Bon dia na tur nos lesadornan di nos "BLOG" - bo tabata sa ku tin mas cu 12 mil persona a subi nos blog pa wak kico tin for di Palabra di Dios? Nos ta spera cu tur cu ta "surf" ariba nos blog ta tuma tempu pa lesa e mensahe pa e dia ey! E foto awe tabata saka na Bonaire poco dia pasa ku nos a bishita e bunita isla aki! Esaki ta den e Parke Bolivia - na un lugar cu yama "lugar aleha" - I laga mi bisa, e ta aleha - aleha di tur kos - leu den mondi mes! (un poco mas di esaki den nos Blog proksimo).

Awe mi kier skirbi  algo di e:

Amor di Dios

Uno di e mensahenan di mas favorabel y admirabel den Scritura ta: E Amor di Dios  pa humanidad den su totalidad. Manera nos ta lesa den San Juan 3:16 “Pasobra Dios a stima mundo asina tanto cu El a duna Su unico Yiu, pa tur cu kere den djE, no bai perdi, ma haya bida eternu.”  Otro Scritura ta spierta nos cu e persona cu no ta stima, ta pasobra cu e no conoce Dios, pasobra Dios ta amor.  Y e prueba di esey ta, cu El a manda Su un y unico Yiu den e mundo pa nos por biba pa medio di djE. No ta asunto cu ta nos a stima Dios, ma cu ta E ta stima nos, y El a manda Su Yiu como un sacrificio di reconciliacion pa nos picanan.

Awor e pregunta aki por ser hasi: Ta kende ta e “nos” cu ta mencion ey? E contesta ta cla y enfatico den Scritura. E “nos” ey ta nifica nos tur.  Henter humanidad desde Adam te na e ultimo ser humano cu lo nace den e mundo aki.  Sea sigur cu Cristo a muri pa cada uno di nos ariba e crus. Y El a hasi esey boluntariamente ariba e base di amor di Dios.

Awor nos lo trece padilanti algo cu ta hopi importante pa cada persona cu ta kere e Evangelio di curason. Pasobra hopi  bes ta sosode cu un persona ta uni cu un Iglesia sin cu nunca el a comprende e importancia di repentimento y fe den Cristo. Y segun Scritura, sin repentimento no tin pordon.  Segun scritura berdadero repentimento ta bini via tendemento di e palabra di Dios. Y e ta Spirito Santo di Dios ta convence nos di pica y di huicio y di husticia. Anto e ta depende di cada persona, si e ta obedece, y e

 

obediencia aki ta nifica pa deposita of pone bo fe den Cristo. Pasobra ta esey ta e motibo pakico nos Señor a wordo mata ariba e crus na man di hende; pa nos por ricibi pordon di tur nos picanan, y bira erederonan di bida eterno. Y tur e bendicionnan aki ta basa ariba e poder y amor di Dios Kende ta semper fiel. Anto cada persona cu ta kere di henter su curason, ta ricibi e Spirito Santo como seyo y garantia, y tambe como yudador y guiador den nos bida diario.

Y aki ta bini e fuente di amor berdadero di cual nos ta purba presenta den e mensahe aki. Y nos ta repeti cu sin repentimento y fe den Cristo, esaki no ta posibel. Galationan 5:22 ta bisa nos lo siguiente: “Ma e fruta di e Spirito ta; amor, goso, pas, pasenshi, cariño, bondad, fieldad, mansedumbre, y control personal. Contra cosnan asina no tin ley. Esunnan cu ta pertenece na Cristo, a crucifica e naturalesa pecaminoso cu su pasionnan y deseonan.”

 Anto e spiertamento pa cada uno di nos cu ta kere di henter nos curason ta: cu siendo cu nos ta biba pa medio di e Spirito, laga nos keda den paso cu e Spirito. E spiertamento ta, pa nos no halsa nos mes, y asina proboca y cudisha un y otro. Si nos desobedece e spiertamento ey, nos ta trece fracaso  den nos bida como un yiu di Dios. Manera un otro scritura cu ta spierta cada uno di nos ta bisa: Boso no sabi cu boso mes ta tempel di Dios y cu Dios Su Spirito ta biba den boso? Si un hende destrui e tempel di Dios, Dios lo destrui e. Pasobra e tempel di Dios ta santo, y boso ta e tempel ey.”  Sea asina bon, pa lesa e Capitulo tres di prome Corintionan completo. Lesa y pensa y medita y gradici Señor nos Dios y Tata, pa Su pasenshi  cu E tin cu cada uno di nos, y pa Su misericordia. Pasobra E no ta lihe na castiga nos, pero si E ta lihe pa pordona nos, y pa restaura nos den communion cu nE, y tambe pa cu un y otro. Den Juan 13:34,35, Señor Jesus un poco dia prome cu Su morto ariba un crus, a bisa Su discipelnan lo siguiente: “Un mandamento nobo Mi ta duna boso, pa boso stima un y otro, mescos cu Ami a stima boso. Na esaki tur hende lo sabi cu boso ta Mi discipel, si boso tin amor un pa otro.” Scritura ta menciona tres birtud principal mientras cu nos ta bibando den e mundo aki, y nan ta fe, speransa y amor. Ma e di mas grandi of excelente di esakinan ta Amor.

