Thursday, January 31, 2008

Idolatria - ultimo dje series




Esaki ta nos ultimo mensahe tocante idolatria den e series tocante idolatria. No ta nifica cu mi a splika tur loke ta inclui den idolatria. Te aki nos a mira algo tocante e celebracion annual cu yama Carnaval. Y mi no a menciona nada tocante e celebracionnan cu ta compaña Carnaval manera scohemento di rey y reina compaña cu baliamento y bebemento, etc. Tambe mi a menciona cu no ta durante Carnaval so nos por comete idolatria pero tambe durante cualke otro dia di aña. Nos a mira tambe cu idolatria ta igual cu adora Satanas y su demoñonan. Mi a recomenda pa lesa e siguiente Scrituranan aki, pa cada persona por sabi cu no ta di nos propio imahinacion nos ta papia. E Scrituranan ta: 1 Corintionan 10:1-22 y 1 Corintionan 8:1-13.
Tambe Galationan 5:16-26 y Colosensenan 3:5 y 1 Pedro 4:3. Y tambe e prome carta di e Apostel Juan completo.

Awe mi ta conclui cu algun Scrituranan for di Romanonan. Y nos ta recomenda pa bo lesa e buki di Romanonan completo. Pakico? Pasobra den e carta aki, e Apostel Pablo kende a wordo scohi y apunta pa Dios e Tata Su mes, y pa nos Señor JesuCristo, ta presenta e Evangelio di e gracia di Dios na nos cu no ta Judiu y tambe na Judiunan, na un manera sumamente cla. Sinembargo, sin e yudansa for di Dios, nos lo no comprende nada, y lo prefera lesa un corant of un novela of algo similar. Tin un promesa sumamente precioso scirbi particularmente pa un persona cu tin e deseo di pertenece na Dios. E ta bisa simplemente esaki: “Pasobra no tin diferencia meimei Judiu y no Judiu, e mes Señor ta Señor di tur y ta bendiciona ricamente tur cu yama na nE, pasobra cada uno cu yama na e Nomber di e Señor lo ta salba.” Ki un bunita promesa for di Esun cu no por gaña!

Bon, awor laga nos bolbe na e tema di idolatria, y nos lo considera loke Pablo a scirbi na e Romanonan: Pasobra rabia di Dios ta wordo revela for di cielo contra tur bida sin Dios y maldad di hende cu ta oprimi e berdad pa medio di nan maldad; siendo cu loke por sea conoci tocante Dios ta cla na nan, pasobra Dios a hasi e cla na nan. Pasobra desde e creacion di mundo, Dios Su cualidadnan invisibel – Su poder eterno y naturalesa divino a wordo mira claramente, siendo comprendi for di loke a wordo traha, di manera cu hende ta sin dispensa. Pasobra aunke cu nan tabata conoce Dios, nan no a glorific’E como Dios, ni tampoco gradici E, ma nan pensamento a bira inutil y nan curason bobo a bira scur. Aunke nan ta profesa di ta sabi, nan a bira bobo y a intercambia e gloria di e Dios inmortal pa imahennan traha pa parce mescos cu hende mortal y parhanan y animalnan y reptilnan. P’esey Dios a entrega nan den e deseonan pecaminoso di nan curason pa impuresa sexual, y pa e degradacion di nan curpa cu un y otro. Nan a entercambia e berdad di Dios pa un mentira, y adora y sirbi cosnan crea enbes di e Creador, Kende ta alaba pa semper. Amen.

Anto e ta continua bisando: Pa e motibo aki, Dios a entrega nan na deseonan bergonsoso. Asta nan mohenan a entercambia relacionnan natural pa loke ta contra naturalesa. Di e mes manera e hombernan tambe a bandona relacion natural cu mohe, y a kima cu pasion pa un y otro. Hombernan cometiendo actonan indecente cu otro homber, y ta ricibi den nan mes e castigo mereci pa nan pervercion.

Ademas, siendo cu nan no a haya cu e bal pa retene e conocemento di Dios, El a entrega nan na un mente deprava, pa haci e loke no mester wordo haci. Nan a bira yena cu tur sorto di inhusticia, maldad, golosidad y depravacion. Nan ta yen di envidia, matamento, pleito, engaño y malicia. Nan ta hacidor di redo, calumniador, odiadornan di Dios, insolente, arogante y gabador; nan ta inventa maneranan pa haci maldad; nan ta desobedece nan mayornan; nan ta sin comprendemento, sin fe, sin curason, sin misericordia.

