Friday, August 24, 2007

E FE KU TA SALBA ....#2


(Praktikando un siertu tipo di fe... lesa mas di esaki den e mensahe mas abou)

Bon dia, bon dia na tur nos amigunan i amiganan plamá rònt Aruba, Antiyas, Hulanda y otro partinan rònt mundu! Kon ta bai ku boso? Lo nos ta kontentu di tende for di boso awe, si boso a bishitá nos sitio. Laga nos sabi bo pensamentunan, bo preguntanan. Nos ta enkurasha bo pa “print” e mensahe pa bo mes y asina bo por tin e den bo propio man pa bolbe les’e atrobe i studia e material segun ku bo tin tempu.

Nos ta rekòrda boso ku nos ta trata di skirbi den tur dos ortrografia: di Aruba i di Antiyas. Aunke similar, sinembargo nan ta diferente. Ta nos deseo di bai segun e deseo di kada gobiernu. Ta bon ku boso tur por lesa kada uno sin problema!

Sr. Bicento ta sigui awor ku e tema ku el a kuminsá den nos último “blòg”:

E FE KU TA SALBA #2

Amigunan, Skritura Santu ta bisa nos, ku e hustu lo biba di fe. (Hebreonan 2:4 i Romanonan 1:16,17, i Hebreonan 10:38).

Te asta den nos bida diario nos ta praktiká un forma di fe. Ehempel: Nos ta kai sinta den un stul ku tur konfiansa, pasobra nos ta kere ku e lo sostené nos peso. Probablemente, abo, ku ta lesando e artikulo aki, ta sintá den un stul. I bo no tin ningun duda òf miedu ku e stul den kual bo ta sinta lo habri fo’i otro laga bo basha abou. Kisas aki ratu bo ta bai tira algo na stoma. I di nobo, bo ta kome bo papa òf bo pan ku beleg tur trankil. Pakiko? Pasobra bo tin konfiansa ku no tin ningun peliger. Dia tras dia nos ta praktiká e forma di fe ei den nos aktividatnan. Nos sabi ku sin alimento nos kurpa lo bira débil i muri den poko tempu.

Tin un porshon masha konosí den Beibel ku ta bisa lo siguiente: “Hende lo no biba di pan so, ma di tur palabra ku ta sali fo’i boka di Dios. (Mateo 4:4 i Deuterónomo 8:3).

Aki, i den hopi otro skrituranan, nos por mira ku tin dos forma di bida pa hende. Uno ta e bida fisikal i temporario; e otro ta, bida spiritual ku ta keda pa semper.

Un persona ku a muri fisikalmente no por biba atrobe ku alimentashon. Un kurpa morto no por risibí alimentashon mas. Ma e bida spiritual ta e loke mi ke papia di djé awor. I mi ta admití ku esaki no ta un tópiko ku ta fásil pa splika. Di akuerdo ku Skritura, desde e kaida di Adam, piká a pasa na tur hende. Esei ta nifiká ku tur hende ku a nase desde e tempu i te awe, ta nase ku e naturalesa di piká. I p’esei ku Skritura ta enfatisá e fakto ku no tin ni un hende ku ta hustu. (Romanonan 3:9-20) ta bisa lo siguiente: “Kiko nos lo konluí anto? Nos ta mihó? Di ningun manera! Ya nos a kulpa tantu Hudiu komo pagano ku nan tur ta bou di piká. Manera ta para skirbí: No tin un hustu, ni sikiera un; No tin un ku ta komprendé, ni un ku ta buska Dios. Tur a desvia, tur hunto a bira inútil; no tin un ku ta hasi bon, ni sikiera un. Nan garganta ta un graf habri; nan lenga ta praktiká mentira. E veneno di kolebra ta riba nan lipnan. Nan boka ta yen di maldishon i amargura. Nan pianan ta lihé pa drama sanger; ruina i miséria ta marka nan kamina, i e kamina di pas nan no konosé. No tin temor di Dios dilanti nan wowonan. Anto e Apòstel Pablo ta sigui splika bisando: Awor nos sabi ku tur loke e Lei ta bisa; e ta bisa na esunan ku ta bou di e Lei, asina ku tur boka por ta será, i mundu kompletu teni responsabel pa ku Dios. P’esei ningun hende lo ser deklará hustu den Su bista dor di wardamentu di Lei; alkontrario, dor di e Ley nos ta bira konsiente di piká.

