Palabra di Dios ta permanece pa semper. Amen y Amen. (Lesa 1 Pedro 1:13-25.  Te un otro mensahe.

Dos ruman precioso den "e fe," ta haya un abraso serca nos Minister President Sr. Eman - ta un privilegio grandi pa haya un abraso di nos Presidente, manera na un occasion special aki un par di luna pasa! Ma cuanto mas lo ta e abraso di e eterno amor di nos Dios door di nos Senor JesusCristo "pa tur ku ta kere den djE!!" na e dia cu nos ta mir'E cara cara. Nos ta sigui awor cu e di siguiente parti di nos "Blog"
tocante e Amor di DIos:

 

Nos ta purba continua cu e mensahe tocante di e “Amor di Dios”, basa ariba e loke Scritura ta revela na prome luga. Pa cuminsa, ta motiva pa Su amor pa humanidad; cual ta inclui cada uno di nos sernan humano; cu e Tata a manda Su unico Yiu den mundo, pa nos por haya pordon di nos picanan, y bida eterno. Ta p’esey cu nos por lesa den Beibel cu Dios no a manda Su Yiu den mundo pa E condena mundo, ma pa salba e mundo pa medio di djE. Scritura ta bisa nos hopi cla y enfaticamente, cu cualke persona cu kere den djE, no ta condena, pero cualke persona cu no ta kere, ta condena caba, pa motibo cu e no a kere den e Nomber di e unico Yiu di Dios. (Juan 3:16-18).

Siendo cu Beibel ta asina cla y persistente tocante e problema di pica, anto ta cumbini cada uno di nos pa duna tur atencion na loke nos Tata Celestial ta revela na nos den Scritura. Pasobra un camina nos ta lesa cu ta nos tur a peca y ta falta e gloria di Dios. Pero e ta bisa nos tambe cu awor nos por wordo hustifica, of sea declara como husto pa medio di Dios Su gracia door di e redencion cu a bini pa medio di Cristo Jesus. E palabra ey, esta Redencion, cu a bini pa medio di Dios Su gracia door di e redencion cu a bini pa medio di Cristo Jesus. E palabra ey, esta Redencion, ta un palabra grandi den Scritura, relaciona cu pordon di picanan. Pasobra e tin di haci cu e preis cu a wordo paga pa nos libertad. Nos por purba mir’e asina aki. Beibel ta enfatisa cu e pago di pica ta morto. E no ta bisa di picanan, pero di pica. Un solo pica a causa e separacion di hende for di Dios, of di Dios for di hende. Ora cu nos Señor JesuKristu tabata ariba e crus, El a carga boluntariamente e picanan di henter humanidad. Y asina El a muri den nos lugar. Esey ta Redencion.

E obra ey di redencion ta na fabor di tur hende, y ta na vigor awe den henter mundo. Pero siendo cu hende a wordo crea den e imagen di Dios, e tin un responsabilidad directo pa cu Señor nos Dios. Cada un di nos ta responsabel dilanti di Señor pa cu nos picanan personalmente. Y pa e motibo ey cada uno di nos mester repenti di picanan, y pone nos fe den Jesus, Kende a carga nos picanan den Su curpa ariba e crus. Pa nos libra di picanan por biba pa husticia. Pasobra ta pa medio di Su heridanan nos a wordo cura. Esey kier meen cu nos ta ricibi pordon di tur nos picanan, y e promesa di bida eterno, cual Señor nos Dios, Kende no por gaña a priminti di siglonan pasa. Si esey no ta amor, anto no tin solo, ni luna, y ni streanan tampoco.

Sea sigur o almanan precioso di tur edad, cu e no ta nos Tata Celestial Su boluntad pa un persona bai perdi. Pero loke si ta Su santo boluntad ta: pa tur hendem tanto aki na Aruba, como henter mundo, repenti di pica y acepta Señor Jesus como Salbador personal. P’esey, ta para scirbi, nos ta repeti: Ken cu invoka e nomber di Señor Jesus, lo ta salba. Y e salbacion ey ta inclui pordon di picanan, y bida eternu. Y esey ta duna nos e previlegio grandi y santu, di por wordo yama: Yiunan di Dios; di acuerdo cu Scritura.

Segun e palabra di Dios, cual ta palabra di Sumo autoridad. No ta hasi diferensia pasobra tur hende a peca, y ta falta e gloria di Dios. Y nos ta bibando den un mundo cu ta yen di diferensianan social. Tin diferencia di rasa, di cultura, di educacion, di puestonan di importancia,

Enfin, e ta nesesario pa nos tin tur eseynan pa e bon marcha den cualke nacion. Pero ora cu nos ta papia di nos relacion cu nos Tata Celestial, Scritura ta spierta nos cu no tin diferencia. Pasobra tur a peca y ta falta e gloria di Dios. Pues, repentimento pa pordon di picanan y fe den nos Señor JesuCristo, ta conta pa tur hende. For di esun cu tin e puesto di mas halto, te na e persona di mas umilde den e mundo aki. Pero esey no ta nifica cu nos mester falta respet pa nos gobernantenan, y pa esunan cu ta mantene orden civil. Mescos e ta cu nos hefenan di trabao, nos maestronan di school. Y nos mayornan etc., etc. Cualke persona cu bai contra di e principionan aki stablece pa Señor nos Dios y Tata Celestial Su mes, lo trece solamente condenacion di un of otro manera ariba su mes.

Pa e motibo ey, amigonan stima, cu stimacion pa un y otro, ta asina indispensibel pa un bida felis. Y e fuente inagotabel di e amor aki ta nos Tata Celestial Su mes. Pero den Cristo, El a hasi’e posibel pa nos ricibi e amor aki pa medio di e Spirito Santo cu ta duna na nos ora cu nos repenti di picanan, y acepta Señor Jesus como nos Salbador.  (Te otro mensahe: Bicento & Betty)