Tuesday, April 16, 2013

E CAMINA DI E CRUS


Durante e dianan di Cuaresma cu a pasa, nos por a mira varios actividadnan relaciona cu e Camina di Crus: (na Television). Y aki na Aruba tambe tabatin un forma di actuacion tocante e Camina di Crus.

E usamento di crus ta bai leuw atras den historia. Hopi crimenalnan y catibonan a wordo mata ariba un crus, ya di hopi tempo prome cu Cristo. Tabata un morto umiyante y cruel. Pero apesar di tur e berguensa di e morto riba e crus, nos mester purba comprende e victoria di nos Señor Jesus den fabor di henter humanidad. Y e victoria aki ta inclui Dios e Tata y Señor Jesus, y e Spirito Santo di Dios. Ora cu e Apostel Pedro a scirbi na e keredornan tocante e poder di Dios cu ta parti di e Evangelio, el a cuminsa su mensahe cu e palabranan aki:  Pedro, un apostel di JesuCristo, na e scohinan di Dios, stranheronan den e mundo, plama door di Pontus, Galatia, Cappadocia, Asia y Bithynia, kendenan a wordo scohi di acuerdo cu e conocemento previo di Dios e Tata, pa medio di santificacaion di e Spirito, pa obediencia na JesuCristo, y wordo gesprinkel cu Su sanger.”

Nos ta encurasha tur hende pa lesa e carta aki scirbi pa e Apostel Pedro; cu oracion y no mucho pura. Dependiente semper pa medi di fe, cu e Spirito Santo di Dios, lo yuda nos pa comprende, y pa obedece.

Den e mensahe cu nos a presenta den nos ultimo blog, nos a purba splica e berdadero nificacion di e titulo CRISTO y MESIAS. Y nos a purba splica cu ambos titulo tin e mes un nificacion relaciona cu e Spirito Santo di Dios. P’esey pone atencion ora cu bo ta lesa e carta acki scirbi pa e Apostel Pedro, cuanto bes e ta menciona, “Cristo”, cu su debido nificacion. Y tur esey ta pa nos comprende cu yudansa di e Spirito Santo, ki un preis cara a wordo paga pa henter humanidad. Y e gran salbacion aki ta ofreci na tur hende, tanto ta den e islanan aki, como den henter mundo. Y e mensahe aki ta duna cu hopi enfasis y hopi cla den Scritura. Y e mensahe ta: “No tin salbacion den ningun otro, pasobra bou di shelo no tin otro nomber duna na hende pa medio di cual nos por wordo salba.” (Lesa Echunan 4:8-12)

Awor, siendo cu e Spirito Santo di Dios ta Esun cu a inspira e Apostel Pedro pa bisa, cu no tin salbacion den ningun otro nomber duna na hende; nos aki na Aruba y e otro islanan mester ta sigur cu ta asina e ta awe pa cada persona, na tur parti di mundo.

Y amigonan stima pa Señor Su  mes, nos por mira y nos por tende con  cada dia sernan humano ta muri. Y no ta solamente esnan di edad halto, ma tambe muchanan y hobennan y adultonan. Y segun Scritura un dia lo tin resureccion di e inhustonan y e hustonan. E Palabra di Dios ta absolutamente cla y enfatico kendenan ta e hustonan y kende ta e inhustonan.

Tuma bo Beibel y lesa for di e buki cu e Apostel Pablo a sirbi na e Romanonan Capitulo tres y lesa e Capitulo completo. Y pone atencion cu ta para scirbi, cu “no tin ni un hende husto, ni sikiera un.” Y sigui lesa y nos ta haya unda ta scirbi cu: “Ma awor aparte di Ley, un husticia for di Dios a bini pa medio di fe den JesuCristo, na tur cu kere. No tin diferencia pasobra tur a peca, y ta falta e gloria di Dios; y ta wordo hustifica gratuitamente, pa medio di  Su gracia, door di e redencion cu a bini pa medio di Cristo Jesus.”