Loke nos por siña for di e Skritura aki ta; ku no tin ni un persona den e mundu aki ku ta hustu den bista di Dios. I esei ta inklui tantu ta Hudiu komo no Hudiu. Manera nos sabi, ta e Hudiunan a risibí e Lei ku Su mandamentunan for di Dios dor di Moises. Sinembargo, e Ley no tabata duná pa e proposito di duna bida, pero mas bien pa hasi hende konsiente di piká. (Romanonan 3:19,20). Bou di e Ley di Moises, e Hudiunan siendo hasí konsiente di nan piká, tabata ofresé sakrifisio di animalnan den varios okashonnan. Pero un bes pa aña un sakrifisio hopi importante tabata wòrdu hasí mediante e Sumo Saserdote e tempu. (Lesa Hebreonan kapítulo nuebe i dies pa un splikashon kompletu.)


Na kuminsamentu di e mensahe kòrtu aki, nos a menshoná ku un persona ku a muri kaba, no por risibí alimento mas. Ma mientras ku un persona ta na bida, e tin mester di alimento, òf e lo muri sigur. Ma Skritura ta siña nos di un otro forma di morto ku ta pasa na tur hende desde e kaida den piká di e promé hende Adam. Pa un splikashon kla i sigur tokante e tema ei ku ta inklui kada uno di nos; por fabor lesa: Romanonan kapítulo sinku sin falta. Den e karta skirbi na esunnan ku a kere Evangelio den e siudat di Efesio, e Apòstel Pablo a bisa nan lo siguiente: “Loke ta boso, boso tabata morto den boso transgreshonnan i pikánan, den kualnan boso tabata bibando tempo ku boso tabata sigui e kustumbernan di e mundu aki i di e gobernantenan di e reino di laira, e spiritu ku ta obrando awor den esunnan ku ta desobedesí.” Y e Apòstel ta sigui bisando: “Nos tur tambe a biba asina un tempu kumpliendo ku e deseonan di nos naturalesa pekaminoso.” (Efesionan 2:1-3).

Aki anto, Skritura ta papia di un otro forma di morto, ku ta e morto spiritual. Siendo asina tabata impusibel pa nos por tabatin komunion ku Dios. Lesa e restu di e kaptíulo dos di Efesionan, unda nos por mira e grasia i e miserikòrdia di Dios pa henter humanidat den e morto di Su Yiu nos Señor HesuKristu ariba un krus pa nos. Lesa e Skritura ei pa bo mes, i e Spiritu Santu lo yuda bo pa komprendé i pa bo repentí i kere di kurason den Hesus.

Amigu/anan, tuma e libertat di skirbi nos pa informa mas aleu, si ainda bo tin pregunta riba loke a wòrdu skirbí tokante “E Fe Ku Ta Salba”. Nos adrés pa skirbi nos ta: bbhenriquez@shaw.ca Of bo por laga un komentario na e lugá indiká riba e “blog”. Te otro biaha.


Skirbí i prepará pa Bicento i Betty Henriquez

Friday, August 17, 2007

E FE CU TA SALBA



Bon dia y Bon Bini na cada uno cu ta bishitando nos sitio:

Den e principio di e luna aki nos a reuni na un bunita lago cu yama Kimball Lake. Aki e famia Ratzlaff, e famia di Betty a reuni pa pasa tres dia hunto. Nan a bin di tur direccion, y algun a bini di leu – no menos cu 86 persona representando 4 generacion! Nan edad tabata di 2 luna (generacion 4) te 91 (di generacion 4)! Di Betty su generacion tabata solamente e, cu su ruman homber menor, Clifford cu ta na bida ainda. Su mayornan y seis ruman homber ya no ta na bida. Nos a pasa e tres dianan hunto den un manera agradabel. Tur a gosa hunto piscando, pasa tempo den e awa, hungando golf, y sinta combersa y come hunto. Tur anochi nos a reuni rond un candela y nos a canta hunto, comparti cualke memoria, etc. Tres persona casá cu un “Ratzlaff” a wordo pidi pa duna un palabra. Den chansa nan tabata yama nan “infiltradornan”! Ata, Bicento a wordo pidi como un di nan, pa duna e Palabra na e ultimo sirbishi hunto. E otro dos tabata esposonan casá cu sobrinanan. Un ta un pastor y e otro un deacono. Tur tres a duna spiertamentonan apropiado pa e occasion. Dios a bendiciona y lo usa e loke a wordo papia. Pues, nos ta contento cu nos por a bai. Un sobrino di Betty a ofrece nos nan “House Trailer” moderno, pa nos por a pasa e dianan ey como rey y reina y nan mes a drumi den un tent!

