Friday, February 22, 2008

Bida Eterno - y con pa hay'e.



Bida eterno? Y con pa haya esey? Mi ta admiti cu esaki ta un topico delicado y fo’i nos alcanse pa duna un splicacion fisical pasobra aki nos ta papia di algo spiritual, algo celestial. Y ta solamente un ser celestial por splica loke ta spiritual y celestial. Sinembargo mi por bisa cu tur confiansa cu aki den Antiyas tur hende a yega di tende di un of otro manera algo tocante bida eterno. Y mas cu esey, e mayoria di Antiyanonan tin aunke ta un tiki speransa di un dia despues di morto ricibi bida eterno.

Masha hopi di nos Antiyano a tende di esey den diferente forma. Nos a depende masha hopi mes ariba nos religion. Enbes di tende tocante bida eterno, nos a tende tocante baimento cielo. Tambe nos a tende cu prome cu nos bai cielo ora cu nos muri, nos alma mester kima un tempo largo den un lugar cu yama purgatorio. Tambe nos a siña cu durante e tempo ey cu nos ta den e candela pa ser purifica, nos por haya yudansa for di esunnan na bida si nan haci oracion pa nos etc., etc.

Awe, danki na e Señor, nos Dios y nos Señor y Salbador Jesus, mayoria di Antiyanonan tin un Bijbel den nan cas. P’esey nos ta combida bo den tur umildad, pa bo habri bo Bijbel y mira si e loke cu nos ta scirbi di dje aki ta di acuerdo cu e Scrituranan Santo, of cu nos ta papia for di nos propio ideanan, keriendo nos mes sabi.

Pa cuminsa, habri bo Bijbel y busca Hebreonan capitulo uno y cuminsa lesa for di versiculo uno unda e bisa lo siguiente: “Den tempo pasa Dios a papia na nos tatanan door di e profetanan na hopi ocacion y den varios manera, pero den e ultimo dianan aki, El a papia cu nos pa medio di Su Yiu, Kende El a nombra como eredero di tur cos, y dor di Kende El a traha e universo. E Yiu ta e resplandor di e Gloria di Dios, y e representacion exacto di Su caracter, sosteniendo tur cos pa medio di Su palabra poderoso. Despues cu El a proveë purificacion pa picanan. El a sinta na e man drechi di e Mahestad den cielo.”
Na cuminsamento mi a menciona cu ta solamente un ser celestial por splica nos y siña nos tocante bida eterna y con pa hay’e. Ata aki nos tin e Yiu di Dios Su mes dor di Kende Dios e Tata a papia cu nos.

Y awor mi ta pidi bo habri bo Bijbel y busca e Evangelio di Juan y lesa den e capitulo uno di versiculo uno te diescuater. Pone atencion con e porcion aki ta igual cu esun di Hebreonan capitulo uno. Tur dos porcion ta presenta e mes un siñansa, esta; cu Señor Jesus ta e representacion exacto di e Dios todopoderoso, y pa e motibo ey E ta e Autoridad di mas halto tocante bida eterna y con nos pecadornan por ricibi e bida eterno aki. Y cu nos por ricibi esey awe y awor, y cu nos no tin mester di kima den ningun sorto di candela pa nos por wordo purifica for di nos picanan. E siñansa ey tocante purificacion den candela no ta existi den Scritura, y e ta contrario di doctrina sano.

