Thursday, October 18, 2007

DOS PORTA Y DOS CAMINA #2


Otoño na Saskatoon, Saskatchewan, Canada
Den nos ultimo mensahe nos a papia tocante uno di e comparacionnan di Señor Jesus cu El a usa durante Su ministerio publico. Y nos a conclui e mensahe cu a bai tocante uno di e comparacionnan di Jesus unda El a papia di dos porta y dos camina; cu e porta smal y e camina smal ta representa ora cu un persona ta tende e Evangelio, y ta repenti di su picanan y ta pone su fe den Jesus, anto djey padilanti ta sigui Jesus como un discipel. Mientras cu e camina y porta hancho ta representa e persona cu ta scohe of ta prefera pa haci menos caso di e Evangelio, y ta sigui su propio camina, cual su fin ta perdicion eterno.

Ta un echo hopi interesante cu Señor Jesus a usa hopi comparacion ora cu E tabata siña y proclama e mensahe di Dios na e multitud di hende cu tabata sigui Su tras pa scuch’E of pa mir’E haci milagernan. Y lo mas importante pa nos cu ta na bida awe, incluyendo claro e persona cu ta lesando e simpel mensahe aki; cu nos tambe por lesa e comparacionnan cu nos Señor a usa mas cu dos mil aña pasa, y e pakico El a usa comparacionnan cu a consisti di storianan tocante eventonan di cada dia.

Asta e Apostelnan cu tabata hunto cu nE a keda straña con Jesus tabata usa tanto storia durante Su siñansanan. Den e buki di Mateo, capitulo 13:1-23 nos tin un bon ehempel. (Pero mi kier a recomenda pa lesa e capitulo 12 di Mateo tambe, pasobra e dos capitulonan aki ta yen di storianan cu Jesus a usa den Su siñansa). Anto Su discipelnan a bini cerca djE y a puntr’E: Pakico bo ta papia cu e hendenan den comparacion? Su contesta tabata esaki: E conocemento di e secretonan di e Reino di Cielo a wordo duna na boso, ma no na nan. Kende cu tin, mas lo wordo duna ne, y e lo tin na abundancia. Ken cu no tin, asta loke e tin lo ser kita for di dje. Esaki ta e motibo pakico Mi ta papia cu nan den comparacion: “Aunke mirando nan no ta mira; aunke tendiendo, nan no ta tende of comprende. Den nan e profecia di Isaias ta wordo cumpli. Boso lo sigui tende, pero nunca comprende; boso lo sigui mira pero nunca ripara. Pasobra curason di e puebel aki a bira insensitivo; apenas nan ta tende cu nan orea, y nan a cera nan wowonan, pa nan no tende cu nan orea, comprende cu nan curason y comberti, y Ami cura nan.” traduci di NIV.

Con cu nos mira e asunto aki, nos por mira con importante e ta pa tende e palabra di Dios. P’esey nos ta lesa den Scritura cu fe ta bini via tendemento di e mensahe, y e mensahe ta ser tendi door di e palabra di Cristo. (Rom. 10:17 NIV). P’esey manera tin un palabra cu ta bisa: No tin un persona mas sordo, cu esun cu no kier tende; y no tin un persona mas ciego, cu esun cu no kier mira.

Y Amigonan sabi kico? E palabranan ey ta keda berdad te awe. Ta bon pa nos sabi cu e comparacionnan cu Señor Jesus a usa, no ta contradici un y otro, alcontrario nan ta splica un y otro! Laga nos mira e Scritura na Lucas 13:22-30 un biaha mas. Aki ta Jesus ta contesta un pregunta tocante si ta un poco hende so lo ta salba. Jesus Su contesta tabata: Haci tur esfuerso pa drenta dor di e porta smal, pasobra hopi, Mi ta bisa boso, lo purba pa drenta, y lo no por.

Un pregunta logico por ta: Di ki manera hendenan ta purba awe pa drenta e Reino di Dios? Corda bon Jesus ta bisa cu ta hopi hende lo purba drenta, pero lo no logra. Kico abo cu ta lesando esaki ta haciendo of a haci tocante e asunto importante aki? E ta importante pasobra ta awor y awe ta e tempo pa haci esey.

Considera e tres islanan aki di abla Papiamento pa un momento. Cuanto alma precioso ta biba cu confiansa den su religion! Nos ta confia cu nos ta un Cristian pasobra nos mayornan a laga batisa nos for di chikito. No ta importa e clase di bida cu nos ta biba, pero nos ta considera nos mes un Cristian pasobra nos a wordo batisa di tempo cu nos tabata un baby.

Ta esey ta e porta smal cu Jesus ta papia di dje? Kico ta di arepentimento? Mi a repenti di mi bida di pica y kere di curason den Señor Jesus como mi Salbador personal? Of nos ta sigui haci oracion na homber y mohenan mortal cu a muri hopi añanan pasa pa yuda mi drenta e Reino di Dios?

