BonBini na nos cas nobo! E ta yama: "MarieStella", y ta situa na un puelito cu yama Saventa, cu tabata e prome "CAPITAL" di Aruba. E ta hopi pega cu laman, nos dushi laman, cu nos ta stima asina tanto! Solamente cu un camina meimei nos y e laman! Sinembargo tin un rij di casnan priva na canto di laman, ma tin 3 of cuatro entradanan cu nos por yega facilemente na canto di awa. Zeeover ta hopi serca tambe!MarieStella ta un cas pa e cuido di nos cu ta di edad halto of cu por un of otro disabilidad. E ta provee 18-20 casitanan pa esnan cu ainda pa zorg pa nan mes, y tambe e nivelnan pa cuido mas intensive. Nos ta haya e cuminda cayente merdia, y combustibelnan pa algo pa desayuno y atarde; tambe nan ta provee labamento di panja, limpiesa di cas, maintenacion, y chapimento di yerba ront cas, E casitanan tin un camber pa dos hende, banjo amplio grandi pa rolstoel,, cu cushina y sala. Tin un staf medico di doctor y nurnan, physioterapi, etc.

Nos a muda riba dia cu BICENTO'S a haci 91 anja! Danki Dios pa Su yudansa den henter e anja te di e dia di awe. E mudamento a bai lihe y sauve cu yudansa di yiu y amigo. Nan a provee dos BOLO provee di Linda (yiu) y Ingrid (amiga) y un "Quesio" pa Myrna, su yiu. Danki na un y tur pa boso yudansa!!

Aki, ami Betty ta "pose" cu Pastor Eusebio (Chebo) Petrona, hunto cu mi sobrino Wayne Ratzlaff di Canada. Wayne y su eposa Bonnie tabata bishitando mi na luna di Februari. Chebo a conta mi sobrino, e mainta ey, na Camp Washington, cu su tata, mi ruman John (ya cu Senjor) a yud'e financieramente pa bai na Beibel School na Jamaica! Esey tabata un sorpresa pa Wayne, pasobra anan tabata mucha yong e tempo ey. Tabata un bendicion pa nan dos combersa riba e bendicion ey, cu Ruman Chebo por a conoci un yiu di esun cu a yud'e den necesidad.

LEY Y GRACIA

Ya a pasa mas cu dos mil añanan despues di e morto ariba un crus di nos Señor Jesus, y di Su resureccion. Y desde e tempo ey, e Bon Nobo di pordon di picanan, y di salbacion pa medio di fe personal den nos Señor  resucita, a wordo y ta siendo proclama. Toh te awe masha hopi hende den mundo, encluyendo e Islanan di Antiyas, ta sigui biba den scuridad, mescos cu nunca e Mesias a bini, y a muri y resucita pa nos.

Scritura Santo of sea Beibel, ta bisa nos hopi cla, cu si tabata posibel pa un persona wordo hustifica pa medio di Ley, of sea, door di wardamento di Ley, anto Cristo a muri pornada. Un persona, kende cu e por ta, cu ta bibando cu e pensamento cu e lo wordo declara husto, pasobra cu e ta biba di acuerdo cu e dies mandamentonan, ta den un eror grave. Nos no ta bisando esaki aki, cu e dies mandamentonan ta malo of robes. Absolutamente cu no! E mandamentonan ta husto y bon, pero ta nos ta debil.

Pa sea sincero y honesto  di acuerdo cu revelacion for di Dios den Scrituranan, NO TIN NI UN persona husto den henter nos mundo, ni sikiera un. Tur a desvia di e bon camina, tur a bira inutil. No tin un cu ta bon, ni sikiera uno. Nan garganta ta un graf habri, nan lenga ta practica mentira. Veneno di colebranan ta ariba nan lipnan. Nan boca ta yen di maldicion y amargura. Nan pianan ta lihe pa drama sanger; ruina y miseria ta marca nan pasonan, y e camina di pas nan no conoce. No tin temor di Dios dilanti nan bistanan.  Lesa Romanonan 3:9-18.

Pa motibo di e berdadnan ey revela hopi cla na nos, amigonan, den Scritura, no ta keda luga pa ningun hende gaba. Pero na lugar di gaba, tur di nos su boca ta wordo silencia. Pasobra separa di fe den Cristo, ni un persona den henter e mundo aki cu lo wordo declara husto, separa di fe den Cristo, Kende a carga nos picanan den Su curpa ariba e crus. Pa nos, libra di picanan, por biba pa husticia, pasobra ta pa medio di Su heridanan, nos a wordo cura. Esey ta e bida berdadero, y e ta pa fe. Y e fe aki ta bini di Dios Su mes mediante e Evangelio y e Spirito Santo cu semper ta compaña e berdadero Evangelio di nos Señor. Y tur esaki ta pasobra nos Tata Celestial a stima nos asina tanto cu E no a spar ni Su unico Yiu, ma El a dun’E pa nos tur, pa trece nos serca djE. Ora cu nos Señor Jesus tabata den un curpa humano mescos cu nos, El  a sclama den un ocacion bisando: Bini serca Mi, boso tur cu ta cansa y carga, y Ami lo duna boso descanso. Tuma Mi yugo ariba boso, y siña di Mi. Pasobra Mi ta mansu umilde di curason. Pasobra Mi yugo ta suave, y mi carga ta lihe. Señor Jesus a bisa e palabranan ey, mientras cu E tabata den un curpa humano mescos cu nos, pero sin e naturalesa di pica, manera nos tur tin. Y ta net pa e motibo ey, El a expresa Su amor real y Su compassion na TUR hende di mundo te ariba e dia di awe.

Pasobra El a conoce kiko tin den hende. Pa e motibo ey, amigonan stima di tur parti di mundo: Sea sigur, y masha sigur cu Jesus ta stima bo mescos cu El a stima esunnan cu a mir’E y a scuch’E, e tempo cu E tabata den un curpa humano mescos cu nos tur tin awor. Y Scritura ta revela cu El a wordo tenta den tur cos mescos cu nos, pero sin pica. Siendo cu Señor Jesus nunca a cai den pica, ta nifica alomenos cu El a soporta tur e peso di e tentacionnan cu El a pasa aden.

Y laga nos purba comprende di nos banda, cu ta pa nos El a sufri, y ta pa nos El a muri. Y ta pa nos e Tata a lant’E for di e mortonan. Pa asina un dia pronto nos lo mir’E net manera E ta! O repenti awe di bo bida di pica y pone bo fe di henter bo curason den nos Señor y Salbador Jesus.

Riba e foto aki mi ta tocando piano pa un reunion di Damanan!  Realmente, e ta prome cu e reunion, pa hala atencion cu ta bon pa bin sinta pa e reunion por tuma luga!

Den e dianan aki nos ta wak voetbol bai goal!!  Ya, ken lo ta e gran campeon?

Ma laga nos wak awo kico Bicento tin pa parti cu nos tocante si Scritura tin algo di bisa nos cu nos por sinja fo'i dje..

