Sunday, December 16, 2007

FE Y OBRA # 1

FE Y OBRA!

Den e buki di Santiago 2:26, nos por lesa siguiente: “Pasobra mescos cu e curpa sin spirito ta morto asina tambe fe sin obranan ta morto.” Pa nos por comprende tocante un fe cu ta morto, nos mester compara otro Scrituranan. Efesionan 2:8-10, ta bisa nos lo siguiente: “Pasobra ta pa gracia boso ta salba, dor di fe, y esaki no ta for di boso mes, e ta e regalo di Dios. No pa medio di obranan, asina cu ni un por gaba. Pasobra nos ta e obra di Su man, crea den Cristo Jesus pa haci bon obranan, cualnan Dios a prepara padilanti pa nos haci.” Aki den Efesionan y den varios otro Scritura, nos ta wordo spierta cu salbacion ta pa gracia y cu e ta un donacion di Dios na nos den Cristo. Pero, mescos cu otro doctrinanan den Beibel, e doctrina tocante salbacion gratis of di regalo, por ser mal comprendi.

Un di e motibonan ta cu e palabranan manera: regalo, of don di Dios, of gracia, etc., facilmente por ser mal comprendi y troci. E berdad cu ta ensera den e doctrina di gracia y fe y regalo y salbacion ta; cu ningun hende por ricibi bida eterno dor cu e ta merece esey. Desde e prome hende Adam te awe, no a biba ningun persona cu a ricibi bida eterno como reompensa pa un bida sin pica. Scritura ta proba esey bes tras bes, di manera cu no ta keda lugar pa duda.

For di chikito aki na Antiyas, nos a wordo siña tocante San esaki y San esaya, y asta ta yen di imagennan y pinturanan di homber y mohenan cu ta wordo venera y asta adora como Santonan. Pero, pa e autoridad di e Palabra di Dios nos por declara awe, cu nunca a existi un persona cu no a peca; y asina merece bida eterno y wordo declara como un Santo. E unico persona cu a biba ariba e mundo aki sin haci pica, ta nos Señor y Salbador Jesus, e Cristo. Lesa sin falta por fabor: 1 Pedro 2:22-25.

Hende por pensa y bisa y rasona hopi cos, pero Scritura ta autoridad, pasobra e ta inspira pa Dios Su mes. Lesa 2 Timoteo 3:14-17. Y ta pa e autoridad di e Palabra di Dios cu mi por declara cu Jesus, e Yiu di Dios Haltissimo, ta e unico persona cu a biba den un curpa humano pa trinta y tres añanan sin comete un pica, y mentira no a wordo haya den Su boca. Y no esey so, ma tambe ta para scirbi cu El a wordo tenta den tur cos mescos cu nos pero tabata sin pica, y El a sufri ora cu E tabata wordo tenta. Lesa sin falta Hebreonan 2:14-18, y Hebreonan 4:14-16. Ta pa e motibo aki, amigonan, Scritura ta enfatisa bon cla lo siguiente: “No tin salbacion den ningun otro, pasobra no tin otro nomber duna na hende bou di cielo, dor di cual nos mester wordo salba.” Lesa esaki den bo mes Beibel den Echunan 4:12.

P’esey no ta existi ni un otro Santo, sino esunnan cu a repenti y kere den Señor Jesus pa pordon di picanan y bida eterno. Esakinan ta enclui Arubiano, Curasoleño y Boneriano, Venezolano, Colombiano, Chines, Africano, Canades, Mericao, etc., etc. cu a tende e Evangelio, y cu yudansa di e Spirito di Dios a repenti y a obedece. Si encaso tin algun cu ta duda, mi ta combida bo pa lesa Revelacion 7:9-17. Sea sigur cu cada uno di esunnan cu ta menciona den e Scrituranan ey, ta personanan mescos cu ami y abo. Ta personanan di tur e nacionnan cu a tende e Evangelio y a kere di curason y a obedece.

Ma awor; Kico ta e parti tocante obra, di cual Santiago ta enfatisa masha fuere mes unda el a declara cu fe sin obra ta morto? Sin duda obra tin un parti importante den cada uno cu ta kere e Evangelio. Pero no lubida cu Efesionan 2:8.9 ta declara cu salbacion NO por ser obenti pa medio di obranan. Sinembargo mi ta admiti cu aki nos tin di haci cu awa hundo, y e ta facil pa causa confucion meimei rumannan den e fe. Y un di e motibonan cu por y ta confundi nos ta e palabra obranan.

