Friday, March 22, 2013


  Esaki ta un foto di Aruba su Prome Minister Señor Mike Eman brasando Bicento, como un di e mas cu 2 mil firmantenan di Aña 1948, (cu ainda ta na bida) pa separa for di ta bao di gobernacion di Curaçao e tempo. Nan tabata kier ta “Baas den nan mes cas!” Esaki  tabata e prome paso den e procedura di algun aña, ma cu tempo a haya nan Status Apart! Tabata un momento special pa nos e dia anochi ey (diasabra dia 14 di Mart) pa tuma parti den Aruba su celebracion di su Himno Nacional y Bandera cual ta Dia 18 di Mart!

 Ma awor nos ta sigui cu nos BLOG pa awe.

 LUS DI MUNDO
Den e buki di e Apostel Juan, Capitulo 8:12, nos ta lesa lo siguiente: “Ora Jesus a papia atrobe cu e puebel El a bisa: Ami ta e lus di mundo. Esun cu sigui Mi, lo no camna nunca den scuridad, ma lo tin e lus di bida.”

 

Amigonan di tur edad, e palabranan aki, Jesus a papia nan mas cu dos mi añanan pasa; pero nan ta na vigor te ariba e dia di awe den henter mundo, encluyendo e Islanan aki di Antiyas. Nos tur sabi e importancia di lus, tanto ta e lus di solo, como di luna y streanan, ademas e lusnan artificial den varios forma. Pero nos tur sabi tambe, e importancia di nos bista di nos wowonan. Si un persona ta ciego, no ta importa cuanto lus tin tur rond di dje, e ta keda den completo scuridad. Ta p’esey, amigonan, e ta asina importante pa cada uno di nos duna atencion na e palabranan di Señor Jesus, y tambe di Su Sirbidornan, e profetanan den Testament Biew, y e Apostelnan den Testament Nobo, y particularmente e palabranan di nos Señor y Salbador Jesus Su mes. Pasobra ta e Palabra di Dios ta duna lus y comprendemento na e simpelnan.

 

Actualmente henter historia humano, cu ta inclui cada uno di nos te ariba e dia awe, ta depende ariba e echunan y obranan di un solo persona, cual ta nos Señor y Salbador JesuCristo. E mester ta suficiente pa cada persona den e mundo aki comprende, cu no tin salbacion den ningun otro (persona) pasobra no tin otro nomber duna na hende bou di cielo, pa medio di cual nos mester wordo salba. Lesa un biaha mas Echunan 4:12. E palabranan ey a wordo inspira door di Spirito Santo na e Apostel Pedro, despues di e Resureccion di nos Señor y Salbador Jesus. Y pa e autoridad di Señor revela den Scritura nos ta afirma cu e palabranan ey ta na vigor te awe y awor cu bo ta lesando e mensahe corto aki. No sigui den duda, no sigui postpone, no sigui ignora y risisti; manera e Spirito di Dios a inspira un sirbidor pa scirbi nos bisando: “Nos mester paga mas atencion cuidadoso na e loke nos a tende”, etc., … “y con nos por scapa si nos ignora  un salbacion tanto grandi asina?”  Lesa Hebreonan 2:1-4.

 

Aki, mescos cu den varios otro Scritura, nos ta wordo spierta seriamente tocante e attitud di ignora, di hasi menos caso na e spiertamentonan scirbi pa nos. Y haciendo esey, nos ta drief pasa bai pa enfrenta e huicio final. Segun Scritura, Señor Jesus no ta solamente un lus den mundo, ma E ta E LUS DI MUNDO. Pues, e unico lus den e tiniebla cu tin ariba henter humanidad. Y nos mester tene cuenta cu lus ta representa e berdad. Den un otro ocacion Señor Jesus a bisa, “Ami ta e camina y e berdad y e bida. Ningun ta bini cerca e Tata sino pa medio di Mi.” Juan 14:6.

