Sunday, May 26, 2013


Siman pasa nos tabatin e privilegio di bai Bonaire - nos isla Hermana, unda ami, Betty a traha di 1982-1997. Ki dushi e tabata pa mira hopi rumannan stima di antesnan, di nos mes edad, cu ainda ta na bida! Tambe hobensitanan cu awor ta lidernan den iglesia y ta camna fiel y firme den Senjor - manera e foto ta mustra. Ki un bendishon! Danki na un y tur cu ta bishita nos blog! Manda nos un comentario of encurashamento na:  cjwmitesoro@gmail.com  MA AWOR PA NOS MENSAHE CORTO FOR DI E PALABRA DI DIOS - lesa poco poco y cu hopi atencion!

E CAIDA

Beibel ta cuminsa cu e siguiente declaracion aki: “Na e principio Dios a crea e cielonan y e tera. Y e tera tabata (of: a bira) sin forma y bashi, y scuridad tabata riba e superficio di e abismo, y e Spirito di Dios tabata move ariba e awanan.”  Anto ta sigi cu e creacion di lus, y di e gran laman, di e gran continentenan, etc., etc.

Pa un mihor splicacion tocante e creacion, nos mester lesa Genesis, Capitulo uno y dos.  Anto den e Capitulo tres nos ta haya e relato tocante di e caida den pica dor di Adam.  Asina anto, e caida cu a causa e drentada di pica, tabata dor di un persona, y asina morto tambe a bini pa tur hende, pasobra tur a peca. Pues, e motibo pakico nos ta comete pica, ta pasobra nos tur ta nace cu e naturalesa pecaminoso ey menciona den Scritura. Y esaki ta berdad pa tur humano, y no ta importa di cual nacion, ni di color. Y no ta importa si nos ta bisti cu bisti religioso of no. E berdad ta keda cu no tin tin ni sikiera un solo persona den henter nos mundo, cu nunca ta peca.  Pero, nos no ta scirbi esaki pa encurasha hende pa sigui biba den pica. Pero nos ta haci loke ta e boluntad di Señor nos Dios y Tata Celestial. Y esey ta, pa tur hende aki den Antiyas y den henter mundo por sabi cu e Yiu di Dios, esta nos Señor Jesus Cristo a carga nos picanan den Su curpa ariba e crus, pa nos libra di picanan por biba pa husticia; pasobra ta pa medio di Su heridanan nos a wordo cura. Segun Scritura, asina pronto cu Adam a desobedece  Dios, pica a drenta den mundo. Y hende a bira corompi, cu e Señor a dicidi pa caba cu henter sivilisacion pa medio di un deluvio. Pero un persona yama Noë y su famia a scapa pa motibo cu Noë tabata un hende cu fe den Dios. Lesa Hebreonan 11:7. Y den 2 Pedro 2:5 nos ta lesa, cu Noë  tabata un predicador di husticia. Siendo asina ta nifica cu tabatin den e hendenan cu a muri den e deluvio, esunnan cu a tende Noë predica tocante husticia, pero nan no a haci caso.

Nos a caba di yega for di un biahe di siete dia na e bunita isla di Bonaire. Y nos ta gradicido na Señor pa e keredornan cu tin ariba e isla ey. Pero te ainda ta keda e mayoria cu no ta hasi caso di e Palabra. Y ta sigui biba net manera cu Señor Jesus no ta existi mes.  Mescos e ta aki na Aruba, y tambe na nos isla ruman di Curaçao. Ya ta mas cu sesenta añanan cu e Evangelio di gracia di Dios, ta wordo proclama den e tres islanan ruman aki.

E ta tempo pues, pa nos lanta fo’i soño encluyendo esunnan cu a profesa di a kere un tempo, pero cu ta bibando un calidad di bida cu ta contrario di e bon boluntad di nos Tata Celestial, revela masha cla mes den Scritura. Cu e spiertamentonan aki, e no ta nos proposito pa halsa nos mes como mihor cu otronan. Pasobra mescos cu tur nos rumannan stima rond mundo, nos ta den e lucha diario. Y corda bon,  rumannan stima pa Señor Su mes, cu nos lucha no ta contra un y otro. Of manera Scritura ta bisa nos, cu: Nos lucha no ta contra carni y sanger, sino contra e gobernantenan, contra e podernan, contra e forsanan mundial di scuridad, contra e forsanan spiritual di maldad den e lugarnan celestial.  Lesa Efesionan 6: 10-18.