Aki den Antiyas, for di tempo cu nos tabata mucha, nos a wordo siña tocante bon obranan. Y e santonan cu mi a menciona caba tabatin hopi di haci cu bon obranan y sacrificionan personal, y pa biba separa fo’i e mundo di pecadornan, etc. Esey NO ta loke Scritura ta siña nos. Y aki den Santiago mes, nos ta haya dos ehempel cu el a duna como ilustracion, esta; Abraham y Rahab e prostituta. E fe di Abraham a wordo proba dor di su echo di obediencia, Y e fe di Rahab a wordo demostra dor di su echu di a pone su bida na peliger, pa motibo di su fe den e Dios Israel. Lesa e bunita pida historia aki den e Buki di Josue 2:1-24.

Pues nos por conclui cu fe sin accion of sin echu ta un fe inutil of morto. No ta basta pa bisa: Ami ta kere cu ta un Dios so tin. Ma e loke si ta necessario ta; pa nos kere y obedece e loke e Unico Dios aki ta bisa nos tocante Su Unico Yiu, nos Señor. Lesa 1 Juan 5: 9-12.
Scirbi pa Bicento Henriquez
Te akinan pa awe. Nos ta invita bo scirbi nos un nota si bo a lesa e mensahe aki tocante Fe y Obra, y comparti cu nos bo pensamento tocante e topico menciona awe! Si encaso ainda bo no tin bo propio Beibel pa lesa tur e Scrituranan menciona ariba, pasa na Libreria Victoria na 25 Elleboogstraat na Oranjestad, y cumpra uno! Lo no duel bo.

FE Y OBRA continua

FE Y OBRA #2

Awe nos ta continua cu e mensahe tocante fe y obra. Den e prome mensahe nos a recomenda pa lesa varios porcion di Scritura pa proba e nificacion di un fe berdadero en contraste di un fe morto di cual Santiago ta papia di dje. Awe lo mi cuminsa cu e Scritura haya den 1 Juan 5:9-12. Y e ta bisa nos lo siguiente: “Nos ta acepta testimonio di hende, ma testimonio di Dios ta mas grandi pasobra e ta e testimonio di Dios, cual El a duna tocante Su Yiu. Ken cu kere den e Yiu di Dios tin e testimonio aki den su curason. Ken cu no kere Dios a haci E un gañador, pasobra e no a kere e testimonio cu Dios a duna tocante Su Yiu. Y esaki ta e testimonio: Dios a duna nos bida eterno, y e bida aki ta den Su Yiu. Esun cu tin e Yiu tin e bida; esun cu no tin e Yiu di Dios no tin bida.” (of e bida) (traduci for di N.I.V.)

E pregunta pa awe ta esaki. Abo cu ta lesando e mensahe aki: Bo sabi cu bo tin e bida eterno aki? E porcion cortico aki di Scritura Santo, ta duna nos e contesta masha cla mes tocante e pregunta:
Kico mi mester haci pa mi por ta salba? of
Kico mi mester haci pa mi haya bida eterno?

E contesta ta duna na nos dor di e Tata Su mes. No ta existi un testimonio mas grandi y sigur cu e testimonio aki. Pone atencion na e gravedad di incredulidad. E ta bisa nos aki, cu e persona cu no kere Dios a haci E un gañador. Pone atencion cu aki e no ta papia di un persona cu no ta kere cu tin un Dios. Ma e condenacion aki ta inclui personanan cu ta bisa cu nan lip, cu nan ta kere cu tin un Dios, pero nan no ta kere e testimonio cu e Unico Dios aki ta duna tocante Su Yiu; esta nos Señor y Salbador Jesus, e Cristo. Henter e mensahe aki relaciona cu salbacion of perdicion, bida eterno of perdicion eterno ta depende si un persona ta kere Dios, of no ta kere tocante Su Yiu.

Awo algo mas tocante un fe morto cu Santiago ta menciona bisando, cu un fe sin obranan ta morto. Un fe morto ta un fe inutil, sin balor. Anto Santiago ta presenta e patriarca Abraham como ehempel di un fe bibo. (Santiago 2:20-24) Aki nos ta lesa lo siguiente: “Abo hende bobo, bo kier evidencia cu fe sin accion ta inutil? No ta pa motibo di loke el a haci nos tata (ancestor) Abraham a wordo considera husto, ora cu el a ofrece su yiu Isaak ariba e altar? Bo ta mira cu su fe y su accionnan tabata traha hunto, y su fe a wordo haci completo pa medio di loke el a haci. Y e Scritura a wordo cumpli cu ta bisa; Abraham a kere Dios,y esey a wordo conta p’e como husticia y el a wordo yama amigo di Dios. Boso ta mira cu un persona ta hustifica dor di loke el a haci, y no pa fe solamente.”