Awor nos ta sigui cu nos mensahe cortico pa awe:

E FE CU TA SALBA

Den e buki di Romanonan capitulo uno, versnan 16 y 17, ta para scirbi lo siguiente: “Mi no tin berguensa di e Evangelio, pasobra e ta e poder di Dios pa salbacion di cada un cu ta kere; prome pa e Judiu, y tambe pa e Griego. Pasobra den e Evangelio un husticia for di Dios ta revela; un husticia cu ta di fe pa fe, net manera ta scirbi: E husto lo biba pa fe.”

Den nos ultimo dos mensahenan, nos a comenta un poco tocante e palabra EVANGELIO, y loke e ta nifica. E mensahe pa awe lo bai hunto cu e esey.

Fe ariba su mes no por salba nos, ma ta e obheto di fe cu ta salba e pecador. Y den e caso aki e obheto menciona ta e Evangelio. Y e Evangelio ta nifica bon noticia of e bon nobo. Y e increibel bunitesa di e bon nobo aki ta, cu e ta pa henter humanidad. Ta un bon noticia directamente for di nos Tata Celestial dirigi na abo cu ta lesa esaki, y na cada uno di nos.

Pone bon atencion cu e bon noticia aki ta e poder di Dios pa salbacion pa cada persona cu ta kere. Y no unicamente e Judiunan, ma tambe pa hende di tur otro nacion den e mundo aki, incluyendo Curaçao, Bonaire y Aruba.

Ma awor, pone bon atencion cu apesar di e gloria di e Evangelio, y di e poder di Dios cu ta bai hunto, ta keda esun parti sumamente importante, y ta esaki: Pa e poder di Dios por obra den un persona e persona aki MESTER KERE.

E palabra “kere” y “fe” ta bai hunto aki. Un di e motibonan principal pa tin fe ta; cu ningun otro persona den e mundo aki por kere pa nos. Ni e angelnan, ni e santonan cu a muri, y ni e santonan den Cristo cu ta na bida awe, por kere pa nos. Ni nos tata of nos mama stima por kere den nos lugar. Ta na cada uno di nos individualmente, e bon noticia aki di hustificacion pa cu Dios ta dirigi. Y e mensahe aki, y e oferta di bida eterno aki ta bini no di hende, ma di e Dios todopoderoso, e Unico Dios berdadero cu a crea nos, y tur cos. E ta Esun cu no por gaña, y p’esey cu cada uno di esunnan cu kere di curason, por tin completo confiansa; pasobra Esun cu ta yama nos den e Evangelio, ta fiel. P’esey FE ta algo personal y individual.

Aki tin algun splicacion tocante e palabra FE: for di hopi aña pasa mi a tende algun splicacion relaciona cu fe. Personalmente mi a defende e religion den cual nos mayornan tabata confia, y cu nan a pasa over na nos. Tabata den e añanan 47 di e siglo cu a pasa, tempo cu Señor den Su gracia a bendiciona nos islanan cu e Evangelio di gracia y di poder di Dios.

Mi defensa personal contra e Evangelio tabata esaki: “Wel; e mensahe ey ta hopi bon, pero ami ta kere cu si nos keda fiel na e religion den cual nos a nace, ta suficiente.” Awe mi ta gradici Señor cu algun dia despues di a pronuncia e palabranan ey; mi a wordo convenci mediante di e Evangelio y e Spirito di Dios; cu e confiansa ey basá ariba religion, tabata falso. Y cu pordon di nos picanan ta posibel unicamente pa fe den Esun cu a muri riba un crus pa nos picanan, y cu Dios a lanta for di morto riba e di tres dia. Y Scritura ta hopi cla tocante e berdad ey unda e ta bisa: “Y no tin salbacion den ningun otro, pasobra cu no tin ningun otro nomber bao di cielo cu ta duna na hende, pa medio di cual nos mester wordo salba.” (Echunan 4:12)
Amigonan; religion NO por salba, ta Cristo ta Esun cu a duna Su bida pa nos.