Nos por puntra, ta den ki sentido amor ta mas excelente cu fe y cu speransa? Lesa den 1 Corintionan 13:1-13, pa e contesta Biblico. Di ningun manera esaki ta nifica cu fe y speransa no ta di vital importancia. Pasobra pa cuminsa sin fe ta imposibel pa hende agrada Dios. Y hustificacion y salbacion ta pa medio di fe. Y e speransa menciona -  aki ta e speransa di bida eterno cual Dios Kende no por gaña, a priminti adelanta.  Ma e motibo pakico AMOR ta mas excelente cu fe y speransa ta; cu amor ta excelente awor den e bida aki, y lo continua pa tur eternidad. Y esey ta pa semper y semper. Pero nunca lubida cu e amor  aki ta fruta di Spirito Santo pa cada pecador cu repenti y kere di curason den nos Señor y Salbador Jesus. Y laga nos sea segur, y masha sigur, cu no tin salbacion den ningun otro. Pasobra bou di cielo no tin otro nomber duna na hende, pa medio di cual nos mester wordo salba. E amor aki cual nos ta presenta aki, no ta posibel. Separa di fe personal den Cristo. Pasobra e ta fruta di Spirito Santo. Y un persona no por ricibi e Spirito Santo separa di fe personal den e Yiu di Dios, Kende a carga nos picanan den Su curpa ariba e crus. E amor cu e sistema di mundo ta papia di dje ta e stimacion egoista carnal  encurasha pa e dios di e sigo aki cu ta Satan.

 

Riba e foto aki tin e rumannan, Sr. Baloche Di Korsow (trahando na Santa Domingo) di Bonaire, Sr. Ton Paula y Sr. Martis, obreronan di Niky Boko cu mi conoce pa anjanan, Donny Paula, sacador di foto, tabata ey, y su esposa Lilian, mi amiganan , y Sr. Maria, pastor di Nort Salinja, Sr.Martis, un hoben Ferens Mercera! El a bisa mi cu e tabata den mi clasnan na Niki Boka -- hopi anja asina, y cu e tabata bon mucha asina!! Nan tabata den e restaurant ey y a tende ku nos ta bulando bek na Aruba, y nan a bin kombersa cu nos den e sala di despidida. Sr. Baloche tabata bisa Sr. Bicento di un mensahe cu el a predica na Barbara Korsow ku a toka su curason y cu nunca e lo lubida. KI UN REUNION!! Ki memorianan nos a intercambia den e rato ey.

Boso sa cu e "E baranca aki tin un historia?!" Bo por sa algo di dje? No? Ami tampoco! Ma tin gana di sa algo di su historia, si! Di con e tin net tres buraco banda di otro?!  Wel, un cos cu ami cu mi esposa ta gusta, ta pa camna den e mondinan aki, tras di Alto Vista, den loke tabata Lago antes, y examina e barancanan ront di nos isla!

 

Awe nos ta sigui cu nos tema "E CAIDA".....cu ta un continuacion di nos mensahe

biaha pasa.

Den nos prome mensahe di e tema aki, nos a menciona cu e prome hende cu Señor Dios a crea, a cai den pica door di a desobedece e Señor. E relato completo nos ta haya scirbi den Genesis,  Capitulonan uno te tres. Y for di e momento ey di e caimento den pica via desobediencia, pica a drenta nos mundo. Di manera cu te awe, cada ser humano ta nace cu e naturalesa pecaminoso for di barica di su kerida mama. Y siendo cu e pago di pica ta morto, ta nifica cu cada uno di nos lo muri fisicalmente sea tempran of lat.

Ademas pa motibo di e naturalesa di pica, nos ta morto spiritualmente pa cu Señor nos Dios. Y esey ta berdad y igual pa cada ser humano. Te asta si nos mayornan ta keredornan di e Evangelio, y asina ta den bon relacion cu nos Tata Celestial, y miembronan di e curpa di Cristo, y eredornan di e promesanan di Señor nos Dios, toch cada uno mester repenti y kere e Evangelio mescos cu nan, pa nos por ricibi pordon di picanan y bida eterno den Cristo nos Señor. E palabra “Evangelio”, ta nifica “Bon Noticia”, of “Bon Nobo.”

