Friday, March 16, 2007

Santa Sena i Boutismo

SANTA SENA I BOUTISMO

Un persona, via email, ta hasi e siguiente pregunta:

UNDA DEN SKRITURA TA PARA SKIRBI, KU SI UN HENDE NO TA BATISA, E NO POR TUMA SANTA SENA?
Amigo i Amiganan: e pregunta aki ta parse fásil, i kisas pa hopi siñadornan, si e ta fásil. Pero nos mester tene kuenta ku den e historia di e berdadero Iglesia di Kristu, semper tabatin problema riba e dos doktrinanan aki. Pa e motibu ei, nos no ta bai pretendé ku nos lo resolve e problema ei un bes i pa semper.

Promé, e doktrina di Boutismo: For di nasemento di e Iglesia, esunnan ku a kere e Evangelio prediká door di e Apòstel Pedro huntu ku e otro apòstelnan; a wòrdu batisá. (Lesa Echunan 2:36-41) Esunnan ku a kere e Evangelio riba e dia ei tabata Hudiunan.

Pero mas despues, e mes un Apòstel Pedro den un vision, a risibí e mandato for di Señor via e Spiritu Santu, pa e bai serka un Senturion Romano ku e mensahe. Aki un grupo di no Hudiu, a tende e Evangelio i ku yudansa di e Spiritu di Dios, a kere. Anto Pedro a ordená nan pa sea batisá den e nòmber di HesuKristu. (Echunan 10:34-48). Basá ariba e Skrituranan aki, i varios otronan, nos por bisa, ku un persona ku kere e Evangelio di akuerdo di Skritura (mira Romanonan 10:1-15) no mester keda sin batisá. I ta pa e motibu ei, ku lidernan spiritual den iglesianan ta vigilá pa nan miembronan, no solamente tokante Santa Sena, ma tambe den tur otro doktrina ku ta sano.

Pero bolbiendo na e doktrina di boutismo, segun Skritura, e ta un símbolo di nos union ku Kristu Su morto i Su Resurekshon. Si un persona NO ta kere e Evangelio di gracia di Dios, pero toch e ta wòrdu batisá, su boutismo lo no salb’e di piká i kondenashon.

Un pekador ku tende e Evangelio i e komprend’e, i e kere ku henter su kurason, ta risibí for di e momentu ei, tur e bendishonnan spiritual ku ta den esei. Meskos e ta ku Santa Sena. (Lesa 1 Korintionan 10:14-22, i tambe 1 Korintionan 11:23-29). Aki nos por mira ku Santa Sena ta direktamente relashoná ku e Sakrifisio di nos Señor HesuKristu. (Lesa tambe Romanonan 6: 1-14.)

Si bo tin pregunta ainda,òf otro pregunta i komentario, sinti liber pa skirbi. Danki pa esnan ku a skirbi. Nos adres ta: bbhenriquez@shaw.ca
Skirbí i prepará pa Bicento i Betty Henriquez

Wednesday, March 14, 2007

DIABIERNA SANTO I PASCO GRANDI

DIABIERNA SANTU

Awe e mensahe ta bai relashoná ku Diabièrna Santu. Esaki ta un dia riba cual nos Señor JesuKristu a wòrdu matá riba un krus despues di a wòrdu rechasá pa e kabesantenan religioso di e Hudíunan e tempu; i El a wòrdu maltratá, i bofoná i umiliá i entregá na e pagánunan ku tabata gobernando e tempu. Nos no ta bisa ku ta robes pa recordá e dia ei, ku sin duda tabata un dia úniku den henter historia di humanidat.

Ma loke si nos kier spierta nos ko-siudadanonan di abla Papiamentu, i tur otro hende, ta e posibilidat di ta selebrá e dia aki manera ora ku nos ta rekòrdá un defuntu. E berdat ta, ku Hesus e Yiu di Dios a wòrdu lantá for di morto na di tres dia, i despues di esei Dios, e Tata, a hals’E te den halturanan, i a dun’E e nòmber ku ta ariba tur nòmber sea den shelu òf ariba tera. I ku pa e Nòmber di Hesus tur rudia lo dobla i tur lenga lo konfesá ku Hesus ta Señor pa Gloria di Dios, e Tata.
(tuma tempu pa lesa Filipensenan 2::5-11, i tambe den Evangelio di Juan, Kapítulonan 18, 19, 20 y 21- kuatro kapítulo - pa un relato kompletu tokante Su sufrimentu morto i resurekshon.)

Kico e lo yuda nos pa rekòrdá Hesus Su morto riba Diabièrna Santu, pero nos no a repentí di nos bida di piká pa kual El a muri riba e krus? Si nos no repentí i kere i obedesé e Evangelio di grasia di Dios; nos selebrashonnan di Diabièrna Santu i Pasku di Resurekshon, lo no yuda nos na nada.

