Decision: Bai Keiru den naturalesa y su resultadonan

Decision

DECISIONNAN

Bon dia Amigo y Amiganan! Ata nos atrobe ta tuma contacto cu tur di boso dor di nos blogspot: www. bbhenriquez.blogspot.com

Dia 3 di Juni cu a pasa, nos a haci un DECISION. E decision ey a haci cu nos mester a haci varios otro decisionnan relaciona cu esun ey. Nos a dicidi cu nos kier sali y keiro den naturalesa!

Ma UNDA lo nos bai?
CUANTO dia lo nos keda?
KI GASTO lo tin?
E CLIMA lo coopera? Tur e preguntanan ey mester a wordo considera prome cu e decision cai!
Nos a dicidi di bai cerca un sobrino di Betty y su esposa, cu ta biba leu den parti nord di nos provencia – te casi fin di e caminda, mas leu ta blo mondi y lagonan. E ta un careda di cuatro ora cu auto.

E decision ey a resulta cu nos a pasa un par di dia masha agradabel mes. Nos a wak zwan ariba lagun, e parha cu yama Loon; nos a mira biná – varios di nan. Nos a sosega, nos a gosa naturalesa. Cu e decision ey nos a haya hopi otro bendicionnan. Por ehempel: un cabina masha moderno y bunita mes pa nos dos so, sin ni un sen di gasto; Un cabina situa enfrente di un e “lake”. Pa nos uso, nan a duna nos un vehiculo cu nan ta yama un “QUAD” – un tipo di auto cu bo por core den mondi cu ne, etc. Den e cabina tabatin un KEIKER, cu nos por sinta hala e bista mas cerca! Hopi bendicionnan – mas cu nos por menciona awor. Tabatin un BOTO ancra dilanti e cabina cu nos tabata liber pa usa si nos tabata kier. E fotonan ariba ta duna boso un idea di e decision y su resultadonan!

Ma tin UN DECISION cu cada uno di nos mester haci cu ta mucho mas importante cu di dicidi di bai keiro den naturalesa, y esey ta e DECISION cu lo dicidi nos futuro eterno. Bicento lo mustra nos for di e Scrituranan awor tocante e DECISION di mas grandi cu un ser humano por haci.

DECISION #1

Durante cada ser humano su bida, e tin hopi decisionnan pa haci relaciona cu scohemento. Normalmente e ta asina cu for di nos nacimento te na e edad di mas of menos diesdos aña, ta nos mayornan ta dicidi y ta scohe pa nos. Nan ta scohe nos alimento y loke nos ta bisti, y unda nos por bai of laga di bai, etc., etc. Ma ta yega e dia na unda cada uno di nos por dicidi kico nos lo scohe. Tin bes cu nos ta scohe robes, y nos ta realisa esey ora ya ta lat. Y e loke nos ta bisando aki, ta berdad pa cada ser humano di tur nacion.

Den Beibel nos ta lesa di un decision sumamente importante cu cada uno di nos mester haci. Nos ta lesa cu Moises, e sirbidor di Dios, a guia e puebel di Israël pa cuarenta aña den e desierto, despues di a libera nan for di sclabitud den Egipto. Anto Dios a revela n’e, cu su dia pa muri a yega. (Lesa Deuteronomo 31:1,2,14,15) Y siendo cu Moises a guia e puebel di Israël pa cuarenta aña, el a siña conoce nan personalmente. Anto el a haci e declaracion importante aki, na e puebel completo, bisando: “Ata, mi ta pone boso dilanto awe bida y prosperidad, morto y destruccion …. y e ta sigui, bisando: “Awe mi ta yama cielo y tera como testigo contra boso, cu mi a pone boso dilanti bida y morto, bendicion y maldicion. P’esey scoge bida, pa boso y boso yiunan por biba, y pa boso por stima e Señor boso Dios, y scucha na Su bos, y tene firme n’E. Pasobra, e Señor ta boso bida…..” (Deuteronomo 30:11-20)

Amigo y amiganan, e invitacion y e spiertamento solemne aki, aunke cu e ta scirbi mas cu tres mil añanan pasa, no tabata pa e Judiunan e tempo solamente, ma tambe pa e Judiunan y no Judiunan cu ta biba awe. Ta masha importante pa nos sabi cu e ultimo palabranan y accionnan di Moises pa cu e Judiunan, ta relata pa nos den Testament Nobo. (Lesa Romanonan nuebe, dies y diesun, y Deuteronomo capitulo 30 y 31).

