UN CAS

UN CAS



Nos mensahe pa awe ta bai tocante di un cas. Unda parti di mundo cu nos bai tin casnan traha den tur forma. Den Beibel tambe nos por lesa hopi di casnan.

Por ehempel: Salmo 23:16 “Siguramente bondad y misericordia lo sigui mi tur e dianan di mi bida, y lo mi biba den e cas di Señor pa semper.”

Hopi bes cas ta referi na e tempel di e Judiunan. Pero den Testament Nobo ta bini declaracionnan asombroso tocante tempel y cas, Den Juan Capitulo 14:1-4, nos ta lesa: “No laga boso curason bira intrankilo, confia den Dios, confia den Mi tambe. Den e cas di Mi Tata tin hopi luga; si no tabata asina, lo Mi a bisa boso. Mi ta bai aya y prepara un lugar pa boso, Mi lo bolbe y tuma boso pa ta cu Mi pa boso tambe por ta unda cu Ami ta. Boso sabi e camina pa e lugar na unda Ami ta bai.”

Aki nos Señor tabata papia di e cas di Su Tata na unda El a bai despues di Su resureccion, y for di unda E lo bolbe atrobe pa busca esunnan cu ta di djE. Ma despues di Su resureccion, y despues di a bolbe cerca e Tata y a ricibi e Spirito Santo for di e Tata, y a mand’E pa e keredornan. (Lesa Echunan 2:29-36 pa un splicacion)

A sosode cu e Spirito Santo aki ta biba den cada persona cu a tende e EVANGELIO y a repenti di nan pica y kere e PALABRA DI DIOS. Prome Corintionan 3:16,17 ta bisa lo siguiente: Boso no sabi cu boso mes ta tempel di Dios, y cu Dios Su Spirito ta biba den boso? Si un hende destrui Dios Su tempel, Dios lo destrui’e; pasobra Dios Su tempel ta sagrado, y boso ta e tempel ey. (Traduci di NIV).

AMIGONAN,
E Corintionan tabata personanan comun mescos cu nos. Nan tabatin e mes un clase di problemanan cu nos por tin awe. Pero nan a tende e Evangelio di Cristo mescos cu nos ta tende of lesa di esey awe, y nan a kere. Y mescos cu nan a ricibi e Spirito Santo di Dios for di e momento cu nan a kere, mescos e ta cu cada uno cu ta kere e Evangelio awe. (Lesa Efesionan 1:13,14 y 1 Pedro 2:1-12).

AMIGONAN, si encaso bo tin un pregunta of criticanan constructivo, scirbi nos sin falta na e adres aki: bbhenriquez@shaw.ca
Nos lo ta contento pa tende algo for di bo!

Morto & Pasenshi di Dios

Amigonan y rumannan, Bon Bini na nos blogspot awe mainta, dia 14 di Februari - e foto aki ta di nos, recien saca, den temperaturanan mas cu binti bao di Zero! Brrr...friooo mes!

Nos ta confia cu bo lo lesa y considera e loke nos ta proclama, y laga nos sabi di bo opinion franco den un nota via nos adres: bbehenriquez@shaw.ca

