Bida of Morto (conclucion)

Amigonan y stimanan; nos tabatin dos mensahe corto tocante bida of morto, y awe nos ta conclui e tema aki. Esey no ta nifica cu nos a bisa tur loke tin di bisa relaciona cu bida of morto, pasobra tur mensahe biblico di un of otro manera ta den e contexto di bida eterno of perdicion eterno. Jesus a bisa e siguiente palabranan aki, mientras cu E tabata den un curpa humano aya na Palestina. "Ami ta bisa boso e berdad, kende cu tende Mi palabranan y kere Esun cu a manda Mi tin bida eterno y lo no ta condena; el a pasa for di morto na bida." Juan 5:24

Tempo cu Jesus a bisa e palabranan ey, E tabata den un curpa humano mescos cu esun di nos, cu excepcion di e naturalesa pecaminoso. Pero, mescos cu e prome hende Adam por a wordo tenta pa desobedece Dios Su mandamento, mescos Señor Jesus tambe por a wordo tenta ora E tabata den un curpa humano mescos cu nos. Y mescos cu nos por sinti dolor y calor y friu y hamber, etc., mescos Señor Jesus tambe por a sinti mescos cu nos. Y mescos cu nos por wordo tenta pa hasi loke ta malo, nos Señor tambe a wordo tenta.

Den Hebreonan nos ta lesa lo siguiente: "P’esey siendo cu nos tin un gran Sumo Sacerdote Kende a bai dor di e cielonan, Jesus e Yiu di Dios, laga nos tene firme na e fe cu nos ta profesa. Pasobra nos no tin un Sumo Sacerdote kende ta incapas pa simpatisa cu nos debilidadnan, ma nos tin Un kende a wordo tenta den tur manera, mescos cu nos ta ser tenta, ma sin pica, (of sinhasi pica)." Hebreonan 4:14-16.

Den e mes un buki ey nos ta lesa: "Siendo cu e yiunan ta di carni y sanger, E tambe a comparti den nan humanidad, di manera cu dor di Su morto E por destrui esun kende tabatin poder di morto, esta, e diabel, y duna libertad na esunnan cu henter nan bida tabata teni den sclabitud dor di nan miedo di morto… Pa e motibo aki E mester a wordo haci mescos cu Su rumannan den tur manera, pa asina E por bira un Sumo Sacerdote misericordioso y fiel den sirbimento na Dios, y cu E por haci reconciliacion pa e picanan di e puebel. Pasobra E mes a sufri ora cu E tabata wordo tenta, E por bini na yudansa di esunnan cu ta wordo tenta." Hebreonan 2:14-18
Den e Scrituranan ey tin masha hopi berdadnan spiritual involvi cu no ta facil pa pone riba papel. Nos ta combida sinceramente na cada uno cu ta lesando e mensahenan aki, pa bo mes personalmente lesa den bo Beibel e scrituranan aki. Y nos ta enfatisa cu cada uno di nos mester haci esey cu oracion y confesion di nos ignorancia, pa Señor ilumina nos mente y obra den nos spirito y den nos ser completo, pa nos por comprende y kere y ricibi e bendicionnan indescribibel cu e Scritura ta contene.

Pues, te aki pa awe. Te otro ocacion. Corda cu nos adres di email ta: bbhenriquez@setarnet.aw Nos lo tin deseo di tende cu bo ta lesando nos blog, y nos ta contento tambe pa cualke sugerensia, pregunta of palabra di encurashamento.
Bicento y Betty Henriquez, Washington