Aunke cu nan sabi Dios Su ordennan husto cu esunnan cu ta hasi sorto di cosnan asina ta merece morto, no solamente nan ta sigui haci nan, ma tambe nan ta di acuerdo cu esunnan cu ta practica nan.

Amigo y amiganan, loke bo a caba di lesa ey, ta for di Testament Nobo den e buki scirbi na e Romanonan. Y algun por pensa cu e cosnan ey a tuma lugar antes den e nacionnan pagano, ma no awe mas. Y no den nos Islanan Cristian, etc., etc.

Nos por haci nos mes e pregunta: “Pakico Dios a entrega e personanan menciona den e prome capitulo di Romanonan; na un mente perverti of deprava? E contesta cu nos ta haya ta: “Pasobra aunke cu nan tabata sabi cu tin un Dios, nan no a glorific’E como Dios, y nan a haya cu e no tin balor pa retene e conocemento di Dios.”

Abo cu ta lesando e mensahe aki; bo ta haya cu e tin balor pa scucha na e Dios cu ta menciona bes tras bes den e buki aki di Romanonan y den e otro bukinan den Beibel? Si esey ta e caso anto bo lo scucha kico e Dios aki ta bisa nos mediante Su unico yiu nos Señor y Salbador Jesus e Cristo? Den e nomber di Dios, e Tata, Jesus, e Yiu di Dios a papia idioma cla pa henter mundo. Y den Señor Jesus solamente ta posibel pa nos adora e Tata den Spirito y berdad.

Ata aki algun Scritura pa yuda esun cu ta anhela pa e berdad: Hebreonan 1:1-4 y Rom. 1:16,17 y Juan 14:5-7 y Tito 3:1-8, 1 Timoteo 2:1-6 y por ultimo Revelacion 21:1-8.

Scirbi pa Bicento Henriquez

Friday, January 25, 2008

IDOLATRIA continua




Den nos prome mensahe tocante e tema aki, nos a menciona Carnaval un poco. Segun historia Carnaval tabata un celebracion pagano na honor di diosnan falso hopi añanan prome cu Cristo a bini na mundo. Pero no ta Carnaval so tabata e medio dor di cual e diosnan falso tabata adora; y Scritura ta firme y severo contra e maldad ey, esta adoramento di idolonan.

Segun Scritura, ora cu un persona ta sirbi of adora un idolo, ta Satanas e ta sirbi y adora. Pasobra no ta existi un otro Dios sino Un. Den prome Corintionan 4: 3,4, nos ta lesa lo siguiente: “Y asta si nos Evangelio ta tapa cu un velo, e ta tapa pa esunan cu ta pereciendo. E dios di e siglo (of era) aki a ciega e mente di esunnan cu no ta kere, asina cu nan no por mira e lus di e Evangelio di e gloria di Cristo, Kende ta e imagen di Dios.” Aki Satanas ta wordo yama e dios di e era of siglo aki. Y mediante su trikinan y metodonan y trampanan, e ta ciega e mente di humanidad cu no ta kere e Evangelio.

Amigonan; di acuerdo cu Scritura, humanidad ta consisti di dos grupo di persona. Esunnan cu ta kere e Evangelio, y esunnan cu no ta kere, (excluyendo muchanan inocente cualnan ta Dios So por huszga). E Apostel Juan ta spierta nos bisando lo siguiente: “Nos sabi cu nos ta yiunan di Dios, y cu henter mundo ta bou di control di e malbado.” ( 1 Juan 5:19 ). Pero net prome cu esaki e mes Apostel ta bisa nos asina aki: “Nos sabi cu ken cu a nace di Dios no ta sigui comete pica; Esun cu tabata naci di Dios ta ward’e sigur, y e malbado no ta mishi cu ne.” (1Juan 5:18)

Ta increibel e diferencia cu Scritura ta menciona cu tin entre e pecador cu repenti di pica y kere den nos Señor JesuCristo; cu esunnan cu no ta kere. E mes Apostel Juan a scirbi lo siguiente: “Yiunan stima, no laga ningun hende desvia boso. Esun cu ta haci loke ta bon ta husto, mescos cu E ta husto. Esun cu ta haci loke ta pecaminoso ta di e diabel, pasobra e diabel ta haciendo pica for di principio. E proposito cu e Yiu di Dios a aparece tabata pa destrui cu e obranan di e diabel. Ningun hende cu a nace di Dios, lo sigui haci pica, pasobra Dios Su simia ta keda den dje; e no por sigui haci pica, pasobra el a nace for di Dios.”