Den e buki di Romanonan capitulo dies y versiculonan 1-5; e Apostel Pablo ta scirbi tocante con zeloso e Judiunan tabata pa cu Dios, pero cu nan zelo of entusiasmo, no ta basa ariba conocemento. Y siendo cu nan no conoce e husticia cu ta bini for di Dios, nan ta trata pa establece uno di nan mes, nan no ta somete na e husticia di Dios. Pasobra Cristo ta e fin di ley pa asina por tin husticia (of hustificacion) pa cada uno cu ta kere. Anto ta sigui cu un porcion unda cada uno di nos, sea Judiu of no Judiu, sea Arubiano of no Arubiano, y di cualke otro nacion ta inclui.

E ta bisa nos esaki: E palabra ta den BO boca y den BO curason, esey ta, e palabra di fe cu nos ta proclamando: Cu si BO confesa cu BO boca, Jesus ta e Señor, y kere den BO curason cu Dios a lant’E for di morto, BO lo ta salba. Pasobra e ta cu BO curason cu BO ta kere y ta hustifica, y e ta cu BO boca cu BO ta confesa y ta ser salba. Manera e Scritura ta bisa, cada uno cu ta confia den djE, nunca lo wordo poni na berguensa. Pasobra no tin diferencia entre Judiunan y Gentilnan – e mes Señor ta Señor di tur, y ta bendiciona ricamente tur cu yama n’E, pasobra cada uno cu yama na e nomber di e Señor lo ta salba.

Amigo y Amiganan, mediante e palabranan aki di Señor, nos ta pone boso dilanti awe bida y morto; bendicion y maldicion. Scoge e bida pa bo biba pa semper hunto cu Señor. Pero pa e decision tan importante aki, ta cada uno di nos mester dicidi. Aki ni nos mayornan y ningun otro persona por scohe pa nos. Ta cu nos propio boca nos mester yama na Señor Jesus; y ta cu nos propio curason nos mester kere.

Mi ta roga bo den nomber di Señor, pa bo scoge AWE MES Y SEA SALBA. Amen.
Scirbi y prepara pa Bicento y Betty Henriquez

DECISION -#2

Nos ultimo mensahe tabata tocante e importancia di nos decision personal pa ricibi Cristo como nos Salbador. E decision ey ta importante pasobra ta cada uno di nos individualmente mester haci nos decision. Ningun otro persona den e mundo aki por dicidi pa nos. Nos ta papiando di un decision importante, pasobra e tin di haci cu bida y morto. E tin di haci cu bo futuro eterno.

O cu e Señor nos Dios lo lumina nos mente awe pa nos realisa con teribel e ta di ta morto den pica y separa di e bida cu ta bini di Dios, causa pa pica. Y pa nos realisa tambe ki un bobedad e ta pa rechasa e bida eterno cu ta ofreci na nos di gracia, sin costo di nos banda - sino nos picanan. Mi a caba di menciona picanan, pasobra ta esey ta e causa di morto y sufrimento y tur malo cu ta existi den henter mundo. Y di e maldicion ey, esta di e loke nos ta yama PICA, ningun di nos a scapa.

Tuma bo Beibel y lesa pa bo mes cu desde e caida den pica dor di Adam, nos tur a peca , y no tin ni sikiera UN persona cu nunca a peca. E unico persona cu nunca a haci pica ta nos Señor JesuCristo. Kisas algun por bisa: Si, pero E ta otro, E no tabatin tentacionnan manera ami tin, etc., etc.