Den e Evangelio di Juan 3:1-21, nos ta haya e storia di un Fariseo cu a bini cerca Jesus den anochi pa haci E algun pregunta (Lesa esaki cu calma y oracion). Y den e versiculonan 12-18 Señor Jesus ta siña nos tocante bida eterno, y con pa tin esey. Aki Señor ta bisa nos, cu El a bini for di cielo, y cu E mester wordo halsa (esta halsa ariba un crus) pa ken cu kere den djE por tin bida eterno. Si nos compara e declaracion aki cu masha hopi otro Scrituranan, nos lo yega na e conclucion aki: e morto di Jesus ariba un crus, no tabata como castigo pa pica cu El a comete; pasobra E mes no a comete ningun pica, y ningun mintira a wordo haya den Su boca. Ma Su morto ariba un crus tabata pa e picanan di nos tur. El a carga nos picanan den Su curpa ariba e crus, pa nos por muri pa picanan y biba pa husticia; pa medio di Su heridanan nos a wordo cura. Aki e curamento ta inclui pordon di tur nos picanan cu nos a comete den nos ignorancia, y ademas nos ta ricibi e autoridad pa rechasa pica den nos bida presente segun otro Scrituranan ta siña nos.

Cualke pregunta tocante e topico di picanan den bida di un berdadero keredor lesa 1 Juan 1:5-10 y tambe 1 Juan 3:4-10), of scirbi nos na e direccion di e programa aki -bbhenriquez@shaw.ca Bolbiendo na e topico di Bida Eterno y con pa hay’e, ta increibel con cla y persistente e Palabra di Dios ta tocante esey. Di acuerdo cu Scritura, bida eterno ta ofreci na tur hende den e mundo aki, dor di kere den e Yiu di Dios cu a wordo mata ariba un crus unda El a drama Su sanger pa e pica di mundo. Lesa por fabor e siguiente scrituranan aki: Romanonan 3:21-26 y Romanonan 5:6-11. Lesa nan cu oracion sincero den bo curason pa e Spirito Santo di Dios yuda bo pa comprende y pa bo repenti y pone bo fe den Esun cu a duna Su bida pa E trece nos serca Dios. Nos lo continua cu e mensahe aki si Señor permiti. Pa Bicento Henriquez

Tuesday, February 12, 2008

DIOS SU PROMESANAN - pa cu nos preguntanan!




1. Tin consuelo den oranan di descurasamento?
“Ora bo ta pasa dor di e awanan lo Mi ta cu bo, y dor di e riunan, nan lo no lastra bo bai ku bo. Ora bo ta cana dor di candela, esaki lo no flamabo, ni e flam lo no kima bo.” Isa. 43:2

“E cosnan aki Mi a papa cu boso, pa den Mi boso por tin pas. Den mundo boso lo tin tribulacion, ma tene curashi. Mi a vence mundo.” Juan 16:33

“Pasobra tur loke ta naci di Dios ta vense mundo; y esaki ta e victoria cu a vence mundo – nos fe. Y ta ken ta esun cu ta vense mundo, si no ta esun cu ta kere cu Jesus ta e Yiu di Dios?” 1 Juan 5:4-5.

2. Unda mi por haya guiansa cierto den temponan difisil di confucion manera tin awe?


“Lo Mi instrui bo y siña bo e caminda cu bo tin cu camna; lo Mi conseha bo; Mi wowo ta riba bo.” Salmo 32:8

“Pasobra e Dios aki ta nos Dios; pa semper y semper E lo guia nos te na morto.”
Salmo 32:8

“SEÑOR guia bo continuamente, y lo satisface bo deseo den lugarnan kima dor di solo, y duna forsa na bo wesonan; lo bo ta manera un hofi bon muha, y manera un fuente di awa cu su awanan no ta caba.” Isaias 58:11

“Ningun tentacion fuera di loke tur hende ta pasa aden, no a bin riba boso; y Dios ta fiel y lo no permiti pa boso wordo tenta mas cu boso por soporta, ma hunto cu e tentacion E lo proveë salida tambe, pa boso por soporta.” 1 Corintionan 10:13

3. Por tin pas den temponan di problemanan y afliccionnan?

“Pasobra Mi sa e plannan cu Mi tin pa boso, SEÑOR ta declara, ‘plannan pa nos y no pa calamidad, pa duna boso un futuro y un speransa.” Jeremias 29:11