Anto e Apostel ta continua bisando: “Asina aki nos ta conoce ken e yiunan di Dios ta, y ken e yiunan di e diabel ta: ken cu no ta practica husticia no ta un yiu di Dios; tampoco esun cu no ta stima su ruman. (1 Juan 3:10)

Na cualke alma precioso cu ta lesando e mensahe aki nos ta encursha bo pa lesa e carta di prome Juan completo. Pidi na nos Tata Celesial pa E yuda bo pa comprende y pa obedece.

Ata aki algun di e declaracionnan cu ta scirbi den e carta aki: “No stima mundo, ni e cosnan cu tin den mundo. Ken cu ta stima e mundo, e amor di e Tata no ta den dje. Pasobra tur cos den e mundo; e deseonan carnal, e deseonan di e wowo, y e orguyo di bida, no ta bini for di e Tata, ma for di e mundo. E mundo y su deseonan ta pasa bai, ma esun cu ta haci e boluntad di Dios, lo biba pa semper.” Tambe e ta bisa: “No keda sorprendi mi rumannan, si e mundo ta odia boso. Nos sabi cu nos a pasa foi morto na bida, pasobra nos ta stima nos rumannan. Ken cu ta odia su ruman ta un matador, y boso sabi cu ningun matador tin bida eterno den dje.” Anto e ta sigui bisando: “Ken cu no kere den Dios ta hasi E un gañador, pasobra e no a kere e testimonio cu Dios a duna tocante Su Yiu. Y esaki ta e testimonio: Dios a duna nos bida eterno, y e bida aki ta den Su Yiu. Esun cu tin e Yiu tin bida; esun cu no tin e Yiu di Dios no tin bida.”

Nos ta roga na cada persona cu ta lesa e mensahe aki di nobo, pa bo lesa prome Juan den bo Beibel, pasobra e ta presenta e Evangelio hopi cla, hunto cu spiertamentonan pa habri nos wowonan pa nos por obedece.
E mes un sirbidor aki ta spierta nos masha fuerte mes tocante idolatria . E unico manera cu nos por ta libra di idolatria ta si nos obedece nos Tata Celestial tocante Su Yiu nos Señor y Salbador Jesus. Pone atencion cu Juan ta termina su carta cu e spiertamento aki na tur cu ya ta kere den Jesus. Asina aki e ta scirbi: “Yiunan chikito, of: Of Mi yiunan, of: “Yiunan stima; warda boso mes fo’i idolonan.” Otro tradicion ta bisa: Keda leu for di idolonan, of sea diosnan falso.

Corda bon cu den e mes un carta aki e Apostel a declara cu: E mundo henter ta bou control di e malbado. E Malbado ke men e diabel, Satanas. Den e buki di Rebelacion e ta wordo yama: e dragon, e serpiente antiguo, e diabel y satanas, cu ta gaña e nacionnan. Sea spierta awe, y scapa yamando den e nomber di Jesus nos Salbador.

Scirbi pa Bicento HenriquezNo lubida cu nos tin masha deseo pa tende algo for di bo! Djies laga nos sabi cu bo a bishita nos sitio y cu bo a lesa e spiertamento awe di idolatria. Ta un momento e ta tuma, ma pa nos e ta encurasha nos pa sigui cu e ministerio aki.
Email address: bbhenriquez@shaw.ca
Carta por ser manda na: Bicento & Betty Henriquez, #534, 120 La Ronge Road, Saskatoon, SK., S7K 7Z9.
Of por laga un comentario ariba blog sitio mes. Tin un lugar pa laga cualke pregunta of rosponde:
www.bbhenriquez.blogspot.com

Saturday, January 19, 2008

Carnival y Idolatria




Mayoria di Antiyanonan y Arubanonan sabi algo tocante e celebracion annual aki. Mayoria ta celebra of ta tuma parti di un of otro manera, sin pensa nada otro cu di pasa un bon tempo.