Alkontrario, nan lo sirbi como testigu kontra nos pa un kondenashon mas pisá. P’esei nos ta roga den nòmber di Señor nos Dios i Tata,na kada persona ku ta lesando esaki, pa sea rekonsiliá ku Dios awe, pasobra El a hasi Esun ku no a konosé piká bira piká pa nos, pa nos por bira e hustisia di Dios den djE. (Lesa 2 Korintionan 5:14-21).

Amigo i amiganan, si bo ta den duda, lesa e Skrituranan menshoná ku tur respèt den presensia di Dios, i pidi E, ku bo mes palabranan, pa e yuda bo obedesé i aseptá e pordon i Bida Eternu ku ta ofresí aki.

Si bo a obedes’é e invitashon aki di parti di Señor Su mes, òf bo ta keda ku pregunta, anto skirbi nos libremente na e direkshon aki: bbhenriques@shaw.ca
Prepará pa Bicento & Betty Henriquez

Corda: Bo por haya Beibel na St Thomas #19, Boekhandel Evangelico,Kòrsow y na Bonieru na Den Statie #2

PASCO DI RESURECCION

Miho conoci como “PASCO GRANDI”, esaki ta e dia cu Cristianismo ta recorda e resureccion di nos Señor for di morto riba un crus. E resureccion di Jesus for di morto ta un parti indispensabel di e Evangelio cu nos ta proclamando den henter mundo. Igual cu Su bida sin pica y Su morto riba e krus.

Durante Su bida den un curpa humano. Señor Jesus a wordo tenta den tur cos mescos cu nos, pero sin pica of sin haci pica. Ta imposibel pa nos splika e sufrimento di nos Señor, ora cu El tabata wordo tenta pa haci pica. Beibel ta bisa nos cu El a sufri ora cu E tabata wordo tenta. Tambe Beibel ta bisa nos cu E no a comete pica, y cu mentira no a wordo haya den Su boca. Beibel ta bisa nos tambe cu E mes a carga nos picanan den Su mes curpa ariba e crus.

Amigonan, considerando e Scrituranan aki, y hopi otronan mas, nos mester realisa e importancia di Su resureccion. Beibel ta bisa cu si E no a resucita lo nifica cu ainda nos ta den nos picanan, y cu tur e keredornan cu a muri keriendo den Jesus, tambe ta perdi. Si Cristo no a resucita, anto nos cu ta wordo yama keredornan, ta esunnan cu mas tin mester pa hende compadece di nan. Pero, danki na nos Tata Celestial; Cristo a wordo lanta for di morto, y El a bira e prome fruta di esunnan cu ya a muri. Ta nifica cu mescos cu Cristo a wordo lanta for di morto door di e poder di e Tata; mescos cada uno di nos cu a repenti di nos picanan y a confia den Cristo pa pordon di picanan, un dia lo resucita for di morto door di e mes un poder cu a lanta Cristo for di morto – esta e Tata.

(Lesa sin falta Efesionan 1:15-23 Y Colesensenan 2:12-15 y 1 Tes. 1:8-10, y 1 Pedro 1:3.. Lesa prome Corintionan completo y lesa e scrituranan aki hunto cu oracion y cu calma.)

Si algun di boso tin pregunta, of un of otro observacion, scirbi nos na e direccion aki: bbhenriquez@shaw.ca Nos kier expresa nos gratitud pa tur esnan ya a tuma kontacto cu nos. Nos ta aprecia esey!
Prepara pa Bicento y Betty Henriquez

*Corda cu bo por haya Beibel y tractadonan na Papiamento na Libreria Victoria,
Elleboogstraat 25,
Aruba

Thursday, March 1, 2007

SCOGEMENTO Y CUARESMA



Bon dia Amigonan i amiganan ku ta bishitá nos Blògspot!

Danki pa tur e kartanan ku nos a risibi! Nan tabata di enkurashamentu pa nos. No lubida di bes en kuando sigui skirbi nos, i duna nos boso ideanan, komentarionan, sugerensianan, boso kritika konstruktivo, etc. Bo tin un pregunta? Libremente skirbi nos i laga nos sabi di esei. Nos lo trata di kontest’e for di Skritura.

E mensahe pa awe ta tokante SKOHEMENTU. Kada dia di nos bida, nos ta hasi un òf mas skohementu:
Kua bisti nos lo bisti?
Ki kuminda nos lo kome?
Unda ku unda nos lo bai?
Tambe tin skohementunan mas importante, manera: Skohementu di un estudio pa un bon trabou despues,òf e skohementu di un esposa, etc. etc.
Ma finalmente tur e skohementunan ei tin nan final. Ora ku morto bini, tur loke un persona a logra den e mundu aki, mester keda atras; nos no por hiba nada ku nos.

Pero nos tin Bon Notisia pa tur hende, ken ku bo por ta. Den e Buki di Deuterónomio 30:19 Moises poko promé di su morto a bisa e Israelítanan lo siguiente: “Awe mi ta yama shelu i tera komo testigu kontra boso, ku mi a pone boso dilanti bida i morto, bendishonnan i maldishonnan. Awor skohe bida pa asina boso i boso yiunan por biba.”