“SEÑOR ta bon, un lugar fortifica den e dia di angustia y E conoce esnan cu ta tuma refugio den djE.” Nahum 1:7

“Pas Mi ta laga cu boso; Mi pas Mi ta duna boso; no manera mundo ta duna, Mi ta dun boso. No laga boso curason bira intrankilo, ni lagu’e tene miedo.” Juan 14:27

4. Unda mi por haya curashi den tempo di miedo?

“Sea fuerte y tene curashi, no tene miedo ni tembla pa nan, pasobra SEÑOR bo Dios ta Esun cu ta bai cu bo. E lo no faya bo ni bandona bo.” Deuteronomo 31:6

“E nomber di SEÑOR ta un toren fuerte; e husto ta core drenta den dje y ta sigur.” Proverbionan 18:10

“No tene miedo, pasobra Mi ta cu bo; no desmaya, pasobra Mi ta bo Dios. Lo Mi fortalese bo, si, lo Mi sostene bo cu Mi man drechi di husticia.” Isaias 41:10

5. Tin posibel pa tin forsa den ora y tempo di debilidad?

“Mira, Ami ta SEÑOR, e Dios di tur carni; acaso tin algo cu ta mucho difisil pa Mi?” Jeremias 32:27

“Jesus a bis’e: ‘Si, bo por! Tur cos ta posibel pa esun cu ta kere.” Marco 9:23

“El a bisa mi, ‘Mi gracia ta basta pa bo, pasobra Mi poder ta wordo haci perfecto den debilidad.” 2 Corintionan 12:9

“Tur cos mi por den Cristo, Kende ta duna mi fortalesa.” Filipensenan 4:13

“Mi Dios lo proveë tur loke boso tin mester, segun Su rikesa den gloria den Cristo Jesus.” Filipensenan 4:19

6. Tin pordon pa pica?

“Mes leu cu pariba ta cu pabou, mes leu El a aleha nos transgresionnan for di nos.” Salmo 103:12

“Bin awor, y laga nos rasona hunto, SEÑOR ta bisa. Maske boso picanan ta manera scarlata, nan lo bira blanco manera nieve, maske nan ta cora manera scarlata, nan lo bira manera lana.” Isaias 1:18

“Sabiendo cu boso no a wordo redemi cu cosnan cu ta perece, manera plata of oro, for di boso manera bano di biba cu boso a ereda di boso antepasadonan, ma cu sanger precioso, como di Lamchi sin defecto y sin mancha, e sanger di Cristo.” 1 Pedro 1:18,19

“Si nos confesa nos picanan, E ta fiel y husto pa pordona nos picanan y pa limpia nos di tur inhusticia.” 1 Juan 1:9

7. Con mi por sabi sigur cu mi por tin bida eterno despues di morto?

“Di berdad, di berdat, Mi ta bisa boso, esun cu tende Mi Palabra y kere Esun cu a manda Mi, tin bida eterno, y no ta bin na huisio, ma a pasa for di morto pa bida.” Juan 5:24

SABAT -#2




E PREGUNTA TABATA: Con importante e Sabat ta pa awendia? Y kico nos ta considera como e dia di Sabat? Diasabra of Domingo, y di con?
Den Mateo 12:8, Señor Jesus ta declara cu E ta e Señor di Sabat. Siendo cu ta asina, nos por ta sigur cu e Señor siendo Doño di e Sabat, ta e autoridad pa splica tocante e dia aki. Manera ya mi a menciona den e prome mensahe, e Ley tabata duna na e puebel di Israel, y cu e Sabat tabata uno di e mandamentonan di e Ley.

E Ley tabata un unidad, di manera cu e cumplimento di uno di e mandamentonan solamente, no tabata basta. Esun cu faya den un a faya den tur. Ehempel: si un persona ta obedece e Ley di Sabat fielmente den tur su detayanan, ma e mes persona aki no ta stima su prohimo mescos cu su mes curpa, su wardamento di e Sabat lo no hustific’e dilanti Dios.