E palabra Carnaval no ta di nos idioma Papiamento, y p’esey nos mester busca su nificacion den e idioma for di cual el a bini. Si nos busca su nificacion den un diccionario of den un encyclopedia, nos por comprende cu e celebracion aki di Carnaval e exisi for hopi añanan pasa caba, asta prome cu Cristo a bin na mundo. E tabata un fiesta pagano cu di un of otro manera ta wordo celebra te awe. E nomber original tin di haci cu carni natural, manera por ehempel carni di animalnan. Pero como cu Scritura ta papia di e carni den e sentido di e naturalesa di pica cu ta den tur su ser humano, e ta facil pa mescla e dosnan ey hunto.

E fiesta di Carnaval ta wordo celebra den varios parti di mundo. Pero tin algun lugarnan unda esaki a bira famoso. Manera a ser menciona caba, Carnaval a existi di prome cu Cristo a bini na mundo. Y tabata for di e tempo un forma di adoracion di diosnan falso. Despues cu Cristo a bini y cu El a wordo crucifica y dera y lanta for di morto; y cu e Evangelio di e gracia di Dios pa pordon di picanan y bida eterno a cuminsa ser proclama despues cu e Spirito Santo a bini pa ta hunto y den e siguidornan di Cristo, e celebracion ey di Carnaval a continua manera custumbra. Esta, e tabata un celebracion pagano dedica na diosnan traha di piedra of di plata of di palo, etc., segun imaginacion di e personanan cu a traha nan. Ta di comprende cu e prome hendenan cu a kere e Evangelio, lo a haya nan mes den conflicto di un of otro manera, y particularmente, ora cu e Evangelio a cuminsa duna fruta den e paganonan. Cu paganonan nos ta referi na e personanan cu no tabata Judiu. Literalmente e nomber of titulo carnaval, no ta wordo haya den Beibel, pero sirbimento na diosnan falso si ta wordo menciona hopi bes. Lesa por fabor den bo Beibel, e capitulo dies di prome Corintionan completo. Den e versiculonan 14-22, e Apostel Pablo ta papia hopi cla cu esnan no Judiu, y den e versiculonan 1-13, e Judiunan y no Judiunan ta inclui.

Pone atencion cu idolatria ta inclui celebracion cu baliamento y inmoralidad sexual. Y e spiertamento cu e Apostel Pablo ta duna aki, no ta na esunnan cu no ta keredor, ma ta na nos cu ta kere di curason den nos Señor JesuCristo. Pakico na esnan cu ta kere Evangelio? E contesta for di Scritura ta; cu cada persona cu a tende e Evangelio, y a repenti di su picanan, y a kere di curason den Esun cu a carga nos picanan den Su curpa ariba e crus; ta ricibi pordon di tur su picanan. Y na e mes un tempo e ta ricibi tur e bendicionnan spiritual cu ta den Cristo.

Ora cu nos ta repenti di nos picanan ta nifica tur nos picanan, y no algun so. Segun Scritura idolatria ta parti di e naturalesa pecaminoso di e ser humano. Y ora cu un persona ta kere e bon noticia di Cristo, e ta ricibi e Spiritu Santo pa yuda y guia nos durante nos bida. Pero di nos banda nos mester ta boluntario y obedicido. Tuma por ehempel Galationan 5:16-26 cu ta bisa nos lo siguiente. “Anto mi ta bisa, biba segun e Spirito, y boso lo no cumpli, of gratifica e deseonan di e naturalesa pecaminoso. Pasobra e naturalesa pecaminoso ta desea loke ta contrario na e Spirito, y e Spirito loke ta contrario di e naturalesa pecaminoso. Nan ta den conflicto cu un y otro, pa boso no haci loke boso kier. Pero si boso ta guia pa e Spirito, boso no ta bou di e Ley. E echunan di e naturalesa pecaminoso ta cla pa mira. Inmoralidad sexual, impuresa y idolatria y bruheria, odio, pleito, jaloers, etc., etc. Y e ta conclui cu e spiertamento aki: “Mi ta spierta boso mescos cu mi a spierta boso caba, cu esnan cu ta biba asina, lo no ereda e reino di Dios.” Lesa esaki for di bo mes Beibel.

