Friday, July 13, 2007

UN MAPA #2

Esaki ta di dos mensahe den kual nos ta usa UN MAPA pa purba splika e importansia di Beibel pa guia nos den e kamina di bida eterno.

Mapanan a wòrdu usá for di hopi siglonan pasá. Pero awe tin mapanan di mas kompliká ku nunka antes. Puntra e kapitannan ku ta manehá e barkonan gigante ku tin awe. Of e piloto di avionnan moderno. Prome ku un persona por ta un Kapitan of un piloto, e mester tin añanan di estudio prome ku e por okupá e puesto ei.

E Título: “Beibel” - no ta e título di un solo buki, sino di varios Scrituranan skirbí door di diferente outornan. Un Beibel ta konsistí di dos título prinsipal ku ta: e Testament Bieu i e Testament Nobo. Un testament ta nifiká un Aliansa. I den e kaso aki, e ta un aliansa entre Dios i hende. E prome aliansa tabata esun di e Lei, kual Dios a entregá na Moses. E di dos i último aliansa ta esun ku a bini pa medio di Hesu-Kristo, nos Señor. E Apòstel Huan ta presentá e Aliansa Nobo ku e deklarashon aki: “Pasobra e Lei a wòrdu duná pa medio di Moses, ma grasia i berdat a bin pa medio di HesuKristu. (Huan 1:17) E deklarashon aki ta siña nos hopi kla ku Beibel ta kontené e dòktrina di lei, i e dòktrina di grasia. E dòktrina di lei basá ariba e mandamentonan di Dios ku a wòrdu entregá mediante Moses.

Si un persona a obedesé e lei òf a kumpli ku e lei kompletu henter su bida sin falta den ningun di e mandamentunan, e persona aki lo a haya bida pa medio di esei. Pero e berdat ta ku ningun hende por wòrdu hustifiká dor di a kumpli ku e Lei di Moses. Pakiko? Pasobra e lei no a wòrdu duná komo un medio pa gana bida eterno, sino mas bien pa mustra e ser humano kon pekaminoso e ta, pa e por repenti i buska Dios. Si un persona por a haya bida dor di a kumpli ku e mandamentonan, anto lo no tabatin mester di sakrifisio di animalnan, manera a tuma lugá bou di lei di Moses.

Beibel ta enfatisá ku e sanger di animalnan nunka por kita piká. Pakiko anto e puebel di Israël tabata ofresé sakrifisio di animalnan? Beibel ta splika ku e sakrifisionan ei tabata un rekordatorio anual di pikánan, pasobra ta impusibel pa e sanger di toronan i kabritunan kita piká. (Lesa Hebreonan 10: 3,4)

Nos ta kombidá kada persona ku ta lesa e mensahe aki, pa bo lesa Hebreonan kapítulo ocho y nuebe y dies pa un splikashon hopi detayá tokante e tema aki di sakrifisio di animalnan pa pordon di pikánan. E versnan diesun i diesdos di kapítulo dies, ta bisa lo siguiente: “Dia tras dia sacerdote ta para i ta kumpli ku su debernan religioso; bes tras bes e ta ofresiendo e mes sakrifisionan, kualnan nunka por kita piká. Pero ora ku e sacerdote aki (esta Kristu) a ofresé pa semper un sakrifisio so pa pikánan, El a sinta na e man drechi di Dios.”

Nos por konklui anto ku bou di lei duná na Moses, e sakrifisionan di animalnan pa pordon di pikánan tabata solamente un rekordatorio i un rekonosementu di pikánan, te dia ku e berdadero sakrifisio a wòrdu ofresí den persona di e Yiu di Dios. P’esei El a wòrdu introdusí dor di Huan Boutista, komo: “E Lamchi di Dios ku ta kita piká di mundu.” (Huan 1:29).

P’esei amigunan stimá pa Dios; si nos kompará Beibel ku un mapa, nos por mira klaramente ku Hesus, i solamente Hesus, ta e kamina, berdat, y bida; i ku ningun hende por bini serka e Tata, sino pa medio di djE. (Huan 14:5,6; Hebreonan 10:19, 20, etc., etc.) Si enkaso abo ku ta lesando e mensahe kòrto aki, ta konfiando den algu otro, ku e speransa di un dia sea aseptá serka Dios, anto sea sigur ku bo ta den e kamina robes. Ora ku un persona ta nenga òf ta neglishá pa konfia den Kristu di henter su kurason; e persona aki realmente ta rechasá e amor di Dios demostrá den e sakrifisio di Su úniku Yiu, Kende a muri pa nos pikánan, pa E trese nos serka Dios.

Dobla bo rudianan awe dilanti Dios, komo un siñal di berdadero repentimento pa bo pikánan, i kere di kurason den Su Yiu ku a muri i resusitá pa nos.

Skirbí i prepará pa B&B Henriquez

Kumpra bo propio Beibel awe, si bo no tin un ainda, i lesa tur e versíkulonan menshoná den e mensahe aki bo mes, i mira si no ta asina. Bo por bishitá Boekhandel Evangelica na Korsow awe, situa na St Thomas #19; si bo ta biba na Bonaire bishita Den Statie #2, na Antriol, i si bo ta biba na Aruba, bishitá Libreria Victoria #25, nan tin Beibelnan na diferente idioma i tamaño.