Pone bon atencion cu lucha contra e gobernantenan no ke men nos gobernantenan civil, sino e gobernantenan satanico cu ta invisible pa sernan humano, pero no pa Señor. P’esey cu nos mester tuma of sea cu nos mester bisti e armadura completo di Dios, pa nos por risisti den e dia malo, y despues di a hasi tur cos, para firme., etc. 

E ta intersante y importante cu Señor Jesus ta wordo yama e “e ultimo Adam”.  Pues, tabatin e prome Adam di cual nos ta lesa su historia den Genesis, Capitulo dos y tres. Ma tocante Señor Jesus presenta como e ultimo Adam, nos ta haya den 1 Corintionan 15:45-49.  Actualmente e curpa cu nos tin, ta relaciona cu e prome Adam cual a wordo forma for di e stof di tera. Pero un dia cada uno di esunnan cu ta kere di curason den nos Señor JesuCristo, lo tin un curpa manera esun di djE.

Y e increibel transformacion aki lo tuma lugar den un instante ora cu nos Señor lo bolbe pa busca nos. Cua nos? Cada persona cu a repenti y kere e Evangelio di henter su curason. O, sea obedecido awe, si bo ta uno cu pa prome bes ta tende y comprende e berdad di e Evangelio.  Corda bon kico Scritura ta bisa nos: KEN CU INVOCA E NOMBER DI SEŇOR, LO TA SALBA.
E fotonan no kier a traslada di mi fotonan! Lo mi busca yudansa y bolbe purba y pone nan otro biaha! Sorry! E cabes aki cu a pensa pa 86 anja ta cansa y no por cu e tecnologia avansa di awe!!  Te otro biaha - corda manda nos un email!  Betty

Saturday, May 11, 2013


 Poco dia pasa nos a pasa algun momentonan masha dushi na parti zuid di nos isla! Ki bunita e naturalesa ta eybandanan. Ami, Betty, ta asina gradicido na Senor cu mi por camna bon atrobe, sin dolor; despues di dos operacion di huep den dies luna for di otro y hopi terapi, mi por camna na canto di laman sin problema!  Si Dios permiti, Dialuna mainta Bicento y ami lo biaha pa Bonaire, unda ami, a traha pa 17 anja y Bicento y su prome esposa, Ursula a bai varios biaha, pa Bicento predica den e iglesianan ey, pues nos tur dos tin hopi amigonan y rumannan ey! Ma nos lo hospeda serca dos famia. Lo ta manera un "ayo" na nos isla stima, pasobra probablemente lo nos no por biaha mucho mas, deber di nos edad halto! Wel, nos kier biahe ey, mientras ainda por!
Sigui awor cu nos pensamentonan for di Scritura tocante loke e ta bisa nos di "E DIA DI SALBACION"

Dia tras dia nos por tende of lesa di almanan precioso cu ta muri di un of otro manera.  Algun ta muri na edad halto despues di un tempo di enfermedad.  Otronan ta muri na edad mediano of otronan siendo hoben ainda. Hopi ta muri inespera via atake cerebral of di curason. Otronan ta via accidente, sea causa pa nan mes culpa, of pa culpa di otro. Masha hopi hende ta muri via crimen, etc., etc.

Scritura ta spierta cada uno di nos, na e manera aki: “Hende ta destina pa muri un bes, y despues di esey pa enfrenta huicio (of sea huzgmento)”. Amigonan di tur edad; con cu nos mir’e, y con cu nos bir’e ; aki tur hende di mundo ta enclui. No ta importa di ki nacion, of di ki color, of sea homber of mohe. Pasobra e Palabra di Dios ta enfaticamente cla, cu morto ta bini pa cada uno di nos. Pero nos mester gradici nos Tata Celestial cu e declaracion tocante morto y e huicio cu ta sigui, no ta stop eynan. Pasobra e ta sigui bisando:  Asina, Cristo tabata sacrifica un bes so, pa kita e pica di hopi hende; y E lo aparece pa di dos bes; no pa carga pica, ma pa trece salbacion na esunnan cu ta sperando p’E. Lesa sin falta Hebreonan Capitulo Nuebe.