Algun dia pasa den noticia mundial a sali un noticia tocante un solda cu ta den e guera aya na Irak; con el a scapa un morto sigur, door cu e tabatin un Beibel den su saco di camisa. Anto un bala di scopet of mitrayador a dal net ariba e Beibel, y esey a scapa su bida. Mi no a tende mas detaye tocante esey, y si e noticia ey ta berdad, mi mester por ta gradicido tanto pa e hoben ey, como pa su mayornan. Y ademas mi ta spera cu e hoben ey ta uno cu su fe ta den Cristo, cu ta e unico cu por salba nos for di e rabia di Dios cu ta bini. Pero, sinembargo, mi kier a duna e spiertamento aki. No ta basta pa nos tin un Beibel sea den nos saco di camisa of den tas, of den auto, of den cas. E Beibel ey ariba su mes NO POR SALBA NOS. Ta e mensahe cu nos ta lesa den nos Beibel cu ta papia cu nos tocante nos Señor y Salbador JesuCristo cu ta salba nos. Esey ta si nos kere cu henter nos curason cu ta pa nos picanan El a muri y resucita di morto pa E trece nos serca Dios. Den e nomber di Señor Jesus, nos ta combida y roga na cada uno cu ta lesa esaki, pa bo repenti di bo picanan y pone bo fe den Señor Jesus. E ora bo lo experimenta e poder di Dios cu tin den e Evangelio cu nos ta proclamando.

Scirbí y prepará pa Bicento y Betty Henriquez

No lubida, cu bo por pasa Libreria Victoria na Aruba, situa na 25 Elleboogstraat, Oranjestad, pa cumpra Beibel, y otro material Cristian. Na Curaçao, bishita Boekhandel Evangelico, St. Thomas #17 pa busca bo Beibel, buki, tarheta, y na Bonaire,

E FE CU TA SALBA



Bon dia y Bon Bini na cada uno cu ta bishitando nos sitio:

Den e principio di e luna aki nos a reuni na un bunita lago cu yama Kimball Lake. Aki e famia Ratzlaff, e famia di Betty a reuni pa pasa tres dia hunto. Nan a bin di tur direccion, y algun a bini di leu – no menos cu 86 persona representando 4 generacion! Nan edad tabata di 2 luna (generacion 4) te 91 (di generacion 4)! Di Betty su generacion tabata solamente e, cu su ruman homber menor, Clifford cu ta na bida ainda. Su mayornan y seis ruman homber ya no ta na bida. Nos a pasa e tres dianan hunto den un manera agradabel. Tur a gosa hunto piscando, pasa tempo den e awa, hungando golf, y sinta combersa y come hunto. Tur anochi nos a reuni rond un candela y nos a canta hunto, comparti cualke memoria, etc. Tres persona casá cu un “Ratzlaff” a wordo pidi pa duna un palabra. Den chansa nan tabata yama nan “infiltradornan”! Ata, Bicento a wordo pidi como un di nan, pa duna e Palabra na e ultimo sirbishi hunto. E otro dos tabata esposonan casá cu sobrinanan. Un ta un pastor y e otro un deacono. Tur tres a duna spiertamentonan apropiado pa e occasion. Dios a bendiciona y lo usa e loke a wordo papia. Pues, nos ta contento cu nos por a bai. Un sobrino di Betty a ofrece nos nan “House Trailer” moderno, pa nos por a pasa e dianan ey como rey y reina y nan mes a drumi den un tent!

Awor nos ta sigui cu nos mensahe cortico pa awe:

E FE CU TA SALBA

Den e buki di Romanonan capitulo uno, versnan 16 y 17, ta para scirbi lo siguiente: “Mi no tin berguensa di e Evangelio, pasobra e ta e poder di Dios pa salbacion di cada un cu ta kere; prome pa e Judiu, y tambe pa e Griego. Pasobra den e Evangelio un husticia for di Dios ta revela; un husticia cu ta di fe pa fe, net manera ta scirbi: E husto lo biba pa fe.”

Den nos ultimo dos mensahenan, nos a comenta un poco tocante e palabra EVANGELIO, y loke e ta nifica. E mensahe pa awe lo bai hunto cu e esey.

