KIKO TA UN KRISTIAN

Bon dia Amigo/anan ku ta bishitá nos BLOGSPOT. Nos ta konfia ku awe, dia 27 di April, boso ta bon aya na Aruba, Bonaire i Kòrsow i tur esnan abla Papiamento ku ta biba na St. Martin, òf Hulanda, i rònt mundu.

Señor Bicento ta sigui awe ku e series di mensahenan kòrtiko ariba e tópiko
Un Kristian.

“Siendo ku e nòmber of titulo KRISTIAN solamente no ta un garantia ku e persona ei a wòrdu pordoná di su pikánan, i ku e tin bida eterno; ta kiko anto nos mester hasi pa nos sabi sigur ku nos pikánan ta pordoná i ku nos tin bida eterno.

Amigonan, ku tur konfiansa i gradisimento na e Señor nos Dios, nos por bisa ku e kontesta ta kla i sigur den e Skrituranan Santu ku nos ta yama Beibel, e Palabra di Dios. Despues di a wòrdu entregá den man di pekadornan, i ku El a wòrdu maltratá skandalósamente i matá riba un krus, i a wòrdu derá; Dios, e Tata a lanta Hesus for di morto. Anto pa un periodo di kuarenta dia, El a aparesé na e Apòstelnan, i a papia ku nan tokante e reino di Dios.

Ma na un okashon El a duna nan e mandamento aki: “No sali for di Herusalem, pero spera pa e promesa di e Tata cu boso a tende Mi papia di djE… boso lo wòrdu batisá ku e Spiritu Santu no muchu dia despues di e dia aki,” E promesa di e Tata di kual Hesus a papia di dje aki tabata e benida di e Spiritu Santu. I e Spiritu aki no por a bini promé ku Señor Hesus a wòrdu glorifiká. Tin varios Skritura ku ta splika esei. (Lesa Juan 7:37-39 i Juan 14:25,26 i Juan 16:1-16).

Despues di a instrui e Apòstelnan tokante e benida di e Spiritu Santu, Hesus a wòrdu tumá den shelu. I algun dia despues durante selebrashon di e fiesta di Pentekòstes, ku tabata un fiesta Hudiu, ku ta tuma lugá sinkuenta dia despues di e Pasku Hudiu. I a sosodé ku ora e Apòstelnan, huntu ku un grupo di disipelnan, inkluiendo e mama di Hesus, i e rumannan di Hesus, tabata reuni riba e dia ei di Pentekòstes; ku di ripiente e Spiritu Santu a bini riba nan. Lesa pa e evento históriko aki den Echunan 2:1-13.

E loke a sigui asina pronto ku e Spiritu Santu di Dios aki a bini tabata algu impusibel pa hende. Pa kuminsá e Spiritu a duna e disipelnan e outoridat pa proklamá e Evangelio di grasia di Dios, sin miedu di e lidernan religioso ku a entregá Hesus den man di e outoridatnan Romano pa El a wòrdu matá.

I na e dos lugá, e Spiritu Santu a duna e Apòstelnan e outoridat pa proklamá Hesus komo Señor i Mesías (òf Kristu). I nan tabata proklamá Su resurekshon ku tur outoridat i klaridat bisando: “I NO TIN SALBASHON DEN NINGUN OTRO; PASOBRA NO TIN BOU SHELU NINGUN OTRO NÒMBER KU A WORDU DUNA NA HENDE, PA MEDIO DI KUAL NOS MESTER WÒRDU SALBA.” Echunan 4:12

P’esei amigonan, un berdaderu Kristian ta un persona ku a pone su fe den e Hesus aki, kende a muri ariba un krus pa nos pikánan, i Kende Dios, e Tata a lanta for di morto, i door di Kende e Tata a manda e Spiritu Santu. (Echunan 2:32-36) I ta e Spiritu aki ta konvensé nos di nos pikánan i di huisio ku ta bini sigur, i ku Hesus ta Esun ku ta libra nos di e huisio ei, si nos repentí awe i konfia den dj’E for di nos kurason.
Skirbí pa Bicento Henriquez

Nos ta rekòrdá tur di boso tokante e lugánan na nos tres islanan unda boso por optené Beibelnan, otro bukinan ku por yuda bo, i traktadonan. Nan ta:

Aruba: Libreria Victoria, 25 Elleboogstraat, Oranjestad.
Bonaire: Den Statie #2, Antriol
Curaçao: Boekhandel Evangelika, St. Thomas #19

Bo a kòrda pa skirbi nos?

