Thursday, April 12, 2012

FOTONAN RECIEN DI NOS Y NOS BIDA DIARIO







Bicento y ami banda di laman
Nos casita den progresso di wordo lanta
mas y mas halto e ta baiendo!!
Nos palo di bagoba carga cu fruta
Nos palo di mangoe carga mescos
Bicento sinta den nos sala!

E EVANGELIO



E foto aki ta di nos palo di Papaya cu nos a planta chikito asina seis luna pasa y awor ta carga cu papayanan dilanti nos casita.
Awor pa nos TEMA pa awe!



Manera nos sabi caba, of alomenos mester sabi, cu e palabra EVANGELIO traduci na Papiamento ta nifica: BON NOTICIA, of “BON NOBO”. Y segun Scritura, e ta Señor nos Dios Su boluntad pa e bon noticia aki wordo proclama den henter mundo y na tur hende. Y kico ta e bon noticia cu e Señor kier pa tur hende di mundo tende?
Amigonan stima pa Señor, Scritura Santo ta contesta e pregunta ey cla y sigur. Asina pronto cu e prome persona cu Dios a crea a desobedece Dios den Paraisoo, Dios a priminti un Salbador, Kende lo derota Satanas cu a causa e prome hende, Adam, pa peca. Y esey ta loke a tuma lugar, ora cu e Unico Yiu di Dios a nace for di e Birgen Maria na un manera unico. El a nace sin e naturalesa pecaminoso cual tur ser humano ta nace cu ne.

Esey ta uno di e motibonan pakico Señor Jesus ta wordo yama: “E ultimo Adam.” (1 Cor. 15:45-49) Esey no ta nifica cu Señor Jesus no a wordo tenta dor di Satanas; alcontrario, nos ta lesa cu nos Señor a wordo tenta den tur cos mescos cu nos, ma sin pica. Señor Jesus den un curpa humano mes cu nos ta nifica, cu El a sufri ora cu El a wordo tenta, pasobra E no a cai den pica. Asta tabatin momento cu Señor Jesus a grita yora na e Tata Kende por a libr’E for di morto. (Lesa sin falta Hebreonan 5:7-10).
P’esey amigonan di tur edad; hoben y ancianonan – ta para scirbi: Con nos lo por scapa si nos neglisha un salbacion asina grandi? Cu na prome lugar a wordo papia dor di Señor, y a wordo confirma na nos dor di esunnan cu a scuch’E.

Amigonan, un di e maneranan astuto cu Satanas ta logra gaña masha hopi ta: pa spera te despues di a caba bo studio, of pa spera te dia cu bo bira bieu, etc., etc. Resultado ta, cu miles di hende rond mundo ta muri sin repenti y obedece na e Evangelio di gracia di Dios. Te asta ariba e islanan aki, continuamente nos ta lesa of tende di hendenan cu ta muri prome cu nan a spera. Esey ta nifica pa muri sin speransa y sin Dios. Pasobra ta imposibel pa un hende yega serca e Tata, separa di fe den Esun cu a muri ariba e crus, y Kende Dios, e Tata, a duna bida atrobe despues di tres dia den un graf. Manera Scritura ta bisa nos hopi cla: “Y no tin salbacion den ningun otro, pasobra no tin otro nomber duna na hende bou di cielo, pa medio di cual nos mester wordo salba.” (Lesa Echunan 4:8-12).

Ta increibel , con apesar di spiertamentonan asina cla, toh hende ta sigui desobedece Dios caprichosamente dor di pone nan confiansa den otro nombernan cu nunca por salba ningun hende. Den casonan asina, hende ta rechasa e amor y e sacrificio di Dios, e Tata, y ta obedece na hende mortal y pecador, pa nan propio perdicion eterno. Nos cu ta scirbi e mensahe corto aki tabata den e mes un situcion prome cu nos a tende y kere y obedece e Evangelio bendiciona di Dios. Nos ta bai conclui cu e porcion aki di Scrtiura cu ta lo siguiente: Alabansa sea na e Dios y Tata di nos Señor JesuCristo, Kende a bendiciona nos den e lugarnan celestical cu tur bendicion spiritual den Cristo. Pasobra El a schoe nos den djE prome cu e creacion di mundo pa ta santo y sin culpa den Su bida. Den amor El a predestine nos pa ta adopta como Su Yiunan, dor di JesuCristo, di acuerdo cu Su placer y boluntad pa e alabansa di Su gracia glorioso, cual El a duna nos libremente den Esun cu E ta stima. (Lesa 1:3-14)
(Lo sigui e tema aki den un otro blog)

E Evangelio -continua

Ola tur lesador di nos BLOG - pa algun tempo nos no tabata conecta cu Internet, dor cu nos tabata keda na cas di otro hende. Ma awor nos ta den nos casita propio. Ki alegria y gratitud nos tin cu Dios a provee esaki pa nos.