MORTO
Kiko Beibel ta bisa nos tokante murimento?
Den Hebreonan 9, versíkulo 27 i 28, nos ta lesa lo siguiente: "I meskos ku hende ta destiná pa muri un biaha so, i despues di esei ta bin huzgamento, asina Kristu tabata sakrifiká un bes so pa kita e pikánan di hopi hende; i E lo aparesé pa di dos bes, no pa karga pikánan, ma pa trese salbashon na esunnan ku ta sperando p’E."
Pues, amigunan, aki nos ta lesa ku morto no ta e final di un hende su eksistensia; perso si e final di su oportunidat pa risibí pordon di pikánan i bida eterno.
Na un otro lugá nos ta lesa: "P’esei meskos ku piká a drenta den mundu dor di un hende, i dor di piká morto, asina morto a bini na tur hende, pasobra tur a peka."
Amigonan, siendo ku morto i huisio ta apsolútamente sigur, anto laga nos konsiderá e promesa di bida eterno na tur pekador ku pone nan fe den Esun ku a muri i resusitá pa nos, esta Hesus; e Yiu di Dios, Beibel ta bisa nos bon kla: "Pasobra e pagu di piká ta morto, ma e regalo di Dios ta bida eterno den Kristu Hesus nos Señor."
Dios ta bisa nos masha kla mes ku: "No tin un hende hustu ariba tera ku ta hasi loke ta hustu i nunka ta peka." Ma DANKI DIOS ku tambe ta para skirbí lo siguiente: "Pasobra Kristu a muri pa pikánan un bes i pa semper, e Hustu pa e inhústunan, pa trese nos serka Dios."
Kristu a muri pa piká, pero E mes nunka a peka. Ta den nos lugá El a sufri i a muri riba un krus. Pero e Tata a lant’E for di morto na di tres dia.
P’esei awe pordon di pikánan ta ofresí na kada persona ku ta atmití su pikánan, i ta pone su fe den Esun ku a muri i a resusitá p’e. Obedesé i biba pa semper, pasobra Esun ku a primintí esei ta fiel.
Skrituranan den e mensahe aki ta: (Hebreonan 9:27,28; Romanonan 5:12; i Pedro 3:18 i Ecclesiastes 7:20 – tuma tempo pa lesa kada uno di nan pa bo mes)
? Amigo/a, bo tin pregunta ariba e tópiko aki? Tin algo ku bo no ta komprendé? Sinti liber pa skirbi nos i kompartí esei ku nos ku tur konfiansa.
Nos adres ta: bbhenriquez@shaw.ca


E PASENSHI DI DIOS
Kico lo a pasa si abo cu ta lesando esaki lo a muri prome cu e dia aki?
Ki edad bo tin? For di mucha caba nos bida ta na peliger di un of otro manera. Tur hende ku ta di basta edad, por mira atras y por corda cuanto bes nos por a perde nos bida. Tur dia nos por lesa y asta mira portretnan di personanan di tur edad cu ta fayece di un of otro manera. No solamente cu nos bida ta
cortico, ma ademas masha delicado.Beibel ta bisa nos esaki: Awor scucha, boso ku ta bisa: "Awe of mañan nos lo bai na e ciudad aki of na e otro, y gasta un aña ey, y haci negoshi y gana placa." Wel, boso ni sikiera sabi kico lo pasa mañan. Kico boso bida ta? Boso ta manera un neblina cu ta aparece pa un tempo cortico, y ta desparece. Loke boso mester bisa ta, si e ta Señor Su boluntad, nos lo biba y haci esaki of esaya. Ma awor boso ta gaba y broma. Tur gabamento asina ta malo. P’esey, kende ku sabi e bon cu e mester hasi y no ta haci e, ta comete pica.
Amigonan, Beibel ta bisa nos cu Dios ta spera cu pasenshi pasobra E no kier pa algun bai perdi; ma cu tur por bini na arepentimento. Sabi anto cu e cos di mas mihor cu bo por haci awe ta, pa repenti y kere den nos Señor y Salbador JesuCristo.


No lubida cu di mañan nos no sabi nada; ta awe y awor ta e dia di salbacion. Obediencia na e yamada di Dios, ta e bendicion di mas grandi cu por bin den bo bida.
(Scrituranan uza ta: Santiago 4:13-17; 2 Pedro 3:9; 2 Corintionan 6:1,2 )

Parada y Passport

Ata, nos aki di nobo, dia 5 di Februari, scirbiendo for nos pais Canada. E ta cubri di un banda pa otro cu un mantel blanco di sneuw . Ta un bista masha bunita manera e foto ta mustra.
Un Noticia di Ortografia:
Nos tur sabi cu Antias tin su propio ortografia y Aruba di dje. Esey ta trece un poco problema pa esnan cu ta scirbi material pa hende di tur tres isla. Ta lastima cu e islanan no por a bini na un acuerdo pa tur 3 isla scirbi e idioma na e mes un manera, ma ya asina e ta. Pues, nos a dicidi di hasi e di e manera aki: un biaha nos lo scirbi den e ortografia di Aruba, anto e siguiente biaha nos lo scirbi den e ortografia di Antias. Nos ta confia asina tur hende lo keda satisfecho. Pues, ainda awe nos ta scirbi den e ortografia di Aruba. Dispensa nos cualke eror den esaki; corda cu nos ta dos biehitonan cu tin ochenta aña y pico!