E GRAN FINAL

Den e dianan aki, tin un lucha masha fervoroso den e mundo di deporte, tocante cual nacion lo bira e Campeon Mundial di Voetbal. Masha hopi gasto di placa tabatin caba, y masha hopi biahamento, etc., etc.

Pero, porfin si nada particular tuma lugar, pronto e dia ey lo yega, cu un team lo sali e ganador. Y nos por imagina e goso y alegria di e team y e nacion cu resulta e Campeon Mundial.

Awor, kico Scritura ta bisa nos tocante algo manera e situacion aki di un victoria cu nos por considera un victoria grandi?

Den e carta cu e Apostel Pablo a scirbi na e Corintionan, e ta bisa nos exactamente e berdad tocante e resultado final di cualke deporte. E ta menciona di coremento of sea di careda. Pero for di esaki nos por siña e berdad pa tur otro deporte, encluyendo voetbal, of sea, wega di bala. Aki e Apostel ta recorda e Iglesia di Corintio, cu den e deporte di coremento ta tur e coredornan ta tuma parti, pero ta uno so ta gana e premio.

Ademas e Apostel ta meniona, cu tur esnan cu ta competi den e weganan, ta haci ehercicio masha pisa. Y nan ta haci esey pa haya un corona cu no ta dura hopi tempo. Anto e Apostel ta recorda e keredornan ey na Corintio: Ma nos ta hasi esey pa haya e corona cu lo dura pa semper. Anto e Apostel ta sigui bisando: Pa e motibo ey, ami no ta core manera un hende cu ta core sin rumbo; mi no ta lucha manera un homber cu ta tira golpi den laira. No, ami ta golpia mi curpa y hasi’e mi catibo, di manera cu despues cu mi a predica na otronan, ami mes lo no wordo descualifica pa e premio.

Asina anto, amigonan di tur edad, cu ta masha entusiasma tocante e lucha di voetbal den e dianan aki, pone bon atencion cu Scritura no ta contra di deporte, pero solamente ta recorda nos, cu e resultado final pa esun cu sali vencedor, su duracion ta masha masha corto.

Pone atencion con te asta den e dianan aki di e weganan mundial, cuanto bes nos ta tende di esunan cu TAWATA famoso den tempo pasa, pero cu ya a pasa pa historia pa semper. Cuanto mas mihor anto amigonan di tur edad, e no ta pa nos duna mucho mas atencion na e Evangelio Eterno cu nos por ricibi awe sin placa y sin preis. Pasobra e preis ya a wordo paga completo pa cada uno di nos. Pero aunke ta berdad cu e preis a wordo paga caba pa cada uno di nos, ta keda esun berdad aki, cu ta fundamental: Dios a crea hende segun Su imagen y semehansa. Y esey ta inclui cu un ser humano ta liber pa haci decision. Un ser humano no ta manera animalnan cu ta wordo controla pa instincto. Tanto ta parhanan, y te asta insectonan ta wordo goberna pa medio di instincto, cual ta un forma di ley den nan, cu ta guianan pa imigra di un lugar pa otro. Pero nos como sernan humano crea den imagen y semehansa di nos Tata Celestial, ta responsabel pa tuma nos propio decision. Ta p’esey cu nos ta lesa masha cla den Beibel, cu e Evangelio mester wordo proclama den henter mundo, na TUR creatura. Esun ku kere ta salba, esun cu no kere ta condena.

O amigonan di tur edad, no tin nada pero nada mas desagradabel den e mundo aki, cu di biba , dia tras dia, sin Cristo como nos Señor y Salbador. Y mescos no tin goso mas grandi te asta den sufrimento, ora cu un persona ta den Cristo nos Señor.

Corda bon, cu siendo cu El a muri y resucita pa nos tur, esey ta inclui tur hende. Pero e berdad ta keda, cu esunnan ku kere ta salba, y esunnan cu no kere ta condena. O sea sigur awe y repenti di pica, y deposita bo fe den e Yiu di Dios como bo unico Salbador.  

FE Y OBRANAN

Ola, amigonan y amiganan! Ki memorianan Bicento y ami tin dje tempo cu algun di nos famianan di Canada a bishita nos! Aki nos ta comiendo cu algun di nan na ZEEROVER na Sabenta,  hunto cu nos amigonan precioso, Stella y Sixto Feliciano! Sinta dilanti Stella  y Sixto boso por mira mi sobrino Wayne y su esposa Bonnie. Wayne ta yiu-homber di mi ruman John cu cerca Senjor basta anjanan caba. 

Nos ta comparti awe un Blog di siete anja pasa, scirbi na Canada, bibando na e Cas di Hende di Edad yama "Bethany Manor"! Gos'e, mientras nos ta sperandi Bicento conclui e mensahenan tocante e topico grandi den Scritura cu yama: E Evangelio. Ya nos a lesa dos, y lo siguiente lo ta # 3.

FE Y OBRANAN

Den e buki di Santiago 2:26, nos por lesa siguiente: “Pasobra mescos cu e curpa sin spirito ta morto asina tambe fe sin obranan ta morto.” Pa nos por comprende tocante un fe cu ta morto, nos mester compara otro Scrituranan. Efesionan 2:8-10, ta bisa nos lo siguiente: “Pasobra ta pa gracia boso ta salba, dor di fe, y esaki no ta for di boso mes, e ta e regalo di Dios. No pa medio di obranan, asina cu ni un por gaba. Pasobra nos ta e obra di Su man, crea den Cristo Jesus pa haci bon obranan, cualnan Dios a prepara padilanti pa nos haci.” Aki den Efesionan y den varios otro Scritura, nos ta wordo spierta cu salbacion ta pa gracia y cu e ta un donacion di Dios na nos den Cristo. Pero, mescos cu otro doctrinanan den Beibel, e doctrina tocante salbacion gratis of di regalo, por ser mal comprendi.

Un di e motibonan ta cu e palabranan manera: regalo, of don di Dios, of gracia, etc., facilmente por ser mal comprendi y troci. E berdad cu ta ensera den e doctrina di gracia y fe y regalo y salbacion ta: cu ningun hende por ricibi bida eterno dor cu e ta merece esey. Desde e prome hende Adam te awe, no a biba ningun persona cu a ricibi bida eterno como recompensa pa un bida sin pica. Scritura ta proba esey bes tras bes, di manera cu no ta keda lugar pa duda.

For di chikito aki na Antiyas, nos a wordo siña tocante “San” esaki y “San” esey, y asta cas y misa ta yen di imagennan y pinturanan di homber y mohenan cu ta wordo venera y asta adora como “Santonan”. Pero, pa e autoridad di e Palabra di Dios nos por declara awe, cu nunca a existi un persona cu no a peca; y asina merece bida eterno y wordo declara como un “Santo”. E unico persona cu a biba ariba e mundo aki sin haci pica, ta nos Señor y Salbador Jesus, e Cristo. Lesa sin falta: 1 Pedro 2:22-25.

