Wednesday, January 30, 2013

CARNAVAL 2013 – lema ta: “Dwal Den Carnival” E celebracion cu ta wordo yama “Carnaval”, tabata un invension religioso como un despedida na e deseonan di carni te na Cuaresma. Y Cuaresma ta cuminsa ariba Diarason di Shinishi, cual tambe ta pertence na e mes un organisacion religioso. Ariba e diarason ey, e fielnan cu ta pertenece na e religion ey ta ricibi un crus marca ariba nan frenta cu shinishi. Anto e sacerdote religioso cu ta marca e crus, ta bisa na e persona: Stof bo ta, y na stof bo lo bo bolbe. Anto e dianan cu ta sigui despues di a ricibi e marca di un crus ariba su frenta, e religosonan ta ocupa nan mes cu yunamento, y no ta come carni ariba diabierna, etc. Ademas, ta evita fiestamento y bistimento luhoso y colorido. Hopi damanan tabata bisti sea na row of blanco. E periodo religioso ey, ta sigui te na Pasco Grandi, of sea Pasco di Resureccion. E palabra “CARNAVAL” , ta nifica un despedida na e carni pa un tempo, pues no pa semper. Y e idea religioso tabata, pa no duna e carni of sea e naturalesa humano su deseonan pa un tempo. Pero despues cu e tempo ey pasa, por sigui biba manera custumbra. Siendo cu ami a pasa personalmente den e episodionan ey, mi por bisa maske ta algo tocante di e adventura religioso ey. Kere of no, pero alomenos pa un tempo mi tabata masha religioso apesar di un naturalesa bergonsosamente corumpi y malo. Pero bolbiendo na e Carnaval; no ta tur hende ta perverso y corompi. Semper tabatin personanan sinceramente fiel na nan religion. Pues nos por bisa: hendenan sinceramente gaña. Scitura ta yama esey “biba den scuridad”. Y un cos ta sigur, tristamente y lamentablemente sigur, cu te ariba e dia aki, multitudnan ta bibando den scuridad, y den peligro di perdicion eterno, ariba e islanan aki, y tambe den henter mundo Scritura Santo ta bisa nos masha cla mes y cu sumo autoridad cu: “No tin salbacion den ningun otro, pasobra bou di cielo, no tin otro nomber duna na hende, pa medio di cualo nos por wordo salba.” (Echunan 4:12) Nos Señor y Salbador JesuCristo a duna of entrega Su mes, pa E libra nos di tur pica. Y pa e motibo ey, El a wordo mata ariba un crus. Y ta net eynan mes, ariba un crus, Dios a pone den djE, e picanan di henter humanidad. P’esey no tin nada straño ora cu nos ta lesa e sentencia aki den Scritura cu ta bisa: “Con nos por scapa, si nos neglisha un salbacion tanto grandi asina? (Hebreonan 2:3) Bolbiendo un momento na e dianan di ignorancia di nos grandinan, kendenan apesar di nan ignorancia tabata hopi deboto. Compara esey cu awe aki na Aruba, y e otro islanan tambe. Nan no tabatin un Beibel, pasobra e siñansa religioso e tempo, tabata considera esey un peliger pa e religion dominante den e Islanan. Pero toh nan tabata hopi cuidadoso den nan sistema di bida. Compara nan sistema di bida cu awe den e Islanan. Mira con mayornan mes ta encurasha nan yiunan pa tuma parti den loke ta immoral y baho. Sigur cu lo tin algun mayornan cu ta hopi preocupa. Pero, e presion di e multitud, y e spirito di rebeldia cu ta gobernando den henter mundo awe, ta causa con hopi mayornan ta perde nan autoridad, anto for di tempran. Pero nos ta cera cu e spiertamento y e conseho aki: Nos tin un Tata den cielo cu conoce cada uno di nos net manera nos ta. Y toh E ta stima nos di tal manera, cu E no a spar ni Su unico Yiu, ma a entregu’E pa nos tur. P’esey kere den Señor JesuCristo, y lo bo ta salba; abo y e hendenan di bo cas. B&B Henriquez