Amigonan; e contesta pa e preguntanan ey nos por haya den Beibel. Lesa loke e Señor Su mes a bisa na Su discipelnan, despues di Su resureccion den Lucas 24:44-49. El a bisa nan: “Asina ta para scirbi; cu e Cristo MESTER a sufri y lanta for di e mortonan riba e tres dia, y cu REPENTIMENTO pa pordon di pica MESTER wordo proclama den Su nomber na TUR NACION, cuminsando na Jerusalem. Boso ta testigo di e cosnan aki. Ta Jesus mes a ordena cu nos mester repenti di nos picanan den tur nacion encluyendo nos cu ta di e tres islanan aki: Aruba, Bonaire y Curaçao. P’esey nos ta conclui cu e spiertamento aki: Nos no por drenta pa e porta smal cu ta guia na bida eterno, sin cu nos a repenti di nos bida di pica, y ricibi Jesus cu a muri riba un crus pa nos picanan, sabiendo cu e Tata a lant’E for di morto pa nos hustificacion. Lesa Romanonan 4:25 y 5:1-11. Pero dor di e porta hancho cu ta guia na destruccion unda mayoria di almanan precioso ta pasa; no tin mester di repentimento. Ey un hende por pasa libremente cu tur su picanan. Beibel ta papia di engaño di pica, y tambe di esclabitud na pica, y e naturalesa di pica. Cristo a muri y resucita pa libra nos di eseynan. Jesus a bisa: :Ami ta e camina, berdad y bida; ningun ta bini cerca e Tata sino pa medio di Mi.” Tambe El a bisa: “Si e Yiu haci boso liber; boso lo ta berdaderamente liber.” (Juan 14:6 y Juan 8:36)

Obedece Dios awe y biba!
Prepara pa Bicento y Betty Henriquez
Corda scirbi nos si bo a wordo bendiciona, of spierta door di e mensahe aki. Tambe sinti liber pa scirbi puntra nos si tin algo den

Thursday, October 11, 2007

Dos Porta y dos Camina


Bon dia na tur nos amigo y amiganan! Nos ta confia cu e mensahe pa awe lo ta di spiertamentu pa kada uno di nos, segun ku nos ta konsidera loke Beibel ta bisa di "Dos porta y dos kamina." Awe nos mensahe ta den e otrografia di nos islanan ruman: Bonaire y Curaçao. Ta bon cu nos tur por comprende di un y otro su manera di skirbi nos "dushi Papiamento"!

Den e Buki di Mateo 7:13,14, Señor a papia di un porta hanchu i un porta smal. E porta hanchu segun Hesus ta esun ku ta habri pa e camina espasioso ku ta hiba na destrukshon, mientras ku e porta smal ta esun ku ta habri pa e camina smal ku ta hiba na bida.

Ademas e Señor ta enfatisá, ku hopi hende ta drenta pa e porta hanchu ku ta hiba na destrukson, mientras ku un poko hende so lo haña e porta i e kamina smal ku ta hiba na bida. (Lesa pa bo mes Mateo 7: 13 y 14, i tambe Lukas 13:22-30)

Segun e Skrituranan aki, Hesus a duna e spiertamentu i e invitashon aki, kontestando e pregunta di un persona. I e pregunta tabata: “Señor; ta algun hende so lo ta salbá?” Anto Hesus a kontestá nan, esta tur e otro personanan ku tabata presente na e momentu ei. I asta nos por bisa ku Señor ta kontestá
nos tambe ku tin pregunta similar den nos kurason awe. Pone atenshon ku aki Hesus ta bisa ku ta solamente poko hende lo haña e porta y e kamina ku ta hiba na bida, mientras ku den Lukas diestres Señor ta bisa ku hopi lo purba pa drenta pero lo no logra.

Amigo y amiganan, Kristo a muri, y a resusitá pa nos, p’esei nos mester lesa òf skucha kiko Dios Su Palabra mes ta bisa nos, na lugá di sigui siñansa di hende mortal ku ta kontradisí e Palabra di Dios. Ehempel; Beibel ta bisa nos, y aki mi por bisa: Dios mes ta bisa, “cu no ta nos a buska Dios, ma E ta buska nos den Kristo. Si nos sigui siñansa di hende sin mira si ta asina Beibel ta bisa, ta igual cu ora un siegu ta sigui guiansa di un ku tambe ta siegu. I e resultado ta, ku tur dos lo kai den un buraku.” Lukas 19:10 ta bisa nos lo siguiente: “Pasobra e Yiu di Hende a bin pa buska i salba loke tabata perdí.” I den Romanonan 3:11-18 nos ta lesa, “No tin ni uno cu ta komprendé ni uno ku ta buska Dios. Tur a desviá, huntu nan a bira inútil; no tin uno ku ta hasi bon, ni sikiera un. Nan garganta ta un graf habrí; nan lenga ta praktiká mentira. Veneno di kolebra ta ariba nan lip. Nan boka ta yen di maldishon i amargura. Nan pia ta lihé pa drama sanger, ruina i miseria ta marka nan kamina, I e kamina di pas nan no konos’e. No tin temor di Dios dilanti nan wowo.”