Hende por pensa y bisa y rasona hopi cos, pero Scritura ta autoridad, pasobra e ta inspira pa Dios Su mes. Lesa 2 Timoteo 3:14-17. Y ta pa e autoridad di e Palabra di Dios cu mi por declara cu Jesus, e Yiu di Dios Haltissimo, ta e unico persona cu a biba den un curpa humano pa trinta y tres añanan sin comete un pica, y mentira no a wordo haya den Su boca. Y no esey so, ma tambe ta para scirbi cu El a wordo tenta den tur cos mescos cu nos pero tabata sin pica, y El a sufri ora cu E tabata wordo tenta. Lesa sin falta Hebreonan 2:14-18, y Hebreonan 4:14-16. Ta pa e motibo aki, amigonan, Scritura ta enfatisa bon cla lo siguiente: “No tin salbacion den ningun otro, pasobra no tin otro nomber duna na hende bou di cielo, dor di cual nos mester wordo salba.” Lesa esaki den bo mes Beibel den Echunan 4:12.

P’esey no ta existi ni un otro Santo, sino esunnan cu a repenti y kere den Señor Jesus pa pordon di picanan y bida eterno. Esakinan ta enclui Arubiano, Curasoleño y Boneriano, Venezolano, Colombiano, Chines, Africano, Canades, Mericano, Europeo, etc., etc. cu a tende e Evangelio, y cu yudansa di e Spirito di Dios a repenti y a obedece. Si encaso tin algun cu ta duda, mi ta combida bo pa lesa Revelacion 7:9-17. Sea sigur cu cada uno di esunnan cu ta menciona den e Scrituranan ey, ta personanan mescos cu ami y abo. Ta personanan di tur e nacionnan cu a tende e Evangelio y a kere di curason y a obedece.

Ma awor, kico ta e parti tocante obra, di cual Santiago ta enfatisa masha fuerte mes unda el a declara cu fe sin obra ta morto? Sin duda obra tin un parti importante den cada uno cu ta kere e Evangelio. Pero no lubida cu Efesionan 2:8.9 ta declara cu salbacion NO por ser obenti pa medio di obranan. Sinembargo mi ta admiti cu aki nos tin di haci cu awa hundo, y e ta facil pa causa confucion meimei rumannan den e fe. Y un di e motibonan cu por y ta confundi nos ta e palabra obranan.

Aki den Antiyas, for di tempo cu nos tabata mucha, nos a wordo siña tocante bon obranan. Y e “santonan”  cu mi a menciona caba tabatin hopi di haci cu bon obranan y sacrificionan personal, y pa biba separa fo’i e mundo di pecadornan, etc. Esey NO ta loke Scritura ta siña nos. Y aki den Santiago mes, nos ta haya dos ehempel cu el a duna como ilustracion, esta; Abraham y Rahab e prostituta. E fe di Abraham a wordo proba dor di su echo di obediencia, Y e fe di Rahab a wordo demostra dor di su echu di a pone su bida na peliger, pa motibo di su fe den e Dios Israel. Lesa e bunita pida historia aki den e Buki di Josue 2:1-24.

Pues nos por conclui cu fe sin accion of sin echu ta un fe inutil of morto. No ta basta pa bisa: Ami ta kere cu ta un Dios so tin. Ma e loke si ta necessario ta; pa nos kere y obedece e loke e Unico Dios aki ta bisa nos tocante Su Unico Yiu, nos Señor. Lesa 1 Juan 5: 9-12.

E EVANGELIO (continua #3)

Aki por mira Bicento contento cu su cuatro yiu-mohenan: Juanita, Chinda, Myrna y Linda! 

 Den nos prome mensahe relaciona cu e Evangelio, nos a menciona cu e Evangelio ta e Bon Noticia na humanidad, basa ariba e amor di Dios pa nos tur. Manera nos por lesa den Juan 3:16, unda e ta bisa “Pasobra Dios a stima mundo (humanidad) asina tanto, cu El a duna Su unico Yiu, pa tur (of) kende cu kere den djE, no lo bai perdi, ma haya of tin bida eterno.” Pues, ey nos tin e prome mencion tocante e increibel Amor di nos Tata Celestial, pa cada ser humano ariba e mundo aki.

Den di dos mensahe, nos a menciona e Evangelio di e crus, Ta ariba e crus, Señor Jesus a carga e picanan di henter humanidad. Esey ta inclui tur y cada ser humano cu  lo habita e planeta aki. Pues, si pa casualidad bo ta lesando e mensahe cortico aki, nos ta desea pa bo sabi e berdad cu Cristo, e Yiu di Dios, a duna Su bida, cargando bo picanan den Su curpa ariba e crus. Y e proposito ta: pa nos libra di picanan, por biba pa husticia, pasobra ta pa medio Su heridanan, nos a wordo cura. Aki nos kier duna un palabra di spiertamento na tur hende: algo tocante crusnan. Hopi almanan precioso tin bes ta carga un crus sea bisti na garganta, of ta cologa na un cadena den auto, of sea di un of otro forma den casnan, oficinanan, of riba portanan, etc., etc.

Pero e berdad segun Scritura ta keda, cu nos tur mester repenti di nos picanan y pone nos fe den Señor Jesus, kende a wordo crucifica pa nos picanan, y a wordo dera. Pero,  na e di tres dia E Tata a lant’E atrobe na un manera victorioso. Di manera cu awor nos Señor no por muri mas, ma E ta sinta na e man drechi di Dios, e Tata, unda E ta representa nos, y ta entercede pa nos como nos Mediador.

Pa carga un crus na garganta, sin repentimento di nos picanan y fe den e Yiu di Dios Kende a carga nos picanan den Su curpa ariba un crus, lo no salba nos! Aunke nos montona crusnan, lo no sirbi nos pa nada den e dia di husgamento. Nos ta repeti  cu sin repentemento personal y fe den e Yiu di Dios, tur forma religioso ta enbano. Ningun otro persona por kere e Evangelio pa nos. Ni nos mayornan stima, ni nos esposo of esposa por repenti y kere e Evangelio den nos luga.

Cristo a muri y a resucita pa cada ser humano. E Angelnan no por repenti y kere den nos lugar. Cada uno di nos, sea homber of mohe, for di tur nacion di mundo ta responsabel dilanti di Dios. Pasobra e Yiu di Dios a muri y a resucita pa cada uno di nos. P’esey Scritura ta sigura nos, cu ta un preis grandi a wordo paga, pa cada uno di nos. Y ta pa e motibo ey tambe nos ta wordo spierta den Scritura cu ta bisa lo siguiente: “ Pa e motibo aki nos mester pone muchu mas atencion na loke nos a tende, pa nos no aparta for di nan. Pasobra si e palabra papia pa medio di angelnan a keda proba di ta firme, y tur transgrecion y desobediencia a ricibi nan pago husto; con anos lo scapa si nos neglisha un salbacion asina grandi? Cu na prome lugar a wordo papia door di Señor, y a wordo confirma na nos door di esunnan cu a tende..” etc., etc. (Lesa Hebreonan 2:1-23)

Pa e motibo ey, amigonan stima pa Señor nos Dios Su mes, manera nos por lesa hopi cla den Scritura Santo. Pasobra ora cu nos lesa cu Dios a stima mundo, etc., etc.  e ta inclui nos sin distinction. Ken cu bo por ta lesando e mensahe cortico y simple aki, sea sigur y masha sigur cu Cristo, e Yiu di Dios, a carga bo picanan den Su curpa aruba e crus. Pero ta keda  e parti sumamente importante na cada uno di nos, cu a tende e Bon Noticia ey, cu e Yiu di Dios Su mes a carga nos picanan den Su curpa ora cu E tabata cologa aruba un crus. Y cu e motibo cu El a haci esey tabata cu nos Tata Celestial Su mes a stima nos, y cu e Yiu di Dios tabata boluntario pa ta e sacrificio pa rescata nos for di e castigo eterno  causa pa pica.