Nos ta encurasha cada uno cu ta lesa e mensahe cortico aki, si bo ta uno di esunnan cu te awe ta den scuridad tocante e obra di Cristo Jesus, Kende a bin den mundo pa busca y salba pecadornan; anto sabi esaki cu e Spirito di Dios mediante e sirbidornan di Dios ta bisa nos cu: “Den e tempo aceptabel Mi a scucha bo, y ariba e dia di Salbadion Mi a yuda bo. Mi ta bisa boso, awor ta “e tempo aceptabel, mira awor ta e dia di salbacion.” (2 Corintionan 6:12)

Esey ta nifica, Amigonan di tur edad, cu nos ta bibando actualmente den e tempo aceptabel, y dia di salbacion di cual Scritura Santo ta spierta nos. Nos kier a haci uso di e momento aki pa spierta tur hende tocante e Camina di Crus. Ta asina facil pa tuma parti den un comedia tocante e caminda di crus, anto hasi menos caso di e berdadero nificacion e Señor Jesus Su morto ariba e crus. Segun Scritura Santo,  Jesus a carga nos picanan den Su curpa ariba e crus. Pa nos libra di picanan, por biba pa husticia. Y ta pa medio di Su heridanan nos a wordo cura. P’esey  cu repentimento di nos banda ta indespensable. Repentimento y fe den Señor Jesus - di otro manera, tur bistimento di crus, of comedia tocante e crus, ta bira un forma so.

Memorianan! Un cuatro anja pasa nos tabata hunto: Famia Edgar Martens, Famia Ressler, Famia Raiman (nee Lillian Mikkelson), y ami cu Bicento na cas di famia Ressler na Canada! Awe, Sr. Raiman y Ruth Martens no ta cu nos mas! Ma ki momentonan preciosos, nos cu a traha na e Islanan di Aruba, Bonaire y Curacao, cu storianan di e principio di e trabao di plama e bon nobo di Cristo na e islanan aki! Lillian cu su esposo Jim, Sra. Martens a saca e foto aki, p'esey e no t'ey riba

Monday, April 1, 2013

Tocante e coreccion: realmente e tabata bon manera e tabata. Ta ami, Betty a bruha (edad! Ha! ha!) Pues, leumai e coreccion!

Awe nos ta sigui tocante:
E MEDIADOR

Segun Scritura, cu ta e Palabra di Dios; tin solamente un Mediador mei mei hende y Dios. Den e Buki di 1 Timoteo 2:6,6,  nos ta lesa lo siguiente: Pasobra tin un Dios, y un Mediador entre Dios y hende, e hende Cristo Jesus, Kende a duna Su mes como un preis di rescate pa tur hende, e testimonio duna na Su tempo apropia. Den otro parti di Scritura nos por lesa e declaracion hopi conoci pa tur e keredornan, cu ta bisa: “Pasobra Dios a stima mundo (of humanidad) asina tanto, cu El a duna SU unico Yiu, pa tur cu kere den djE, no bai perdi, ma tin bida eterno. Anto e Scritura ta sigui bisa nos; cu Dios no a manda Su Yiu den mundo pa condena e mundo, ma pa salba e mundo pa medio di djE. Esun cu kere den djE, no ta condena, pero esun cu no kere, ta condena caba, pasobra e no a kere den e nomber di Dios Su unico Yiu. Y e ta sigui bisa nos, cu e motibo pakico hende no ta kere ta; cu hende ta stima scuridad na lugar di lus, pasobra nan echunan of nan obranan ta malo. Tur persona cu ta haci maldad ta odia e Lus, y nan lo no bini den e lus, pa nan obranan no wordo exponi. Pero e persona cu ta biba pa medio di e berdad ta bini den e lus, pa asina por mira claramente, cu loke El a haci a wordo haci mediante Dios. Lesa Juan 3:1-21.

E spiertamento principal cu nos kier spierta tur hende ta esaki: Tin solamente y unicamente un Mediador entre nos y Dios. Y e nomber di e Mediador aki ta JesuCristo, of sea E homber Cristo Jesus. E titulo: E “Cristo” y “Mesias” tin e mes un nificacion. Den e mensahe corto aki, nos lo purba trece padilanti e importancia di e nomber of titulo “Cristo” of “Mesias”. Y e unico manera cu nos por haci esaki ta, pa medio di Scritura mes. Y pa e motibo ey, nos kier encurasha e rumannan den fe, y tur otro persona interesa den loke Scritura ta siña nos, pa lesa e siguiente Scrituranan aki den bo Beibel.

