FE Y OBRA continua

FE Y OBRA #2

Awe nos ta continua cu e mensahe tocante fe y obra. Den e prome mensahe nos a recomenda pa lesa varios porcion di Scritura pa proba e nificacion di un fe berdadero en contraste di un fe morto di cual Santiago ta papia di dje. Awe lo mi cuminsa cu e Scritura haya den 1 Juan 5:9-12. Y e ta bisa nos lo siguiente: “Nos ta acepta testimonio di hende, ma testimonio di Dios ta mas grandi pasobra e ta e testimonio di Dios, cual El a duna tocante Su Yiu. Ken cu kere den e Yiu di Dios tin e testimonio aki den su curason. Ken cu no kere Dios a haci E un gañador, pasobra e no a kere e testimonio cu Dios a duna tocante Su Yiu. Y esaki ta e testimonio: Dios a duna nos bida eterno, y e bida aki ta den Su Yiu. Esun cu tin e Yiu tin e bida; esun cu no tin e Yiu di Dios no tin bida.” (of e bida) (traduci for di N.I.V.)

E pregunta pa awe ta esaki. Abo cu ta lesando e mensahe aki: Bo sabi cu bo tin e bida eterno aki? E porcion cortico aki di Scritura Santo, ta duna nos e contesta masha cla mes tocante e pregunta:
Kico mi mester haci pa mi por ta salba? of
Kico mi mester haci pa mi haya bida eterno?

E contesta ta duna na nos dor di e Tata Su mes. No ta existi un testimonio mas grandi y sigur cu e testimonio aki. Pone atencion na e gravedad di incredulidad. E ta bisa nos aki, cu e persona cu no kere Dios a haci E un gañador. Pone atencion cu aki e no ta papia di un persona cu no ta kere cu tin un Dios. Ma e condenacion aki ta inclui personanan cu ta bisa cu nan lip, cu nan ta kere cu tin un Dios, pero nan no ta kere e testimonio cu e Unico Dios aki ta duna tocante Su Yiu; esta nos Señor y Salbador Jesus, e Cristo. Henter e mensahe aki relaciona cu salbacion of perdicion, bida eterno of perdicion eterno ta depende si un persona ta kere Dios, of no ta kere tocante Su Yiu.

Awo algo mas tocante un fe morto cu Santiago ta menciona bisando, cu un fe sin obranan ta morto. Un fe morto ta un fe inutil, sin balor. Anto Santiago ta presenta e patriarca Abraham como ehempel di un fe bibo. (Santiago 2:20-24) Aki nos ta lesa lo siguiente: “Abo hende bobo, bo kier evidencia cu fe sin accion ta inutil? No ta pa motibo di loke el a haci nos tata (ancestor) Abraham a wordo considera husto, ora cu el a ofrece su yiu Isaak ariba e altar? Bo ta mira cu su fe y su accionnan tabata traha hunto, y su fe a wordo haci completo pa medio di loke el a haci. Y e Scritura a wordo cumpli cu ta bisa; Abraham a kere Dios,y esey a wordo conta p’e como husticia y el a wordo yama amigo di Dios. Boso ta mira cu un persona ta hustifica dor di loke el a haci, y no pa fe solamente.”

Amigonan, e motibo pakico tur esakinan tocante e fe y accion di Abraham a wordo scirbi, ta pa nos siñansa. Nos por siña for di e fe berdadero aki di Abraham cu Dios ta fiel y cu E ta podersoso pa cumpli cu Su promesa. Den e buki di Genesis 12:1-3, nos ta haya e prome mandato y promesa di Dios na Abraham. E tempo ey Abraham tabatin 75 aña di edad. Aki Señor a bisa Abraham pa e sali for di su tera y for di cas di su tata y bai na un tera cu e Señor lo mustr’e. Y e Señor a dun’e un promesa cu tur hende di mundo lo ta bendiciona dor di dje. Den Genesis 15, e Señor a papia cu Abraham den un vision, y a dun’e curashi. Pero Abraham a keha cu e no tabatin ningun yiu pasobra Señor no a dun’e, y cu ta un cria di dje lo ta su eredero. Anto aki e Señor a priminti cu Abraham mes lo bira tata di un yiu homber, cu lo ta su eredero. Anto e Señor a hiba Abraham pafo y a bis’e: “Mira e cielonan y conta e streanan – si bo por conta nan. Anto Señor a bis’e; asina bo descendientenan lo ta.” Abraham a kere e Señor, y El a conta esaki como husticia p’e. Despues di esaki varios añanan a pasa, y na edad di 86 aña Abraham tabatin un yiu homber cu un cria mohe di su esposa Sara, y cu consentimento di Sara. Y na e edad di 99 aña e Señor a aparece na Abraham y a bis’e: “Ami ta e Dios Todopoderoso; cana Mi dilanti y sea sin culpa. Ami lo confirma Mi aliansa meimei Ami y abo, y lo Mi multiplica bo masha hopi.” Abraham a cai cu su cara na suela, y Dios a bis’e; “Loke ta Ami, esaki ta Mi aliansa cu bo: Bo lo ta e tata di hopi nacionnan. Lo bo no wordo yama Abram mas, bo nomber lo ta Abraham, pasobra Mi a haci bo un tata di hopi nacionnan.”

Pues, prome cu e relato aki den Genesis 17, Abraham su nomber tabata Abram (cu ta nifica, tata exalta y Abraham tabata su nomber nobo cu ta nifica: tata di hopi) Aki tambe e ley di circumsicion pa e descendientenan di Abraham a wordo introduci; y tambe confirmacion di Dios Su promesa na Abraham cu e lo tin un eredero cu lo bini for di su mes curpa. Anto Señor a bisa na Abraham: “Bo esposa Sara lo haya un yiu homber pa bo, y bo lo yam’e Isaak”.

Por fabor lesa henter e historia aki den Genesis Capitulo 12, y Capitulonan 15,16 y 17), pasobra tin hopi detayanan mas cu mi no a menciona. Lo mi conclui den nos otro mensahe.
Scirbi y prepara pa Bicento & Betty Henriquez

Nos ta tuma e momento aki pa desea tur nos amigonan y rumannan den e fe, un Felis Pasco y Aña Nobo – cordando cu felicidad berdadero por ser haya den Cristo Jesus, e Yiu di Dios so, Kende a bini den e mundo aki y a carga nos picanan den Su curpa ariba e cruz, y Dios e Tata a resucit’E ariba e di tres dia –y tur cu kere den Dje por tin bida eterno! Esey ta e berdadero celebracion di PASCO.