Otro Scritura ta spierta esnan cu ta kere e Evangelio, lo siguiente: “Conta como morto tur loke ta pertenece na boso naturalesa terenal: immoralidad sexual, impuresa, pashon, deseonan malo, y golosidad cual ta idolatria.” (Col. 3:5). Tur e Scrituranan ey ta duna spiertamento na e berdadero Cristiannan y no na esunnan cu ta di nomber so. Golosidad pa placa y otro cosnan ta ser considera igual cu idolatria cu ta nifica adoramento di dios falso. Y siendo cu dios falso realmente no ta existi, pasobra no ta existi ningun otro Dios sino Un. P’esey cu loke ta pa nos cu ta kere e Evangelio tin solamente un Dios, e Tata, for di Kende tur cos ta bini, y pa Kende nos ta biba; y tin solamente un Señor JesuCristo, pa medio di Kende tur cos a bini, y door di Kende nos ta biba.

Y ta p’esey, amigonan, Scritura ta bisa nos cu idolatria ta igual cu sirbimento di demoñonan. Y e no ta posibel pa un hende sirbi demoñonan y sirbi e Dios biba tambe. Lesa 1 Cor. 8:1-13, y tambe 1 Cor. 10:18-22.

E Apostel Pablo ta spierta nos mescos. E ta bisa lo siguiente: “Pasobra ya boso a gasta suficiente tempo den tempo pasa haciendo e loke paganonan ta haci, bibando den sensualidad, pashon, buracheria, paranda, fiesta di bebemento y idolatria detestabel.

Mi ta repeti; tur e spiertamentonan aki ta scirbi na e berdadero keredornan, na e yiunan di Dios. Ta nos mester hui di e sorto di cosnan ey, pa nos por ta di bendicion pa otronan como testigonan fiel den Cristo nos Señor. Nos lo continua cu e tema aki den nos siguiente mensahe aki via Internet.

Scirbi y prepara pa Bicento & Betty Henriquez

Corda cu na Libreria Victoria na 25 Elleboogstraat na Oranjestad, bo por haya otro tractadonan tocante Carnaval y topiconan relaciona, pa bo lesa y parti pa otronan, especialmente den e temporada aki.

Tuesday, January 1, 2008

FELIS AÑA NOBO


FE Y OBRA – Conclusion

Awe lo mi conclui tocante e tema di FE y Obra, pero mi no ke men cu mi a splica tur loke ta inclui den e doctrinanan importante aki. P’esey, lo ta hopi bon pa esunnan cu ta lesa e mensahe aki, scirbi bo pregunta of observacion tocante e mensahe aki, y mand’e pa nos na nos direccion, cu ta:

www.bbhenriquez.blogspot.com na Papiamento,
www.bicentoandbetty.blogspot.com na Ingles, y nos email adres ta:
bbhenriquez@shaw.ca
E doctrina tocante FE y OBRA, ta di sumo importancia pa cada uno cu a ricibi Jesus como Su Salbador y Señor. Esey ta un decision cu cada uno di nos personalmente mester haci. Otro persona por yuda nos, pero no por dicidi pa nos. Beibel cu ta contene Scrituranan inspira pa Dios Su mes, mediante Su Spirito Santo, ta e unico autoridad den e asunto aki di fe y obra.

Den e dos mensahenan cu a bai prome unda mi a comenta un poco tocante fe y obra, mi a papia tocante e fe di Abraham, pasobra e ta wordo yama den Scritura e tata di tur hende di tur nacion cu ta kere den e Dios cu a lanta Jesus nos Señor for di morto. Ta e Jesus aki a wordo entrega na morto pa nos picanan, y a wordo lanta na bida pa nos hustificacion. Lesa e versiculonan aki cu ta scirbi masha cla mes den Romanonan capitulo cuater completo.

Aki Abraham ta wordo yama e tata di tur cu ta kere e Evangelio. E titulo ey a wordo duna na Abraham como un ehempel, pa nos haci mescos cu el a haci. Kico of cual ta e obra cu Abraham a hasi? Acaso Abraham tabata un ser humano perfecto y sin pica? Absolutamente no; pero e obra cu el a haci tabata cu el a kere Dios, y esey a wordo conta pa Dios Su mes, como husticia. Ta nifica cu e unico manera cu pecadornan manera nos por ser declara como husto, ta si nos tambe kere Dios tocante loke E ta bisa nos di Su Unico Yiu, nos Señor Jesus.