Fe ariba su mes no por salba nos, ma ta e obheto di fe cu ta salba e pecador. Y den e caso aki e obheto menciona ta e Evangelio. Y e Evangelio ta nifica bon noticia of e bon nobo. Y e increibel bunitesa di e bon nobo aki ta, cu e ta pa henter humanidad. Ta un bon noticia directamente for di nos Tata Celestial dirigi na abo cu ta lesa esaki, y na cada uno di nos.

Pone bon atencion cu e bon noticia aki ta e poder di Dios pa salbacion pa cada persona cu ta kere. Y no unicamente e Judiunan, ma tambe pa hende di tur otro nacion den e mundo aki, incluyendo Curaçao, Bonaire y Aruba.

Ma awor, pone bon atencion cu apesar di e gloria di e Evangelio, y di e poder di Dios cu ta bai hunto, ta keda esun parti sumamente importante, y ta esaki: Pa e poder di Dios por obra den un persona e persona aki MESTER KERE.

E palabra “kere” y “fe” ta bai hunto aki. Un di e motibonan principal pa tin fe ta; cu ningun otro persona den e mundo aki por kere pa nos. Ni e angelnan, ni e santonan cu a muri, y ni e santonan den Cristo cu ta na bida awe, por kere pa nos. Ni nos tata of nos mama stima por kere den nos lugar. Ta na cada uno di nos individualmente, e bon noticia aki di hustificacion pa cu Dios ta dirigi. Y e mensahe aki, y e oferta di bida eterno aki ta bini no di hende, ma di e Dios todopoderoso, e Unico Dios berdadero cu a crea nos, y tur cos. E ta Esun cu no por gaña, y p’esey cu cada uno di esunnan cu kere di curason, por tin completo confiansa; pasobra Esun cu ta yama nos den e Evangelio, ta fiel. P’esey FE ta algo personal y individual.

Aki tin algun splicacion tocante e palabra FE: for di hopi aña pasa mi a tende algun splicacion relaciona cu fe. Personalmente mi a defende e religion den cual nos mayornan tabata confia, y cu nan a pasa over na nos. Tabata den e añanan 47 di e siglo cu a pasa, tempo cu Señor den Su gracia a bendiciona nos islanan cu e Evangelio di gracia y di poder di Dios.

Mi defensa personal contra e Evangelio tabata esaki: “Wel; e mensahe ey ta hopi bon, pero ami ta kere cu si nos keda fiel na e religion den cual nos a nace, ta suficiente.” Awe mi ta gradici Señor cu algun dia despues di a pronuncia e palabranan ey; mi a wordo convenci mediante di e Evangelio y e Spirito di Dios; cu e confiansa ey basá ariba religion, tabata falso. Y cu pordon di nos picanan ta posibel unicamente pa fe den Esun cu a muri riba un crus pa nos picanan, y cu Dios a lanta for di morto riba e di tres dia. Y Scritura ta hopi cla tocante e berdad ey unda e ta bisa: “Y no tin salbacion den ningun otro, pasobra cu no tin ningun otro nomber bao di cielo cu ta duna na hende, pa medio di cual nos mester wordo salba.” (Echunan 4:12)
Amigonan; religion NO por salba, ta Cristo ta Esun cu a duna Su bida pa nos.

Algun dia pasa den noticia mundial a sali un noticia tocante un solda cu ta den e guera aya na Irak; con el a scapa un morto sigur, door cu e tabatin un Beibel den su saco di camisa. Anto un bala di scopet of mitrayador a dal net ariba e Beibel, y esey a scapa su bida. Mi no a tende mas detaye tocante esey, y si e noticia ey ta berdad, mi mester por ta gradicido tanto pa e hoben ey, como pa su mayornan. Y ademas mi ta spera cu e hoben ey ta uno cu su fe ta den Cristo, cu ta e unico cu por salba nos for di e rabia di Dios cu ta bini. Pero, sinembargo, mi kier a duna e spiertamento aki. No ta basta pa nos tin un Beibel sea den nos saco di camisa of den tas, of den auto, of den cas. E Beibel ey ariba su mes NO POR SALBA NOS. Ta e mensahe cu nos ta lesa den nos Beibel cu ta papia cu nos tocante nos Señor y Salbador JesuCristo cu ta salba nos. Esey ta si nos kere cu henter nos curason cu ta pa nos picanan El a muri y resucita di morto pa E trece nos serca Dios. Den e nomber di Señor Jesus, nos ta combida y roga na cada uno cu ta lesa esaki, pa bo repenti di bo picanan y pone bo fe den Señor Jesus. E ora bo lo experimenta e poder di Dios cu tin den e Evangelio cu nos ta proclamando.