 

Na manera di bisa anto, O stimanan di tur edad: cu e unico camina cerca e Tata, ta pa medio di fe den Señor Jesus. Pues, bida eterno ta ofreci na henter humanidad, pa medio di fe den e Yiu di Dios. Pasobra El a carga nos picanan den Su curpa ariba e crus; pa nos libra di pica, por biba pa husticia, pasobra ta pa medio di Su heridanan, nos a wordo cura. Siendo cu e palabranan di Señor ta irevocabel, nos mester  ta sumamente atento pa obedece, y no postpone. Pasobra nos no sabi kico un solo dia por trece cu ne. Ora cu nos ta neglisha y ta ocupa nos mes cu mil y un cos, nos curason ta bira duro pa cu e palabra di Dios.

 

Poco prome cu Señor Jesus a wordo mata ariba e crus, El a bisa e palabranan aki na Su discipelnan, “No laga boso curason bira intrankilo, confia den Dios; y confia den Mi. Den e cas di Mi Tata tin hopi lugar; si no tabata asina Mi lo a bisa boso. Y si Mi bai y prepara un luga pa boso, Mi lo bolbe atrobe y tuma boso pa ta cu Mi, pa boso tambe por ta unda cu Ami ta. Boso conoce e camina pa e luga unda Mi ta bai. Anto un di Su discipelnan a bis’e: Señor, nos no sabi ta unda Bo ta bai, anto con nos por sa e camina? Jesus a

contesta: Ami ta e camina y e berdad y e bida. Ningun, of ni un ta bini cerca e Tata sino pa medio di Mi.

 

Esaki amigonan di tur edad ta uno di e declaracionnan absolutamente cla den Scritura, bisá na nos pa Señor Jesus Su mes, cu no ta existi ningun otro nomber den mundo pa medio di cual un persona por yega cerca e Tata. Si encaso un persona persisti den confia den cualke otro nomber pa e wordo salba y ricibi bida eterno y bai serca e Tata; e ta completamente den eror. Pasobra e ta bai contra di e palabranan di nos Señor y Salbador Jesus. Y den un caso asina un hende ta bai contra e boluntad di Dios, y ta menosprecia e sacrificio di nos Señor y Salbador Jesus.

 

Sea sigur amigonan di tur edad, y masha sigur, cu no ta exsisti otro nomber bou cielo, pa medio di cual tin salbacion.

Wednesday, March 13, 2013

BON DIA, nos ta bai sali keiro un poco banda di laman - esaki ta un lugar favorito pa nos! E lugar unda e gansnan ta reuni!  Nos topico pa e Blog awe ta:

E AUTORIDADNAN

Kico Scritura ta siña nos tocante nos Gobernantenan? Pa nos por hiba un bida di acuerdo cu Señor nos Dios y Tata Su boluntad relaciona cu nos gobernantenan, ta necesario pa nos sabi kico e Spirito Santo di Dios, a guia e sirbidornan di Señor, pa bisa nos den Scrituranan.

Scirbiendo na e rumannan den Cristo cu tabata biba na Roma, e Apostel Pablo a bisa nan lo siguiente: “Cada uno mester somete su mes na e autoridadnan cu ta gobernando, pasobra no tin autoridad cu excepcion di e loke Dios a stablece. E autoridadnan cu ta existi a wordo stableci pa Dios. P’esey esun cu risisti contra e autoridad, ta resisti contra e loke Dios a institui, y esunnan cu haci asina lo trece huicio ariba nan mes. Pasobra gobernantenan no ta un causa di terror pa esnan cu ta haci loke ta corecto, ma pa esnan cu ta haci loke ta robes.  Bo kier ta liber di miedo pa esun cu tin autoridad? Anto haci e loke ta corecto, y e lo recomendo bo. Pasobra e ta sirbidor di Dios pa haci bon pa bo. Perso si bo haci loke ta robes, tene miedo, pasobra no ta pornada e ta carga spada. E ta Dios Su sirbiente, un agente di rabia, pa castiga esnan cu ta haci e loke ta robes. Pa e motibo ey, ta necesario pa somete na e autoridadnan, no solamente pa motibo di posibel castigo, ma tambe pa motibo di consenshi. Esey ta e motibo tambe pakico boso ta paga belasting, pasobra e autoridadnan ta sirbientenan di Dios, cu ta duna nan  tempo completo pa goberna. Duna cada uno e loke bo ta debe n’e. Si bo ta debe belasting, paga belasting; si ta tributo anto tributo; si ta respet, anto respet; si ta honor, anto honor.” (Romanonan 13:1-7)