Y e proposito pa lesamento di e Scritura menciona ta, pa nos por yega na e conclucion cu tur e promesanan di mas precioso cu nos ta haya den Beibel, ta dirigi na cada uno di nos, den henter mundo. Y si un di nos desprecia e increibel declaracionnan ey, no ta hende nos ta desprecia, sino Señor Su mes, Kende no a spaar ni Su unico Yiu, ma El a dun’e pa cada uno di nos. Y den un caso asina ta esun cu rechasa e gran salbacion aki, lo enfrenta condenacion eterno. Un otro porcion di Scritura cu ta spierta nos tocante e mes un berdad aki, ta den e Buki di Romanonan Capitulo Dies. Nos ta recomenda na cada persona cu ta lesa e mensahe aki, pa bo lesa e Capitulo Dies di Romanonan. Cuminsando cu e versiculo ocho, nos ta haya e contesta pa preguntanan hasi, of por wordo hasi.  Anto e ta bisa nos lo siguiente: Ma kico e ta bisa? “E palabra ta serca di bo; e ta den bo boca, y den bo curason, esey ta, e palabra di fe cu nos ta proclamando. Cu si bo ta confesa cu bo boca, “Jesus ta Señor”, y ta kere den bo curaso cu “Dios a lamt’E for di morto, bo lo ta salba. Pasobra ta cu bo curason bo ta kere, y ta hustifica, y e ta cu bo boca cu bo ta confesa y ta salba. Manera Scritura ta bisa, cada uno cu confia den djE, nunca lo wordo poni  na berguensa. Pasobra no tin diferencia meimei Judiu y Paganonan – e mes Señor ta Señor di tur, y ta bendiciona ricamente tur cu ta yam’E. Pasobra cada uno cu yama na e nomber di Señor, lo ta salba.”

Anto ta sigui e spiertamentonan solemne aki. Con un persona por sclama pa ayudo na uno den kende nan no ta kere?

Y aki amigonan y co-cuidadanonan, homber y mohenan di tur edad di comprendemento. Esaki ta realmente un problema grandi den henter mundo, encluyendo  nos aki den Antiyas Hulandes. Si un persona no ta pone Su fe den Señor Jesus, pa e por haya pordon di picanan; por tin dos motibo. Uno ta, cu e nunca a tende cu Jesus a biba, y a muri, y a resucita pa e por haya pordon di tur pica y bida eterno como promesa di Esun cu no por gaña. Y e di dos motibo ta; cu el a tende, pero pa un of otro excusa, e no tin interes. Sigur cu tin otro argumento tocante e dos puntonan ey. Pero pa e autoridad di acuerdo cu e Palabra di Dios, nos por bisa cu E EVANGELIO bendiciona di Señor, a wordo proclama duro y cla den e islanan aki pa hopi añanan. Tanto ta den campañanan unda e Evangelio a wordo proclama hopi cla mediante varios sirbidornan di Señor. Y tambe via literatura y testimonio personal di keredornan, etc., etc.

Y pa ultimo: Nos a caba di mira via Television e coronamento di un Rey. Practicamente henter mundo sabi cu awor cu Hulando tin un Rey. Y ya ta mas cu dos mil añanan cu e Evangelio di e Rey di Reynan ta wordo proclama den henter mundo. Sinembargo e mayoria rond mundo, incluyendo Aruba, NO ta reconoce e berdadero Rey cu tin e poder den cielo y ariba tera. P’esey nos ta haya e pregunta aki den Beibel, cual ta contesta su mes bisando: “Mira pa boso no rechasa Esun cu ta papiando cu nos for di cielo.” Lesa Hebreonan 12:25-28. Pasobra si e hendenan ey no a scapa ora cu nan a rechasa Esun cu a spierta nan ariba tera, con nos lo por scapa si nos bira lomba pa Esun Kende ta spierta nos for di cielo?

Wednesday, May 1, 2013


EXAMEN

Pasamento di examen ta algo comun den henter mundo; y na e mes un tempo hopi importante pa bienestar di tur hende den henter mundo. Dependiendo den cual rango di trabao un persona ta scohe, un estudio por tuma basta añanan y hopi sacrificio. Ma e tempo di mas importante ta e dia di examen y e resultado.
Pero den e mensahe simpel y cortico aki, nos kier presenta e examen di mas importante cu cada uno di nos mester haci prome cu ta laat. Y na un manera masha particular, e ta pa cada uno cu ta considera su mes di ta un Cristian.

E Apostel Pablo scirbiendo na e Iglesia di Dios cu tabata den Corintio, a comparti na nan (y nos awe) e doctrinanan cu ta valido awe pa nos, mescos cu e tabata pa e keredornan e tempo na Corintio y Achaia (Akaya). Nos ta combida cada persona cu ta lesa e mensahe cortico aki, pa bo tuma tempo pa lesa e dos cartanan aki scirbi na keredornan, mescos cu nos, na e Iglesia di Corintio. Y den e dos cartanan aki nos ta haya spiertamentonan y reprendementonan hunto cu e promesanan di mas precioso cu ta posibel.