Y amigonan di tur edad; den henter e mundo aki, no ta existi un noticia mas precioso cu e bon noticia cu Señor nos Dios y Tata Celestial a duna nos un Salbador. Y e Salbador aki ta e unico Yiu di Dios Su mes. Den Juan Capitulo tres, nos tin un porcion na unda nos Señor mes ta duna e testimonio aki: “Pasobra Dios a stima mundu asina tanto cu El a duna Su unico Yiu, pa kende cu kere den djE, no perese (of bai perdi) ma tin bida eterno, Pasobra Dios no a manda Su Yiu den e mundo pa condena e mundo, ma pa salba e mundo pa medio di djE. Kende cu kere den djE, no ta condena, ma kende cu no kere ta condena caba pasobra e no a kere den e nomber di Dios Su unico Yiu. Esaki ta e condenacion: Lus a bini den mundo, pero hende ta stima scuridad na lugar di lus, pasobra nan echunan tabata malo. Tur, of cada uno cu ta haci malo ta odia e lus, y lo no bini den e lus, pa miedo cu su echunan lo wordo exponi. Ma esun, of kende cu ta biba pa medio di berdad, ta bini den e lus, pa asina por wordo manifesta cu su echunan a wordo hasi den Dios.” (Juan 3:6-21)

E porcion di Scritura ey cu nos a cuminsa cu ne den e mensahe corto aki, ta inclui cada uno di nos; di un of otro manera. Y particularmente pa motibo cu mayoria  di nos den e tres islanan aki,  particularmente tabata y ta te ainda ta considera nan mes como un Cristian pa motibo di tradicion religioso.

Realmente e titulo of nomber “Cristian”, no ta wordo menciona hopi bes den Scritura. Solamente tres bes esey ta menciona cu ta den: Echunan 11:26 (pa prome bes), anto den Echunan 26:28, y tambe den 1 Pedro 4:16. y e titulo of nomber ey ta nifica: Un cu ta sigui Cristo. Un siguidor di Cristo. Pa e motibo ey nos por bisa cu e nomber di Cristo a wordo mal usa den henter mundo, mediante religion. Pero nos por gradici Señor nos Dios, cu E no ta lihe pa condena, pero si lihe pa misericordia y berdad.

Segun Scritura no ta existi ningun hende cu ta husto di naturalesa, ni sikiera UN. No tin ni uno cu ta comprende, ni uno cu ta busca Dios. TUR a bira lomba y hunto a bira corompi. No tin ni uno cu ta hasi bon, ni sikiera UN, Nan garganta ta grafnan habri, nan lenganan ta practica engaño. E veneno di colebranan ta riba nan lip. Nan boca ta yen di maldicion y amargura. Nan pia ta lihe pa drama sanger; ruina y miseria ta marca nan caminanan, y e camina di pas nan no conoce. No tin temor di Dios dilanti nan wowonan.” (Lesa Romanonan 3:9-18)

Manera nos sabi, e nacion Judiu a ricibi bendicionnan grandi for di e Señor mediante Moses y otronan desde cu Señor a libra nan for di sclabitud na Egipto. Anto Señor a duna nan e dies mandamentonan y tambe otro leynan. Pero tur eseynan a tuma lugar di acuerdo cu e sabiduria y poder y tambe e pasenshi di Dios. Y e proposito di nos Tata Celestial ta, pa salbacion di tur hende, y no di Judiunan solamente. Di manera cu awe e salbacion grandi di Señor, no ta pa e Judiunan solamente, ma tambe pa tur otro nacionnan. E boluntad di Señor ta pa e Evangelio wordo proclama den henter mundo, tanto ta na Judiunan como tur otro rasa.

Den Romanonan Capitulo ocho, nos ta lesa lo siguiente: “P’esey cu awor no tin condenacion mas pa esunnan cu ta den Cristo Jesus, pasobra door di Cristo Jesus e ley di e Spiritu di bida a hasi mi liber for di e ley di pica y morto. Pasobra loke e ley no tabatin poder pa hasi, den cu e tabata debilita door di e naturalesa pecaminoso, Dios a hasi door di a manda Su mes Yiu den e apariencia di hende pecaminoso pa ta un ofrenda pa pica. Y asina El a condena pica den hende pecador; pa e husticia di ley por wordo cumpli den nos, cu no ta biba segun e naturalesa pecaminoso  ma segun e Spirito”. E ta bon pa lesa e Capitulo 8 di Romanonan completo.  Te un otro mensahe.