Pa nos cu ta biba na e islanan aki, nos mester comprende cu nos sistema di gobernacion ta diferente cu nacionnan grandi, ma e principio biblico ta keda mescos. Nos tin pa ehempel: Reynan y Presidentenan, y Emperadornan y otronan. Y no ta pasobra cu nan ta wordo yama den Scritura como sirbidornan di Dios, nan tur ta keredornan. Cualke persona sin importa e titulo cu e tin, ta inclui den humanidad, pa kendenan Cristo a muri ariba e crus. Si Cristo a muri pa e mundo completo, ta nifica cu El a muri y resucita pa tur hende. Y esey ta inclui tur gobernantenan den tur nacion. Y pa tur otro grandinan manera: Cientificonan, Docter of Mediconan y Maestronan y Soldanan y Polisnan, etc., etc. Y cada uno di esakinan ta yama pa arepentimento y kere e Evangelio sin excepcion di ni sikiera un. Segun e Palabra Bibo di Señor nos Dios, no tin ni un persona kende su bida ta asina bon, cu e no tin mester di arepenti y kere e Evangelio. Y esey ta e motibo pakico Señor Jesus a bisa cu e ta dificil pa un persona rico drenta e reino di Dios.

Pero den otro lugar nos ta lesa, cu no ta pa e riconan so esey ta dificil, ma tambe pa tur otro hende. Por ta un hende masha religioso, y cu tin puesto halto den religion. Pero kende cu e por ta, e berdad to keda cu si un persona no repenti y ricibi pa medio di fe, Señor Jesus como su Salbador, y e muri den e situacion ey, e ta perdi di acuerdo cu Scritura. Ni bisti religioso, ni nomber religioso por scapa un persona di condenacion eterno. Ta e mes un condicion tin pa cada persona den henter mundo. Cristo, nos Señor a muri riba un crus, pa nos libra di picanan por biba pa husticia. Ta pa medio di Su heridanan nos a wordo cura. Nos no mester lubida cu cada uno di nos su bida ta manera un neblina cu ta aparece pa un momento, y anto desaparece. Lesa Santiago 4:13-17, sin falta.

P’esey e Spirito di Dios a inspira esun cu a scirbi e buki di Hebreonan pa bisa nos lo siguiente: Nos mester paga mas atencion cuidadosamente, na e loke nos a tende pa nos no drief pasa bai. Pasobra si e mensahe papia dor di angelnan a keda proba di ta firme, y tur violacion y desobediencia a ricibi su pago husto, con lo nos scapa si nos ignora un Salbacion tanto grandi asina? E contesta pa e pregunta ey ta inclui den e mes un pregunta ey.

Amigonan stima pa Señor Su mes. No ta importa den cual categoria humanamente bo ta pertenece. Pero pa e autoridad di e Palabra di Dios bibo nos ta encurasha bo awe, pa bo umiya bo mes dilanti Señor, y ricibi di curason, Señor Jesus como bo unico Salbador personal. Y sea sigur cu si bo obedece e boluntad di Dios, dor di repenti y pone bo fe den e Yiu di Dios, Kende a entrega Su mes, pa e trece nos serca Dios;   bo lo no repenti nunca cu bo a haci e decision ey.
Bicento y Betty Henriquez

Thursday, March 7, 2013

Nos ta gosando e bunita laman banda di Baby Beach! Nos ta gusta hiba nos
coffee, awa, co'i pasa boca y gosa nos bunita isla stima!
Awe nos ta combida bo lesa poco poco algo cu Scritura ta bisa tocante:

NOS DESTINO FINAL

Den e Buki di Hebreonan, Capitulo 9:27-29, ta para scirbi asina aki: “Mescos cu hende ta destina pa muri un bes, y despues di esey pa enfrenta huicio; Mescos Cristo tabata sacrifica un bes, pa kita e picanan di hopi hende;  y E lo aparece pa di dos bes, no pa carga pica, ma pa trece salbacion na esunnan cu ta sperando ariba djE.”

