Friday, May 25, 2007

SABIDURIA #2



Amigunan, awe nos ta kontinuá ku e tópiko di Sabiduria, i loke Skritura ta siña tokante di esei. Den nos promé mensahe tokante e tópiko aki, mi a menshoná ku nos mundu awe ta yen di sabiduria den tur ramo; pero apesar di e alkanse asombroso di sabiduria humano, e no ta yega mas leu ku morto. Si bo lo lesa Salmo 49, bo lo mira ku nada no a kambia di e tempu pa awe. Mi ta repetí, sinembargo, ku sabiduria y konosementu y abilidat, etc., no ta algu malu ariba su mes. Pero Skritura ta siña i ta spierta nos, ku e sabiduria humano ta enkontraste ku e sabiduria di Dios.

Ehempel: Den Skritura nos ta lesa lo siguiente: “Pasobra e mensahe di e krus ta bobedat pa esunnan ku ta peresiendo, ma pa nos ku ta wòrdu salbá, e ta e poder di Dios. Pasobra ta para skirbí: Mi lo destrui e sabiduria di e sabínan; i e inteligensia di e inteligentenan lo Mi frustra.” Anto e Apòstel ta sigui bisa, “Unda e hende sabí ta? Unda e eskolar? Unda e filósofo di e era aki ta? Dios no a hasi e sabiduria di e mundu aki bobedat? Pasobra siendo ku den e sabiduria di Dios, e mundu pa medio di su sabiduria no konos’E; Dios tabata agradá pa dor di e bobedat di loke a wòrdu prediká, pa salba esunnan ku ta kere. Hudiunan ta demandá siñalnan milagroso, y griegunan ta buska sabiduria, ma nos ta prediká Kristo krusifiká, un piedra di trompiká pa hudiunan, i lokura pa e paganunan, ma pa esunan ku Dios a yama, tantu ta hudiu y griegu, Kristo ta e poder di Dios i e sabiduria di Dios. Pasobra e (asina yamá) lokura di Dios, ta mas sabí ku hende, i e (loke ta parse) debilidat di Dios ta mas fuerte ku fortalesa di hende.”

Skirbiendo na e rumannan den e fe na Kolosa, e Apòstel Pablo ta bisa lo siguiente: “Mi kier pa boso sabi kuanto mi ta luchando pa boso, i pa esunnan na Laodisea, i pa tur ku no a kontra ku mi personalmente. Mi propósito ta ku nan por ta enkurashá di kurason i uni den stimashon, pa nan por tin e rikesa di komprendementu kompletu, pa nan por konosé e misterio di Dios, esta, Kristo, den Kende tur e tesoro di sabiduria i di konosementu ta skondí. Mi ta bisa boso esaki pa ningun hende no gaña boso ku argumentonan ku ta zona bunita.” (Kolosensenan 2:1-4)

Amigonan, nos tambe ta enkurashá kada uno di boso pa un bes i pa semper pone boso konfiansa den Hesus pa pordon di pikánan i bida eternu.

Si bo ta un hoben ku ta studiando aktualmente, bo no tin mester di neglishá bo estudio pa bo sigui Kristo. Alkontrario! Laga Kristo ta e promé den bo bida i sigui ku bo estudio; bo por ta un bon testimonio pa otro hobennan estudiante. Si ya bo a kaba ku bo estudio i ta okupá un òf otro puesto di trabou, laga Kristo ta e promé den bo bida i sea un bon testimonio pa bo kompañeronan di trabou. Si bo tin plan di sigui ku estudio mas avansá, no laga esei stroba bo di repentí i kere Evangelio, i sigui ku bo estudio i ta un bon ehempel pa otronan.

Si bo a frakasá den bo bida personal, kòrda Kristo ta stima bo, i a muri i a resucitá pa bo, i ta yama pa bo. No lubidá ku den djE, tur e tesoronan di sabiduria i konosementu ta skondí. Kòrda ku Kristo ta e poder di Dios, i e sabiduria di Dios den ki situashon ku bo por ta, sea bon òf malu. Dios ta yama pa nos repentí i kere den Señor Hesus. No tin diferensia, tur hende a peka i ta falta e gloria di Dios. Ma Hesus a muri den nos lugá ariba un krus, kargando den Su kurpa nos pikánan. Ma e Tata a lant’E for di morto i a glorifik’E. Obedesé Dios awe, i pone bo fe den Su Yiu i sea salbá.
Skirbí i prepará Bicento i Betty Henriquez
#534, 120 La Ronge Road,
Saskatoon, SK., Canada
S7K 7Z9

SABIDURIA - #1



Amigo y Amiganan di abla Papiamento, awe mi ta cuminsa un topico hopi importante relaciona cu e Evangelio di Cristo, nos Señor. Y e topico ta di SABIDURIA. Nos mundo ta yen di evidencia cu ta resultado di sabiduria humano alcansa dor di añanan di investigacion y di scrudiñamento y kibramento di cabes, etc., etc.