Esaki ta e Bon Noticia cu nos tin e privilegio di por anuncia awe. Y cada bes cu un persona ta obedece of acepta y kere e bon nobo aki, tin goso den cielo meimei di e Angelnan di Dios. Y esaki ta berdad infalibel, pasobra ta simplemente imposibel pa nos Tata Celestial gaña. Amen y Amen!

Algun dianan pasa Bicento y ami a caba di paga nos cuenta di coriente na Elmar NV, na Hato aki na Aruba. Net ora nos tabata saliendo for di e parkeerplats, un Señora a aserca nos ofreciendo nos un pamfleta. Bicento a baha e bentana, a tum’e y nos a sigui nos camina pa cas.  Mi a cuminsa le’s, ey mes den auto, y esaki ta loke mi a lesa:

JESUS TA E PORTA PA CIELO
Jesus ta e porta … El a bisa den Juan10:9, “Ami ta e porta; si un hende drenta door di Mi, e lo ta salba, y lo drenta y sali y lo haya yerba berde.” Jesus ta e camina…  Ami ta e camina, e berdad y e bida; ni un hende no ta bin cerca e Tata, sino pa medio di Mi.” (Juan 14:6)

JESUS TA E UNICO PORTA PA CIELO

Mi amigo, laga mi haci bo e pregunta importante aki. Abo ta tratando pa drenta cielo door di un otro manera,  cu esun cu Jesus a provë?  Si ta asina, Jesus ta bisa cu bo ta un hortador y ladron. “Di berdad, di berdad Mi ta bisa boso. Esun cu  no drenta pa e porta den cura di carnenanma ta subi pa otro part, esei ta un hortador y ladron. ” (Juan 10:1)

No tin otro manera pa drenta cielo. Religion no ta e camina! E predicador of sacerdote no ta e camina! Bautismo di awa no ta e camina! Miembresia den un Iglesia no ta e camina! Siendo un hende moral no ta e camina! Haciendo bon obranan no ta e camina!

Beibel ta bisa den Echunan 4:12, “Y no tin salbacion den ningun otro, pasobra no tin bou  cielo ningun   otro nomber tampoco, cu ta duna na hende, pa cua nos mester wordo salba.”  No tin nada cu bo por haci pa gana salbacion of entrada na Cielo.  “Pero nos tur a bira manera hende cu ta impuro, y tur nos echunan husto ta manera paña sushi.” (Isaias 64:6a).  Ta solamente door di ricibi JesuCristo com obo Señor y Salbador bo p r drenta den e reino di Dios.

CON BO POR DRENTA E PORTA?
Bo por drenta e porta door di pidi Jesus bin den bo curason y salba bo. “Ma tur esnan cu ricibi E, na nan El a duna e derecho pa bira yiunan di Dios, esnan cu ta kere den Su nomber.” (John 1:12)  Beibel ta declara, “Cu si bo confesa cu bo boca Jesus como Señor, y kere den bo curason cu Dios a lant’E for di mortonan, lo bo ta salba. Pasobra cu curason hende ta kere pa haya husticia, y cu boca e ta confesa pa haya salbacion.  Ken ci invova e nomber di SEŇOR lo ta salba.” (Romanan 10:9,10, 13)

No laga diabel gaña bo door di pone bo kere cu tin un otro camina. Beibel ta bisa cu e diabel ta … “un gañador, e tata di tur mentira.” (Juan 7:44b)

Salbacion eterno ta un regalo gratis na tur cu simplemente ta ricibi JesuCristo den nan curason. “Pasobra pa medio di gracia boso a wordo salba door di fe, y esey no ta di boso mes; e ta e don di Dios, no como resultado di obranan, pa ni un hende no gaba.” (Efesionan 2:8,9)

Jesus a bisa den Marco 1:15b, “… repenti boso y kere e Evangelio.” Keriendo e Evangelo ta keriendo “…cu Cristo a muri pa nos picanan segun e Scrituranan . y cu El a wordo dera, y cu El a wordo lanta riba e tres dia segun e Scrituranan.” (1 Corintionan 15:3,4)

Jesus a muri ariba e crus, a wordo dera  y a wordo resucita pa e poder di Dios pa nos salbacion. “Pasobra Dios a stima mundo asina tanto cu El a duna Su unico Yiu pa ken  cu kere den djE no bai perdi, ma tin bida eterno.” (Juan 3:16)

Mi amigo, si bo ke ta sigura cu bo ta salba y cu cielo lo ta bo hogar, haci e oracion aki, of cu palabranan similar,  cu henter bo curason.  “O Dios, mi ta admiti cu ami ta un pecador, baiendo perdi. Mi sabi cu mi no por salba mi mes. Ami ta repenti di mi picanan y mi ta pone mi fe den e sanger cu Señor Jesus a drama pa mi ariba e crus pa paga pa tur mi picanan. Mi ta acepta Bo awor como mi Salbador y ta confia cu Bo lo hiba mi na cielo. Amen.”

Beibel ta bisa nos den Juan 3:36, “Esun cu kere den e Yiu tin bida eterno; ma esun cu no obedece E Yiu , lo no mira bida, ma e rabia di Dios ta keda riba dje.” (Juan 3:36)

Esaki ta e mensahe ariba e pampleta cu e señora a ofrece nos e den e parkeerplats di Elmar NV! E tabata un tractado ofreci na public gratis di “Fellowship Tract League” na Lebanon, Ohio, na Estados Unidos.  Ki un spiertamento! Nos ta cpmparti e mensahe aki cu boso nan ariba nos blog awe.

E EVANGELIO (continua).

Manera ya mi a mencion, den dos blog anterior cu nos tabatin bishita di Canada y Inglatera di sobrino y sobrina y nan famianan! Na tur a bin 10! Mi a priminti mi sobrino David cu ami lo snorkel cu ne, aunke esey lo ta mi prome biaha pa snorkel desde cu mi a opera mi dos heup! 

Ma ata mi aki, a snorkel cu nan na Baby Beach. Nan a rondona mi cu wow'i shoko, pa nada n' pasa mi!! Tabata un privilegio unico y un tempo cu ami lo no lubida!