PRIMAVERA A YEGA !

Si, alafin, alafan Primavera a yega aki na Canada. E prome flor cu ta sali for di tera ta e CROCUS. E sabananan ta yen di nan – un bunita bista! E ta un siñal sigur cu dianan di calor ta nos dilanti. Tambe e famoso parhanan “Canadian Geese” ta yegando tur dia na trupanan grandi buscando nan propio lugar pa traha neishi, pone webu, cria nan yiu y prepara nan pa bolbe bula Zuid den seis luna!


Bonbini na nos Blogspot. Nos ta confia cu boso ta bon. Nos ta sigui awe cu e topico UN CRISTIAN. Tin hopi comentarionan den Noticia rond mundo tocante e palabra “Cristian”. Aki ta nos segundo articulo tocante loke Beibel ta bisa! Sinti liber pa “download” y “print” e articulonan pa comparti nan cu bo amigonan y famianan.


UN CRISTIAN - #2

Probablemente abo cu ta lesando esaki tin pensá den bo mes cu bo ta un Cristian. Conociendo Aruba, Curaçao y Bonaire; e gran mayoria di nos a yega di considera nos mes como un Cristian. Y si un hende puntra nos con nos a bira un Cristian, hopi lo contesta: Mi a nace den un cas Cristian, of; Mi a nace un Cristian, of mi a bira un Cristian ora mi mayornan a laga batisa mi.

PERO KICO BEIBEL MES TA SIÑA NOS TOCANTE E ASUNTO IMPORTANTE AKI?

Den e prome mensahe tocante e Nomber ey, nos a menciona tocante cu e nomber of titulo Cristian ta menciona solamente tres bes den Beibel. Y esunnan cu a wordo yama Cristian, a wordo yama asina pa motibo cu nan tabata kere den Cristo, y tabata sigui Su siñansa door di e Apostelnan. Ma prome cu esey nan a wordo yama: keredornan, discipelnan y e rumannan, y e santonan y tambe, E Iglesia. Awe despues di serca dos mil aña, ainda e mundu ta confundi y bruha tocante titulonan y nombernan.

Pero danki na Señor nos Dios, Kende a haci e posibel pa nos tin e Scrituranan Santo, mediante cual nos por wordo siñá, reprendi y corigi den e camina di Dios. Lesa 2 Timoteo 3:1-17.

E nomber Cristian NO ta un garantia pa drenta e Reino di Dios. Pero, fe personal den JesuCristo motiva pa repentimento di nos picanan, ta e garantia pa ricibi pordon y bida eterno. E increibel y inexplicabel bendicion aki ta ofreci na cada ser humano den henter mundo, pa gracia sin placa y sin preis. Pero, si, el a costa e preis di e sanger precioso di Cristo cu a wordo drama pa nos riba un crus. El a muri den nos lugar, pa E trece nos serca Dios. Ta p’esey cu nos ta lesa den Beibel lo siguiente: “Pasobra boso a wordo cumpra pa un preis: p’esey glorifica Dios den boso curpa.” Y atrobe, “Boso a wordo cumpra pa un preis: no bira catibo di hende.” 1 Cor. 6:20 y 1 Cor. 7:23. Y tambe den Efesionan 1:7 nos ta lesa, “ Den djE nos tin redencion pa medio di Su sanger, e pordon di nos picanan segun e rikesa di Su gracia, cu El a drama na abundancia riba nos.”