Un cos sigur ta, cu e Apostel Pablo a splica e asunto di Ley hopi cla mes. Y e dia di Sabat ta inclui. Lo tuma hopi espacio pa nos descuti detayadamente tocante wardamento di e Ley di Moses, den cual e dia di Sabat ta inclui. P’esey mi ta conseha na cada persona cu tin hamber y sed pa e Palabra di Dios, pa bo lesa e Buki di Romanonan y e buki of sea e carta scirbi na e Galationan cu ta papia masha cla mes tocante LEY y GRACIA.

Ata aki un ehempel: Den Galationan 3:10-14 nos ta lesa lo siguiente, “Maldiciona ta cada uno cu no ta continua pa haci tur loke ta scirbi den e buki di ley.” Claramente ni un ta hustifica dilanti Dios pa medio di e ley, pasobra e husto lo biba pa medio di fe. E Ley no ta basa ariba fe; alcontrario, e hende cu haci e cosnan aki lo biba pa medio di nan. Cristo a redimi nos for di e maldicion di e ley dor di a bira un maldicion pa nos, pasobra ta scirbi “Maldiciona ta cada uno cu a wordo colga na un palo.” El a redimi nos pa e bendicion duna na Abraham por bini na e paganonan (no-Judiunan) dor di Cristo Jesus; di manera cu pa medio di fe nos por ricibi e promesa di Spirito.”

Medita ariba e palabranan ey amigo y amiganan di tur edad. Pero, nos mester tene bon na cuenta cu Salbacion pa gracia apart di e Ley no ta nifica cu e persona cu ta kere di curason den nos Señor JesuCristo, y asina ricibi pordon di picanan y bida eterno, y ademas tur e bendicionan spiritual for di cielo, incluyendo e Spirito Santo como garantia y tambe como guiador y consehador, cu e persona aki, no tin mester di obedece e mandamentonan. Alcontrario! Señor Jesus pa medio di Su Sacrificio haci un bes y pa semper, a haci e posibel pa cada uno cu ta kere e Evangelio hiba un bida victorioso cu ta inclui e Ley completo. Galationan 5:13,14,22,23 yRomanonan 13:8-10.

Prome cu Señor Jesus a wordo entrega den man di hende, pa nan haci cu nE tur loke tabata para scirbi di djE den e Ley di Moses y e profetanan y e Salmonan, El a duna un SOLO mandamento na e Apostelnan. Y esun mandamento aki ta inclui tur otro mandamento. Ta berdad cu e mandamento aki tabata inclui den e 10 mandamentonan, pero e tepo ey e Spirito Santo no a wordo duna, pasobra Jesus no a wordo glorifica ainda. Lesa Juan 7:37-39 y Echunan 2:22-36.

E mandamento cu mi ta referi na ne ta haya den Juan 13:34,35 unda Señor Jesus a bisa na e Apostelnan lo siguiente: “Un mandamento nobo Mi ta duna boso: stima un y otro. Manera Ami a stima boso, asina boso mester stima un y otro. Tur hende lo sabi cu boso ta Mi discipelnan si boso stima un y otro. E mes Apostel cu tabata hunto cu Jesus na e momento cu El a duna na nan un mandemento nobo, a scirbi den 1 Juan 3:21-24, lo siguiente: “Stimanan, si nos curason no ta condena nos, nos tin confiansa dilanti Dios y ta ricibi for di djE kico cu nos pidi, pasobra nos ta obedece Su mandamentonan y ta haci loke ta agradabel nE. Y esaki ta Su mandamento: pa kere den e nomber di Su Yiu JesuCristo, y pa stima un y otro manera cu El a manda nos. Esunnan cu obedece Su mandamentonan ta biba den djE, y E den nan. Y esaki ta con nos sabi cu E ta biba den nos: nos sabi esey pa medio di e Spirito cu El a duna nos.