Ma awor:  ta tempo pa nos studia hunto algo mas tocante e tema:

E EVANGELIO

Den nos prome mensahe, nos a enfatisa cu e palabra Evangelio  ta nifica “Bon Noticia”. Y e Bon Noticia aki ta duna na tur hende di mundo. Y e Bon Noticia ta; cu e Yiu di Dios cu  ta nos Señor JesuCristo a carga nos picanan den Su curpa ariba e crus, na unda El a muri pa e picanan di henter humanidad. E persona cu tende e Bon Nobo aki, y kere di curason, y acepta Señor Jesus como su unico Salbador, ta ricibi pordon di tur picanan, y e promesa di bida eterno cu nos Señor, y hunto cu tur e otronan cu a kere di curason.

Awe nos lo considera pa un momento tocante: e Evangelio y e crus. Ora cu nos ta papia di “e crus” nos ta papia di algo historico. Pa cuminsa:  crusnan a wordo usa como un manera cruel pa mata malbadonan, ya for di hopi tempo prome cu nos Señor Jesus. Ariba e mes un dia ey, cu Señor Jesus a wordo crucifica, tabatin dos ladron  cu tambe a wordo crucifica, y Jesus tabata crucifica mei mei di nan. Y un di e ladronnan ey, tawata insulta Señor manera nos por lesa den Lucas 23:39. Pero e otro criminal a reprende. Y a pidi Señor Jesus pa corda riba dje, ora cu E bini den Su reino. Y Jesus Su contesta tawata, “Mi ta bisa bo e berdad; awe lo bo ta cu Mi den Paraiso.” (Lesa Lucas 23:32-43)

Pues, papiando di un crus awe, y particularmente di e crus ariba cual nos Señor a muri,; ki nificacion esey tin pa henter humanidad awe? Nos ta bibando actualmente den un tempo cu noticianan for di tur parti di mundo ta yega serca nos rapidamente. Ehempel: For di algun simannan caba, henter mundo por scucha via television tocante di e Avion cu a perde, carga cu pasaheronan. Tambe tocante e problema entre Rusia y Crimea. Ademas e problemanan masha serca di nos aya na Venezuela, etc., etc. Sigur  sigur, cu cada uno di e noticianan ey, tin hopi importancia pa masha hopi hende.

Pero, pa autoridad di e Palabra di e Dios Todopoderoso, nos por bisa cu: E morto di Señor Jesus ariba un crus, ta e noticia di mas importancia pa cada uno di nos aki na Aruba,  Curaçao y Bonaire, y e resto di mundo, cu tur otro noticianan poni hunto. Y e motibo pakico nos por bisa algo asina ta: cu ta ariba e crus ey, nos Señor Jesus a carga e picanan di henter humanidad den Su curpa. Y esey ta nifica cu tur ser humano ta envolvi of inclui. Sinembargo nos mester tene cuenta cu un ser humano ta diferente cu animalnan of parhanan, etc. E ser humano a wordo crea den e imagen di Dios bibo, Kende a crea tur cos. Cada persona, sea homber of mohe, a wordo crea cu un boluntad propio. Nos por bisa si of no dependiendo di e circunstancia. Y bolbiendo atras den historia di humanidad, asina pronto cu e prome personanan cu Dios a crea, a desobedece  Dios, pica a drenta mundo, y hunto cu esey morto tambe a drenta, etc., etc.

Y segun e Palabra di Dios, ni sikiera un persona a scapa e condenacion cu a sigui e caimento den pica. Esey ta nifica cu no tin ni sikiera un persona aki na Aruba of e resto di humanidad ront mundo, cu a scapa e condenacion cu a bini pa causa di pica. Segun Scritura: Tur a peca, y ta falta e gloria di Dios. Pero; si: segun e mes un Scritura, cu ta palabra di Dios bibo, ta bisa nos asina aki: “Pero, awor, aparte di e ley, un husticia di Dios a wordo manifesta di cual e Ley y e Profetanan ta testifica, esta; e husticia for di Dios cu ta bini pa medio di fe den JesuCristo na tur cu kere. No tin diferencia, pasobra tur a peca, y ta falta e gloria di Dios, y ta hustifica gratuitamente, pa medio di Su gracia, door di e redencion cu a bini pa medio di Cristo Jesus.”  Lesa Romanonan 3: 21-16).

E palabra “REDENCION” , ta di sumo importancia pa tur hende for di tur nacion di mundo. Pasobra Redencion ta enclui cada uno di nos, sin importa di cual nacion. E palabra ey ta nifica cu un preis a wordo paga pa cada uno di nos. Y tur hende di mundo ta enclui den e redencion aki. Scritura ta bisa masha cla mes, cu e pago di pica ta morto. Y Scritura ta revela cu despues di morto lo sigui huicio of sea huzgamento. Sea sabi y obedece Señor Kende ta Esun cu kier pa tur hende repenti y kere e Bon Noticia aki di pordon y bida eterno pa medio di fe den Cristo Jesus nos Señor. 

Nostalgia!  E dianan aki nos ta pasa frequentemente den e cunucu di Centro Juvenil Washington, e lugar unda mi a traha pa 12 anja cu mucha, hoben y adulto den Campamentonan, Clubnan, Retironan, Recreacion di tur sorto. Wel, den e dianan aki bou e direccion di Sr. Frits Van Dijk y su Senjor y yiunan, e lugar tin bida atrobe! ta dushi pa observa. Ta haci nos corda hopi e pasada manera e dos foto mi a "Post" awe. E prome ta mustra hobennan ta pusta ken por bula di mas halto! Den di dos dos hobennan yudando pa lanta un "
co'i wanta biento" usando e tractor cu su garoshi cargando ramanan di coco! Ki memorianan! 

MA AWOR ta e momento cu nos kier medita den e Palabra di Dios, y nos tema awe ta: E EVANGELIO.

Pa e gracia y misericordia di nos Tata Celestial, nos lo presenta algun mensahenan relaciona cu e Evangelio. Manera nos a menciona caba varios bes, cu e palabra “Evangelio”
 ta nifica “Bon Noticia”. Y di berdad cu e mensahe presenta den e Evangelio, ta e noticia di mas precioso cu ta worde proclama den henter mundo! Y e preciosidad di dje ta; cu e ta dirigi na tur hende di mundo. P’esey, sea cu ta un dama of cu un cabayero, anciano, adulto of hoben, e mensahe relaciona cu e tema di Evangelio, ta dedica na cada uno di nos. Y no lubida cu e ta un noticia di gran alegria pa tur hende di mundo. No ta haci diferencia entre e riconan y e pobernan, homber y mohenan, pasobra nos tur a peca y ta falta e gloria di Dios.

Pa cuminsa, e Evangelio aki, of sea; e bon nobo aki, ta basa ariba e amor di Dios pa henter humanidad. Beibel ta bisa nos lo siguiente: Pasobra Dios a stima mundo (humanidad) asina tanto, cu El a duna Su Unico Yiu, pa tur cu kere den djE no bai perdi, ma tin bida eterno. Pasobra Dios no a manda Su Yiu den mundo pa condena e mundo, ma pa salba e mundo pa medio di djE, Kende cu kere den djE, no ta condena, pero kende cu no kere ta condena caba, pasobra e no a kere den e Nomber di e unico Yiu di Dios.

