SABIDURIA - #1

Amigo y Amiganan di abla Papiamento, awe mi ta cuminsa un topico hopi importante relaciona cu e Evangelio di Cristo, nos Señor. Y e topico ta di SABIDURIA. Nos mundo ta yen di evidencia cu ta resultado di sabiduria humano alcansa dor di añanan di investigacion y di scrudiñamento y kibramento di cabes, etc., etc.

Nos no ta nenga cu sabiduria humano tin su parti bon pa henter humanidad, pero e sabiduria humano NO ta alcansa mas leu cu e graf, of sea morto. Si nos ta bai un poco atras den historia, nos lo haya sabi, cuanto humanidad a logra pa medio di sabiduria. Y particularmente na e final di dos mileño y ta siguiendo den e di tres mileño den cual nos ta actualmente. Sinembargo, apesar di tanto sabiduria cu tin awe na desposicion di hende, toch morto ta sigui mescos; e rico, e pober, e poderoso, y e debil, bieu y hoben – no ta haci diferencia.

Tin dos porcion di Scritura cu nos ta encurasha esunnan cu ta lesando e mensahe cortico aki, pa bo busca y lesa. E prome ta SALMO 49 completo, y e di dos ta PROME CORINTIONAN capitulo uno completo. Salmo 49 ta splica na placa chikito e banidad di un bida sin Dios y sin speransa. Y e spiertamento ta pa e rico y e pober sin excepcion. Mientras cu e buki di Corintionan uno ta presenta e Yiu di Dios, nos Señor Jesus, e Cristo como SABIDURIA for di DIOS, y cu E ta nos husticia, y nos santidad, y nos redencion. Aki e Cristo cu a wordo mata ariba un crus ta wordo presenta na henter mundo, incluyendo na abo cu ta lesando esaki; como e poder di Dios, y e sabiduria di Dios. Aki nos ta lesa tambe, cu Dios a haci e sabiduria di e mundo aki locura y bobedad, y cu E lo frustra e inteligencia di e inteligentenan. Di ningun manera nos ta bisa cu e ta imposibel pa un persona cu ta bon educa y tin un puesto importante den comunidad wordo salba, of un persona cu ta un bon atleta, etc., etc. PERO, loke si Beibel ta siña bon cla ta: cu tur hende mester repenti y kere Evangelio pa e por ta salba! Sea bon educa of no; sea di famia halto, of di famia comun y pober, no tin excepcion. Nos tur y cada uno mester repenti di nos picanan y ricibi Señor Jesus como nos unico Salbador.

Pues, amigo y amiganan; si bo a tende Su bos awe, no haci bo curason duro. Obedece y biba; pakico bo mester muri den bo picanan sin speransa? Dios ta stima nos, y E ta stima bo y ta yama bo pa bo sea reconcilia cu nE dor di kere den Esun cu a carga nos picanan den Su curpa ariba e crus. Y cu El a lamta for di morto pa medio di Su poder. Y Scritura ta bisa nos cu no tin salbacion den ningun otro, pasobra no tin ningun otro nomber bou di cielo duna na hende pa medio di cual nos por ta salba. Y ken cu invoca e nomber di Señor lo ta salba. Haci esey awe, haci’e awor, pasobra e Señor mes lo yuda bo pa medio di Su Spirito.

Aki den un dos dia, si Dios permiti, nos lo sigui cu e topico aki ariba SABIDURIA. Semper nos ta contento si nos tende cu un persona a lesa nos mensahenan cortico basa ariba e loke Scritura ta bisa. Masha danki pa esnan cu a scirbi bisa nos cu nan a lesa loke nos a scirbi. Esey ta encurasha nos pa sigui cu e ministerio aki. Si bo a lesa esaki, tuma un rato y manda nos un Email. Pues, te otro biaha! Bicento y Betty Henriquez