Bida Eterno y con pa hay'e - conclusion

E foto: Comiendo un "lekker" Salmou hunto cu nos amigonan -misioneronan cu a sirbi Señor pa hopi aña na Mali, Africa, y ademas nan ta famia. E señora ta yiu di Betty su madrasa.

Bida Eterno, y con pa hay'e:Esaki no ta nifica cu mi a bisa tur loke tin di bisa tocante di e topico aki. Pasobra esaki ta un doctrina cu tin di haci cu e proposito final di Dios revela door di Scritura Santo. E ta nos oracion na Dios nos Tata, den e nomber di Señor Jesus, cu henter Antiyas por ta salba y tin bida eterno. Y no solamente Antiyas ma tambe henter mundo mes. Bijbel ta bisa nos masha cla, cu Dios a stima mundo asina tanto, cu El a duna Su unico Yiu, pa ken ku kere den djE no bai perdi, ma tin bida eterno. Nos ultimo mensahe a termina cu e versiculo cu ta bisa, “Dios a duna nos bida eterno, y e bida aki ta den Su yiu. Esun cu tin e Yiu tin e bida; esun cu no tin e Yiu di Dios no tin e bida.” 1 Juan 5:10-12

Anto Juan ta continua bisando: “E cosnan aki mi a skirbi boso cu ta kere den e nomber di e Yiu di Dios, pa boso por sabi cu boso tin bida eterno.” Pone atencion cu e Apostel Juan no ta bisa cu kisas boso tin bida eterno, of probablemnte boso tin e bida eterno ey. Ma e ta bisa nos cu nos por sabi cu nos tin e bida eterno ey, esta cada persona cu ta kere den e Nomber di e Yiu di Dios.

P’esey, amigonan y amiganan, nos ta roga na cada uno cu ta lesa e mensahe aki; stop di confia den cualke otro nomber cu e speransa falso cu un dia bo lo tin bida eterno. Pasobra Bijbel ta bisa nos bon cla lo siguiente: “Y no tin salbacion den ningun otro; pasobra bou di cielo no tin ningun otro nomber cu a wordo duna na hende, pa medio di cual nos mester wordo salba.” Echunan 4:12.

Co-ciudadanonan Antiyano, ta awe y awor ta e momento di gracia pa cada uno di nos repenti di nos bida di pica, y pone nos fe den e Yiu di Dios Kende a carga nos picanan den Su curpa ariba un crus y a muri den nos luga y a wordo dera. Pero Dios a lant’E for di e mortonan despues di tres dia, y a hals’E te den halturanan, y a dun’E e nomber cu ta ariba tur nomber, cu pa e nomber di Jesus tur rudia lo dobla, di esnan cu ta den cielo, y riba tera, y bou di tera, y cu tur lenga lo confesa cu JesuCristo ta Señor, pa e gloria di Dios e Tata.

Mi ta repeti: Awe, y awor ta tempo pa cada uno di nos obedece Dios dor di kere den Su Yiu pa pordon di nos picanan y ricibi bida eterno. Bijbel ta bisa nos lo siguiente: “Como trahadornan hunto cu Dios nos ta urgi boso pa no ricibi e gracia di Dios enbano. Pasobra E ta bisa, “Den tempo aseptabel Mi a scucha bo, y riba e dia di salbacion Mi a yuda bo. Mira, awor ta e tempo di aceptacion, awor e ta e dia di salbacion.” 2 Cor. 6:1,2.

Ma awor por bin preguntanan manera: Pero con un hende por sabi cu e ta salba, y cu e tin e bida eterno ey awor mes den e curpa aki? Nos por sinti esey?

Otro persona por bisa: Ami semper a kere cu ta te despues di nos morto nos lo haya sabi ta ken cu ken lo ta salba, etc., etc.

Amigonan; pa e gracia y misericordia di Dios, nos por comprende pa cada persona cu tin sorto di preguntanan asina. Y mi no ta bisa cu sorto di preguntanan asina ta malo of robes. Pasobra ta ken nos ta pa bisa ken cu ken tin bida, y kende no tin e bida eterno ey, y si ta awor of despues. Sinembargo e contesta sigur tocante bida eterno, nos ta haya den Scrituranan Santo cu nos ta yama Bijbel. Pero Bijbel no ta un buki so, e ta un combinacion di hopi bukinan den un solo buki; y a wordo skirbi door di diferente autornan.