E porcion chikito aki di Scritura, ta encera e historia y e destino final di cada persona cu a nace desde e prome hende Adam, te na e ultimo cu lo nace ainda prome cu e di dos benida di nos Señor y Salbador JesuCristo. E no ta haci diferencia di cual nacion, y ni tampoco entre homber y mohe. Cada uno di nos ta destina pa muri un dia, y cada uno di nos ta destina pa wordo huzga. Practicamente no ta pasa un dia, cu te asta ariba e isla chikito aki, nos ta mira potret di esunnan cu a muri. Tin bes algun di e defuntonan ta ricibi elogio, etc., etc. Pero e berdad y realidad cu ta keda ta esaki: Awor ta sigui e huicio. Un dia tur esunnan cu ta den graf lo lanta for di unda cu nan por a muri. Sea cu ta riba tera of den laman, tur esunnan cu a muri lo resucita y pa aparece dilanti e trono di Dios Haltisimo. Y Scritura ta bisa nos hopi cla mes, cu tur e personanan cu nan nomber no ta scirbi den e buki di bida, lo wordo tira den e tanki di candela cual ta e Segundo morto. Lesa Rebelacion 20:11-15. Pone atencion cu ta esunnan kende nan nomber no ta scirbi den e buki di bida, lo ta tira den e tanki di candela.

Aki amigonan di tur edad, laga nos comprende bon cla, cu e no ta papia di buki di miembrecia di ningun Iglesia. Un hende por tin su nomber scirbi como miembro di cualke iglesia, y sinembargo su nomber no ta scirbi den e buki di bida. Ma un hende ta puntra: Ta con anto un hende por tin Su nomber scirbi den e Buki di Bida ey? E contesta ta cla y persistente den Beibel. Laga nos cuminsa na e principio di e ministerio di nos Señor JesuCristo. Manera nos por lesa den Scritura; Juan Bautista tabata esun cu Dios a scohe pa introduci e Yiu di Dios den Su ministerio como Mesias y Salbador di mundo. Pa nos comprende esey miho, nos mester lesa Juan 1:1-34. Den Juan 1:35, nos ta lesa asina aki: E siguiente dia Juan tabata ey atrobe, hunto cu dos di su discipelnan. Ora cu el a mira Jesus pasando, el a bisa: Mira e Lamchi di Dios. Ta importante pa nos pone atencion na e declaracion ey di un persona cual Dios a scohe pa ta esun cu lo introduci Señor Jesus como e Lamchi di Dios cu ta kita pica di mundo. Pues henter humanidad ta inclui den e amor y sacrificio di Dios aki. Y p’esey nos por lesa na un otro lugar den Scritura e declaracion solemne aki: “P’esey nos mester paga mas atencion cuidadoso na e loke nos a tende, pa nos no drief pasa bai. Pasobra si e mensahe duna dor di angelnan tabata firme, y tur violacion y disobediencia a ricibi su castigo husto; con nos lo por scaba si nos ignora un salbacion tanto grandi asina?”

E prome cos cu cada un di nos mester tene cuenta cu n’e ta; cu nos tin, cada uno di nos, sea ta homber of mohe, rico of pober, cada uno di nos tin un sita cu morto. Y manera cada uno di nos mester a siña caba, cu no tin diferencia di persona. Ademas no tin diferencia entre edad y sexo, sea ta femenino of femenina. Pero ademas di e absolut di morto pa cada persona cu nace den e mundo aki, ta sigui e loke Scritura ta yama: “HUICIO”. O cuanto bes den nos ignorancia nos a haci menos caso di e spiertamento solemne aki. Cu nos atitud di ignorancia y arohancia, nos ta mofa tocante e spiertamentonan di e Palabra di Dios, cu ta inspira pa e Spirito Santo di Dios.