Poko despues di a hasi e deklarashon aki, Moises, e sirbidor di Dios a muri, y su graf a keda deskonosi. Pero den Testament Nobo nos ta lesa di unu ku ta mas grandi ku Moises, esta nos Señor JesuKristo, e Yiu di Dios. Y den e Evangelio di Juan Kapítulo 14 y versíkulo 6; kontestando e pregunta di unu di e Apòstelnan.

El a bisa lo siguiente: “Ami ta e kamina, berdad i bida. Ni unu ta bini serka e Tata eksepto dor di Mi.” (NIV)

Amigonan i amiganan, esaki ta algu ku ni morto por kita di esun ku tin e. Bida eterno ta únikamente den Kristo. Pero p’esei a bira pusibel, E mester a muri pa nos pikánan, i wòrdo lantá for di morto dor di e Tata.

I awe nos ta pone bo dilanti, BIDA i MORTO. Skohe e bida eterno aki pa bo por biba sin tin mester di tin miedu di morto. Den Juan 11:25 Señor Hesus ta bisa: “Ami ta e Resurekshon i e Bida. Esun ku kere den Mi lo biba, aunke ku e muri; i ken ku biba i ta kere den Mi lo no muri nunka.”

Esaki no ta nos idea, pero ta e Palabra di Dios dirigí na bo. SKOHE ANTO E BIDA ETERNO AKI KU TA OFRESI NA NOS TUR COMO BON NOTISIA FO’I DIOS.
Scirbi y prepara pa Bicento y Betty Henriquez

Un Rekòrdatorio chikito: kòrda ku boso por buska Bijbel, traktadonan i otro material na nos dushi idioma Papiamento na:

Libreria Victoria,
Elleboogstraat 25,
Oranjestad, Aruba, Dutch Caribbean
Boekhandel Evangeliko, (Tel:747.6997)
St. Thomas #19,
Curacao, Netherlands Antilles

Na Cas di:
S. Cicilia,
Den Statie #2,
Antriol, Bonaire, Netherlands Antilles

CUARESMA

Amigonan y Amiganan, awe nos ta bai purba comenta tocante Cuaresma cu ta algo hopi conoci den Antiyas y Aruba, y tambe den nacionnan cu ta papia Casteyano.

Kico Cuaresma ta? E ta un periodo cu ta cuminsa ariba Diarazon di Shinishi, y ta termina riba Pasco Grandi. Pues, ta un forma di celebracion religioso cu ta envolvi miyones di sernan humano.

Nos proposito awe ta pa compara e celebracion aki cu loke Scritura ta siña. Segun e siñansa tocante Cuaresma ta, cu Diarazon di Shinishi ta cuminsamento di un periodo di penitencia y yunamento como un señal di repentimento y duele pa picanan cometi den e tempo cu a pasa. Anto tabatin e custumber cu durante e dianan di cuaresma, esunnan cu ta fiel ta nenga nan mes di cosnan cu otro dianan si tabata permiti. Ehempel: bistimento di pañanan luhoso, fiestanan cu baliamento, comemento di carni riba diabierna y mas.

Pero kico Beibel mes ta siña tocante di Cuaresma? Cu tur respet pa tur hende, nos contesta ta: cu e siñansa ey no ta ser haya den Scritura. Loke si ta skirbi den Beibel ta lo siguiente: “Den tempo cu a pasa, Dios a pasa por alto sorto di ignorancia asina, pero awor E ta manda tur hende na tur parti pa repenti. Pasobra El a stablece un dia cu E lo huzga e mundo cu husticia pa medio di e Homber cu El a apunta. El a duna prueba di esaki na tur hende door di lant’E for di morto.” (Lesa Echunan 17:29-31)

Amigonan, tanto e Scritura aki y hopi otronan ta siña nos, cu nos no mester di un cierto periodo cada aña, pa nos castiga nos propio curpa, y pretende cu nos tin duele pa nos picanan keriendo cu esey lo hustifica nos dilanti di Dios . E mandato di Dios na tur hende di mundu ta pa repenti awe mes y kere Evangelio cu ta e bon nobo di pordon pa bida eterna na tur cu kere. Castigando nos curpa no por kita nos picanan, pasobra pordon di picanan ta wordo obteni solamente pa medio di fe den Esun cu a ricibi e castigo cu nos a merece den Su curpa ariba e Crus. Y Dios a lant’E for di morto, pa nos fe y confiansa por ta den Dios, y nunca den nos propio obranan. (Lesa Efesionan 2:1-10, y tambe Tito 2:11-15).
Scirbi y prepara pa Bicento y Betty Henriquez

Bo tin pregunta riba e topico aki di Cuaresma of di cualke otro topico? Scirbi nos awe mes. Nos lo purba contest’e for di e Scrituranan.

Nos adres ta:
Via Post:
Bicento y Betty Henriquez,
#534, 120 La Ronge Road,
Saskatoon, SK., Canada. S7K 7Z9

Via Email
bbhenriquez@shaw.ca
Nos ta aprecia cualke comentario of sugerencia ariba nos articulonan.