ULTIMO ROSEA

Antes na Aruba, nos bieuwnan tabata bisa na e final di un aña; cu e aña bieuw ta halando su ultimo rosea. Claro cu esey ta unicamente un manera di papia den comparacion. Sinembargo e comparacion ey ta ilustra e bida di cada uno di nos sernan humano, y asta di animalnan. (Compara Eklesiastes 3:18-22). Pero no tuma e scritura ey como un splicacion final di e tema aki; pasobra e diferencia entre hende y animal ta incomparabel. Pero laga cada uno di nos sea sigur cu mescos cu nos tabatin nos prome rosea den e mundo aki na e momento cu nos a nace; mescos cada uno di nos lo tin nos ultimo rosea na ora di nos morto.

Uno di e casonan mas interesante y importante, ta tocante nos Señor Jesus den Su encarnacion. Aunke cu El a existi for di eternidad, sinembargo ora cu El a bini na mundo den un curpa humano, E tabatin Su prome rosea. Y mescos cu nos, E tambe mester a hala y exhala rosea pa duna bida na e curpa. Y na, of ariba e crus El a hala Su ultimo rosea. Tur cuater Evangelio ta menciona esaki di un of otro manera. (Lesa Mateo 27:50 y Marco 15:37 y Lucas 23:46, y Juan 19:30). E prome persona cu a wordo mata pa motibo di Su fe den Señor Jesus tabata Esteban cu tabata un homber yen di fe y di e Spirito Santo. (Echunan 6:5)

Pero a socede cu un grupo religioso Judiu cu ta yama nan mes e snoa di libertad, motiva pa fanatismo, a traha un complot, y a acusa Esteban di blasfemia, y a logra pa kita su bida na un manera cruel. (Lesa Echunan capitulonan 6 y 7) Ora cu e tabata muriendo, e tabata haci oracion, y el a bisa: Señor Jesus ricibi mi spirito! Y pidiendo na Señor pa E pordona e pica di esunnan cu a mat’e, el a muri.

E palabra original cu a wordo traduci pa "muri" aki, realmente ta cu el a bai soño. Segun Scritura, e Resureccion no a tuma lugar ainda. Esunnan cu ta di Cristo, lo resucita ora cu E bolbe pa tuma Su Iglesia cu ta consisti di tur cu a muri den Cristo. Tempo cu Apostel Pablo tabata na bida ainda; tabatin algun profesante cu a desvia for di e berdad, y tabata siña cu e Resureccion a tuma lugar caba. Y sorto di siñansa asina ta trastorna fe di keredornan manera a socede e tempo caba. (Lesa 2 Timoteo 2:14-19) Na cua parti di mundo cu e por ta; un persona cu e repenti di su picanan, y a obedece e Evangelio; na ora di su morto cu e lo hala su ultimo rosea; e persona aki ta muri den Señor. Esey ke keen cu e ta na encargo di Señor. Sabiendo esaki cada uno di nos cu ta kere e Evangelio tin e siguridad di resureccion cual lo tuma lugar ora cu Cristo bolbe pa tuma nos cerca djE pa semper. (Lesa 1 Tes. 4:13-18)

Si encaso algun di boso cu ta lesa e mensahe corto aki, tin algun pregunta, sea asina bon pa scirbi nos na e direccion cu ta compaña e mensahe aki. Mientrastanto sea sigur cu nos ultimo rosea den e mundo aki, no ta nifica e final, pero solamente un periodo corto prome cu nos glorificacion uni ora cu nos Señor bolbe den Gloria.
Nos lo sigui cu e tema aki..... y un Felis Aña Nobo di parti di nos dos - Bicento & Betty Henriquz