Nos no ta nenga cu sabiduria humano tin su parti bon pa henter humanidad, pero e sabiduria humano NO ta alcansa mas leu cu e graf, of sea morto. Si nos ta bai un poco atras den historia, nos lo haya sabi, cuanto humanidad a logra pa medio di sabiduria. Y particularmente na e final di dos mileño y ta siguiendo den e di tres mileño den cual nos ta actualmente. Sinembargo, apesar di tanto sabiduria cu tin awe na desposicion di hende, toch morto ta sigui mescos; e rico, e pober, e poderoso, y e debil, bieu y hoben – no ta haci diferencia.

Tin dos porcion di Scritura cu nos ta encurasha esunnan cu ta lesando e mensahe cortico aki, pa bo busca y lesa. E prome ta SALMO 49 completo, y e di dos ta PROME CORINTIONAN capitulo uno completo. Salmo 49 ta splica na placa chikito e banidad di un bida sin Dios y sin speransa. Y e spiertamento ta pa e rico y e pober sin excepcion. Mientras cu e buki di Corintionan uno ta presenta e Yiu di Dios, nos Señor Jesus, e Cristo como SABIDURIA for di DIOS, y cu E ta nos husticia, y nos santidad, y nos redencion. Aki e Cristo cu a wordo mata ariba un crus ta wordo presenta na henter mundo, incluyendo na abo cu ta lesando esaki; como e poder di Dios, y e sabiduria di Dios. Aki nos ta lesa tambe, cu Dios a haci e sabiduria di e mundo aki locura y bobedad, y cu E lo frustra e inteligencia di e inteligentenan. Di ningun manera nos ta bisa cu e ta imposibel pa un persona cu ta bon educa y tin un puesto importante den comunidad wordo salba, of un persona cu ta un bon atleta, etc., etc. PERO, loke si Beibel ta siña bon cla ta: cu tur hende mester repenti y kere Evangelio pa e por ta salba! Sea bon educa of no; sea di famia halto, of di famia comun y pober, no tin excepcion. Nos tur y cada uno mester repenti di nos picanan y ricibi Señor Jesus como nos unico Salbador.

Pues, amigo y amiganan; si bo a tende Su bos awe, no haci bo curason duro. Obedece y biba; pakico bo mester muri den bo picanan sin speransa? Dios ta stima nos, y E ta stima bo y ta yama bo pa bo sea reconcilia cu nE dor di kere den Esun cu a carga nos picanan den Su curpa ariba e crus. Y cu El a lamta for di morto pa medio di Su poder. Y Scritura ta bisa nos cu no tin salbacion den ningun otro, pasobra no tin ningun otro nomber bou di cielo duna na hende pa medio di cual nos por ta salba. Y ken cu invoca e nomber di Señor lo ta salba. Haci esey awe, haci’e awor, pasobra e Señor mes lo yuda bo pa medio di Su Spirito.

Aki den un dos dia, si Dios permiti, nos lo sigui cu e topico aki ariba SABIDURIA. Semper nos ta contento si nos tende cu un persona a lesa nos mensahenan cortico basa ariba e loke Scritura ta bisa. Masha danki pa esnan cu a scirbi bisa nos cu nan a lesa loke nos a scirbi. Esey ta encurasha nos pa sigui cu e ministerio aki. Si bo a lesa esaki, tuma un rato y manda nos un Email. Pues, te otro biaha! Bicento y Betty Henriquez

Tuesday, May 15, 2007

BETTY A YEGA E "BIG ONE" - 80 aña - April 25, 2007



Bon dia na un y tur! Nos ta cuminda boso awe mainta for di nos luga di biba aki na Canada. Den e dianan aki nos ta gosando masha e cambio gradual di Primavera na Zomer! Nos ta ocupa den pleimento di nos flornan, ta plantando simia di esaki esaya y awor ta gosa con nan a spreit y ta crece.