E EVANGELIO – Continuacion
Den nos prome mensahe tocante e EVANGELIO, nos a menciona cu e palabra ey ta nifica: “Bon Noticia”, of: “Bon Nobo” Y e preciosidad di esey ta; cu e bon nobo aki ta bini for di Dios Haltisimo, y ta pa nos tur sin excepcion. Na manera di bisa, e prome cu a participa e bon nobo aki di un Salbador, tabata un angel. Asina aki nos ta lesa den Beibel, “Tabatin wardadornan di carne cu tabata keda den e sabananan ey, y cu anochi tabata tene warda riba nan tou di carne. Un Angel di Señor a presenta na nan, y e Gloria di Señor tabata resplandece rondo di nan, y nan a spanta masha. Pero e Angel a bisa nan: No tene miedo; Mi ta trece bon noticia pa boso di gran alegria, cu lo ta pa tur hende. Awe den e ciudad di David, a nace un Salbador pa boso; E ta Cristo, e Señor. Esaki lo ta e señal pa boso. Boso lo haya un Baby lora den paña, y drumi den un pesebre..” Y di ripiente a parce hunto cu e Angel un multitud di e ehersito Celestial, dunando alabansa na Dios bisando: “Gloria na Dios den halturanan, y ariba tera pas na hende, ariba Kende Su fabor ta descansa.” Lucas 2:8-14
E prome cos cu nos ta haya relaciona cu e Evangelio ta: “E nacemento di un Salbador.” Nos por hasi e pregunta: Un Salbador for di kico of for di unda? Den e prome buki den e Testament Nobo cu ta Mateo, den e prome capitulo, versnan 18-24, nos tin un relato of un splicacion con y pakico Dios a duna nos un Salbador. Aki nos ta lesa cu Señor nos Dios a manda un Angel pa splica na Jose cu e loke a tuma lugar cu su esposa Maria, tabata obra di Dios mediante e Spirito Santo. Y Maria lo duna lus na un Yiu Homber, y cu Jose mester dun’E e nomber Jesus, pasobra E lo salba su puebel for di nan picanan.
Pues, amigonan stima pa Señor Su mes, na unda parti cu bo por ta na e momento aki. Esaki ta e Bon Noticia cu nos tin pa participa y comparti: Dios, e Tata Todopoderoso a stima humanidad asina tanto cu El a manda y duna Su unico Yiu, pa salba nos for di nos picanan. Y con El a hasi esey? Kico Señor Jesus a hasi pa salba nos di nos picanan? E contesta berdadero nos ta haya den Scritura cual ta inspira pa e Spirito Santo di Dios. Y ey nos por lesa, cu Cristo a carga den Su curpa ariba e crus, e picanan di nos tur, pa di e manera ey nos por muri pa picanan y biba pa husticia; pasobra pa medio di Su heridanan, nos a wordo cura. Pasobra nos tabata manera carnenan cu a dwal, pero awor cada uno di nos cu ta kere di curason a bolbe na e Wardador y Cuidador di nos alma. Lesa 1 Pedro 2:20-25.
Laga nos pone bon atencion na e Palabra di Dios, cu ta bisa nos bon cla, cu no tin ni sikiera un bon hende den mundo cu ta merece bida eterno despues cu e muri. Tampoco no ta existi un forma di Religion cu por salba e pecador. Segun Scritura, no tin ni sikiera uno. E EVANGELIO no ta un religion, ma e ta e BON NOBO di pordon y bida eterno pa cada persona cu repenti di su bida di pica y acepta Señor Jesus como Salbador personal. Segun Scritura: Ken cu invoca e nomber di Señor, lo ta salba. Esey ta algo manera ora un persona convenci di su picanan ora cu e ta tende of lesa di e bon nobo di pordon di picanan y bida eterno den Cristo. Anto e persona, kende cu e por ta – sea un tata, of un mama, of un hoben masculino of feminino ta sclama na Dios: Awor mi ta repenti di mi bida di pica, y mi ta acepta Señor Jesus como mi unico Salbador.
Amigonan stima pa Señor Su mes, nos por garantisa segun Scritura, cu pa cada persona cu ta repenti di pica y desposita su fe den Cristo, tin goso den cielo pa e angelan di Señor. Pasobra sea sigur cu e no ta e boluntad di nos Tata Celestial, pa un solo persona bai perdi; ma pa tur por bini na repentimento, y na conocemento di e berdad. Corda e palabranan di nos Señor cu a bisa: Ningun por bini serca e Tata sino pa medio di Mi. Tambe El a bisa: Bini cerca Mi tur cu ta cansa y carga, y Ami lo duna boso descanso. Tuma Mi yugo ariba boso, y siña for di Mi; pasobra Mi ta mansu y umilde di curason, y boso lo haya descanso pa boso alma. O ki goso lo tin awe den cielo meimei di e Angelnan, pa cada persona cu repenti di henter su curason y confia Señor Jesus pa pordon di su picanan.