Y pa sea franco,  multitudnan lo para un dia dilanti di Esun cu a stima nos asina tanto; cu E no a spar ni Su unico Yiu, ma a dun’E pa nos tur. P’esey sea sigur cu e Yiu di Dios a carga cada uno di nos picanan den Su curpa ariba e crus. Pa nos,  libra di picanan por biba pa husticia. Pasobra pa medio di Su heridanan nos a wordo cura.

Awe, te awe e Spirito Santo di Dios, mediante e palabranan di Dios den Scritura ta obra pa convence nos di pica y di husticia y di huicio. Awe y awor ta e tempo aceptabel, awe ta e dia di salbacion. E berdad di e Evangelio di Dios y di Cristo, amigonan stima pa nos Tata Celestial Su mes, ta encera cu Cristo a carga nos picanan den Su curpa ariba e crus. Y ora cu nos tende e Evangelio e Spirito di Dios ta convence nos di pica y di husticia y huicio. Si nos obedece e Palabra di Dios cu ta e guia pa e Spirito di Dios, e ta mescos cu si nos a muri hunto Cristo. Y no esey so, ma mescos cu nos a muri cu n’E, mescos nos a resucita tambe cu n’E., etc. Esey ta e testimonio di e Palabra di Dios bibo. Lesa pa fabor henter e buki scirbi na e Colosensenan. O por fabor lesa e buki ey cu calma y cu oracion y Señor nos Dios lo bendiciona bo ricamente si bo obedece y kere di henter bo curason.                              Bicento y Betty Henriquez

Friday, March 1, 2013

Bicento ta saboreando su dushi pastech'i bacalao!
Otro memoria di mi bunita pais, y nos dushi anjanan bibando cerca un riu cu nos por cana di cas p'e!  Nos tabata sinta aki combersa hunto, come pastech'i bacalao y haya "nostalgia" pa Aruba! Ken por? Nos ta stima tur dos pais masha. Nos tin amigonan
y amiganan y famia na tur dos pais.  E contesta ta: Dios Su gracia ta basta pa nos!

Recuerdonan di nos tempo na Canada!  Tin ora nos tin problema cu "nostalgia" - deseo di bishita e lugarnan precioso aki. Aki nos ta kedando cu mi sorbino Ted Ratzlaff cu su esposa Bertha. Nan a presta nos nan QUAD pa core rond den e areanan rond!

Corda nos den oracion, pasobra di berdad nos tin e deseo pa bai BISHITA, (no biba)
Canada un biaha mas, cu Dios lo duna salud y forsa pa realisa esey: cu nos por mira nos famianan y duna nan e "ayo terrenal" prome cu nos bai cerca Senjor of E yama nos cerca djE. Nos ta realisa cu nos edad ta halto, nos tempo corto aki bao, y si nos
kier biaha ainda, e mester ta pronto.

FE Y OBEDIENCIA


Bon dia, amigo y amiganan, Nos ta desea cu cada un cu lesa e spiertamento cortico aki for di e Palabra di Dios lo worde encurasha pa sigui padilanti den e bida di fe. "E husto lo biba pa fe".  Si bo a wordo yuda, encurasha, of bo tin un pregunto, un comentario scirbi nos na: cjwmitesoro@gmail.com of tambe por comenta riba Facebook. Nos lo keda hopi contento pa tende si bo a lesa e mensahe corto aki.
AWOR: FE Y OBEDIENCIA
Segun Scritura, e FE cu ta salba ta bai hunto cu obediencia. Pues, e dosnan aki ta inseparable. Ademas, e fe aki ta bini via tendemento di e Palabra di Dios. Obediencia claramente ta nifica un accion. Y e accion aki ta real y di curason y sumamente solemne, pasobra e ta obediencia na e Dios Todopoderoso Creador di e universo.

Esaki, amigonan, ta e motibo pakico uno di e sirbidornan di e Dios haltissimo a scirbi cu: “fe sin obra ta morto.” Aunke mes cu e declaracion ey tin mas cu un nificacion, e ta spierta nos cu fe sin obediencia no tin balor dilanti Dios. Tuma tempo pa lesa den e buki di Santiago Capitulo 2:14-25. Of lesa e buki di Santiago completo. Na un manera di bisa, fe y obediencia ta inseparable. Y mescos cu e ta cu palabranan y accionnan.