Scirbí y prepará pa Bicento y Betty Henriquez

No lubida, cu bo por pasa Libreria Victoria na Aruba, situa na 25 Elleboogstraat, Oranjestad, pa cumpra Beibel, y otro material Cristian. Na Curaçao, bishita Boekhandel Evangelico, St. Thomas #17 pa busca bo Beibel, buki, tarheta, y na Bonaire, Den Statia 2.

Saturday, August 11, 2007

E EVANGELIO #2

Bon dia, bon dia na tur nos amigonan bibando ariba nos dushi islanan di Aruba, Bonaire i Curaçao. Nos ta desea kada uno di boso un bon dia den Señor. Segun nos no ta pasa dia ku nos no ta kòrda ariba boso! Sigur sigur nos kurason ta ei ketu bai. Awe nos ta sigui ariba e tópiko di biaha pasá, ma awe ta e turno pa skirbí den e ortografia di Kòrsow i Boneiru. Nos ta sugerí pa lesa e mensahe poko poko meditando riba kada palabra òf pensamentu, i pidi Señor duna bo komprendementu segun ku bo ta lesa.

E EVANGELIO

Den nos prome komentario tokante e palabra Evangelio, nos a menshoná ku e palabra ei no ta nifiká religion, pero su berdaderu nifikashon den nos idioma Papiamento ta: Bon Nobo, òf Bon Notisia. I e Bon Notisia aki ta pa henter mundu. E ta Dios Su boluntat pa kada persona den e mundu di awe tende e Bon Notisia aki aloménos un bes. I no solamente pa tende e Bon Nobo; ma ker’e tambe.

Awe lo mi elaborá un poko mas tokante RELIGION. Aunke esei ta zona simpel, tòg e no ta asina. Un hende por yega asina leu ku asta e por duna su bida pa su religion, keriendo ku e ta hasiendo un fabor na e Señor nos Dios. Siendo ku ya mi a menshoná den nos prome mensahe tokante e palabra Evangelio; ku mayoria di Antiyanonan y Arubanonan ta religioso; awe lo mi kontinuá riba e tema ei.

RELIGION no ta algu malu ariba su mes, ma ta ora ku religion ta enkontraste ku e Evangelio di grasia di Dios, e ta bira un berdadero problema . Ku reverensia i temor mi lo remarká aki, ku e palabra Evangelio ariba su mes so, tampoko no tin nifikashon. Nos a tende e palabra ei fo’i tempu ku nos tabata mucha sin ku nos tabatin un idea ta kico e ta nifiká.

E palabra EVANGELIO ta parti di un kadena di nòmber i di akshon i di echunan. Loke mi ta referí na ne ta ku e Evangelio ta konsekuensia di amor i poder i grasia i miserikòrdia i sabiduria i fieldat, i tambe di e huisio di Dios kontra piká i di e sakrifisio kostoso di parti di Dios, pa nos ku ta pekadornan, tur di nos, por risibí pordon i bida eternu basá riba esei.

E Skrituranan ta bisa nos lo siguiente: “Kiko anto nos lo bisa di e kosnan aki? Si Dios ta pa nos, kende por ta kontra nos? E ku no a spar ni Su propio Yiu, ma e entregu’E pa nos tur, kon E lo no duna nos tambe, hunto ku nE, tur kos di grasia? Ken lo trese un akusashon kontra esnan ku Dios a skohe? Ta Dios ta Esun ku ta hustifiká. Ken ta Esun ku ta kondená? Kristu Hesus ta Esun ku a muri, ademas Kende a wòrdu lantá for di morto, i ta na man drechi di Dios, i ta intersedé pa nos. Ken lo separá nos for di e amor di Kristu? Tribulashon òf angustia òf persiguimentu, òf hamber òf desnudes, òf peliger òf spada? Manera ta para skirbí: Pa Bo kousa nos ta enfrentá morto henter dia; nos ta konsiderá manera karné pa wòrdu matá. Ma den tur e kosnan aki nos ta mas ku vensedornan dor di Esun ku a stima nos. Pasobra mi ta konvensé ku ni morto, ni bida, ni angelnan, ni prinsipadonan, ni e presente ni e futuro, ni podernan, ni haltura ni profundidat, ni ningun otro kos den henter kreashon, lo ta kapas pa separá nos for di e amor di Dios ku ta den Kristu Hesus, nos Señor.” (Romanonan 8: 31-39). Einan, amigonan, i muchu mas ta e frutanan di e Evangelio di Dios.