Amigonan, e motibo pakico tur esakinan tocante e fe y accion di Abraham a wordo scirbi, ta pa nos siñansa. Nos por siña for di e fe berdadero aki di Abraham cu Dios ta fiel y cu E ta podersoso pa cumpli cu Su promesa. Den e buki di Genesis 12:1-3, nos ta haya e prome mandato y promesa di Dios na Abraham. E tempo ey Abraham tabatin 75 aña di edad. Aki Señor a bisa Abraham pa e sali for di su tera y for di cas di su tata y bai na un tera cu e Señor lo mustr’e. Y e Señor a dun’e un promesa cu tur hende di mundo lo ta bendiciona dor di dje. Den Genesis 15, e Señor a papia cu Abraham den un vision, y a dun’e curashi. Pero Abraham a keha cu e no tabatin ningun yiu pasobra Señor no a dun’e, y cu ta un cria di dje lo ta su eredero. Anto aki e Señor a priminti cu Abraham mes lo bira tata di un yiu homber, cu lo ta su eredero. Anto e Señor a hiba Abraham pafo y a bis’e: “Mira e cielonan y conta e streanan – si bo por conta nan. Anto Señor a bis’e; asina bo descendientenan lo ta.” Abraham a kere e Señor, y El a conta esaki como husticia p’e. Despues di esaki varios añanan a pasa, y na edad di 86 aña Abraham tabatin un yiu homber cu un cria mohe di su esposa Sara, y cu consentimento di Sara. Y na e edad di 99 aña e Señor a aparece na Abraham y a bis’e: “Ami ta e Dios Todopoderoso; cana Mi dilanti y sea sin culpa. Ami lo confirma Mi aliansa meimei Ami y abo, y lo Mi multiplica bo masha hopi.” Abraham a cai cu su cara na suela, y Dios a bis’e; “Loke ta Ami, esaki ta Mi aliansa cu bo: Bo lo ta e tata di hopi nacionnan. Lo bo no wordo yama Abram mas, bo nomber lo ta Abraham, pasobra Mi a haci bo un tata di hopi nacionnan.”

Pues, prome cu e relato aki den Genesis 17, Abraham su nomber tabata Abram (cu ta nifica, tata exalta y Abraham tabata su nomber nobo cu ta nifica: tata di hopi) Aki tambe e ley di circumsicion pa e descendientenan di Abraham a wordo introduci; y tambe confirmacion di Dios Su promesa na Abraham cu e lo tin un eredero cu lo bini for di su mes curpa. Anto Señor a bisa na Abraham: “Bo esposa Sara lo haya un yiu homber pa bo, y bo lo yam’e Isaak”.

Por fabor lesa henter e historia aki den Genesis Capitulo 12, y Capitulonan 15,16 y 17), pasobra tin hopi detayanan mas cu mi no a menciona. Lo mi conclui den nos otro mensahe.
Scirbi y prepara pa Bicento & Betty Henriquez

Nos ta tuma e momento aki pa desea tur nos amigonan y rumannan den e fe, un Felis Pasco y Aña Nobo – cordando cu felicidad berdadero por ser haya den Cristo Jesus, e Yiu di Dios so, Kende a bini den e mundo aki y a carga nos picanan den Su curpa ariba e cruz, y Dios e Tata a resucit’E ariba e di tres dia –y tur cu kere den Dje por tin bida eterno! Esey ta e berdadero celebracion di PASCO.

Tuesday, December 4, 2007

Brasa di Señor - continua

“E BRASA DI SEÑOR” – continua.

Den e ultimo mensahe, mi a presenta Señor Jesus como e Brasa di Señor, basa riba un profecia den Isaias 53:1-6. Den e mes profecia ey, Señor Jesus ta wordo compara cu un spreit delicado y un rais for di tera seco. Ademas e profecia ta menciona cu E no tabatin nada den Su aparencia pa hende por a apreci’E. etc.

Siendo cu e brasa di Señor ta reprensenta autoridad y poder, nos mester trata na comprende den ki sentido debilidad y poder por obra hunto. Danki na Señor cu nos ta haya e contesta den Scritura mes. E contesta ta wordo haya den e encarnacion di Señor Jesus.

Masha pronto nos lo cuminsa prepara pa e Celebracion di Pasco di Nacemento di Jesus. Na Aruba y e otro islanan di Antiyas, nos tin e custumbra di celebra cu lusnan di color, dornamento di Kerstboom y comemento, bistimento, dunamento di regalonan y mas!