Wednesday, July 4, 2007

Mensahe: UN MAPA pa Bicento Henriquez

UN MAPA

Beibel por ser compara como un mapa. Un mapa ta algo hopi importante den arkitectura. Ora ta edifica algo complica tin mester di un mapa traha pa expertonan den e materia ey. Pero, awe nos ta bai papia di un mapa pa uza ora cu bo ta biahando den un tera stranhero. Cada nacion, sea chikito of grandi tin su mapa. Aruba, Curacao y Bonaire, cada uno tin su mapa. Y turistanan cu ta bishita nos, ta aprecia masha di por tin un mapa di e isla cu nan ta bishita.

Nos a caba di bolbe for di un biaha basta leu cu nos a bai aki na Canada. Y p’esey nos por papia di con importante e ta pa tin un mapa, y particularmente ora ta trata di un nacion grandi manera Canada of U.S.A., y otro nacionnan grandi. Sinembargo, con importante cu un mapa por ta, sea pa traha un edificio of un guia den un tera stranhero; e no por ser compara cu e importancia di Beibel.

Pasobra tur e cosnan cu por ser menciona tocante un mapa ta temporario y te asta por cambia. Pero Beibel cu ta e Palabra di Dios ta un guia pa bida eterno y no por cambia, pasobra Dios NO ta cambia. Di acuerdo cu Scritura Santo, nos ta stranheronan y peregrinonan ariba e mundo aki. Y como hendenan cu ta kere cu tin un Dios cu un dia lo huzga henter mundo cu husticia nos tin mester di un guia cu ta sigur.

E guia ey, e Señor nos Dios a duna nos den Su Yiu stima, esta nos Señor JesuCristo. E Jesus aki no solamente ta mustra nos e camina cu nos mester sigui; ma El a bisa cu E mes ta e Camina, y cu ningun hende por bini serca e Tata sino pa medio di djE.

Ariba e dia aki cu nos ta scirbiendo e mensahe aki, nos mundo ta yen di caminanan troci p’aki p’aya cu no solamente ta robes, ma cu ta guia na perdicion. Proverbionan 14:12, ta bisa nos lo siguiente: “Tin un camina cu ta parce bon den bista di hende; ma su fin ta e camina di morto.” Señor Jesus no a bisa cu E ta UN camina, ma El a bisa cu E TA E Camina, y cu ningun hende por bini serca e Tata sino pa medio di djE. P’esey, amigonan di abla Papiamento, nos ta presenta na cada persona den e islanan aki, y esunnan cu ta plama den otro nacionnan – e bon noticia di pordon y bida eterna cu ta solamente pa medio di fe den Cristo pa e pecador cu ta repenti di su picanan, y cu ta pone su fe den e Jesus cu a carga nos picanan den Su curpa riba e crus.

Den e buki di 2 Timoteo nos ta lesa lo siguiente: “P’esey, no tene berguensa pa duna testimonio tocante nos Señor, of berguensa di mi su prisonero. Ma uni cu mi den sufrimento pa e Evangelio, pa medio di e poder di Dios, kende a salba nos y a yama nos na un bida santo, no pa motibo di nada cu nos a haci, ma pa motibo di Su propio proposito y gracia. E gracia aki tabata duna na nos den Cristo Jesus prome cu e cuminsamento di tempo, ma el a wordo revela awor dor di e aparicion di nos Salbador, Cristo Jesus, kende a destrui morto y a trece bida y imortalidad na lus pa medio di e Evangelio. (2 Timoteo 1:8-10)

Nos ta roga bo den e nomber di Dios, e Tata pa bo acepta awor mes, Jesus como bo Salbador. No ta existi ningun otro nomber bou cielo pa medio di cual nos por ta salba. (Echunan 4:12)

Scirbí y prepara pa Bicento Henriquez y Betty Henriques. Scirbi nos sea via email na: bbhenriquez@ shaw.ca; of via post na: #534, La Ronge Road, Saskatoon, SK., Canada, S7K 7Z9

No lubida di bishita Libreria Victoria na Elleboogstraat 25, Oranjestad, Aruba. Eynan bo por haya Beibel na Papiamento, y otro bukinan bon pa alimento spiritual. Na Curacao, por bishita Bukhandel Evangelica situa na St. Thomas # 19, y na Bonaire na Den Statie #2.

UN MAPA ta sigui!



Aki nos ta na cas di famia Ressler. Sr.Ressler tabatin un afspraak cu doctor y no tabata na cas na e momento cu nos a saca e foto aki. Ma sinembargo nos por a bishita cu ne un rato.

Ki importante UN MAPA tabata pa nos pa nos por a yega na tur e diferente lugarnan! Sigui lesa un mensahe cortico cu Bicento a prepara yama: UN MAPA.

Un Mapa (ta sigui)



Bicento na wiel y Betty cu mapa den man, dos biehitanan a sali cu auto pa bishita rumannan y co-trahadornan, y famia na e provencia di Alberta. Nos prome lugar tabata Jim y Lillian Raimen - foto mas ariba! Despues pa bishita cu famia Martens y Ressler.

UN MAPA