DEN E PARADA – pa Bicento Henriquez
Esaki ta zona manera e parada di carnaval. Pero no ta na esey mi ta referi awor, ma na un parada mucho mas grandi cu ta tumando lugar den henter mundo.
Den Beibel nos por lesa loke Señor Jesus ta bisa nos tocante di e parada aki: El a bisa: "Drenta dor di e porta smal, pasobra hancho ta e porta y espasioso e camina cu ta hiba na destruccion, y hopi ta esnan cu ta drenta dor di dje. Pasobra chikito ta e porta y smal e camina cu ta hiba na bida, y poco ta esnan cu ta hay’e." (Mateo 7:13,14)
Mas despues Jesus ta compara Su mes cu porta di un cura di carne. Antes na Aruba nos tabatin masha hopi cura pa carne y cabrito. Igualmente na Kòrsou y Boneiru. Tabata un porta smal unda un animal so por a pasa. Jesus anto, ta duna nos di comprende cu E mes ta e porta y E mes ta e camina di bida eterno. Y tambe E ta siña nos cu ta poco hende ta drenta dor di e porta y e camina ey. Den un otro ocasion Jesus a bisa lo siguiente "Ami ta e camina, y e berdad, y e bida; ningun ta bini cerca e Tata sino pa medio di Mi." ( Juan 14:6.) Ta duro pa kere cu apesar di un invitacion tan sublime cu ta duna na nos y na henter mundo; tog, e mayoria ta hasi menos caso, y ta scohe e camina hancho cual su final ta destruccion. Nos ta pidi awe y ta roga na cada uno cu ta lesa esaki, pa bo scohe y drenta pa e porta smal. No sigui mas den e parada di e camina hancho di perdicion. Kere den Señor Jesus y biba.
Si bo tin pregunta of critica of sugerencia; anto scirbi nos un nota na e direccion aki: bbhenriquez@shaw.ca
PASSPORT
Antes y te awe, un passport ta un documento indispensabel pa por pasa di un nacion pa otro. Si bo no tin un passport cu bo, e porta ta cera pa bo. Aunke cuanto bo yora y sclama, lei ta lei pa uno y tur. Nos tin mester di un documento cu nos potret y nos firma y cu un seyo y firma di Autoridad pa nos drenta libremente.
Algo bon conoci rond mundo ta cu tin bes hende ta haci uso di un passport falso. Algun ta logra, otro no, y semper tin castigo pa e persona culpabel.
Beibel tambe ta papia di un documento cu seyo di supremo autoridad, pa e dia di resureccion, y ta lo siguiente: "Y boso tambe tabata inclui den Cristo ora cu boso a tende e palabra di berdad, e Evangelio di boso salbacion. Y ora boso a kere, boso a wordo marca den djE cu un seyo, e Spirito Santo priminti, Kende ta e garantia di nos erencia te na e redencion di esnan cu ta possecion di Dios – pa e alabansa di Su gloria."
Y tambe: "No haci e Spirito Santo di Dios tristo, cu kende boso a wordo seya pa e dia di redencion." (Efesionan 1:13,14) y Efesionan 4:30 (Traduci for di New International Version)
E pregunta importante ta: Con mi por ricibi e seyo aki, cual ta e Spirito Santo mes? E contesta ta duna claramente den e loke nos a caba di lesa. Prome, un persona mester tende e Evangelio cu ta e Palabra di berdad. Di dos, esun cu tende e Evangelio mester kere cu henter su curason. (Lesa Romanonan 10:1-13.) Y na di tres luga, ta Dios ta Esun cu ta seya of duna nos Su Spirito Santo como garantia. (Lesa sin falta 2 Corintionan 1:19-22.)
Sea sigur amigonan, cu esaki ta mas importante y mas valioso cu tur passport di mundo; y e ta ofreci na nos di gracia.
Si bo tin pregunta of critica, of sugerencia scirbi nos un nota na e direccion aki: bbhenriquez@shaw.ca