Amigonan stima di henter Caribe, y di henter mundo. E berdadnan menciona den e porcion di Scritura aki, cu ta scirbi for di mas cu dos mil añanan pasa, ta na vigor mescos cu si ta awe Señor a papia cu nos den bos audible. Y aki, y door di Scritura Santo, nos ta wordo sacudi cu e spiertamento solemne aki, pa nos repentii di nos picanan, y ricibi of acepta Señor Jesus como nos unico y suficiente Salbador. Ariba e crus El a carga cada uno di nos, su picanan. Pa nos libra di picanan por biba na un manera husto, pasobra ta pa medio di Su heridanan nos ta cura. Y esey ta nifica cu ta solamente si nos repenti di nos bida di pica, y acepta Señor Jesus como nos Salbador personal, nos ta wordo pordona y purifica, y ta bira miembro den e curpa di Cristo. Y como garantia cada uno di nos cu a obedece e Evangelio mediante repentimento di nos picanan, y fe den Señor Jesus, ta ricibi e Spirito Santo. Y esey ta e garantia di nos salbacion y bida eterno. Awor ta necesario pa nos sabi kico Señor ta bisa nos cu ta sigui for di e momento mas precioso ey di nos fe personal den e Yiu di Dios.

Segun Scritura, ora cu un persona ta tende e Evangelio, e ta wordo convenci di su picanan y di e huicio di Dios. Anto e persona aki ta kere den Señor Jesus di henter su curason cu e yudansa di e Spirito Santo di Dios. For di e momento ey, e persona aki, sea homber of mohe, sea un adulto of un hoben, e persona aki ta nace di nobo. Y for di e momento aki, e ta bira un miembro di e curpa di Cristo cu ta e Iglesia di Dios bibo, pilar y fundeshi di berdad.

Sinembargo, mescos cu un baby recien naci tin mester di lechi pa e por crece y madura, mescos un persona cu a kere di henter su curason, tin mester di e lechi spiritual di e Palabra di Dios, pa e por crece cu ne, y madura. Nos ta recomenda aki na cada uno den e Islannan aki, cu a kere e Evangelio recientemente, pa bo lesa e Capitulo cuater  di Efesionan cu oracion, pa Señor Su guiansa den bo bida nobo. Anto lesa tambe: 1 Corintionan 12:1-31. Aki nos por siña hopi cla, cu ta e Spirito Santo di Dios, ta Esun cu ta duna donnan na e persona cu a kere e Evangelio di curason. Y e curpa humano ta wordo usa aki como un ilustracion exelente. Y e resultado ta cu cada berdadero keredor ta ser compara cu un miembro den e curpa. Y e unico manera pa e curpa humano funciona manera mester ta; cada miembro mester coopera cu un y otro. Y cada miembro tin mester di un y otro. P’esey cu amor pa un y otro, tur parti di cada miembro den e curpa di Cristo.

Pa fabor rumannan den Cristo di idioma Papiamento, laga nos bolbe na e doctrinanan sano di Scritura. Pa nos stima un y otro di acuerdo cu e boluntad di nos Tata Celestial. No lubida di lesa 1 Corintionan 12 completamente.

UN DIOS SOLAMENTE

Dia 24 di Januari te cu Februari 17, 2013,  Bicento y ami, Betty, tabatin e privilegio di tin bishita di nos famianan for di Canada. Nan tabata dies persona na tur! Ki un tempo dushi nos a pasa! Nos a keiro hunto, come hunto, asta dos bes na Zeerover! Nos  bishita rumannan den e fe, pasa un tempo haci conoci cu algun di Bicento su yiunan, bisanieto/a, y asta bisanieto, ruman y sobrina! Nan a "snorkel" na Baby Beach, Malmok, Palm Island.  Asta ami, Betty, cu 86 anja a "snorkel" cu nan, cumpliendo cu un promesa cu mi a haci cu David, via telefon cu ami lo snorkel cu nan, dia cu nan bin!! Wel, wel, tabata un tempo precioso. Mira riba e foto ariba algun di nan cu a subi e Anker na parti zuid di Aruba.  Danki pa bini!

 

Ma awo nos kier tuma tempo pa wak den Scrituranan y mira Kiko Dios tin di bias di e topico aki:  

UN DIOS SOLAMENTE

Mi a tende hende bisa enfaticamente: “Ami ta kere cu tin un Dios.”  Y e pensamento of e proposito di e declaracion ey ta: cu esey ta tur loke un persona mester sabi,  pa e ta den bon relacion cu Dios, y speransa pa despues di morto.

E loke nos ta purba trece padilanti cu e mensahe aki ta, e loke Spirito Santo di Dios, a inspira e Apostelnan y otro sirbidornan berdadero di Dios pa bisa nos e berdad tocante Señor Dios. Pasobra no ta di awo cu tabatin e mes un problema aki; esta,  pa kere cu ta un Dios so tin, y cu esey ta basta den e dia di Huicio. Un di e sirbidornan di Dios cu yama Santiago, ta spierta nos bisando, “Bo ta kere cu ta un Dios so tin. Bon! Asta e demoñonan ta kere esey y ta tembla.” (Santiago 2:19).

E declaracion severo aki di Santiago, no ta pa siña nos cu e ta robes pa kere cu tin un Dios solamente. Pero e spiertamento ta, pa nos pone bon atencion na loke e Unico Dios aki ta bisa tocante di Su Unico Yiu, cu ta nos Señor y Salbador JesuCristo. Pues, pa nos comprende e loke Santiago ta bisa nos, nos mester compara Scritura cu Scritura. Solamente asina nos por yega na e comprendemento, cu ta un Dios so tin, y un Mediador entre Dios y hende. Y cu e Mediador aki, ta ningun otro sino e unico Yiu di Dios Su mes. Pa e motibo ey, amigonan di tur edad, cu e salbacion aki ta wordo yama: “E gran Salbacion” pasobra den e mundo aki, no tin nada cu por ser compara cu n’e. Pa cuminsa, tur loke cu tin den mundo, ta pasahero.

Un ser humano por yega asina leu di por montona rikesa den e mundo aki. Pero su propio bida no ta su posicion.  Mescos cu e hende pober ta muri; mescos e hende rico tambe ta muri, e no por hiba su rikesa cu n’e. E tin cu laga tur cos pa otronan cu no a traha p’e. Pero na e otro banda, ora cu un persona cu tabata pober durante henter su bida ta muri, su pobresa lo no tin ningun efecto den e dia di huicio. Mescos cu e rico su rikesa no por salb’e, mescos e pobresa di un persona pober, tampoco por salb’e.

E berdad segun Scritura ta, cu tur hende den mundo, mester repenti di pica, y kere den nos Señor y Salbador JesuCristo, Kende a entega Su mes pa nos picanan, pa E trece nos serca Dios. No tin diferencia entre rico y pober, pasobra tur a peca y ta falta e gloria di Dios.