Amigonan, e sanger di Cristo ta inclui Su bida mes, y e manera cruel cu El a wordo sacrifica pa nos. Pero na di tres dia Dios, e Tata, pa medio di Su poder a lanta Cristo for di morto, y a dun’E e Nomber ariba tur nomber, tanto ta den cielo como ariba tera.

Un dia, Amigonan, tur rudia lo dobla pa e Jesus aki, pero e miho tempo pa haci esey ta awe y awor mes! No tarda mas, ma obedece awe.

Bo tin mester di un Beibel? Bo por haya cumpra na Libreria Victoria, Elleboogstraat 25, Oranjestad.

Cumindamento di Bicento y Betty, Jim y Lillian

Soboriando un Plato di Cuminda di Laman - stilo Italiano

UN KRISTIAN

E nòmber Kristian òf título Kristian ta pa indentifiká un persona ku ta un siguidó òf disípulo di Kristu. Den e Buki di Echunan 11:26, nos ta lesa lo siguiente: “I na Antiokia e disipelnan a wòrdu yamá Kristiannan pa promé bes.”

Despues di esei e nòmber òf título Kristian, ta wòrdu menshoná solamente dos bes mas. E Apòstel Pedro ta e úniku Apòstel ku ta menshoná e nòmber Kristian, i e ta menshon’e den e kontexto di sufrimentu. Asina aki nos ta lesa den 1 Pedro 4:12-19: “Amigunan stimá, no sea sorprendí pa e pruebanan doloroso ku boso ta pasando aden, net manera ta algu strañu ta pasando ku boso. Ma alegra boso ku boso ta participa den e sufrimentunan di Kristu, pa boso por salta di goso ora Su Gloria ta revelá. Si boso ta wòrdo insultá pa motibu di e nòmber di Kristu, boso ta bendishoná pasobra e Spiritu di Gloria, i di Dios ta deskansá riba boso. Si boso ta sufri, e no mester ta manera un matadó òf un ladron, òf kualke otro kriminal, òf asta manera un ku ta entremeté den asunto di otro. Pero, si boso ta sufri komo un Kristian, no tene berguensa, ma alaba Dios ku boso ta karga e nòmber ei. Pasobra e ta tempu pa huisio kuminsá ku e famia di Dios; i si e ta kuminsá ku nos; kiko e resultado final lo ta pa esnan ku no ta obedesé e Evangelio di Dios. Si e ta duru pa e hustu pa ta salbá; kon lo para ku e hende sin Dios i e pekadó? Asina anto esunnan, ku ta sufri di akuerdu ku Dios Su boluntat, mester kometé nan mes na nan fiel Kreador i kontinuá hasiendo bon.”
P’esei, Amigonan, un berdaderu Kristian, ta un persona ku a tende e Evangelio di Dios, i ku yudandsa di e Spiritu Santu di Dios, ta komprendé i ta obedesé.

Obediensia ta ora e pekadó ta repentí di su bida di piká, i ta kere di kurason den e Yiu di Dios, Kende a drama Su sanger riba un krus pa motibu di nos pikánan. No ta eksistí un berdaderu Kristian fuera di fe bibu den Hesus, e Yiu di Dios.

Boutismo di awa sin fe personal den Kristu ta pornada. Pa ta miembro di un religion òf di un Iglesia sin repentimentu y fe den Señor Hesus, ta un speransa falsu, den kual multitutnan ta bibando.

Pidi Dios awe pa E yuda bo pa repentí i pa kere e bon notisia di pordon i bida eterno ku ta solamente i únikamente pa fe den e Yiu di Dios.

Bo tin pregunta? Tuma un momento pa manda nos, via email, bo pregunta òf pensamentu ku bo tin. Laga nos interkambiá komunikashon! Kòrda bo por hasi kontakto ku nos na: bbhenriquez@shaw.ca Tambe, aki den un par di dia, nos lo bini ku e segundo parti di e tòpiko aki: Kiku un Kristian ta - segun e Skrituranan. I esei ta na: www. bbhenriquez.blògspot.com. Komparti ku bo famianan y amigu/anan di nos blògspot, i sinti liber pa pasa nos adrès na nan. Nos tin deseo di tende algo for di bo.