Si bo ta interesa den e historia di Bijbel, busca esey den un buki di historia. Pero, laga mi bisa esaki. E asunto di Bijbel ta di vital importancia, pasobra ta basa ariba autoridad di e Scritura Santo mi ta skirbi e mensahenan aki.

Awor tocante si nos por sinti cu nos tin bida eterno den e curpa aki; of si nos mester spera pa despues di morto pa nos haya sabi e berdad, mi contesta basa ariba Scritura ta lo siguiente.

Prome, tocante sintimento, y e contesta ta NO. Pakico mi por bisa esey? E contesta ta cu Scritura no ta menciona esey ni un bes. Loke si Scritura Santo ta menciona ta cu e persona cu repenti di su picanan y kere di curason den nos Señor JesuCristo, e persona aki tin bida eterno, y e lo no bini na huicio, ma a pasa for di morto na bida. (Juan 5:24). Y den un caso asina, e persona cu a kere di henter su curason den Señor Jesus, por ta yen di goso y por salta di alegria, etc., etc., pero su salbacion y bida eterno ta basa ariba su fe personal den nos Señor, y nunca ariba su goso of sintimento. Scritura ta firme y constante cu bida eterno ta pa medio di fe. Den e buki di Romanonan 1:16,17, nos ta lesa lo siguiente: Pasobra mi no tin berguensa di e Evangelio, pasobra esaki ta e poder di Dios pa salbacion pa tur cu ta kere……Pasobra den esaki e husticia di Dios ta keda revela di fe pa fe, manera ta para skirbi: e husto lo biba pa medio di fe. Ta nifica pues cu bida eterno ta basa ariba e palabra di Dios den e Evangelio, y nunca ariba con un hende ta sinti. E ta cla pa mira con un hende religioso por ta masha contento den e loke cu su religion ta siñ’e; aunke su siñansa ta bai contra e Evangelio. Tocante cu nos mester spera ta na fin despues di nos morto, wel, un idea asina ta contesta su mes. Y e contesta ta cu e ora lo ta muchu lat.

Ta awe y awor ta e DIA DI SALBACION. Sea sigur pa lesa nos siguiente mensahe of scirbi nos na: bbhenriquez@shaw.ca

Traha y prepara pa Bicento y Betty Henriquez

BIDA ETERNA - continua

Na fin di Siglo 18 y durante Siglo 19, a bin hopi cambio den henter mundo, incluyendo Antiya. E sistema di bida tabata masha simpel, y e mayoria di nos hendenan tabata pober materialmente. Hopi Arubianonan e tempo mester a bai busca trabou na lugarnan manera Cuba of Colombia. Noticia ta bin cu tin hopi trabao sea na Cuba of Colombia, y hopi di nos tatanan a dicidi di biaha sea pa Cuba of Colombia pa traha den plantashon di caña of di Cofi. Curaçao tabata algo similar, aunke mi sabi cu na Curaçao tabatin hopi trabou un tempo, unda cu hopi Arubiano a haya trabou. Mescos Bonaire tambe tabatin e mes un lucha, y den e tempo ey, hopi Boneriano a bira nabegante y asina sostene nan famia. E tempo biahmento no tabata rapido manera awe y comunicacion tabata via carta cu por a tuma hopi dia prome cu e famianan hay’e den nan man. E loke mi kier bisa ta esaki: Nos tatanan a risca nan bida pa nan por a sostene nos, y nos ta gradici nan pa esey.

Ma e mensahe aki ta tocante algo mucho mas importante cu tur eseynan, pasobra nos ta papiando di Bida eterna, y con pa hay’e. Unda mi mester bai pa haya e bida eterna ey? Acaso mi mester subi bai cielo pa haya sabi? Of mi mester crusa laman y bai Palestina of Roma pa mi haya esey? Bijbel ta siña nos lo siguiente, “No bisa den bo curason, Kende lo subi na cielo? (esta pa trece Cristo abou). Of, kende lo baha den e abismo? (esta pa trece Cristo ariba for di e mortonan). Pero kico e ta bisa? E Palabra ta serca di bo; e ta den bo boca, y den bo curason, esey ta e palabra di fe cu nos ta proclamando; cu si bo confesa cu bo boca, “Jesus ta Señor”, y kere den bo curason cu Dios a lant’E for di mortonan, bo lo ta salba. Pasobra e ta cu bo curason cu bo ta kere y ta hustifica, y ta cu bo boca bo ta confesa y ta salba manera Scritura ta bisa, Kende cu confia den djE, nunca lo wordo poni na berguensa. Pasobra no tin diferencia entre Judiu y pagano, e mes Señor ta Señor di tur, y ta bendiciona ricamente tur cu ta yama ariba djE, pasobra Kende cu yama ariba e nomber di Señor lo ta salba.” (Lesa bo mes den Romanonan 10:1-21.) Haci e cu respet y anticipacion. Pidi Señor cu bo mes boca pa E yuda bo pa comprende y pa ricibi e bida eterna aki, cual ta posibel unicamente dor di kere cu bo curason den e Yiu di Dios.