Pa un bon estudio tocante e doctrina di amor y stimacion, lesa tur sinco capitulo di prome Juan. Lesa tambe prome Corintio capitulo 13 completo.

Mi ta conclui pa awor, tocante e doctrina di Sabat, mi a menciona cu e palabra Sabat ta nifica descanso, sosega of sociego, stop cu tur trabou, etc. Aki den Hebreonan capitulo 3 y 4, nos ta lesa cu esun cu kere e Evangelio ariba e dia di awe, ta drenta den e sociego of descanso ey. Lesa capitulo 3 y 4 pidiendo Señor na e mes un tempo pa e yuda bo comprende y obedece. Repentimento sincero y fe den nos Señor JesuCristo ta e berdadero descanso pa nos. (Hebreonan 4:8-11)

E idea di Sabat, Diasabra of Diadomingo, y pakico. Sinceramente mi tin cu reconoce cu no tin un mandamento den e Testamento Nobo pa un dia special como Sabat. No tin un mandamento cu ta bisa cu Diadomingo ta nos Sabat nobo. Loke si nos ta haya ta, cu e discipelnan despues di e resureccion di Señor Jesus, a reuni ariba e prome dia di siman cu ta Diadomingo. (Juan 20:19). Y den Echunan 20:7, nos ta haya un grupo di keredornan cu a reuni pa comunion hunto cu e Apostel Pablo ariba Diadomingo. Mescos den 1 Cor. 16:2, nos ta haya un indicacion cu e rumannan di Corintio tabata reuni riba Diadomingo.

Y por ultimo den Hebreonan 10:24, 25, nos ta haya un spiertamento general pa no laga di reuni hunto, etc. Nos mester tene cuenta tambe cu e Judiunan cu a kere e Evangelio, probablemente a sigui reuni ariba Diasabra.

Pero no tin un mandamento cu ta duna na e Iglesia tocante un dia di Sabat. Problemente e custumber pa reuni ariba diadomingo a resulta di e facto cu Señor Jesus a resucita for di morto ariba un Diadomingo.

Por fabor no laga di manda bo pregunta – sea ta tocante e mes topico aki, of cualke otro. Nos ta purba contesta nan for di Scritura – loke Beibel ta bisa di dje. Boso por manda boso preguntanan na e adres aki: bbhenriquez@shaw.ca

Saturday, February 2, 2008

SABAT




PREGUNTA: Con importante e Sabat ta awendia? Y cua dia nos ta considera como e dia di Sabat? Diasabra of Diadomingo y di con?Segun expertonan di e idiomanan original Hebreo y Griego; e palabra Sabat ta nifica descanso – sociego, stop, para, descansa y socega. Y pa e Judiunan esaki tabata un dia di descanso y di stop cu tur trabao y otro actividadnan manera camnamento mas leew cu ta permiti na nan.

E Sabat Judiu ta cuminsa tur diabierna seis or’ di atardi, y ta finalisa diasabra sies or’ di atardi. E Sabat aki a cuminsa segun Scritura, na e final di e Creacion relata den Genesis e capitulo uno.

Anto Genesis 2:1-3 ta bisa nos lo siguiente: “Asina e cielonan y e tera a keda cla, y tur loke tabata den nan. Y ariba e di shete dia Dios a caba Su trabao cual El tabata haci; y El a descansa ariba e di shete dia for di Su trabao cual El a hasi. Y Dios a bendiciona e di shete dia, y a santific’e: pasobra cu den dje El a descansa for di tur Su trabou cual Dios a crea y a haci.” Mi no tin intencion pa splika e asunto di Sabat aki di ningun manera, pasobra mi simplemente no por. Principalmente siendo cu mi sabi, cu por tin keredornan sincero cu ta observa e dia di Sabat.