Ami, Betty, a haci aña dia 25 di April: esun cu nan ta yama aki: “THE BIG ONE”. Mi a cumpli 80 aña. Bishita di famia, e-mailnan na cantidad, carchinan, yamadanan di telefon for di Aruba, bolo, comemento, boket di flor for di Boneiru , tur a contribui na un dia precioso! Dios tabata fiel, y masha misericordioso pa cu mi door di e ochenta añanan largo cu El a permiti mi biba riba e mundo aki! Mi ta gradici E awe, pa Su fieldad, y cu mi a tende e Evangelio ora mi tabatin 12 aña di edad. Mi a comprende cu mi tabata un pecador y tabatin mester di arepenti y kere den Jesus Cristo, e Yiu di Dios, como mi Salbador personal. NUNCA a duel mi, te na e momento aki cu mi ta scirbiendo esaki. E dia ey, mi a confesa mi pica dilanti Dios, y mi tambe a confesa Cristo como mi Salbador dilanti hende. Mi a confes’E dilanti mi mayornan y mi amigonan.

Awe Bicento ta continua riba e tema: CONFESION. Den henter Antiyas e palabra CONFESION OF CONFESA ta bon conoci. Particularmente CONFESION AURICULAR, cu ta nifica; pa confesa den orea di un otro persona loke bo a haci of laga di haci.

Den nos prome mensahe tocante e tema aki, nos a mira e porcion di Scritura cu ta papia cu nos tocante esaki, den e buki di Romanonan 10: 8-11. Y nos a conseha na amigo y amiganan, pa lesa e Capitulo dies di Romannan completo. Pasobra e porcion di Scritura ey ta enfatisa hopi cla y cu autoridad e necesidad absoluto pa nos personalmente y di curason confesa cu Jesus ta Señor y cu Dios a lanta Jesus for di morto, pa nos por ta salba. Y ey e ta enfatisa cu ta cu nos curason nos ta kere y ta wordo hustifica, y ta cu nos boca nos ta confesa y ta salba. P’esey nos ta bolbe pidi y roga na cada uno cu ta lesa esaki, pa bo lesa Romanonan dies completo. Y mientras, of prome cu bo ta les’e, pidi na Dios, pa E yuda bo comprende, y duna bo e curashi pa obedece. Hamas y nunca lo duel bo cu bo a pone bo fe den Señor Jesus.

Un otro parti di CONFESION ta esun dilanti di hende, Y si nos ta kere cu esey ta simple y facil, nos por ta masha kiboca. Masha hopi hende lastimamente, ta bolbe atras na perdicion, pa motibo di miedo di hende. Miedo di Lidernan Religioso, miedo di hendenan di cas, y di amigonan di trabou of di bo lasonan social den deporte, etc.,etc.

Nos ta enfatisa aki, cu pa un persona obedece e Evangelio bendiciona di Dios, e tin mester di e poder di Dios Su mes pa haci e decision aki. Danki Dios cu e poder ey, ta compaña e Evangelio for di principio y te awe, y lo ta te na e final. Ta p’esey cu Dios a duna e Spirito Santo na Señor Jesus, Kende a manda e Spirito aki riba e dia di Pentecostes pa keda cu nos te na final di e era aki. Lesa Juan 15: 26, 27 y Juan 16: 5 - 16, y tambe Echunan 2: 29 - 33.

Bolbiendo na e importancia di CONFESA Jesus dilanti di hende, nos ta lesa den Mateo 10: 32 lo siguiente: “P’esey, ken cu confesa Mi dilanti di hende, esey lo Mi confesa tambe dilanti di Mi Tata cu ta den cielo. Ma ken cu nenga Mi dilanti di hende, esey Mi tambe lo nenga dilanti Mi Tata cu ta den cielo.”

Ta p’esey Amigonan cu na un otro luga nos ta lesa: “Como trahadornan hunto cu Dios nos ta urgi boso pa no ricibi e gracia di Dios enbano. Pasobra E ta bisa, den e tempo di Mi fabor Mi a scucha bo, y den e dia di salbacion Mi a yuda bo. Mi ta bisa boso, awor ta e tempo di Dios Su fabor, awor ta e dia di salbacion.” 2 Cor. 6:1,2 NIV

Ademas den Echunan 17:30, 31 tin e spiertamento aki: “Den e tempo cu a pasa Dios a tolera sorto di ignorancia asina, ma awor E ta comanda tur hende na tur parti pa repenti, Pasobra El a fiha un dia den cual E lo huzga e mundo cu husticia pa medio di e homber cu El a apunta. El a duna prueba di esaki na tur hende door di a lant’E for di morto.” (traduci for di NIV (cual ta nifica “New International Version”)

Amigo y amiganan, nos ta pidi hunto cu boso, pa Dios Su yudansa net na tempo pa yuda pa obedece, e sea libera den Cristo, nos Señor.