E Apostel Juan ta bisa nos asina aki: No stima e mundo, ni e cosnan cu tin den mundo. Si un hende ta stima e mundo, e amor di e Tata no ta den dj’e. Pasobra tur loke ta den mundo – e deseonan di hende pecaminoso, e deseonan di su wowonan, y e gabamento di loke e tin y ta hasi – no ta bini di e Tata, pero for di e mundo.

Aki na Aruba, of Curaçao, of Bonaire, y den henter e mundo aki, ta e mes un berdad aki ta prevalece. E hende natural nunca tin basta of suficiente pa hasi’e berdaderamente felis y contento. Anto ariba tur loke un ser humano por tin, e por pensa cu pa kere cu tin un Dios solamente ta dun’e siguridad no solamente ariba e mundo aki awor presente, ma tambe despues di su morto.

Amigonan di tur edad, si e keremento ey den un Dios so, ta e contesta; anto ta nifica cu Cristo a muri pornada. Anto e ora nos ta desprecia e obra di Dios den Cristo completamente. Esaki ta zona masha mahos mes, y blasfemoso.  Pero ta exactamente asina masha hopi  almanan precioso ta biba dia tras dia tur parti di mundo, y tambe aki mes den islanan. Scritura ta declara masha cla mes, cu no tin ni sikiera un persona den henter mundo, cu no tin mester di repentimento y fe den Cristo pa e por ricibi pordon di picanan y bida eterno. P’esey amigonan di tur edad, sea sigur, cu e no ta basta pa kere cu tin un Dios solamente; pasobra te asta e demoñonan ta kere esey. Pero loke si ta absolutamente nesesario, ta pa kere e loke e Unico Dios aki ta bisa tocante di Su Unico Yiu Kende El a manda den mundo. Manera Scritura ta bisa nos masha  cla mes cu Dios a stima mundo asina tanto cu El a duna Su unico Yiu, pa tur cu kere den djE, no bai perdi, ma haya bida eterno. Pasobra Dios no a manda Su Yiu den mundo pa condena  e mundo ma pa salba e mundo, Esun cu kere den e Yiu tin bida eterno, ma esun cu no kere, lo no mira e bida, ma e rabia di Dios lo keda riba dje. Sea sigur, O Aruba, y tur otro parti di mundo, cu e Palalbra di Dios , lo no faya di ningun manera.

Bon dia, Bon dia, lesadornan di nos blog. Mi ta cuminda boso awe for di Baby Beach, un tiki mas pariba unda e olanan ta mas bruto; e ta un lugar favorite di ami y mi esposa Betty, ora nos ta bin banja na "Baby Beach" - un boca chikito asina y e awa no ta hundo. Touristanan ta bin di otro banda unda e hotelnan ta localisa! Nan ta sinti hopi "safe" aki!

 

Ma awe mi ta scirbi di un topico cu nos ta yama :  MORTO

Esaki ta un titulo cu ningun ser humano ta aprecia. Morto no ta un noticia colorido y di goso. Su color ta preto cu ta representa un abismo no aprecia. Sinembargo, apesar di nos sintimento pa cu morto, tur dia, te asta ariba e isla chikito aki, nos por lesa of tende di un of mas mortonan. Y no solamente esey; pero no tin diferencia entre edad, y ni tampoco entre rico y pober, homber of mohe. Di acuerdo cu e Palabra di Dios, morto ta destina pa nos tur, y despues di esey ta sigui huicio of huzgamento. Lesa sin falta: Hebreonan capitulo 9 completo.  Pa fabor lesa e porcion di Scritura ey. Y considera ki importante e ta, cu Cristo, e Yiu di Dios, a wordo mata ariba un crus, na unda El a carga den Su curpa, e picanan di cada uno di nos. Pues, di henter humanidad. Y e mes Jesus aki lo bolbe atrobe, pero e biaha aki, lo no ta pa motibo di pica mas, ma pa trece salbacion na esunnan cu ta sperando p’E.

Un pregunta por ta: Y ta kende cu kende, ta esunnan cu ta sperando ariba Señor Jesus? Ta na cual religion mi mester uni of pertenece, pa mi por spera cu goso e benida di Jesus? Amigonan y stimanan di tur edad, e contesta pa sorto di preguntanan asina, ta masha cla mes scirbi pa nos den Scritura Santo cu nos ta yama, “Beibel”.  Pa ehempel, mira Echunan 4:12, unda e Apostel Pedro hunto cu e Apostel Juan a declara den presencia di e lidernan principal di e Judiunan bisando: “Salbacion no ta wordo haya den ningun otro, pasobra no tin otro nomber duna na hende bou di cielo, pa medio di cual nos mester wordo salba.” Aki e Apostel ta papia di e nomber di Señor Jesus, Kende ta Esun cu e Judiunan religioso a crucifica, pero Dios, e Tata a lant’E for di e morto.

Amigonan stima di abla Papiamento,y di cualke otro idioma. Ta e mes un Jesus aki nos ta presenta awe via e mensahe cortico aki. E no a cambia ni un momento so. Salbacion y bida eterno ta posibel awe unicamento mediante e mes un Jesus aki, di Kende nos ta lesa den Echunan 4:10-12. Segun Scritura, e loke ta keda cla pa cada persona aki den islanan caribe y den henter mundo ta: REPENTIMENTO y FE den CRISTO.  Repentimento ta pa tur hende, na tur parti di mundo. Pasobra sin repentimento no tin pordon. Y e causa di esey ta masha cla presenta den Scritura. Y e causa pakico repentimento ta pa tur hende ta: cu no tin ningun persona den mundo cu no tin mester di repentimento. Pakico? E contesta absolut segun e Palabra di Dios ta: Cu no tin ni sikiera un solo persona den e mundo aki, cu nunca a peca. No ta asunto cu ami no ta un mal hende, of mi ta un religioso fiel na mi religion, etc., etc. Pasobra e berdad revela mediante e Spirito Santo di Dios scirbi pa nos repetidamente den Scritura ta: cu no tin ni un hende bon  den mundo cu nunca a peca. Nos por peca cu nos pensamento, cu nos bista, y cu nos palabranan.

Awe cu nos ta scirbiendo e mensahe aki, ta net den e dianan cu aparentemente Aruba ta yen di fiestamento y preparacion pa mas fiestamento. Y esey ta inclui for di e hendenan di edad halto, cu mester sabi miho, te na e muchanan menor di edad, cu realmente mester ta bou di cuido di nan mayornan. E ta simplemente un berguensa asta pa scirbi e loke ta wordo hasi den secreto y den scuridad, y ta wordo acepta pa autoridadnan y pa religiosonan, y pa mayornan. Of sea; cu e manera di bida aki, ta wordo forsa ariba mayornan y otro autoridadnan.

