E EVANGELIO #2

Bon dia, bon dia na tur nos amigonan bibando ariba nos dushi islanan di Aruba, Bonaire i Curaçao. Nos ta desea kada uno di boso un bon dia den Señor. Segun nos no ta pasa dia ku nos no ta kòrda ariba boso! Sigur sigur nos kurason ta ei ketu bai. Awe nos ta sigui ariba e tópiko di biaha pasá, ma awe ta e turno pa skirbí den e ortografia di Kòrsow i Boneiru. Nos ta sugerí pa lesa e mensahe poko poko meditando riba kada palabra òf pensamentu, i pidi Señor duna bo komprendementu segun ku bo ta lesa.

E EVANGELIO

Den nos prome komentario tokante e palabra Evangelio, nos a menshoná ku e palabra ei no ta nifiká religion, pero su berdaderu nifikashon den nos idioma Papiamento ta: Bon Nobo, òf Bon Notisia. I e Bon Notisia aki ta pa henter mundu. E ta Dios Su boluntat pa kada persona den e mundu di awe tende e Bon Notisia aki aloménos un bes. I no solamente pa tende e Bon Nobo; ma ker’e tambe.

Awe lo mi elaborá un poko mas tokante RELIGION. Aunke esei ta zona simpel, tòg e no ta asina. Un hende por yega asina leu ku asta e por duna su bida pa su religion, keriendo ku e ta hasiendo un fabor na e Señor nos Dios. Siendo ku ya mi a menshoná den nos prome mensahe tokante e palabra Evangelio; ku mayoria di Antiyanonan y Arubanonan ta religioso; awe lo mi kontinuá riba e tema ei.

RELIGION no ta algu malu ariba su mes, ma ta ora ku religion ta enkontraste ku e Evangelio di grasia di Dios, e ta bira un berdadero problema . Ku reverensia i temor mi lo remarká aki, ku e palabra Evangelio ariba su mes so, tampoko no tin nifikashon. Nos a tende e palabra ei fo’i tempu ku nos tabata mucha sin ku nos tabatin un idea ta kico e ta nifiká.

E palabra EVANGELIO ta parti di un kadena di nòmber i di akshon i di echunan. Loke mi ta referí na ne ta ku e Evangelio ta konsekuensia di amor i poder i grasia i miserikòrdia i sabiduria i fieldat, i tambe di e huisio di Dios kontra piká i di e sakrifisio kostoso di parti di Dios, pa nos ku ta pekadornan, tur di nos, por risibí pordon i bida eternu basá riba esei.

E Skrituranan ta bisa nos lo siguiente: “Kiko anto nos lo bisa di e kosnan aki? Si Dios ta pa nos, kende por ta kontra nos? E ku no a spar ni Su propio Yiu, ma e entregu’E pa nos tur, kon E lo no duna nos tambe, hunto ku nE, tur kos di grasia? Ken lo trese un akusashon kontra esnan ku Dios a skohe? Ta Dios ta Esun ku ta hustifiká. Ken ta Esun ku ta kondená? Kristu Hesus ta Esun ku a muri, ademas Kende a wòrdu lantá for di morto, i ta na man drechi di Dios, i ta intersedé pa nos. Ken lo separá nos for di e amor di Kristu? Tribulashon òf angustia òf persiguimentu, òf hamber òf desnudes, òf peliger òf spada? Manera ta para skirbí: Pa Bo kousa nos ta enfrentá morto henter dia; nos ta konsiderá manera karné pa wòrdu matá. Ma den tur e kosnan aki nos ta mas ku vensedornan dor di Esun ku a stima nos. Pasobra mi ta konvensé ku ni morto, ni bida, ni angelnan, ni prinsipadonan, ni e presente ni e futuro, ni podernan, ni haltura ni profundidat, ni ningun otro kos den henter kreashon, lo ta kapas pa separá nos for di e amor di Dios ku ta den Kristu Hesus, nos Señor.” (Romanonan 8: 31-39). Einan, amigonan, i muchu mas ta e frutanan di e Evangelio di Dios.

E Evangelio ta wòrdu yamá: “E poder di Dios pa salbashon di kada unu ku ta kere, pasobra den e Evangelio un hustisia for di Dios ta revelá, un hustisia ku ta di fe pa fe, net manera ku ta para skirbí: “ E hustu lo biba di fe.” E parti unda nos ta lesa, un hustisia for di Dios, ta nifiká ku Dios ta deklará e pekador ku a repentí di su pikánan i a kere di kurason den Hesus ku a muri pa nos pikánan, komo hustu òf hustifiká. Dios e Tata, ta deklará e pekador ku ta repentí i kere e Evangelio komo hustu, basá ariba e hustisia di Kristo Hesus, Kende ta e úniku ku nunka a kometé piká durante mas òf ménos 33 aña, durante kualnan El a wòrdu tentá meskos ku nos, pero sin kometé piká. Además El a bai rònd den e puebel hasiendo bon na tur hende sin eksepshon. Den otro palabra simpel: Hesus a meresé komo rekompensa pa un bida santu bou di pruebanan intenso di wòrdu deklará komo hustu dor di e Tata. Hesus, anto, ta e úniku persona den un kurpa humano ku a meresé e nòmber hustu. E UNIKU HUSTU.

Den Echunan 3:14, e Apòstel Pedro ta reprendé e puebel Hudiu ku a rechasá Hesus komo nan Mesías bisando: “Ma boso a nenga Esun Santu i Hustu,” ets., ets. I e mes Apòstel aki den 1 Pedro 3:18 ta deklará: Pasobra Kristu a muri pa pikánan un bes pa semper, e Hustu pa e inhustunan, pa trese nos serka Dios.

P’esei, Amigunan; ta e hustisia aki di nos Señor Hesus, ta ser kontá komo di nos, si nos repentí I kere den djE di henter nos kurason. Esei ta e Bon Nobo ku nos ta presentá awe na tur nos amigonan ku ta di e islanan di habla Papiamentu. Si bo a tende Su bos awe; no hasi bo kurason duru.
Skirbi i prepará pa Bicento y Betty Henriquez

Si bo tin pregunta òf komentario, sinti liber pa skirbi nos na: bbhenriquez@shaw.ca Nos lo ta mas ku kontentu pa kontestá segun ku nos por for di e Palabra di Dios komo base. Semper e ta enkurashá nos pa tende for di boso ku ta bishitá nos Blog. Danki na esunnan ku a skirbi nos den e dianan ak!