Ma awor, e Apostel ta duna e rumannan den Cristo, of sea; tur cu ta bisa cu e ta un Cristian. (Algo similar cu tin aki na Aruba, Curaçao y Bonaire), e siguiente spiertamento aki: “Examina boso mes pa mira si boso ta den e fe; pone boso mes na prueba. Boso no ta realisa cu Cristo Jesus ta den boso – cu exepcion claro cu boso a faya e prueba?”

Amigonan y rumannan den Cristo; e spiertmento aki, cu e Apostel Pablo a scirbi na e Iglesia di Corintio mas cu dos mil añanan pasa, ta valido pa nos aki na e islanan di Antiyas mescos cu e tabata pa e Iglesianan na Conrintio e tempo.

Pone atencion na e posibilidad di no pasa e test. Anto e pregunta aki por bin, of sea cu algun hende por hasi e pregunta aki. Con mi por test mi mes? Tempo cu e Apostel a scirbi na e Corintionan, nan no tabatin un Beibel manera nos si por tin awe. Awe nos por examina nos mes lesando y scudriando Scrituranan. Por ehempel, nos por habri un Beibel, y lesa claramente cu: “Bou cielo no tin otro nomber duna na hende, ma medio di cual nos mester wordo salba.” (Echunan 4:12) Of, nos por lesa: “Pordon di picanan ta wordo proclama den e nomber di Señor Jesus.” Ademas nos ta lesa cu: “Sin repentimento, no tin pordon.” Anto hasi nos mes e pregunta: Mi ta kere cu di curason mi a repenti di tur pica, y a pone mi fe den Señor Jesus? Mi ta kere di henter mi curason, cu e Spirito Santo ta biba den mi for di e momento cu mi a kere den Señor Jesus?  Corda bon rumannan den e fe; cu e Apostel Pablo a  spierta e rumannan na Corintio, pa nan pone nan mes na prueba, y e mes un spiertamento ey ta valido pa nos awe, tanto ta aki na Aruba, como e otro islanan. Pone atencion cu e spiertamento na e Corintionan tabata pa nan examina nan mes, pa mira si nan ta den e fe, y pa nan purba of test nan mes, etc., (Lesa 2 Cor. 13:5-10)

Y un recordatorio na tur e rumannan, na unda parti cu cada uno por ta. Nos ta wordo spierta hopi cla den Scritura, cu den mundo nos lo tin afliccion, ma cu nos mester tin confiansa, pasobra Señor Jesus a vence e mundo. Di cual sorto di afliccion Scritura ta spierta cada uno di nos aki?

Nos ta combida cada persona cu lesa e mensahe corto aki, pa bo tuma tempo y lesa Juan Capitulo 17. Aki nos por lesa e oracion cu nos Señor a hasi net prome cu Su morto ariba un crus, pa Su sirbidornan e tempo, y pa nos cu ta keredornan awe. Anto pone atencion cuanto bes nos Señor ta menciona “E mundo”. Y aki esey no ta nifica e tera solamente, ma e habitantenan di e mundo, y particularmente, e sistema di mundo.

Kico ta e sistema di mundo? Esey ta inclui tur e sistemanan di bida cu te asta ariba e pida baranca aki cu yama “Aruba”, nos ta experimentando. E lucha pa rikesa y mas rikesa, bistimento of desnudes, etc., etc. Placer, y mas placer. Mientras cu e Spirito Santo ta spierta nos mediante Scritura cu: Si nos tin pa come y pa bebe y pa cubri nos curpa, laga nos sea contento cu esey. Pasobra esunnan cu kier bira rico ta cai den tentacion  y den trampa, y den hopi deseo loco y perhudicial cu ta hasi hende sink den ruina y destruccion. Pasobra e stimacion di placa ta un rais di tur sorto di maldad. Algun hende golos pa placa, a dwal of desvia for di e fe, y a traspasa nan mes cu hopi afliccion. Anto nos ta wordo spierta, cada uno di nos cu ta kere den nos Señor cu henter nos curason, pa nos hui for di tur e cosnan ey, y pa nos persigui pa husticia y reverencia pa Dios, y pa fe, amor y perseverancia, etc. (Lesa 1 Timoteo 6:1-16 sin falta). Pasobra e spiertamentonan ey ta pa cada un di nos como keredornan, pa nos examina nos mes.