E Evangelio ta wòrdu yamá: “E poder di Dios pa salbashon di kada unu ku ta kere, pasobra den e Evangelio un hustisia for di Dios ta revelá, un hustisia ku ta di fe pa fe, net manera ku ta para skirbí: “ E hustu lo biba di fe.” E parti unda nos ta lesa, un hustisia for di Dios, ta nifiká ku Dios ta deklará e pekador ku a repentí di su pikánan i a kere di kurason den Hesus ku a muri pa nos pikánan, komo hustu òf hustifiká. Dios e Tata, ta deklará e pekador ku ta repentí i kere e Evangelio komo hustu, basá ariba e hustisia di Kristo Hesus, Kende ta e úniku ku nunka a kometé piká durante mas òf ménos 33 aña, durante kualnan El a wòrdu tentá meskos ku nos, pero sin kometé piká. Además El a bai rònd den e puebel hasiendo bon na tur hende sin eksepshon. Den otro palabra simpel: Hesus a meresé komo rekompensa pa un bida santu bou di pruebanan intenso di wòrdu deklará komo hustu dor di e Tata. Hesus, anto, ta e úniku persona den un kurpa humano ku a meresé e nòmber hustu. E UNIKU HUSTU.

Den Echunan 3:14, e Apòstel Pedro ta reprendé e puebel Hudiu ku a rechasá Hesus komo nan Mesías bisando: “Ma boso a nenga Esun Santu i Hustu,” ets., ets. I e mes Apòstel aki den 1 Pedro 3:18 ta deklará: Pasobra Kristu a muri pa pikánan un bes pa semper, e Hustu pa e inhustunan, pa trese nos serka Dios.

P’esei, Amigunan; ta e hustisia aki di nos Señor Hesus, ta ser kontá komo di nos, si nos repentí I kere den djE di henter nos kurason. Esei ta e Bon Nobo ku nos ta presentá awe na tur nos amigonan ku ta di e islanan di habla Papiamentu. Si bo a tende Su bos awe; no hasi bo kurason duru.
Skirbi i prepará pa Bicento y Betty Henriquez

Si bo tin pregunta òf komentario, sinti liber pa skirbi nos na: bbhenriquez@shaw.ca Nos lo ta mas ku kontentu pa kontestá segun ku nos por for di e Palabra di Dios komo base. Semper e ta enkurashá nos pa tende for di boso ku ta bishitá nos Blog. Danki na esunnan ku a skirbi nos den e dianan ak!

Bon Bini for di nos Balcon!



Bon dia amigonan y amiganan. Bonbini na nos “Blogspot” awe. Nos ta cuminda boso for di nos Balcon, ariba e di cinco piso, di e edificio grandi yamá “Bethany Manor”cu tin mas cu 500 biehito/anan, manera Bicento y ami, Betty ta biba. Nos ta gosa nos flornan y matanan, cu nos a planta na luna di Mei, y cu awor ta floria den nan gloria!

Danki pa bishita nos “Blogspot”. E emailnan cu nos ta ricibi ta encurasha nos pa sigui “Post” mensahenan cortico y di emergencia pa e temponan den cual nos ta bibando awe. Nos topico awe ta:


“E EVANGELIO” – y kico e ta nifica.

E gran mayoria di Antiyanonan a tende e palabra “evangelio” for di tempo cu nos tabata mucha. Pa mayoria di nos e palabra ey tabata solamente un palabra religioso, y nunca nos a busca pa sabi ta kico e palabra Evangelio ta nifica. Pero ya pa awe, hopi di nos Antiyanonan tin un idea di su nificacion, aunke te ainda mayoria no a ricibi Esun kende ta e causa di e Evangelio. (y ta cu tristesa, mi tin cu bisa esey.)

Pa cuminsa, e palabra Evangelio no ta nifica un religion. Manera nos sabi, mayoria di Antiyano ta religioso, y ta mara na un of otro religion. Den mayoria di caso, nos ta lanta haya nos mes mara na un religion basa riba decision di nos mayornan, kendenan tambe a ricibi esey door di nan mayornan.