Y ta kico Dios ta bisa nos tocante Su Yiu? Lesa sin falta na 1 Juan 5:9-13. Ma tin hopi otro Scrituranan cu ta papia di e mes un berdad ey den otro forma. Y esey ta, cu no tin salbacion den ningun otro, pasobra cu bou di cielo no tin ningun otro nomber duna na hende pa medio di cual nos mester wordo salba. E loke ta maraviyoso den e testimonio aki di Dios e Tata Su mes ta; cu e ta dirigi na nos pecadornan, y no na e hustonan. Scritura ta bisa nos masha cla, cu: na e tempo apropia, of sea net na tempo, mientras cu nos tabata sin forsa ainda, Cristo a muri pa e impionan. Ta masha poco bes un hende ta duna su bida pa un hende husto, aunke cu pa casualidad tin bes cu un hende por risca muri pa un bon hende. Pero Dios a demostra Su amor pa nos di e manera aki: Mientras cu nos tabata pecadornan ainda, Cristo a muri pa nos. (Lesa sin falta Romanonan 5:1-11).

Pues, Amigonan, considerando e Scrituranan aki cu mi a menciona, y masha hopi otronan cu mi no a menciona; nos por mira bon cla cu e salbacion di pecadornan, ta un obra totalmente di nos Tata Celestial mediante Su unico Yiu cu ta JesuCristo. Y cu e obra ey ta basa riba Su amor y misericordia y compacion, y e ta pa gracia. Pues, salbacion y bida eterno no tin nada di haci cu nos propio husticianan. Beibel ta compara nos propio husticianan como lapinan sushi y di imundicia. (Isaias 64:6) Sinembargo tin algo sumamente importante cu ta keda pa nos mes personalmente hasi. Y esey ta fe den e Yiu di Dios cu a muri crucifica pa nos picanan, pero lanta for di morto na di tres dia, y ricibi den Gloria, for di unda E lo bolbe atrobe pa resucita y transforma tur pecador cu a kere e Evangelio, pa nan por ta cu nE pa semper. (Lesa sin falta 1 Tes. 4:13-18).

Awor, algo tocante OBRANAN of sea nos ECHONAN y nos ACCIONNAN durante henter nos bida como un keredor. Beibel ta papia masha hopi mes tocante e doctrina aki di obranan. Nos a mira caba cu ningun hende lo ta salba pa medio di su mes obranan. Sinembargo ta scirbi cu Dios a salba nos di gracia den Cristo, pa bon obranan cu El a prepara adelantá pa nos haci. (Efesionan 2:8-10). Ademas nos ta lesa den Beibel, cu tur persona cu kere e Evangelio di gracia di Dios, mester parece dilanti e tribunal di Cristo, pa cada un por ricibi su recompensa segun loke cu el a haci durante e tempo cu e tabata den e curpa, sea bon of malo. ( 2 Cor. 5:10). Otro Scritura relaciona cu e importancia di nos echunan actual, como yiunan di Dios basa riba e facto cu nos a repenti di nos picanan y a kere di curason den Señor Jesus; ta wordo haya den 1 Corintionan 3:10-23.

Rumannan den e fe, y tur cu ta lesa e mensahe aki. Tin masha hopi spiertamento cla y sigur den Beibel, tocante fe y obra. Nan ta scirbi pa nos no sea gañá cu nos ta un asina yama CRISTIAN, mientras cu nos echunan ta contradici esey. Beibel ta bisa por ehempel: “No sea gañá: ni esun sexualmente immoral ni e idolatranan ni e adulteradornan, ni esunnan afemina (gay), ni e homosexualnan, ni ladronnan, ni esnan cu ta golos pa placa, ni burache, ni blasfemador, ni estafado, lo ereda e Reino di Dios. Y asina algun di boso tabata. Ma awor boso a wordo laba, boso a wordo santifica, boso a wordo hustifica den e Nomber di Señor JesuCristo y pa medio di e Spirito di nos Dios.” (Lesa 1 Cor. 6:9-11)

Te akinan riba e topico aki. No hesita pa scirbi nos si bo tin pregunta tocante loke a nos a descuti aki. Tambe nos kier recorda bo cu na Libreria Victoria, situa na 25 Elleboogstraat, na Oranjestad, tin tractadonan, Beibelnan y otro material bon pa yuda bo den e crecemento di bo fe.