Pero wanta un rato amigo y amiganan. Scritura ta sigura nos cu Señor Jesus a wordo tenta den tur cos mescos cu nos, pero sin pica. Nos Señor a wordo tenta of sea poni na prueba, dor di Satan y dor di hende, pero E no a comete ningun pica. Pero loke si a pasa ta cu El a sufri ora cu E tabata wordo tenta. Y Scritura ta revela na nos cu tabatin momento cu nos Señor a sclama yorando na Dios Su Tata, pa E libr’E di e morto cu tabatin Su dilanti causa pa humanidad. E tata a duna nos Señor forsa y asta goso den tur Su sufrimento, ora cu El a considera e resultado di Su sacrificio pa picanan di henter mundo den Su curpa riba e crus. Lesa pa bo mes, of pidi un amigo of amiga lesa pa bo e siguiente Scrituranan cu ta bisa nos tocante di e berdadnan aki: (Hebreonan 12:1-6; Hebreonan 2:14-18 y Hebreonan 5:7-10, of lesa tur e cinco capitulonan aki di e buki di Hebreonan; y tambe 1 Pedro 2:1-25).

Pues, comprende bon amigo y amiganan, cu nos no ta proclamando nos propio gran ideanan, ma nos ta trece padilanti e berdadnan fundamental di Scritura cualnan tin consecuencianan pa awor mes den e bida aki, y tambe pa eternidad. Awor, tur e berdadnan aki tocante e tentacionnan cu Jesus a pasa aden sin cu El a peca, ta relaciona cu Su Mision pa cual El a bini na mundo. El a bin pa kita nos picanan, y ta p’esey El a wordo yama: “E Lamchi di Dios cu ta kita e pica di mundo.” (Juan 1:29). Esey a tuma lugar ora cu E tabata riba e crus, un bes y pa semper. P’esey ora cu Señor Jesus a muri ariba e crus, El a muri den lugar di nos tur. Y na di tres dia e Tata a lamt’E for di morto, y asina garantisa pordon di tur picanan y bida eterna na cada persona cu kere den Jesus. Despues di Su resureccion Señor a aparece na e Apostelnan y algun otro cu tabata hunto cu nan, y El a bisa nan lo siguiente: “Asina ta para scirbi, cu e Cristo meser a sufri y lanta for di morto riba e di tres dia, y cu repentimento pa pordon di picanan mester wordo proclama den Su nomber na tur e nacionnan cuminsando for di Jerusalem” (Lucas 24: 46,47). Y den e buki di Echunan 17:29-31, ta para scirbi lo siguiente: “P’esey siendo cu nos ta descendientenan di Dios, nos no mester pensa cu e ser dibino ta mescos cu oro of plata of piedra, un imagen forma dor di arte y imaginacion di hende. Den e tempo cu a pasa Dios a tolera sorto di ignorancianan asina, pero awor E ta comanda tur hende na tur parti pa repenti. Pasobra El a fiha un dia cu E lo huzga e mundo cu husticia pa medio di e homber cu El a apunta.” El a duna prueba di esaki na tur hende, dor di a lant’E for di morto. Segun Scritura, sin repentimento no tin pordon.

Pa nos ricibi pordon di nos picanan serca di Dios, nos mester admiti nos picanan Su dilanti.
Lesa 2 Pedro 3:9 y OBEDEC’E. Scirbi pa Bicento Henriquez di Aruba, biba na Canada.

NOS KIER RECORDA BO PA PASA NA Libreria Victoria, Elleboog 25, na Oranjestad, si bo ta biba na Aruba, pa cualke necesidad cu bo tin pa Beibel, tractado, buki, tarheta, regalo, etc. Y si bo ta biba na Bonaire, bo por pasa na Den Statie #2, na Antriol; y na Curacao, bo por pasa na Boekhandel Evangelika, St. Thomas #19.

Te otro ocasion!