Un cos cu mi por bisa cu tur siguridad dor cu segun Scritura, un berdadero keredor -- cu esey mi ta referi na cualke persona cu a tende e Evangelio di nos Señor JesuCristo, y e persona aki a repenti di tur pica, y a pone su fe den e Jesus aki, Kende a sufri y a muri pa nos picanan; y cu Dios, e Tata a lanta for di morto na e di tres dia -- e persona aki ta ricibi pordon di tur pica, y ta wordo conta como hustifica dor di e Tata Su mes. (Lesa Romanonan 1:1-6 y 16,17 y Romanonan 3:19-31).

E Scrituranan ey, y hopi otronan ta papia idioma cla cu nos, y ta bisa nos cu tanto e Judiu como e no Judiu ta bou di pica. Den otro palabra, Judiu y no Judiu ta bou di condenacion. (Romanonan 3:9-18). Enfin; manera cu nos sabi, e ley di mandamentonan tabata duna na e Judiunan mediante Moses. Y e ley tocante Sabat tabata uno di e dies mandamentonan. Segun Scritura, si un persona a cumpli cu henter e ley, ma a faya den un punto so; e ta culpabel di tur e resto. P’esey nos por bin na e conclusion aki, cu te asta si un hende ta cumpli fielmente cu e dia di Sabat, pero e ta faya den uno di e otro mandamentonan, e ta culpabel di tur. Pa un comprendemento cla y sigur tocante e tema aki di ley, incluyendo e Sabat; nos ta recomenda pa lesa Romanonan capitulonan 9-11 sin falta. Di ningun manera lo mi por condena e personanan cu ta kere di curason den nos Señor Jesus, y ta observa e dia di Sabat como nan dia di sociego enbes di Diadomingo. E loke si mi por bisa cu ta robes, ta ora cu e dia di Sabat ser conta como parti di salbacion. No ta for di awor cu tabatin mal comprendemento entre Ley y Gracia. Un di e problemanan di doctrina cu e Apostel Pablo a combati tabata tocante e ley di Moses, y particularmente e doctrina di circumcision, y wardamento di dianan. Tuma por ehempel Galationan 4:8 … Aki nos ta lesa lo siguiente: “Antes, tempo cu boso no tabata conoce Dios, boso tabata catibo na esunnan cu pa naturalesa no ta diosnan. Pero awor cu boso conoce Dios, of sea cu boso ta conoci pa Dios, con por ta cu boso ta bolbiendo na e principionan debil y miserabelnan ey? Boso ta desea pa sea esclabisa pa nan tur di nobo? Boso ta observando dianan special, y lunanan y temporadanan y añanan! Mi tin miedo pa boso, cu di un of otro manera mi a malgasta mi esfuersonan ariba boso, etc.

Mescos den Colosensenan 2:6-23. Den e versiculonan 16, 17 nos ta lesa lo siguiente: “P’esey no laga ningun hende huzga boso pa e loke boso ta come of bebe of tocante fiestanan religioso, celebracionnan di luna nobo, of un dia di Sabat. Esey nan ta un sombra di e cosnan cu tabata pa bin; e realidad sinembargo, ta haya den Cristo. Sigui lesa te final di e capitulo. Mi ta repiti cu no tin nada malo si un berdadero yiu di Dios ta respeta y ta observa e dia di Sabat. Pero, si esey ta wordo hasi cu e intencion di hustificacion personal, y na mes un tempo condena esunnan cu no ta warda e dia ey, e ora si e ta robes segun Scritura. Pasobra segun Scritura, cu ta pa gracia nos ta wordo salba, pa medio di fe, y esaki no ta for di nos mes, e ta e regalo di Dios, no pa medio di obranan, di manera cu ningun hende por gaba.

Keda pendiente….. nos lo conclui tocante e tema aki “E Sabat” den nos otro mensahe.

Scirbi y prepara pa Bicento & Betty Henriquez