Ma e dia cu nos Señor a nace for di e Birgen Maria, El a nace den un stal of sea un cura di carné y otro animalnan. Anto su mama a lor’E den paña y a pon’E den un pesebre, pasobra no tabatin lugar pa nan den e posada. Manera nos sabi, un pesebre ta un baki den cual animalnan ta come y ta kou nan cuminda. Kico e evento aki relaciona cu e nacemento di Jesus por siña nos?

Pa nos comprende algo nos mester tene cuenta cu Esun cu a nace na e manera umiyante ey, tabata Cristo, e Señor, e Yiu di Dios. Haltisimo (Lesa Lucas 2:10,11). Scritura ta siña nos cu Esun cu a nace na e manera umilde ey, ta Esun dor di Kende Dios, e Tata a crea e universo. E Apostel Juan ta scirbi lo siguiente tocante Jesus:Tur cos a wordo traha dor di djE. Y nada a bin na existencia sino dor di djE.,etc., (Lesa Juan 1:1-10). E testimonio ey ta grandi y mester ta suficiente pa convence nos di e grandesa di Señor Jesus hunto cu e Tata. Otro testimonio nos ta haya den Colosensenan 1:15-17, y ta lo siguiente: “E ta e imagen di e Dios invisibel, e prome naci di henter creacion. Pasobra pa medio di djE tur cos a wordo crea; cosnan den cielo y ariba tera, vicibel y invicibel, sea ta trono of podernan of gobenantenan of outoridadnan; tur cos tabata crea pa medio di djE y pE. E ta prome cu tur cos, y den djE tur cos ta teni hunto.” E mes un testimonio aki ta wordo repiti den Hebreonan 1:1-3. Y e ta bisa lo siguiente: “Den tempo pasa Dios a papia na nos tatanan dor di profetanan na varios ocacion y den diferente manera; ma den e ultimo dianan aki El a papia cu nos pa medio di Su Yiu Kende El a nombra como eredero di tur cos, y dor di Kende. El a traha e universio. E Yiu ta e resplendor di e Gloria di Dios y e representacion exacto di Su persona, sosteniendo tur cos pa medio di Su Palabra poderoso.”

Ta e mes un Persona aki dor di Kende tur cos den e universo a wordo crea, a bini den mundo na un manera umilde, y den un curpa humano. Y den e curpa ey, El a umiya Su mes, y a obedece te na morto, asta e morto riba un crus.

Considerando e mahestuosidad di e Yiu di Dios di prome cu nos mundo y humanidad a existi, nos por puntra: Pakico anto E mester a bini den mundo, pa E sufri tanto y muri e morto di mas bergonsoso na man di hende cu E mes a crea? E contesta nos ta haya den Scritura mes, inspira pa e Spirito Santo di Dios. E contesta ta: e amor di Dios pa humanidad. “Pasobra Dios a stima mundo asina tanto cu El a duna Su unico Yiu, pa ken cu kere den djE no bai perdi ma tin bida eterno.” (Juan 3:16)

Ta imposibel pa mi ni pensa mes pa splika un amor y un sacrificio tanto grandi asina. Scritura ta duna e spiertamento aki: “P’esey, nos mester paga mihor atencion na e loke nos a tende, pa nos no drief pasa bai. Pasobra si e mensahe papiá pa medio di angelnan tabata firme, y tur violacion y desobediencia a ricibi su castigo husto; con nos lo scapa si nos ignora un salbacion tanto grandi asina?” (Hebreonan 2:1-4)

Durante henter Su bida den carni ariba mundo, Señor Jesus a lucha y risisti contra tentacion pa E haci pica. Su lucha tabata contra e mes un tentacionnan dor di cualnan nos tur a cai. El a wordo tenta dor di satan, y e sistema di mundo cu ta bou di poder di e diabel. Contrario cu nos, Señor Jesus no tabatin e naturalesa pecaminoso. Pero El a soporta e peso di sufrimento ora cu E tabata wordo tenta. (Hebreonan 2:18).

Manera ya mi a declara, e ta imposibel pa ami splica algo tan profundo asina. E victoria grandi di nos Señor den nos fabor ariba e poder di scuridad, tabata parce un derota, pero siendo cu E no a peca y ningun mentira haya den Su boca, Dios e Tata a lant’E for di morto, y a hals’E y dun’E e nomber cu ta ariba tur nomber. Confia den Señor Jesus awe, y sea libra di e Huicio di Dios cu ta bini.

No lubida di bishita Libreria Victoria den e dianan aki di Celebracion di e Nacemento di nos Señor JesuCristo .... sigur ey lo tin Beibel, Tractadonan di Pasco, Buki of otro material pa bo regala bo famia y amigonan e Pasco aki! No por tin un regalo mas mihor cu e Palabra di Dios!! Libreria Victoria ta situa na Elleboogstraat 25 na Oranjestad.