Y corda: TARDANSA TA DESOBEDIENCIA.

Saturday, May 12, 2007

Un splicacion

E foto di Sr. Bicento comiendo su pastechi banda di e riu "North Saskatchewan" ta mas abao - tras di e mensahe.

E autor Bicento Henriquez ta gosando un "Pastechi di Bacalau" sinta na Riu aki na Canada!

Oh, si, aki na Canada nos ta gosando nos pastechinan di bacalau, di carn'baca, di keshi Gouda "yonge kaas", nos banana hasa, papaya, mango! Mi ta percura cu Bicento no ta falta su cumindanan Arubano - asta bonchi cu carni'sa, etc. etc. Corda cu mi a pasa un 50 aña na Aruba y Bonaire; ami ta gusta masha tur e cumindanan ey! Ma di otro banda, mi ta keda admira con Sr. Bicento a custumbra cu cuminda Canades! Boso mester wak e baha un plato di "Perogies" y "Farmer Sausage"!

CONFESION

E mensahe pa awe ta tocante Confesion òf Confesá. Y esaki tabata y ta te ariba e dia di awe, algo hopi conoci na Aruba y henter Antiyas.

Den Scritura e palabra “Confesa”, tin mas cu un nificacion. Nos lo purba studia dos di nan awe. E prome ta den Romanonan 10:8-11. “Ma kico e ta bisa? E palabra ta pega cu bo; e ta den bo boca y den bo curason, esta e palabra di fe cu nos ta proclamando: cu si bo CONFESA cu bo boca, Jesus ta Señor, y kere den bo curason cu Dios a lant’E for di morto, bo lo ta salba. Pasobra ta cu bo curason bo ta kere, y ta hustifica, y ta cu bo boca bo ta confesa y ta salba. Manera cu e Scritura ta bisa, esun cu ta confia den djE, nunca lo wordo poni na berguensa.” Lesa Romanonan Capitulo dies completo, y tambe Mateo 10:32-33.

E invitacion aki pa ricibi pordon y bida eterno ta ofreci na tur hende di mundo sin excepcion. Pone bon atencion cu e palabra mester sali for di cada uno di nos su mes boca despues of ora cu nos a kere cu nos curason.

Amigonan y amiganan; ningun hende den e mundu aki por kere pa nos, ni confesa pa nos. E palabra confesa por nifica: “pa admiti, of pa reconoce”. Ta nos mes, y ningun otro persona por admiti den nos luga cu nos ta un pecador, y ta nos mes mester kere di curason cu Dios a lanta Su yiu for di morto. Y nos mester comprende cu ta pa nos picanan El a muri, pasobra E mes no a conoce pica, y ningun mentira a wordo haya den Su boca. Nos mester comprende bon cla, cu no ta posibel pa nos sconde nos picanan dilanti di Dios. E conoce cada uno di nos net manera cu nos ta.

E palabra confesion por nifica tambe: “pa papia mescos”. Ke meen: pa papia mescos cu loke ya Dios sabi di nos. Nos por puntra: “Pero con por ta posibel pa Dios stima un pecador manera mi siendo cu E ta conoce mi net manera mi ta?” E contesta ta cla y berdadero scirbi pa nos den Scritura. Ehempel: den e buki di Romanonan 5:6-8: “Pasobra tempo cu nos tabata sin forsa ainda, ma na e tempo apropia, Cristo a muri pa e impionan. Pasobra apenas un hende lo muri pa un hende husto; aunke kisas pa un bon hende, algun por risca muri. Ma Dios ta demostra Su propio amor pa cu nos den esaki; cu tempo nos tabata pecadornan ainda Cristo a muri pa nos.”

P’esey amigonan; no haci bo mes sordo pa e yamanda di Dios awe. REPENTI di bo picanan, y acepta e pordon cu Dios ta ofrece na bo awe. No cera bo curason, pasobra ningun di nos sabi kiko un dia por trece cu ne.

Scirbi pa Bicento Henriquez

Sinti liber pa “ download” y “print” e mensahe aki, of cualke otro di e mensahenan, y parti nan cu bo famianan y amigonan.

FELICITACION – nos kier duna nos felicitacion na Angelica Croes doño di LIBRERIA VICTORIA cu a cumpli 25 aña di tene e portanan di LV habri pa e puebel di Aruba! Masha Pa Bien!!