Pa cuminsa lesa Lucas 2:8-14. Aki nos por lesa cu un Salbador a nace, y e Salbador ta Cristo, e Señor. Pues, aki nos por mira masha cla, cu e titulo “Cristo”, no a wordo duna door di hende, of sernan humano. Sino dor di Dios, e Tata Su mes, mediante e Angelnan. Ya nos a menciona cu e titulo Cristo y Mesias tin e mes un nificacion. “Cristo” ta for di Griego , y “Mesias” ta for di Hebreo. Y ambos ta nifica: Ungui (of hunta). Den e Testament Bieu tin hopi ehempel tocante e asunto ey di huntamento cu azeta y ponemento di man. Realmente un studio completo of perfecto tocante di e doctrina aki di Cristo e Yiu di Dios y e unico Mediador, no ta posibel pa nos presenta den poco palabra. Pero e loke nos ta tratando pa trece padilanti awe ta e importancia di comprende y acepta Señor Jesus como Salbador y Señor. Pa e simple facto cu bao di cielo, no tin otro nomber duna na hende pa medio di cual nos mester wordo salba. Y esey ta” amen, door di Scritura. E nomber of titulo Cristo, ta nifica Ungui of sea; Hunta. Y nos ta haya e titulo ey, esta “Cristo” mas cu seis shen bes den Beibel y mayoria ta den Testament Nobo. Y e nificacion final of completo di e titulo ey ta: Cu Dios e Tata a duna Jesus di Nazaret, e Spirito Santo como guiador pa e obra pa cual e Tata a mand’E na mundo.

Nos ta admiti cu e no ta facil pa splica na un manera perfecto un doctrina manera esaki. Pero e berdad ta keda cu ta esey e titulo Cristo y Mesias ta nifica. Nada straño anto cu nos ta lesa den Beibel, cu nos a wordo cumpra cara, p’esey cu nos mester duna gloria na Dios, pasobra di djE nos ta. El a cumpra nos cu un preis. Den 1 Corintionan 6:19,20, nos ta lesa asina aki: Boso no sabi cu boso curpa ta un tempel di e Spirito Santo, Kende ta den boso, Kende boso  a ricibi for di Dios? Boso no ta pertenece na boso mes, boso a wordo cumpra cara (of pa un preis). P’esey onra Dios cu boso curpa.” (Mira tambe 1 Cor. 7:23). Awor nos ta haci un apelacion of un peticion na tur e rumannan den Cristo pa boso lesa: Lucas 4:4-21 y 1 Timoteo 2:5,6, y Hebreonan 9:15. Y corda bon e titulo: “Cristo”, semper ta nifica cu Jesus di Nazaret tabata guia pa e Spirito Santo di Dios. Y por ultimo, lesa Hebreonan 9:24-28.

Asina anto rumannan stima pa e Tata Su mes, y pa nos Señor y Salbador Jesus. Laga cada uno di nos corda bon, cu cada uno di nos cu a kere di curason den nos Salbador Jesus; a ricibi e mes un Spirito Santo ey, cu a guia nos Señor durante Su ministerio den mundo. O, ki facil e ta pa nos lubida, o kerido rumannan den e fe.  Pidi pa nos cu ta prepara e mensahenan aki, pa nos no desvia for di e berdad, ma pa nos por para firma pa e berdad revela den e Palabra di Dios. Te un otro mensahe.


Aki nos ta comparti dos foto di nos actividad ayera: Para riba nos veranda chikito mi por piki un bacoba for di e cacho di bacoba colgando sina cerca, ma lastimo ainda nan ta berde berde!  Despues nos a dal un trip te na part zuid oost di nos isla y a gosa un rato banda di e laman brabo ey! Tabata un dushi mainta pa nos!