Pone bon atenshon ku aki no ta ser bisá ku ta e paganunan so ta hiba e sorto di bida ei, ni tampoko e Hudiunan; ma loke ta skirbí aki ta inklui nos tur. Sea ta e persona bon eduká, òf e ignorante, grandi i chikitu, riko i pober. Romanonan 3:9,10 ta bisa nos lo siguiente: Kiku nos lo konkluí anto? Nos ta mihó? Di ningun manera! Ya nos a kulpa tantu ta Hudiu komo no Hudiu ku tur ta bou di piká. Manera ta para skirbí: No tin ni un hustu, ni sikiera un.”

Un hende por bin ku e pregunta aki: Si ta asina e asuntu ta; ta kende lo por ta salbá anto? Laga nos mira Romanonan 3, kuminsando ku versikulo 19, ku ta bisa nos asina. “Awor nos sabi ku tur loke e Lei ta bisa, e ta bisa na esunnan ku ta bou di e Lei, pa tur boka por wòrdu será, i henter mundu sea kontá kulpabel dilanti Dios. P’esei si un hende lo ser deklará hustu den su bista dor di opservá e Lei; pasobra ta mediante e Lei nos ta bira konsiente di piká.”

Laga nos purba komprendé awor algu tokante e porta hachu i e porta smal ku nos ta haña den Mateo 7:13,14. Pone atenshon ku HOPI hende ta drenta dor di dje. E no ta bisa ku hopi hende ta buska e porta hanchu y e kamina hanchu. Pero e porta smal i e camina smal Señor ta bisa ku solamente POKO hende ta hañ’e. Meskos ku otro Skrituranan, aki tambe nos mester kompará e siñansa aki di Señor Hesus, ku otro Skrituranan ku ta papia di e mes un tópiko. Ya nos a menshoná kaba e Skritura den Romanonan 3:11-18 na kuminsamentu di e mensahe aki. I ei nos por mira bon kla ku no tin ni sikiera un ser humano ku ta bon den e bista di Dios. I tin otro skrituranan ku ta afirmá esei. P’esei siendo ku nos tur a nace ku e naturalesa di piká, nos ta kla pa sigui den e kamina hanchu di perdishon. Te asta esunnan ku a nase for di mayornan ku a repenti y kere e Evangelio di gracia di Dios. E muchanan aki ku a tende e palabra di Dios for di tempran den nan bida, i ku a mira e bon ehempel di nan mayornan, etc., etc. Segun ku e muchanan ta krese, nan lo realisá ku apesar di nan mayornan; tòg nan tin e naturalesa pekaminoso den nan mes, i ku nan tambe mester repentí di nan piká, i obedesé e Evangelio.

Amigo y amiganan ku ta lesando e mensahe aki. Den kual di e kaminanan bo ta na e momentu aki? Kisas algun lo puntra: “Y ta kua ta e kamina ku ta hiba na bida eterna?” Hesus a duna nos e kontesta kla i sigur. El a bisa lo siguiente: “Ami ta e Kamina, Berdat i bida. Ni uno ta bini serka e Tata sino pa medio di Mi.” (Huan 14:6 tradusí for di New International Version.)

Kon nos por haña e kamina ei? E kontesta ta ku e kamina di bida eterna ei a bini serka nos awe. Hesus a bini na mundu pa buska i salba pekadornan. Beibel ta bisa nos masha kla mes ku no ta nos a buska Dios, ma ta E a stima nos i a manda Su Yiu komo un sakrifisio propisiatorio pa nos pikánan. ( 1 Huan 4:10). Y esei ta nifiká ku e bida sin piká di Hesus i Su morto ariba un krus, i Su resurekshon for di morto i Su halsamentu na e man drechi di Dios e Tata; tabata pa nos por risibí rekonsiliashon ku Dios awe, pa medio di repentimentu pa pordon di nos pikánan, i asina haña bida eterno pa medio di nos fe den Kristo. “Esun ku kere den e Yiu di Dios tin bida eterno, esun ku no kere lo no mira e bida, ma e rabia di Dios lo keda riba dje.” (Huan 3:36) E porta smal i e kamina smal, amigonan, ta pa nos repentí di nos pikánan i pone nos fe den Hesus.
Skirbí i prepará pa Bicento i Betty Henriquez
Sinti liber pa skirbi nos si bo tin kualke pregunta òf komentario. Bo por skirbi nos na: bbhenriquez@shaw.ca Tambe, na Libreria Victoria situá na Elleboogstraat 25, na Oranjestad, Aruba, boso por haya Beibel, i otro bukinan di bon yudansa den e bida kristian, I tambe tractadonan pa duna na boso amigunan i ko-trahador