Tuesday, January 8, 2013

EXAMINACION Scirbiendo na e Iglesia di Dios cu tabata den Corinto, hunto cu e rumannan den Cristo cu tabata biba na Acaya; e Apostel a bisa nan lo siguiente: “Examina boso mes pa mira si boso ta den e fe, purba, of test boso mes. Boso no ta realisa cu Cristo Jesus ta den boso? Solamente claro, si boso faya den e prueba?” Lesa 2 Corintio. 13:5-10. Examinacion ta algo masha comun na tur parti di mundo. Mira cuanto automobilnan ta core continuamente ariba e pida baranca aki, cu yama Aruba. Y cada manehado di e autonan aki, mester tin un prueba cu el a pasa su examinacion pa maneha un automobile, cu exito. Di otro manera, e lo wordo castiga segun Ley. Mescos e ta den tur otro ramo di ocupacion. Y den tur caso e ta algo personal. Cada uno di nos tin su responsabilidad. Mescos e ta, amigonan di tur edad, den nos realacion cu nos Tata Celestial. Cada uno di nos mester examina su mes si nos ta den e fe di acuerdo cu Scritura Santo. Esey ta nifica cu nos no por depende ariba e fe di un otro persona pa nos salbacion y bida eterno. Nos no por depende ariba e fe di nos mayornan pa nos drenta e Reino di Cielo. Un esposa no por depende ariba e fe di su esposo pa su salbacion. Cada uno di nos lo duna cuenta di su mes na Dios. Lesa sin falta Rom. 14:1-23. Ey nos ta lesa masha cla cu cada un di nos lo duna cuenta di su mes na Dios. Lesa tambe den e buki di Rebelacion 20:12-15, of lesa henter e capitulo ey. Ey nos ta lesa lo siguiente: “Y mi a mira e mortonan grandi y chikito para dilanti di e trono, y bukinan a wordo habri.Un otro buki a wordo habri cual ta e buki di bida. E mortonan a wordo huzga di acuerdo cu loke nan a haci manera e ta scirbi den e bukinan.” Anto e versiculo 15 ta conclui bisando, “Si cualke persona su nomber no a wordo haya scirbi den e buki di bida, el a wordo tira den e tanki di candela." Lesa pa bo mes Rebelacion 20:11-15. Pone atencion cu aki ta tur ser humano ta inclui. Y esey ta nifica simplemente cu tanto e riconan y e pobernan lo ta presente. Ey lo ta presente esunnan cu tabata emperadornan, of reynan, of presidentenan, specialistanan, miyonarionan, cientificonan, etc., etc. P’esey, O stimanan, e ta asina importante pa cada uno di nos examina nos mes si nos ta den e fe , si of no. Corda esaki bon. E no por ta si y no na e mes un tempo. E ta esun of e otro. Sea cu nos ta den e fe, of sea cu nos no ta. Awor por bin e pregunta aki: KICO den “E FE” ta nifica? Ta di cual religion e ta papiando aki? Amigonan stima pa Señor Su mes; aki e no ta papiando di ningun religion. Pero aki e ta papia di e fe personal den Cristo Jesus nos Señor. Scritura ta enfatisa e berdad aki bisando nos lo siguiente: “Y no tin salbacion den ningun otro, pasobra bao di cielo, no tin otro nomber duna na hende, pa medio di cual nos mester wordo salba.” Lesa pa ehempel: Echunan 4:8-12. Amigonan di tur edad; sea sigur cu e loke e Apostel Pablo a proclama mas cu dos mil añanan pasa, ta keda mescos te awe. E berdad ta keda, cu ta fe den Cristo solamente ta salba nos. Y ta solamente den Cristo nos ta scapa e rabia husto di Dios. Sea huicioso, y scapa awe mes dor di repenti y pone bo fe den Cristo nos Salbador. Esey ta unda nos mester examina nos mes, hacienda nos mes e pregunta: Mi a repenti di picanan y deposita mi fe di henter mi curason den Cristo? Sea sigur amigonan, y sea masha sigur; cu pordon di picanan, y bida eterno ta haya solamente den Cristo. Tur e profetanan for di principio di historia humano, a testifica tocante nos Señor y Salbador Jesus, e Yiu di Dios. SEA SABI Y REPENTI AWE, Y PONE BO FE DEN DJE.