Nos por puntra: Kico anto e palabra Evangelio ta nifica? E contesta, amigonan, nos ta hay’e directamente for di e Scrituranan Santo. Pa cuminsa nos ta lesa fo’i Lucas 4:17-21 lo siguiente: “Y nan a dun’E e buki di Profeta Isaias. Y El a habri’e, y a haya e lugar unda tabata scirbi: E Spirito di Señor ta riba Mi, pasobra El a ungui Mi pa predica bon noticia na e pobernan. El a manda Mi pa proclama libertad pa e prisioneronan, y recobracion di bista pa e ciegonan, pa duna libertad na e opriminan, pa proclama e aña di Señor Su fabor. Anto El a sera e buki, dun’e bek na e sirbidor y a sinta. Y bista di tur hende den e snoa tabata fiha ariba djE. Y El a bisa nan: “Awe e Scritura aki a keda cumpli den boso oido.”

Segun e Scritura aki amigo y amiganan; Señor Jesus ta siña cu E ta Esun cu Dios e Tata a autorisa pa predica e bon noticia di salbacion na pecadornan den henter mundo. Con El a haci esey? E contesta ta den e Scrituranan mes. Ehempel: Den e Buki di Mateo 16:21 nos ta lesa lo siguiente: “For di e tempo ey Jesus a cuminsa splica na Su discipelnan cu E mester bai na Jerusalem y sufri hopi cos na e mannan di e ancianonan, y sacerdotenan principal y e siñadornan di e ley; y cu E mester wordo mata, y wordo lanta riba e di tres dia.” Y den e mes un buki aki di Mateo 20:17-19 nos ta lesa: “Y ora Jesus tabata baiendo pa Jerusalem, El a hala e diesdos discipelnan un banda y a bisa nan: nos ta subiendo pa Jerusalem, y e Yiu di Hende lo ta traiciona na e sacerdotenan principal y e siñadornan di e ley. Nan lo conden’E na morto y lo entregu’e na e paganonan pa wordo bofona y suta y crucifica. Na di tres dia E lo wordo lanta.”

Si nos ta compara e Scrituranan aki cu esun di Lucas 4:16-21, nos por mira cu den Lucas 4, Jesus no tabata papiando di e pobernan material, ni esnan cu ta prisionero, y ni esnan ciego y oprimi fisicalmente; ma El a papia di e hendenan cu a biba e tempo y esunnan cu ta bibando awe. Aki nos tin di haci cu nos bida spiritual den e mundo aki. E ta papia di nos cu ta pober pa cu Dios, y cu ta boluntariamente prisioneronan di tur sorto di maldad, y cu ta ciego spiritualmente sirbiendo Satan sin sabi.

E Evangelio anto ta nifica: E BON NOBO of e BON NOTICIA cu tin pordona y liberacion pa medio di fe den e Jesus Kende a wordo traiciona y entrega den man di hende y a wordo maltrata y bofona y crucifica. Pero, Dios e Tata a dun’E bida atrobe na di tres dia, pa nos por ricibi pordon y bida eterno. ESAKI TA E EVANGELIO cu nos ta proclama awe, sea aki na Aruba y Antiyas, y na tur parti di mundo. Esaki ta e Bon Nobo cu e Apostelnan a sali y proclama cu awor tin bida eterno den e nomber di Jeus na cada uno cu REPENTI di pica y kere den Señor Jesus. Sin repentimento no tin pordon.

Amigonan, Scritura ta siña nos, cu despues di Su resureccion y glorificacion, Dios a duna Jesus e Spirito Santo cual El a manda pa convence nos di picanan pa nos por repenti y kere den Señor Jesus. Lesa Echunan 2:29-30 y Echunan 20:21. Sin repentimento, amigonan, no tin pordon.
Scirbí pa Bicento Henriquez

Nos ke recorda boso pa bishita Libreria Victoria, Elleboogstraat #25 na Aruba, y Boekhandel Evangelico na St. Thomas, Kòrsòw y Den Statie #2 na Bonaire. Eynan bo por cumpra bo propio Beibel na Papiamento, of den cualke idiomo cu bo tin mester, y otro material Christian.

Y no lubida di scirbi nos na: bbhenriques@shaw.ca