E DIA DI SALBACION

Bon dia ariba e di dos dia di April, 2007
Aki boso por mira Bicento limpiando e auto despues di nos ultimo caida pisa di sneew!

Basta aña pasa, e Buki yama: Bo Preguntanan Contesta, scirbi pa Bicento Henriquez, tabata obtenibel tempo cu e tabatin e programa, cu e mes un nomber, na Radio Victoria. Aunke nos lo a preferi di a revis’e prome, ma circunstancianan no a permiti. Pero, si bo tin gana pa haya e boeki ey den su forma original pa bo lesa e contestanan ariba preguntanan tocante Beibel y e bida cristian, bo por hay’e cumpra na Libreria Victoria.
Libreria

Victoriata localisa na: Elleboogstraat 25, Oranjestad.
E DIA DI SALBACION
Den Scritura nos ta lesa cu e tempo den cual nos ta bibando yama: “E Tempo Aceptabel, y e Dia di Salbacion.” (2 Cor. 6:1,2)

Net prome cu e declaracion aki, nos ta lesa ta pakico e tempo aki ta wordo yama asina. Pasobra den 2 Cor. 5:19-21, nos ta lesa cu Dios a reconcilia nos cu Su mes den Cristo, sin tuma nos picanan na cuenta, y cu Dios a haci Jesus, kende no tabata conoce pica, bira pica pa nos, pa nos por bira e husticia di Dios den djE.

Anto e Apostel Pablo ta bisa nos, cu e, como un sirbidor di Dios y di Señor Jesus, hunto cu e otro apostelnan, a wordo encarga cu e ministerio di reconciliacion. Esey ta pa laga henter mundo sabi cu Dios a proveë un manera pa nos, cu di naturalesa ta enemigonan di Dios pa motibo di nos picanan; awor por wordo reconcilia cu Dios mediante fe den Su Yiu, nos Señor y Salbador JesuCristo, Kende a carga nos picanan den Su curpa riba e crus, pa E reconcilia nos cu Dios. Y no esey so, pero e Apostel Pablo ta yama su mes un embahador di Cristo, y ta mescos cu ta Dios mes ta apela na nos, door di e Apostelnan, pa nos sea reconcilia cu nE.

Amigo y amiganan, ora cu bo ta lesando e mensahe aki, sea sigur cu ta mescos cu si Dios ta yama y roga na bo personalmente pa bo sea reconcilia cu nE mediante fe den Cristo. E ora bo por comprende e declaracion aki cu ta bisa: “P’esey, ken cu ta den Cristo ta un creacion nobo; e loke ta biew a pasa, y e nobo a bini.”

Ta p’esey mes cu e Apostel ta sigui bisando: “Como co-trahadornan cu Dios, nos ta urgi boso pa no ricibi e gracia di Dios enbano, pasobra E ta bisa, den e tempo aceptabel Mi a scucha bo, y riba e dia di salbacion Mi a yuda bo. Mira, awor ta e tempo aceptabel, mira, awor ta e dia di salbacion.” Y den un lugar ta para scirbi: “Pa e motibo aki nos mester paga mucho mas atencion na loke nos a tende pa nos no drief pasa bai. Pasobra si e mensahe papia door di angelnan a keda firme, y cada violacion y desobediencia a ricibi su castigo husto, con nos por scapa si nos ignora un salbacion tanto grandi asina?”

E Scrituranan pa e mensahe cortico aki ta: (2 Cor. 5:17-21; 2 Cor. 6:1,2 y Heb. 2:1-4) Lesa nan y pensa y obedece. Anto scirbi nos si bo tin pregunta of bo tin deseo pa mas splicacion. Pero corda, tardansa ta desobediencia.

Scirbi y prepara pa Bicento y Betty Henriquez