Mira cuanto bes e yamada personal y individual por ser haya den esun porcion di Scritura aki. Nos Tata Celestial ta yamando cada uno di nos pa nomber, pa nos repenti di nos picanan y acepta Su Yiu, e Señor JesuCristo como nos Salbador personal. Bida eterna ta solamente den Cristo, pasobra ta pa e proposito ey El a bini den mundo lagando Su Gloria cu E tabatin hunto cu Dios e Tata, di prome cu e mundo a existi. Anto El a tuma e forma di un sirbidor siendo haci den imahen of semehansa di hende, y hayando Su mes den e condicion ey, El a umiya Su mes y a obedece te na morto, asta morto riba un crus. Anto nos ta sigui lesa cu: “P’esey Dios a hals’E na e luga di mas halto, y a dun’E e nomber cu ta ariba tur nomber, cu pa e nomber di Jesus tur rudia mester dobla, den cielo y ariba tera y bou di tera y tur lenga lo confesa cu Jesus Cristo ta Señor, na e Gloria, of pa e Gloria di Dios e Tata.” (Lesa Filipensenan 2:5-11).

Amigonan, bida eterna ta igual cu immortalidad. Segun Scritura, pica a drenta mundo dor di un hende, (Adam) y morto a bini dor di pica. Y ta di e manera ey morto a bini pa tur hende, pasobra tur a peca. Esey ta nifica simpel y cla, cu si hende no a hasi pica, e lo a keda biba pa semper. Esey ta nifica immortalidad y bida eterna. Pero Scritura ta masha cla y ta repiti bes tras bes cu no ta existi ni sikiera un persona cu no ta hasi pica. Siendo asina ta nifica cu tur hende ta bou e condenacion di morto. Con anto nos por ser libra di e condenacion ey, siendo cu nos tur a peca? Con un pecador manera mi por haya bida eterna? Danki na e Señor nos Dios, cu e contesta ta cla y sigur den Scritura Santo. Y p’esey mes nos ta conseha y encurasha cada uno cu ta lesando e mensahe aki, pa bo por lesa e Scrituranan tur dia, pidiendo Dios na e mes un tempo pa Su yudansa.

Bijbel ta siña nos sin laga luga pa tin duda cu bida eterna ta solamente den Cristo, e Yiu di Dios. Ta pa nos ricibi e bida eterna ey, cu El a muri crucifica. Pasobra; for di alcanse di hende pa comprende, El a carga den Su curpa ariba e crus, e causa di morto, esta e pica di nos tur. Pero siendo cu E mes no a comete ningun pica, apesar di a wordo tenta den tur cos mescos cu nos. E Tata a dun’E bida atrobe lantando E for di e mortonan. Awor e ta posibel pa ricibi bida eterna, si nos admiti personalmente di henter nos curason nos pica, y acepta e pordon y bida eterna cu ta unicamente posibel pa medio di fe den Jesus. Tur otro esfuerso pa haya bida eterna ta bano, y un reproche na e Amor di Dios y Sabiduria di Dios y e Sacrificio di nos Señor y Salbador Jesus. Bijbel ta bisa nos lo siguiente: “Esun cu no kere Dios, a haci E un gañador, pasobra e no a kere e testimonio cu Dios a duna tocante Su Yiu. Y esaki ta e testimonio: Dios a duna nos bida eterna, y e bida aki ta den Su Yiu. Esun cu tin e Yiu tin e bida; esun cu no tin e Yii di Dios no tin e bida.” (1 Juan 5:10-12).
Scirbi y prepara pa Bicento y Betty Henriquez