Awor tocante di murimento of sea; morto. E Spirito Santo di Dios a revela hopi cla den Scritura, cu morto lo ta e ultimo enemigo cu lo wordo destrui. Y Esun cu lo destrui cu morto ta nos Tata Celestial Su mes. Manera nos por lesa hopi cla mes den e buki di prome Corintionan, capitulo 15. Lesa cu calma henter e capitulo aki. Y aki nos por mira cu na final di historia humano ariba mundo, Dios e Tata Su mes lo destrui cu morto mediante Señor Jesus. Di manera cu finalmente Dios e Tata Su mes, lo ta tur cos den tur cos.

Sea asina bon di lesa e Capitulo 15 aki cuidadosamente y oracion y dependiende ariba e guianso  di e Spirito Santo di Dios, cu tur respet y reverencia.

 

Tin bes ami ta pensa unda tur e hobencitonan ta cu a sinta bao di mi sinjansa un tempo? Wel, e ultimo biaha cu nos a bishita Bonaire, algun pastornan y obreronan cristian a bin bisa nos ayo na vliefelt! Ki un sorpresa di mira varios di hobennan cu tabata den mi ministerionan di club, zondagschool, etc., na Bonaire! Nan tambe a expresa nan gratitud na Bicento pa e bendicion di su mensahenan antes y awor na Blog. Tabatin brasanan di alegria di a mira un y otro despues di anjanan! Dios ta grandi, y  simia, SU Palabra, no ta wordo planta envano den e curason di muchanan y hobennan. Fe y curashi nos mester tin pa kere cu e Palabra cu ta wordo planta lo duna fruta den su tempo. E foto aki ta hopi valioso yu precioso pa mi! P'esey curashi sinjadornan di Oansa, Apem, zondagschool, Club di Mucha na Centro Juvenil Washington. Nunca perde animo, ni speransa. Dios ta grandi! Eynan ta e lidernan di e future.  AWOR Lesa tocante kico Scritura ta bisa tocante Gobernantenan y nos relacion pa cu nan......

 

NOS GOBERNANTENAN

Scirbiendo  na Timoteo kende den e ocacion aki tabata un sirbidor di Dios na e Iglesia di Efeso; e Apostel Pablo ta bisa Timoteo lo siguiente: P’esey prome cu tur cos, mi ta spierta pa suplica, oracion, peticion y gradicimento wordo haci pa tur hende. Pa reynan y tur esunnan cu ta den autoridad, pa nos hiba un bida trankilo y keto den tur santidad y dignidad. Esaki ta bon y agradabel den bista di Dios nos Salbador. Kende kier pa tur hende wordo salba, y yega na conocemento di e berdad. Pasobra ta un Dios so tin, y un Mediador tambe mei mei Dios y hende. E hende Cristo Jesus, Kende a duna Su mes como e preis di rescate pa tur hende – e testimonio duna na Su debido tempo. (Lesa 1 timoteo 2”1-15)

Den e porcion di e Scritura aki, amigonan di tur edad, homber y mohenan, nos por mira bon cla, e importancia di Autoridadnan Civil. Y e importancia tambe di haci oracion pa nos gobernantenan. Pasobra den un sentido nan ta sirbidornan di Dios, pa proteha e poblacion sin excepcion di persona. Siendo cu esey ta e berdad irevocabel segun Scritura. Ta nifica cu tur sorto di rebeldia contra autoridadnan civil, ta mescos cu rebeldia contra Señor Su mes. Scirbiendo na un otro sirbidor di Señor cu yama Tito, e Apostel Pablo ta bisa lo siguiente: Recorda nan pa ta sumiso na gobernantenan, y na autoridadnan, pa ta obedicido, y dispuesto pa haci tur bon obra. Pa no calumnia ningun hende, pa no ta pleitado, ma suave, mustrando tur consideracion pa tur hende. E palabra “tur consideracion” por nifica: “cortesia”, of: “mansedumbre”. Y nos mester comprende, cu esey ta nifica, nos atitud pa cu tur hende. Pues, francamento bisa, sin yudansa di e Spirito Santo di Dios, e lo ta masha dificil, of imposibel.

Anto e Apostel ta sigui bisando: Pasobra nos mes tambe un tempo tabata ignorante, desobedecido, gaña, esclavisa na varios pasion y placer, bibando den malisia y envidia, odioso, y odiando otro. Ma ora cu e bondad di Dios nos Salbador, y pa Su amor pa humanidad a aparese, El a salba nos , no a base di obranan cu nos a haci den husticia; ma segun Su misericordia, pa medio di e labamento (of baño)  di regenracion, y renobacion pa medio di Spirito Santo. Kende (of cual) El a basha of duna of drama ricamente ariba nos pa medio di JesuCristo nos Salbador. Pa nos siendo hustifica pa medio di Su gracia por wordo hasi erederonan segun e speransa di bida eterno. Anto e Apostel ta sigui bisando: Esaki ta un palabra fiel; y e cosnan aki mi kier pa bo confirma constantemente, pa esunnan cu a kere den Dios percura di haci bon obranan. E cosnan aki ta bon, y di probecho pa tur hende. Anto e Apostel ta sigui cu e spiertamento aki, cu sin duda ta keda na vigor te na e final di nos bida den e curpa aki bisando: Ma evita contraversionan bobo, geneologianan y pleito y descusionnan tocante di ley, pasobra nan no tin probecho, y no tin ningun balor. Pues, considerando e loke Scritura ta bisa nos tocante di nos Gobernantenan, nos por mira hopi cla, cu nan tin un responsabilidad grandi pa cu comunidad, pero, na e mes un tempo nan mes tambe tin responsabilidad grandi dilanti di Señor. Pa e motibo ey, ora cu nos ta haci oracion pa nan, laga nos corda cu e Evangelio di gracia di Dios, ta enclui tur ser humano, for di e mas menos, te na esun di mas halto.

Ora cu nos ta lesa den Scritura cu Señor ta manda of ordena na tur hende pa nan repenti; esey ta nifica, “TUR HENDE”.  Den e Buki di Echunan 17:29-31,  nos por lesa cu den e temponan cu a pasa, Dios a ignora ignorancia di hende, pero awor E ta manda of comanda tur hende, na tur parti pa nan arepenti. Pasobra El a fiha un dia den cual E lo huzga mundo cu husticia pa medio di un homber Kende El a apunta. El a duna prueba di esaki na tur hende dor di a lant’E for di morto.

E loke nos ta purba enfatisa aki, amigonan stima, ta e facto cu tur tur hende ta inclui. Tanto ta e grandinan, como esunnan di mas abao cu a biba den e mundo aki. Esey ta inclui: Reynan, Emperadornan, Presidentnan, Ministernan, Cientificonan, y tur otro titulonan cu a y ta existi.E grandinan lo no scapa pa motibo di nan grandesa. E pobernan lo no scapa pa motibo di nan pobresa. Si salbacion tabata posibel di cualke otro manera, cu repentimento di pica, y fe den Cristo nos Señor; ta nifica cu ta pornada Cristo a muri y resucita pa nos.

 

P’esey amigonan di tur rango y situacion, Awe ta e dia di Salbacion. Si bo a tende Su bos awe, no haci bo curason duro. Corda loke Scritura ta bisa nos. Ken cu invoca e nomber di Señor, LO TA SALBA.