E dia y e momento cu un persona ta kere e Evangelio di gracia di Dios, e ta nace di nobo. E nacemento nobo ta obra di Dios, basa ariba e fe di e persona cu ta kere e Evangelio di henter su curason. P’esey cu nos ta haya e spiertamento solemne aki den Scritura, unda e ta bisa:”Si bo a tende Su bos awe, no hasi bo curason duro.” (Hebreonan 3: 7-18). Manera Señor ta bisa nos na un otro lugar: “Den e tempo aceptabel Mi a scucha bo, y ariba e dia di salbacion Mi a yuda bo. Mira, awor ta e tempo aceptabel, mira awor ta e dia di salbacion.” (2 Cor. 6:1,2)

Segun Scritura Santo, cu declaracionnan irrevocabel, pica a drenta mundo via desobediencia di un persona, y como consecuencia di esun disobediencia ey, humanidad complete a wordo afecta. Esey ta e motibo pakico nos ta haya declaracionnan manera: “No tin un persona husto, ni sikiera uno, no tin ni uno cu ta comprende, ni uno cu ta busca Dios. Tur a bira lomba, hunto nan a bira inutil, no tin ni un hende cu ta haci bon, no tin ni sikiera un. Nan garganta ta un graf habri; nan lenga ta practica mintira. Veneno di colebra ta riba nan lipnan. Nan boca ta yen di maldicion y amargura. Nan pia ta lihe pa drama sanger” .., etc., etc.Lesa Romanonan 3:9-18. Anto e ta sigui bisando cu ta tur boca ta wordo cera y mundo completo ta culpable pa cu Dios.

Esey, amigonan stima di Señor Su mes, ta encera tur hende di mundo, y esey ta nifica cada uno di nos. Awor nos por puntra: Con anto nos por ta salba?

Danki na Señor nos Dios y Tata Celestial, nos tin e contesta cla den Scritura Santo. Na cuminsamento di e mensahe aki, nos a menciona cu pica a drenta den mundo door di disobediencia di un persona, cual ta Adam. Asina pronto cu Adam a desobedece Dios, el a perde comunion cu Dios, y el a wordo saca for di paraiso, etc.

Awor mescos cu humanidad completo a wordo afecta pa e desobediencia di esun hende ey, cu ta Adam, mescos humanidad completo tin e oportunidad pa wordo reconcilia cu Dios pa medio di obediencia di un solo persona cu ta nos Señor y Salbador JesuCristo na Kende nos ta debe gratitud pa semper. Den e buki di e prome Corintionan Capitulo 15, cuminsando cu vers 45, nos ta lesa lo siguiente: “Asina ta scirbi: E prome hende Adam, a bira un alma bibo, e ultimo Adam, a bira un Spirito cu ta duna bida. Anto si nos sigui lesa, nos ta haya cu e natural a bini prome, y despues e spiritual. E prome hende tabata for di e stof di tera, e di dos hende ta di cielo. Y mescos cu nos tin e aparencia di e hende terenal, mescos no lo tin e aparencia di e hende celestial”.  Lesa e porcion aki cu hopi cuidao. Anto bolbe lesa na Romanonan 5. Aki na Rom. 5: nos por lesa hopi cla, cu mescos  henter humanidad a wordo condena door di e desobediencia di un hende; mescos pa medio di obediencia di un hende, hopi lo wordo haci husto.  Nos ta conseha cada uno cu lesa e mensahe aki, pa bo tuma tempo pa lesa Rom 5:1-20. Anto despues, tuma tempo pa lesa e buki aki di Romanonan completo.   

Semper pidi Señor, pa E yuda bo comprende y pa obedece. Y sea sigur cu Señor nos Dios ta fiel, di manera cu ken cu invoca e nomber di Señor, lo ta salba. Corda bon, cu tardansa ta igual cu desobediencia.

Bicento y Betty Henriquez